Baholo—Tšoarang Mohlape oa Molimo ka Mosa!

“Re bile mosa har’a lōna, joale ka moanyesi ha a hlokomela bana ba hae ka lerato.”—1 BA-THESSALONIKA 2:7.

 1. Ke hobane’ng ha Paki e ’ngoe le e ’ngoe e tšepahalang ea Jehova e ka ikutloa e sireletsehile?

JEHOVA ke Molisa e Moholo. O fana ka mokhoa o khaphatsehang ho bahlanka ba hae ba seka linku ’me o ba tsamaisa “mehlaleng ea ho loka” ka baka la lebitso la hae le halalelang. Kahoo, ha ho hlokahale hore ba etsang thato ea hae ba tšohe letho le lebe ’me ba ka talima ho Molimo oa bona o nang le kutloelo-bohloko bakeng sa matšeliso. Ka sebele, Paki e ’ngoe le e ’ngoe e tšepahalang ea Jehova e na le lebaka le utloahalang la hore e ikutloe e sireletsehile tlhokomelong e lerato ea Molimo.—Pesaleme ea 23:1-4.

 2. Joaloka lehlaseli la khanya ea Molimo, Jesu o bontša litšobotsi life?

² Jesu Kreste ke “lehlaseli la khanya ea [Molimo], le setšoantšo sa boleng ba oona.” (Ba-Heberu 1:1-4) Kahoo Jesu, Molisa ea Molemo, le eena o bontša lerato le kutloelo-bohloko. (Johanne 10:14, 15) Ka mohlala, ka lekhetlo le leng o ile “a bona bongata bo boholo, ’me a ba utloela bohloko, hobane ba ne ba le joale ka linku tse se nang molisa; ’me a qala ho ba ruta taba tse ngata.”—Mareka 6:34.

 3. (a) Joaloka Jehova Molimo le Jesu Kreste, balisa ba tlaasana ba Bakreste ba lokela ho bontša litšobotsi life? (b) Ke keletso le temoso efe eo moapostola Pauluse a ileng a e fa balebeli?

³ Bakreste bohle ba lokela ho ‘etsisa Molimo ’me ba tsamaee leratong joale ka ha Kreste a ba ratile.’ (Ba-Efese 5:1, 2) Kahoo ba lokela ho ba le lerato le kutloelo-bohloko. Sena e lokela ho ba ’nete haholo-holo ho balisa ba tlaasana ba mohlape oa Molimo. Moapostola Pauluse o itse: “Itlhokomeleng, le hlokomele le mohlape oohle, oo Moea o Halalelang o le beileng balebeli ba oona, hore le alose kereke ea Molimo, eo a iphumanetseng eona ka mali a Mora oa hae. Kea tseba hore, ha ke se ke tlohile, liphiri tse sehlōhō li tla kena har’a lōna, ’me li ke ke tsa qenehela mohlape [“tšoara mohlape ka mosa,” NW]. Esita le ho lōna ka sebele ho tla hlaha banna ba tla sotha ’nete, ho khelosa barutuoa hore ba ba sale morao.”—Liketso 20:28-30, TLP.

 4. (a) Ka mor’a nako, ho ile ha etsahala eng tumellanong le temoso ea Pauluse ho Liketso 20:29, 30 (TLP)? (b) Ke lipotso life joale tseo ho lokelang ho nahanisisoa ka tsona?

⁴ Ka mor’a nako, “liphiri tse sehlōhō” tsa bakoenehi li ile tsa hlaha ’me ha lia ka tsa “tšoara mohlape ka mosa.” Empa re thaba hakaakang hore e be baholo ba har’a Lipaki tsa Jehova ha ba sebelise bompoli bo joalo! Empa, balumeli ’moho ba ka lebella ho fumana tšoaro ea mofuta ofe ho balebeli baa ba khethiloeng ke moea? ’Me bakhethoa ba joalo ba ka bontša kameho e mosa joang ho linku tsa Jehova?

Ba se ke ba Busa Mohlape ka Thata

 5. (a) Hangata baeta-pele ba lefatše ba tšoara bafo ba bona joang? (b) Jesu o bontšitse joang hore ha ho sebaka sa bompoli har’a balateli ba hae?

⁵ Ka nepo re ka lebella hore baholo ba Bakreste ba re tšoare ka tsela e nang le kutloelo-bohloko. Ha ba tšoane le babusi ba lefatše, bao hangata ba busang bafo ba bona ka thata. Ka mohlala, ho tlalehoa hore morena Charlemagne oa Lefrank (ea busitseng ho tloha ka 768 ho ea ho 814 C.E.) “o ile a qobella Masaxon, tlas’a kotlo ea lefu, ho amohela kolobetso, a ahlola ka likotlo tse boima ka ho fetisisa ba tlōlang Molao oa ho Itima Lijo, ’me kae kapa kae a kenya likhoka sebakeng sa khothalletso.” (The History of the Christian Church, ea William Jones) Bompoli ha bo na sebaka har’a balateli ba Jesu, hobane o itse: “Lea tseba hore babusi ba bahedene ba ba busa ka thata, ’me banna ba bona ba baholo ba iketsa bo-’mampoli holim’a bona. Ha hoa lokela ho ba joalo har’a lōna, empa mang kapa mang ea batlang ho ba moholo har’a lōna e tlameha ho ba mohlanka oa lōna, ’me mang kapa mang ea batlang ho ba sebakeng sa pele har’a lōna e tlameha ho ba mohlanka oa lōna, feela joalokaha Mor’a Motho a sa tlela ho sebeletsoa, empa ho sebeletsa batho ba bang, le ho fana ka bophelo ba hae ho lopolla ba bang ba bangata.”—Mattheu 20:25-28, An American Translation.

 6. (a) Mabapi le baholo, ke linnete life tsa motheo tse totobalang? (b) Phutheho e na le lebaka la ho lebella eng ho baholo, ’me banna baa ba lokela ho italima joang?

⁶ Monna oa Mokreste ea ‘hahamallang tšebeletso ea molebeli o lakatsa mosebetsi o motle.’ (1 Timothea 3:1, NW) Ha re nahanisisa ka sena le keletso ea Jesu e sa tsoa qotsoa, linnete tsena tsa motheo lia totobala: (1) Baholo ba Bakreste ba tlameha hore ba se iketse bo-’mampoli holim’a ba bang; (2) ba jereng boikarabelo har’a balateli ba Jesu e tlameha ho ba bahlanka ba bona, eseng benghali ba bona; ’me (3) banna ba hahamallang tšebeletso ea molebeli ba lokela ho e talima e le “mosebetsi o motle,” eseng boemo bo phahameng. (Liproverbia 25:27; 1 Ba-Korinthe 1:31) Lentsoe “moholo” ha le phahamisetse monna leha e le ofe ka holim’a barapeli ba bang ba Jehova. Ho e-na le hoo, phutheho e na le lebaka la ho lebella hore baholo bohle e be banna ba hōlileng moeeng, ba nang le phihlelo, le ba ikokobelitseng ba etellang pele tšebeletsong e halalelang. Ka sebele, baholo ba lokela ho italima e le bahlanka ba ikokobelitseng ba Jehova Molimo, Jesu Kreste, le Bakreste ’moho.—Ba-Roma 12:11; Ba-Galata 5:13; Ba-Kolosse 3:24.

 7. (a) Baholo ba lokela ho sebelisa 2 Ba-Korinthe 1:24 (NW) joang ha ba sebelisana le ba bang? (b) Baholo ba lokela ho etsa eng ka litaelo tseo ba li amohelang ho tsoa ho Sehlopha se Busang?

⁷ Ho iketsa mohlanka ea ikokobetsang oa ba bang ka tlhaho ho thibela moholo ho leka ho ba ‘busa ka thata.’ ’Me ho hotle hakaakang hore e be balebeli ba rōna ba bontša boikutlo bo tšoanang le ba Pauluse! O ile a bolella Bakreste ba Korinthe: ‘Ha re marena holim’a tumelo ea lōna, empa re basebetsi ’moho bakeng sa thabo ea lōna.’ (2 Ba-Korinthe 1:24, NW) Tumellanong le hoo, ba sebelisang bolebeli bo lerato ha ba imetse balumeli ’moho ka lithibelo tsa botho tse sa hlokahaleng. Ho e-na le hoo, balebeli ba har’a Lipaki tsa Jehova ba tsamaisoa ke melao-motheo ea Mangolo ’me ba fana ka tšebeletso e mosa, e thusang. Hape ba bontša kameho e tebileng bakeng sa mohlape oa Molimo ka hore ka potlako ba sebelise litaelo tse amohetsoeng ho tsoa ho Sehlopha se Busang sa Lipaki tsa Jehova.—Liketso, khaolo 15.

 8. Pauluse o ne a e-na le boikutlo bofe ka balumeli ’moho, ’me see se lokela ho ama baholo ba lekholong lee la bo20 la lilemo joang?

⁸ Kahobane Pauluse o ne a e-na le kameho e mosa bakeng sa mohlape oa Molimo, o ne a ka bolella Bakreste ba Thessalonika: “Re bile mosa har’a lōna, joale ka moanyesi ha a hlokomela bana ba hae ka lerato. Ka mokhoa o joalo, ka baka la ho le rata, re elelitse hore re tla le nea e seng Evangeli ea Molimo feela, empa le eona meea ea rōna, kahobane le le baratuoa ba rōna ruri.” (1 Ba-Thessalonika 2:7, 8) Pauluse o ile a itšoara joaloka ’mè ea anyesang, ea ratang bana ba hae ka tsela e tebileng hoo a etelletsang lithahasello tsa bona ka pele ho tsa hae ea bileng a nang le kameho e mosa ka bona. See se lokela ho susumetsa baholo ba lekholong la bo20 la lilemo hore ba tšoare mohlape oa Molimo ka mosa hakaakang!

Mehloli ea Topollo le Khatholoho

 9. Ke maemo afe a batho ba Jehova ba mehleng ea kajeno a boletsoeng esale pele ho Esaia 32:1, 2?

⁹ Ha a supa mehleng ena ea ’Muso oa Jesu Kreste, moprofeta Esaia o ile a bolela esale pele hore morena o ne a tla “busa ka ho lōka” ’me “mahosana” a ne a tla busa ‘ka toka.’ Kahoo, baholo ba ka hare ho mokhatlo o hlophisitsoeng oa puso ea Molimo oa mehleng ea kajeno ba sebetsana le lithahasello tsa ’Muso oa leholimo o hlomiloeng—tšebeletso ea bohosana ka sebele! Mantsoe a boprofeta a eketsehileng a Esaia a sebetsa ho banna bana ba nang le boikarabelo: “E mong le e mong oa bona o tla ba joale ka tšireletso ha moea o foka, joale ka lehaha ha sefefo se e-tla, joale ka molatsoana oa metsi naheng e omileng, le joale ka moriti oa lefika le phahameng naheng e nyoriloeng.”—Esaia 32:1, 2.

10. Moholo ka mong har’a Lipaki tsa Jehova e lokela ho ba mohloli oa eng?

¹⁰ Ho fapana le baeta-pele ba bolumeli ba hatellang ba Bokreste-’mōtoana, baholo ba har’a Lipaki tsa Jehova ke mehloli ea topollo le khatholoho. Joaloka lihlopha tsa banna ba hōlileng, ba phahamisa khotso, khutso, le tšireletseho har’a batho ba Jehova. E le batho ka bomong, moholo ka mong a ka tlatsetsa boemong bona bo botle ka ho tšoara mohlape oa Molimo ka mosa.

Ka Toka le ka ho Loka

11. (a) Ke boemo bofe bo akaretsang bo neng bo le teng har’a Bakreste ba lekholong la pele la lilemo bo atileng liphuthehong tse ngata tsa Lipaki tsa Jehova kajeno? (b) Balebeli ba na le boikarabelo bofe ho phutheho, hona hobane’ng?

¹¹ Le hoja mathata a ile a hlaha liphuthehong tse ling tsa Bokreste tsa lekholong la pele la lilemo, boemo ba tsona bo akaretsang e ne e le ba khotso, bonngoe, le thabo. (1 Ba-Korinthe 1:10-12; 3:5-9; Ba-Efese 1:2; Jakobo 2:1-9; 3:2-12; 4:11, 12; 1 Johanne 1:3, 4) Boemo bo botle ba moea bo teng hape liphuthehong tse ngata tsa Lipaki tsa Jehova kajeno ka baka la tlhohonolofatso ea Molimo, ketello-pele ea Kreste, le mosebetsi o tšepahalang oa balebeli ba khethiloeng. Ho tiisa hore ho ba le khotso, bonngoe, le thabo ka phuthehong, banna bana ba batla thuso ea Molimo ’me ba loana ka matla ho boloka mokhatlo o hlophisitsoeng oa Molimo o hloekile, boitšoarong le moeeng. (Esaia 52:11) Le ka mohla mokhatlo o hlophisitsoeng o litšila o ne o ke ke oa ba le khotso ’me oa thaba, ’me ka sebele o ne o ke ke oa fumana kamohelo le tlhohonolofatso ea Molimo. ‘Mahlo a oona a hloekile haholo hore a ka bona se sebe,’ ho mamella phoso. (Habakuke 1:13, NW) Ka hona, har’a lintho tse ling, baholo ba lebelletsoe ho hlokomela litaba tsa boahloli ka mokhoa o lokileng, oa Mangolo. Empa lintlha tse ling tse lokelang ho hopoloa ha ho sebetsanoa le litaba tse joalo ke life?

12. Le hoja ho sa hlokahale hore baholo ba nyakurele ka har’a litaba tsa botho tse sa hanyetsaneng le melao kapa melao-motheo ea Bibele, ke eng se lokelang ho etsuoa ka lebaka la Ba-Galata 6:1?

¹² Ntho e ’ngoe, litabeng tse amang likhohlano tsa botho, batho ba ka ’na ba khona ho rarolla litaba ka lekunutu. (Mattheu 18:15-17) Kaha baholo hase ‘bahatelli ba tumelo ea rōna,’ ha baa lebelloa ho nyakurela ka hare ho litaba tsa botho feela tse sa akarelletseng ho tlōloa ho tebileng ha melao kapa melao-motheo ea Bibele. Joalokaha ho ka lebelloa, haeba ho e-na le bopaki ba hore motho o nkile “mohato o mong o fosahetseng pele a o hlokomela,” ba nang le litšoaneleho tsa moea ba lokela ho “leka ho busetsa motho ea joalo tseleng ka moea o bonolo.”—Ba-Galata 6:1, NW.

13. Mangolo a bontša joang hore baholo ba lokela ho nka khato feela ka bopaki ba phoso, eseng taba ea bo-bare?

¹³ Baholo ba lokela ho sebeletsa ‘toka,’ ka mehla ba hloke leeme. Kahoo ba lokela ho nka khato ka bopaki ba phoso, eseng feela taba ea bo-bare. Pauluse o elelitse: “Se amohele qōso e qōsang moholo, haese ka bopaki ba batho ba babeli kapa ba bararo.” (1 Timothea 5:19, TLP) Ho latela tekanyetso ea Jehova, Iseraeleng ea boholo-holo motho ea neng a qosoa ka sebe se tebileng o ne a lokela ho bolaoa ‘ka melomo ea lipaki tse peli kapa tse tharo, eseng e le ’ngoe.’ Ho feta moo, ho bonahala eka moqosuoa o ne a e-na le monyetla oa ho talimana le ba mo qosang, ’me haeba bopaki bo lekane, ‘matsoho a lipaki e ne e lokela ho ba ’ona a beoang pele holim’a hae ho ’molaea.’—Deuteronoma 17:6, 7.

14. (a) Ka phoso Diotrefe o ne a leka ho etsa joang? (b) Molimo o lebelletse eng ho baholo ha ba sebetsana le litaba tsa boahloli?

¹⁴ Ho tlameha ho be le motheo o utloahalang oa Mangolo bakeng sa khato ea boahloli. Re thaba hakaakang hore e be balebeli ba phutheho ha ba tšoane le Diotrefe ea ikhohomosang oa lekholong la pele la lilemo C.E.! Ka phoso o ne a leka ho “ntšetsa ka ntle ho phutheho” ba lakatsang ho amohela ka mofuthu baena ba tsamaeang. Moapostola Johanne ha aa ka a talima sena le liketso tse ling tse fosahetseng habobebe empa o ile a lemosa: “Haeba ke e-tla, ke tla hopola mesebetsi ea hae.” (3 Johanne 9, 10, NW) Ka hona, komiti ea boahloli ea mehleng ea kajeno e tlameha ho kholiseha hore ho na le motheo oa Bibele bakeng sa khato leha e le efe ea ho khaola eo e e nkang.a Ho totobetse hore Molimo o lebelletse baholo ba Bakreste hore ba be le toka ha ba sebelisana le ba bang. Ka sebele, ba tsamaisang litaba tsa mokhatlo o hlophisitsoeng oa lefatšeng oa Jehova e tlameha ho ba “banna ba nang le boikarabelo, ba tšabang Molimo, banna ba ka tšeptjoang.”—Exoda 18:21, NW.

15. Thapelo e lokela ho phetha karolo efe linyeoeng tsa boahloli?

¹⁵ Komiti e ’ngoe le e ’ngoe ea boahloli ea Bokreste e lokela ho batla thuso ea Jehova ka thapelo e tlohang botebong ba pelo. Seboka se tšoaroang le moena kapa khaitseli ea qosoang ka phoso e tebileng se lokela ho buloa ka thapelo. Ha e le hantle, e ne e tla ba ho loketseng ho rapela neng kapa neng nakong ea puisano haeba ho phahama tlhokahalo e khethehileng ea thuso ea Molimo.—Jakobo 5:13-18.

16. Baholo ba lokela ho tsamaisa linyeoe tsa boahloli ka mokhoa ofe, hona hobane’ng?

¹⁶ Baholo baa tseba hore molumeli ’moho ea qosoang ka ho etsa phoso ke “nku” ea mohlape oa Molimo ’me o lokela ho tšoaroa ka mosa. (Bapisa le Ezekiele 34:7-14.) Linku tsa sebele li hloka tlhokomelo e mosa, hobane ke libopuoa tse boi tse itšetlehileng ka molisa oa tsona bakeng sa tšireletso. Kahoo, ho thoe’ng ka linku tsa tšoantšetso tse ka phuthehong ea sebaka ka seng? Ha ho pelaelo hore li ikutloa li sireletsehile tlhokomelong ea Molisa e Moholo, Jehova Molimo, le Molisa ea Molemo, Jesu Kreste. Empa balisa ba tlaasana ba mohlape ba tlameha ho itšoara ka litsela tse tlatsetsang khotsong ea ka hare le boikutlong ba tšireletseho ba bahlanka ba Jehova ba seka linku. Ka hona, haeba u molisa ea tlaasana oa Mokreste, na baena le bo-khaitseli ba hao ba ikutloa ba sireletsehile ’me ba e-na le khutso tlhokomelong ea hao? Ke ’nete hore baholo ba tlameha ho phahamisa melao le melao-motheo ea Bibele ka tieo. Empa ho latela Mangolo ho hlokahala hore ba sebetsane le linku ka tsela e lerato le ho tsamaisa linyeoe tsa boahloli ka mokhoa o khutsitseng, o laolehileng, o mosa, le o nahanelang.

17. Ke lintlha life tsa Mangolo tseo baholo ba lokelang ho li hopola, haholo-holo nakong ea linyeoe tsa boahloli?

¹⁷ Kaha ha rea phethahala, “bohle re khopjoa nthong tse ngata” ho seo re se buang. (Jakobo 3:2) E mong le e mong oa rōna o hloka mohau oa Molimo le “sehlabelo sa poelano” sa Kreste. (1 Johanne 1:8–2:2, NW; Pesaleme ea 130:3) Kahoo molisa ea tlaasana oa Mokreste o tšoanela ho italima ka boikokobetso. Hape o lokela ho hopola mantsoe a Jesu: “Joale ka ha le rata ho etsoa ke batho, ba etseng joalo le lōna.” (Luka 6:31) Keletso ena e lokela ho sebelisoa haholo-holo nakong ea linyeoe tsa boahloli. Banna ba tšoanelehang moeeng ba lokela ho leka ho busetsa Mokreste ea fosang tseleng ‘ka moea o mosa; ba iponele, e se re ba lekoa le bona.’—Ba-Galata 6:1; 1 Ba-Korinthe 10:12.

18. (a) Phello e ne e ka ’na ea e-ba efe haeba baholo ba ne ba ka khahlapetsa ba bang nakong ea linyeoe tsa boahloli? (b) Ka baka la Mareka 9:42, baholo le Bakreste ba bang ba lokela ho itebela khahlanong le ho etsa eng?

¹⁸ Haeba baholo ba ne ba ka khahlapetsa ba bang nakong ea linyeoe tsa boahloli, sena se ne se ka ’na sa ipaka se le kotsi ho batho ba joalo. Empa esita le haeba kotsi ea maikutlo kapa ea ’mele e sa ka ea hlaha, ho ne ho ka ’na ha e-ba le kotsi e tebileng moeeng, ’me litšoaneleho tsa balebeli le tsona li ne li ka belaelloa. (Bapisa Jakobo 2:13.) Kahoo, nakong ea linyeoe tsa boahloli le ka linako tse ling kaofela, baholo ba lokela ho ba mosa ’me ba tlameha ho itebela khahlanong le ho khopisa ba bang. Ho totobetse hore ho hlokahala hore Bakreste bohle ba be seli ntlheng ena, hobane Jesu o itse: “Ha e le ea khopisang e mong oa ba banyenyane bana ba lumetseng ho ’na, ho ka bang molemo ho eena ke ho tlamelloa leloala le leholo molaleng, a lahleloe leoatleng.” (Mareka 9:42) Tšiloana e ne e ka ’na ea e-ba khōlō hoo ka tloaelo ho neng ho hlokahala matla a phoofolo ho e pitikisa, ’me ha ho mang kapa mang ea lahletsoeng leoatleng ka boima bo bokaalo molaleng oa hae ea neng a ka pholoha. Ka hona, ruri moholo o lokela ho ba seli hore a se hlahise khopiso e ka fellang ka ho intša kotsi e sa feleng moeeng kapa ho ntša motho leha e le ofe ea khopisitsoeng kotsi.—Ba-Filippi 1:9-11.

Tsoelang Pele ho Bontša Kameho e Mosa

19. Petrose o ile a fa baholo ’moho le eena keletso efe, ’me ho arabela ka nepo ho eona ho ama litebello tsa bona joang?

¹⁹ Moapostola Petrose o bontšitse hore na balebeli ’moho le eena ba ne ba lokela ho alosa mohlape joang ha a ngola: “Alosang mohlape oa Molimo o ho lōna, le o lebele, e seng ka ho qophelloa, e mpe [e] be ka ho rata; e seng ka baka la moruo o mobe, e mpe e be ka ho rata; e seng ka ho busa mehlape ea lōna ka thata, e mpe e be ka ho etsetsa mohlape mehlala. ’Me mohla molisa e moholo a hlahang, le tla nka moqhaka oa khanya, o sa boleng.” (1 Petrose 5:2-4) Ke feela ka ho sebelisa keletso e joalo le ka ho bontša kameho e mosa bakeng sa mohlape oa Molimo balebeli ba tlotsitsoeng ba ka fumanang moputso oa bona oa leholimo e le libopuoa tsa moea tse sa shoeng le baholo ba nang le tšepo ea lefatšeng ba ka amohelang bophelo bo sa feleng Paradeiseng e tlang ea lefatše lohle.

20. (a) Balisa ba tlaasana ba Bakreste ba tlameha ho sebetsana le balumeli ’moho le bona joang? (b) U ikutloa joang ka tšebeletso e behang mohlala le kameho e mosa ea baholo ba lerato?

²⁰ Jehova Molimo hammoho le Jesu Kreste ke Balisa ba lerato, ba nang le kutloelo-bohloko. Kahoo le hoja balisa ba tlaasana ba Bakreste ba phahamisa ka tieo litekanyetso tsa Molimo, ba tlameha ho bontša lerato le kutloelo-bohloko ha ba sebelisana le balumeli ’moho le bona ba seka linku. Ruri Lipaki tsa Jehova kaofela tse tšepahalang li ananela ka ho tebileng tšebeletso e behang mohlala ea baholo ba joalo ba iketsang sehlabelo ba lebelang letlotlo la bona ’me ba tšoara mohlape oa Molimo ka mosa. Kananelo eo, hammoho le tlhompho e loketseng, e ka bontšoa ka ho utloa ba etelletseng pele har’a rōna.

[Mongolo o botlaaseng ba leqephe]

Khopolo ea Hao ke Efe?

◻ Jesu Kreste o ile a bontša joang hore ha ho sebaka sa bompoli har’a balateli ba hae?

◻ Baholo ba lokela ho etsa eng ha ho amoheloa litaelo tse tsoang ho Sehlopha se Busang?

◻ Ho latela Esaia 32:1, 2, baholo e lokela ho ba mehloli ea eng?

◻ Mangolo a bontša joang hore baholo ha baa lokela ho nka khato ka taba feela ea bo-bare?

◻ Balisa ba tlaasana ba Bakreste ba lokela ho tšoara mohlape joang?

[Setšoantšo se leqepheng la 18]

Thapelo e tlohang botebong ba pelo ea hlokahala ha komiti ea boahloli e tšoara seboka le molumeli ’moho