‘Lulang Lentsoeng la Ka’

“Haeba le lula lentsoeng la ka, ka sebele le barutuoa ba ka.”—JOHANNE 8:31.

 1. (a) Ha Jesu a khutlela leholimong, ke’ng seo a ileng a se siea moo lefatšeng? (b) Re tla hlahloba lipotso life?

HA Jesu Kreste, Mothehi oa Bokreste, a khutlela leholimong, ha aa ka a siea libuka tseo a li ngotseng, liemahale tseo a li hahileng kapa maruo ao a a bokeletseng. O ile a siea barutuoa ba hae ’me a ba a bolela lintho tse hlokahalang bakeng sa hore motho e be morutuoa. Ha e le hantle, Kosepeleng ea Johanne, Jesu o ile a bolela lintho tse tharo tsa bohlokoa tse hlokahalang tseo batho ba ratang ho ba balateli ba hae ba lokelang ho li etsa. Lintho tsee ke life? Re ka li etsa joang? ’Me motho a ka tiisa joang hore oa tšoaneleha ho ba morutuoa oa Kreste kajeno?a

 2. Joalokaha ho tlalehiloe Kosepeleng ea Johanne, ntho ea bohlokoa e hlokahalang hore motho e be morutuoa ke efe?

² Hoo e ka bang likhoeli tse tšeletseng pele ho lefu la hae, Jesu o ile a ea Jerusalema ’me a ruta matšoele a neng a bokane moo bakeng sa ho keteka Mokete oa Maphephe o neng o nka beke. Ka lebaka la sena, bohareng ba mokete oo, “ba bangata ho bongata ba beha tumelo ho eena.” Jesu o ile a tsoela pele ho ruta, hoo le ka letsatsi la ho qetela la mokete ona, “ba bangata [ba ileng] ba beha tumelo ho eena.” (Johanne 7:10, 14, 31, 37; 8:30) Joalokaha ho tlalehiloe ke moapostola Johanne, nakong ena Jesu o ile a bua le balumeli ba bacha ’me a bolela ntho ea bohlokoa e hlokahalang hore motho e be morutuoa, a re: “Haeba le lula lentsoeng la ka, ka sebele le barutuoa ba ka.”—Johanne 8:31.

 3. Ke tšoaneleho efe e hlokahalang hore motho a ‘lule lentsoeng la Jesu’?

³ Ka mantsoe ana Jesu o ne a sa bolele hore balumeli ba bacha ba haelloa ke tumelo. Ho e-na le hoo, o ne a bontša hore ba na le monyetla oa ho ba barutuoa ba hae ba ’nete—hafeela ba lula lentsoeng la hae ’me ba bontša mamello. Ba ne ba amohetse lentsoe la hae empa ho ne ho hlokahala hore ba lule ho lona. (Johanne 4:34; Baheberu 3:14) Ka sebele, Jesu o ne a nka hore mamello ke tšoaneleho ea bohlokoa bakeng sa balateli ba hae hoo puisanong ea ho qetela le baapostola ba hae e tlalehiloeng Kosepeleng ea Johanne, a ileng a phehella ka makhetlo a mabeli a re: ‘Tsoelang pele le ntatela.’ (Johanne 21:19, 22) Bakreste ba bangata ba pele ba ile ba etsa joalo. (2 Johanne 4) Ke’ng se ileng sa ba thusa ho mamella?

 4. Ke’ng se ileng sa nolofalletsa Bakreste ba pele ho mamella?

⁴ Moapostola Johanne, eo e neng e le morutuoa ea tšepahalang oa Kreste hoo e ka bang ka lilemo tse 70, o ile a bolela ntlha ea bohlokoa. O ile a babatsa Bakreste ba tšepahalang, a re ho bona: “Le matla ’me lentsoe la Molimo le lula ho lōna hape le hlōtse ea khopo.” Barutuoa bao ba Kreste ba ne ba mameletse kapa ba lutse lentsoeng la Molimo, hobane lentsoe la Molimo le ne le lutse ho bona. Ba ne ba le nka e le la bohlokoa haholo. (1 Johanne 2:14, 24) Hoa tšoana le kajeno, e le hore re ‘mamelle ho isa bofelong,’ ho hlokahala hore re tiise hore lentsoe la Molimo le lula ho rōna. (Matheu 24:13) See re ka se etsa joang? Papiso ea Jesu e fana ka karabo.

“Utloang Lentsoe”

 5. (a) Papisong e ’ngoe ea hae, Jesu o bua ka mefuta efe e sa tšoaneng ea mobu? (b) Papisong ea Jesu, ke’ng se tšoantšetsoang ke peō le mobu?

⁵ Jesu o ile a etsa papiso ea mojali ea jalang peō, ’me e tlalehiloe Kosepeleng ea Matheu, Mareka le Luka. (Matheu 13:1-9, 18-23; Mareka 4:1-9, 14-20; Luka 8:4-8, 11-15) Ha u ntse u bala litlaleho tsena, u tla hlokomela hore moko-taba papisong ena ke hore peō e tšoanang e oela mefuteng e sa tšoaneng ea mobu ’me e beha litholoana tse sa tšoaneng. Mobu oa pele o thata, oa bobeli ha oa teba ’me oa boraro o tletse meutloa. Mobu oa bone ho fapana le e meng e meraro, o “motle.” Ho latela tlhaloso ea Jesu, peō ke molaetsa oa ’Muso o ka Lentsoeng la Molimo, ’me mobu o tšoantšetsa batho ba lipelo li sa tšoaneng. Le hoja batho ba tšoantšetsoang ke mefuta e sa tšoaneng ea mobu ho e-na le moo ba tšoanang teng, ba tšoantšetsoang ke mobu o motle ba na le botho bo ba khethollang.

 6. (a) Mofuta oa bone oa mobu papisong ea Jesu o fapana joang le mefuta e meng e meraro, ’me seo se bolela’ng? (b) Ke’ng se hlokahalang bakeng sa ho bontša mamello joaloka barutuoa ba Kreste?

⁶ Tlaleho e ho Luka 8:12-15 e bontša hore liketsahalong tsena tse ’nè kaofela, batho ba ‘utloa lentsoe.’ Leha ho le joalo, ba nang le “pelo e ntle le e molemo” ha ba ‘utloe lentsoe’ feela. ‘Baa le boloka ’me ba beha litholoana ka mamello.’ Ka lebaka la hore mobu o motle o bonolo ’me o tebile, metso ea peō ea teba, ’me ka lebaka leo, peō ea mela ’me e behe litholoana. (Luka 8:8) Ka ho tšoanang, ba nang le lipelo tse ntle baa utloisisa, baa ananela ’me ba amohela lentsoe la Molimo. (Baroma 10:10; 2 Timothea 2:7) Lentsoe la Molimo le lula ho bona. Ka lebaka leo, ba beha litholoana ka mamello. Kahoo, ho hlokahala kananelo e tebileng le e tlohang pelong bakeng sa Lentsoe la Molimo hore re bontše mamello joaloka barutuoa ba Kreste. (1 Timothea 4:15) Leha ho le joalo, re ka etsa joang hore re be le kananelo e tlohang pelong bakeng sa Lentsoe la Molimo?

Pelo le ho Thuisa ho Tebileng

 7. Pelo e ntle e amahanngoa haufi le mosebetsi ofe?

⁷ Hlokomela hore na Bibele khafetsa e amahanya pelo e ntle le mosebetsi ofe. “Pelo ea ea lokileng ea thuisa e le hore e arabe.” (Liproverbia 15:28) “Lipolelo tsa molomo oa ka le ho thuisa ha pelo ea ka e ke e be tse khahlisang ka pel’a hao, Jehova.” (Pesaleme ea 19:14) “Pelo ea ka e tla thuisa ka lintho tsa kutloisiso.”—Pesaleme ea 49:3.

 8. (a) Ha re bala Bibele, ke’ng seo re lokelang ho se qoba, empa ke’ng seo re lokelang ho se etsa? (b) Re rua melemo efe ka ho thuisa ka thapelo ka Lentsoe la Molimo? (Akarelletsa lebokose le reng “Le Tsepame ’Neteng.”)

⁸ Joaloka bangoli bana ba Bibele, le rōna ho hlokahala hore re thuise ka kananelo le ka thapelo ka Lentsoe la Molimo le mesebetsi ea hae. Ha re bala Bibele kapa lingoliloeng tsa Bibele, ha rea lokela ho etsa joalokaha eka re bahahlauli ba potlakileng ba tlohang sebakeng se seng ho ea ho se seng, ba nka lifoto tsa ntho e ’ngoe le e ’ngoe empa ba se na nako ea ho thabela lintho tsena hantle. Ho e-na le hoo, ha re ithuta Bibele re lokela ho ipha nako ea ho ema ’me re thabele seo re se balang.b Ha re ntse re thuisa re khutsitse ka seo re se balang, lentsoe la Molimo le ama lipelo tsa rōna. Le ama maikutlo a rōna ’me le lokisa monahano oa rōna. Le boetse le re susumelletsa ho tsebisa Molimo mehopolo ea rōna e tebileng thapelong. Ka hona, kamano ea rōna le Jehova ea matlafala, ’me lerato la rōna ho Molimo le re tlama hore re tsoele pele re latela Jesu esita le tlas’a maemo a thata. (Matheu 10:22) Ho hlakile hore ho thuisa ka seo Molimo a se bolelang ke habohlokoa e le hore re lule re tšepahala ho isa bofelong.—Luka 21:19.

 9. Re ka tiisa joang hore lipelo tsa rōna li lula li amohela lentsoe la Molimo?

⁹ Papiso ea Jesu e boetse e bontša hore ho na le lintho tse sitisang peō, e leng lentsoe la Molimo, ho hōla. Ka hona, e le hore re lule re le barutuoa ba tšepahalang, re lokela (1) ho bona litšitiso tse tšoantšetsoang ke mobu o mobe o boletsoeng papisong le (2) ho nka mehato ea ho li lokisa kapa ho li qoba. Ka tsela eo, re tla tiisa hore lipelo tsa rōna li lula li amohela peō ea ’Muso ’me li lula li beha litholoana.

E “Haufi le Tsela”—Ke ba Tšoarehileng

10. Hlalosa mofuta oa pele oa mobu o papisong ea Jesu, ’me u hlalose hore na o bolela eng.

¹⁰ Mofuta oa pele oa mobu oo peō e oelang ho oona o “haufi le tsela” moo peō ‘e hatakeloang.’ (Luka 8:5) Mobu o haufi le tsela e tsamaeang masimong oa thatafala ka lebaka la batho ba tsamaeang ho oona. (Mareka 2:23) Ka ho tšoanang, ba lumellang hore lintho tsa lefatše li ba jelle nako le matla ho sa hlokahale, ba ka fumana hore ba tšoarehile haholo hoo ba sitoang ho ba le kananelo e tlohang pelong bakeng sa lentsoe la Molimo. Baa le utloa, empa ba hlōleha ho thuisa ka lona. Kahoo, lipelo tsa bona ha li le amohele. Pele ba e-ba le lerato la lona, “Diabolose oa tla ’me o tlosa lentsoe leo lipelong tsa bona e le hore ba se ke ba lumela ’me ba pholoha.” (Luka 8:12) Na see se ka thibeloa?

11. Re ka thibela lipelo tsa rōna ho tšoana le mobu o thata joang?

¹¹ Ho na le ho hongata ho ka etsoang ho thibela pelo hore e tšoane le mobu o sa beheng o haufi le tsela. Mobu o hatakeloang le o thata o ka nolofala ’me oa beha haeba o lengoa ’me ho sa tsamauoe ho oona. Ka ho tšoanang, ho ipha nako ea ho ithuta Lentsoe la Molimo le ho thuisa ka lona ho ka etsa hore pelo e tšoane le mobu o motle o behang. Senotlolo ke hore re se ke ra tšoareha haholo ka lintho tse tloaelehileng. (Luka 12:13-15) Ho e-na le hoo, tiisa hore u ipha nako ea ho thuisa ka “lintho tsa bohlokoa haholo.”—Bafilipi 1:9-11.

E “Lefikeng”—Ke ba Boi

12. Mofuteng oa bobeli oa mobu papisong ea Jesu, lebaka la sebele leo semela se senyenyane se ponang ka lona ke lefe?

¹² Ha peō e oela mofuteng oa bobeli oa mobu, ha e oele feela ka holimo, joaloka mobung oa pele. E hlahisa metso ’me ea mela. Empa ha letsatsi le chaba, semela se senyenyane se tlaboloa ke mocheso oa letsatsi ’me sea pona. Leha ho le joalo, hlokomela ntlha ena ea bohlokoa. Semela sena se senyenyane ha se pone ka lebaka la mocheso. Etsoe, semela se metseng mobung o motle le sona se chesoa ke letsatsi empa ha se pone—ha e le hantle, sea tlokoma. Phapang e bakoa ke’ng? Jesu o re semela sena se senyenyane se pona “ka lebaka la ho se be le botebo mobung” le “ho se be le mongobo.” (Matheu 13:5, 6; Luka 8:6) Ha ‘lefika’ le le ka tlas’a mobu hantle, le sitisa peō ho tebisa metso hore e fumane mongobo ’me e tiee. Semela se senyenyane se pona hobane mobu o sa teba.

13. Ke batho ba mofuta ofe ba tšoanang le mobu o sa tebang, ’me lebaka la sebele la tsela eo ba itšoarang ka eona ke lefe?

¹³ Karolo ena ea papiso e bua ka batho ‘ba amohelang lentsoe ka thabo’ ’me ba latela Jesu ka cheseho “ka nakoana.” (Luka 8:13) Ha ba chesoa ke lebatama la “matšoenyeho kapa mahloriso,” ba tšoha hoo ba lahleheloang ke thabo le matla ’me ba khaotsa ho latela Kreste. (Matheu 13:21) Leha ho le joalo, lebaka le tebileng la tšabo ea bona hase khanyetso. Etsoe, barutuoa ba Kreste ba limilione ba mamella mahloriso a sa tšoaneng empa ba lula ba tšepahala. (2 Bakorinthe 2:4; 7:5) Lebaka la sebele leo ba bang ba tšabang ka lona ebe baa oa, ke hore lipelo tsa bona tse kang lefika li ba thibela ho thuisa ka botebo ka lintho tse matlafatsang le tsa moea. Ka lebaka leo, kananelo eo ba bang le eona bakeng sa Jehova le lentsoe la hae ha ea teba ’me e fokola hoo e ke keng ea mamella khanyetso. Motho a ka thibela see joang?

14. Motho o lokela ho nka mehato efe ho thibela pelo ea hae hore e se ke ea tšoana le mobu o sa tebang?

¹⁴ Ho hlokahala hore motho a tiise hore litšitiso tse kang mafika tse tšoanang le ho koatela ruri, boikhabi bo sa bonahaleng kapa boikutlo bo bong bo joalo bo thatafatsang motho empa bo ipatile, ha lia lula pelong ea hae. Haeba tšitiso e joalo e se e le teng, matla a fanoang ke lentsoe la Molimo a ka e tlosa. (Jeremia 23:29; Baefese 4:22; Baheberu 4:12) Ka mor’a moo, ho thuisa ka thapelo ho tla susumelletsa hore ‘lentsoe le hlongoe’ ka botebo pelong ea motho. (Jakobo 1:21) Sena se tla fana ka matla a ho hlōla ho nyahama ’me se re fe sebete sa ho lula re tšepahala ho sa tsotellehe liteko.

E “Har’a Meutloa”—Ke ba Lipelo li Arohaneng

15. (a) Ke hobane’ng ha re lokela ho ela hloko mofuta oa boraro oa mobu o boletsoeng ke Jesu? (b) Qetellong ho etsahala’ng ka mofuta oa boraro oa mobu, hona e le ka lebaka lefe?

¹⁵ Mofuta oa boraro oa mobu, e leng o meutloa, re lokela ho o ela hloko ka ho khetheha hobane o tšoana le mobu o motle ka litsela tse itseng. Ho tšoana le mobu o motle, mobu o meutloa o etsa hore peō e be le metso ’me e mele. Qalong, ha ho na phapang khōlong ea semela se secha mefuteng ena e ’meli ea mobu. Leha ho le joalo, ha nako e ntse e feta, ho hlaha boemo bo bipetsang semela qetellong. Ho fapana le mobu o motle, mobu ona o tlala meutloa. Ha semela se senyenyane se mela mobung, se hlōlisana le ‘meutloa e ileng ea hōla le sona.’ Ka nakoana, limela tsena li tseka lijo, khanya le sebaka, empa qetellong meutloa e koahela semela ’me e se ‘bipetse.’—Luka 8:7.

16. (a) Ke batho bafe ba tšoantšetsoang ke mobu o meutloa? (b) Ho latela litlaleho tse tharo tsa Kosepele, ke’ng se tšoantšetsoang ke meutloa?—Bona mongolo o botlaaseng ba leqephe.

¹⁶ Ke batho ba mofuta ofe ba tšoantšetsoang ke mobu o meutloa? Jesu oa hlalosa, o re: “Ke ba utloileng, empa, ka ho nkoa ke matšoenyeho le maruo le menyaka ea bophelo bona, ba bipetsoa ka ho feletseng ’me ha ba tlise letho phethehong.” (Luka 8:14) Joalokaha peō ea mojali le meutloa li mela mobung ka nako e le ’ngoe, ka tsela e tšoanang, batho ba bang ba leka ho amohela lentsoe la Molimo le “menyaka ea bophelo bona” ka nako e le ’ngoe. ’Nete ea lentsoe la Molimo e jaloa lipelong tsa bona, empa e tlameha ho hlōlisana le lintho tse ling tseo ba li ratang. Pelo ea bona ea tšoantšetso e arohane. (Luka 9:57-62) Sena se ba thibela ho ipha nako e lekaneng ea ho thuisa ka thapelo le ka tsela e khotsofatsang ka lentsoe la Molimo. Ba sitoa ho amohela lentsoe la Molimo ka botlalo ’me kahoo ha ba na kananelo e tlohang pelong e hlokahalang bakeng sa ho mamella. Butle-butle, lithahasello tsa bona tsa moea li koaheloa ke ho phehella lintho tseo e seng tsa moea hoo ba ‘bipetsoang ka ho feletseng.’c Ba sa rateng Jehova ka pelo eohle ba ba le phello e soabisang hakaakang!—Matheu 6:24; 22:37.

17. Ho hlokahala hore re etse liqeto life e le hore re se ke ra bipetsoa ke meutloa ea tšoantšetso e boletsoeng papisong ea Jesu?

¹⁷ Ha re etelletsa pele litaba tsa moea, re qoba ho bipetsoa ke lintho tse bohloko le tse monate tsa lefatše lena. (Matheu 6:31-33; Luka 21:34-36) Ha rea lokela ho hlokomoloha ho bala Bibele le ho thuisa ka seo re se balang. Re tla fumana nako e eketsehileng ea ho thuisa ka botebo le ka thapelo haeba re nolofatsa bophelo ba rōna ka hohle kamoo ho ka etsahalang. (1 Timothea 6:6-8) Bahlanka ba Molimo ba entseng sena—bao ho ka thoeng ba fothotse meutloa mobung hore semela se behang litholoana se fumane lijo tse eketsehileng, leseli le sebaka—ba hlohonolofatsoa ke Jehova. Sandra ea lilemo li 26 o re: “Ha ke thuisa ka melemo eo ke e fumaneng ’neteng, ke hlokomela hore lefatše le ke ke la fana ka melemo e joalo!”—Pesaleme ea 84:11.

18. Ke joang re ka lulang lentsoeng la Molimo le ho mamella joaloka Bakreste?

¹⁸ Kahoo, ho hlakile hore rōna bohle, ba banyenyane le ba baholo, re tla lula lentsoeng la Molimo ’me re mamelle joaloka barutuoa ba Kreste hafeela lentsoe la Molimo le lutse ho rōna. Kahoo, a re tiiseng hore mobu oa lipelo tsa rōna tsa tšoantšetso ha o thatafale, ha e be o sa tebang kapa o tletseng meutloa, ho e-na le hoo o lula o le bonolo ’me o tebile. Ka tsela eo, re tla khona ho amohela lentsoe la Molimo ka botlalo le ho “beha litholoana ka mamello.”—Luka 8:15.

[Mongolo o botlaaseng ba leqephe]

U ka Araba Joang?

• Ke hobane’ng ha ho hlokahala hore re ‘lule lentsoeng la Jesu’?

• Ke joang re ka lumellang lentsoe la Molimo hore le lule lipelong tsa rōna?

• Ke batho ba mofuta ofe ba tšoantšetsoang ke mefuta e mene e sa tšoaneng ea mobu e boletsoeng ke Jesu?

• Ke joang u ka fumanang nako ea ho thuisa ka lentsoe la Molimo?

[Lebokose/Setšoantšo se leqepheng la 10]

“LE TSEPAME ’NETENG”

SELEMO le selemo, ba bangata bao e bileng barutuoa ba Kreste ka nako e telele, ba bontša hore ba “tsepame ’neteng.” (2 Petrose 1:12) Ke eng se ba thusang ho mamella? Nahana ka lintho tse ling tseo ba li bolelang.

“Qetellong ea letsatsi le leng le le leng ke bala karolo e itseng ea Bibele ebe kea rapela. Ka mor’a moo ke nahana ka seo ke se balileng.”—Jean, ea kolobelitsoeng ka 1939.

“Ho thuisa kamoo Jehova, motho ea phahameng hakana-kana, a re ratang ka botebo kateng, ho etsa hore ke ikutloe ke sireletsehile ’me ho mpha matla a ho lula ke tšepahala.”—Patricia, ea kolobelitsoeng ka 1946.

“Ka ho khomarela mekhoa e metle ea ho ithuta Bibele le ho ikakhela ka setotsoana ‘linthong tse tebileng tsa Molimo,’ ke ’nile ka tsoela pele tšebeletsong ea Jehova.”—1 Bakorinthe 2:10; Anna, ea kolobelitsoeng ka 1939.

“Ke bala Bibele le lingoliloeng tsa rōna tse thehiloeng Bibeleng ka morero oa ho hlahloba pelo ea ka le lipakane tsa ka.”—Zelda, ea kolobelitsoeng ka 1943.

“Nako e molemohali ho ’na ke ha ke otlolla maoto ’me ke bua le Jehova ka thapelo ke mo tsebisa hore na ke ikutloa joang.”—Ralph, ea kolobelitsoeng ka 1947.

“Ke qala letsatsi ka ho hlahloba temana ea letsatsi le ho bala karolo ea Bibele. Sena se etsa hore ho be le ntho e ncha eo ke thuisang ka eona letsatsing leo.”—Marie, ea kolobelitsoeng ka 1935.

“’Na ke khothatsoa ke lingoliloeng tse tšohlang buka ea Bibele temana ka temana.”—Daniel, ea kolobelitsoeng ka 1946.

U ipha nako ea ho thuisa ka thapelo ka lentsoe la Molimo neng?—Daniele 6:10b; Mareka 1:35; Liketso 10:9.

[Setšoantšo se leqepheng la 13]

Ka ho etelletsa pele litaba tsa moea, re ka “beha litholoana ka mamello”