Jesu Bophelo le Tšebeletso Tsa Hae

Setšoantšo sa Mokete oa Lenyalo

KA LITŠOANTŠO tse peli, Jesu o pepesitse bangoli le baprista ba baholo, ’me ba batla ho ’molaea. Empa Jesu o sa le hōle le ho qeta ka bona. O tsoela pele ho ba bolella setšoantšo se seng hape, a re:

“’Muso oa maholimo o tšoana le morena ea neng a etsetse mora oa hae mokete oa bohali [“lenyalo,” TLP]. A roma bahlanka ba hae ho bitsa ba neng ba memetsoe bohali [“moketeng,” TLP]; empa ba hana ho tla.”

Jehova Molimo ke Morena ea lokisetsang mokete oa lenyalo bakeng sa Mora oa hae, Jesu Kreste. Qetellong, monyaluoa oa hae oa balateli ba tlotsitsoeng ba 144 000 o tla kopana le eena leholimong. Bafo ba Morena ke batho ba Iseraele, ba amohetseng monyetla oa ho fetoha “’muso oa baprista,” ha ba tlisoa selekaneng sa Molao ka 1513 B.C.E. Ka hona, ketsahalong eo, ba ile ba atolosetsoa memo ea ho tla moketeng oa lenyalo pele.

Leha ho le joalo, pitso ea pele ea ba memiloeng ha e-ea ka ea tsoa ho fihlela ka hoetla ka 29 C.E., ha Jesu le barutuoa ba hae (bahlanka ba morena) ba qala mosebetsi oa bona oa ho bolela ka ’Muso. Empa Baiseraele ba tlhaho ba ileng ba amohela pitso ena e neng e etsoa ke bahlanka ho tloha ka 29 C.E. ho ea ho 33 C.E. ba ne ba sa rate ho tla. Kahoo Molimo o ile oa neha sechaba sa ba memiloeng monyetla o mong, joalokaha Jesu a hlalosa:

“A boela a roma bahlanka ba bang, a re: Bolellang ba memiloeng, le re: Bonang, ke lokisitse mokete oa ka, likhomo tsa ka le linonneng tsa ka li hlabiloe; ntho tsohle li se li lokile; tloong [“moketeng,” TLP].” Pitso ena ea bobeli le ea ho qetela ea ba memiloeng e qalile ka Pentekonta 33 C.E., ha moea o halalelang o ne o tšolleloa holim’a balateli ba Jesu. Pitso ena e ile ea tsoela pele ho fihlela ka 36 C.E.

Leha ho le joalo, ba bangata haholo ho Baiseraele bao, le bona ba ile ba nyelisa pitso ena. Jesu oa hlalosa: “Bamemuoa ba se ke ba natsa, ba itsamaela; e mong a ikela masimong, e mong a ikela khoebong ea hae. Ba bang ba tšoara bahlanka ba khosi, ba ba etsa hampe, ’me ba ba bolaea.” (TLP) Jesu o tsoela pele: “Morena . . . a halefa; a roma makhotla a hae, a timetsa babolai bao, a chesa le motse oa bona.” Sena se etsahetse ka 70 C.E., ha Jerusalema e ne e senngoa ke Maroma, ’me babolai bao ba ile ba bolaoa.

Joale Jesu o hlalosa se etsahetseng nakong eo: “Eaba [morena] o bolella bahlanka ba hae, a re: Bohali [“mokete oa lenyalo,” TLP] bo se bo lokisitsoe, empa ba neng ba bo bilelitsoe, e ne e se ba bo tšoanelang. Joale, ikeleng mateanong a litsela, ’me le biletse bohaling [“moketeng,” TLP] bohle bao le ba fumanang.” Bahlanka ba ile ba etsa sena, ’me “ntlo ea bohali ea tlala batho ba lulang lijong.”

Mosebetsi ona oa ho bokella baeti mateanong a litsela ka ntle ho motse oa ba memiloeng o qalile ka 36 C.E. Molaoli oa lebotho oa Moroma Kornele le lelapa la hae ke bona ba pele ba sa bollang bao e seng Bajode ba ho bokelloa. Ho bokelloa ha bana bao e seng Bajode, bao kaofela ha bona e leng ba nketseng sebaka ba ileng ba hana pitso pele, ho tsoetse pele ho tla fihlela lekholong lena la bo20 la lilemo.

Ke nakong ea lekholo lena la bo20 la lilemo moo ntlo ea litšebeletso tsa lenyalo e tlalang. Jesu o pheta se etsahalang joale, o re: “Eitse morena ha a kena ho bona ba lutseng lijong, a bona motho ea sa aparang kobo ea bohali. A re ho eena: Mokan’a ka, u kene joang mona, u se na kobo ea bohali? Eo a hloka puo. Eaba morena o re ho bahlanka: ’Mofeng maoto le matsoho, le mo nke, ’me le mo lahlele lefifing le kantle, moo lillo li tla ba teng le litsikitlano tsa meno.”

Monna eo ea se nang seaparo sa lenyalo o tšoantšetsa seka Bakreste ba Bokreste-’mōtoana. Bana le ka mohla Molimo ha o e-s’o ka o ba amohela e le ba nang le boiponahatso bo loketseng joaloka Baiseraele ba moea. Le ka mohla Molimo ha o e-s’o ka o ba tlotsa ka moea o halalelang e le majalefa a ’Muso. Kahoo ba lahleloa ka ntle lefifing moo ba tla timela teng.

Jesu o phethela setšoantšo sa hae ka ho re: “Hobane ba bitsoang ba bangata, empa ba khethiloeng ha ba bakae.” E, ho ne ho e-na le ba bangata ba memiloeng sechabeng sa Iseraele ho fetoha litho tsa monyaluoa oa Kreste, empa ho ile ha khethoa Baiseraele ba tlhaho ba fokolang feela. Bongata ba baeti ba 144 000 ba amohelang moputso oa leholimo ba ipaka e se Baiseraele. Mattheu 22:1-14; Exoda 19:1-6; Tšenolo 14:1-3.

◆ Ke bo-mang ba memetsoeng moketeng oa lenyalo pele, hona ke neng ba atolosetsoang memo?

◆ Ke neng pitso e qalang ho tsoela ho ba memiloeng, hona bahlanka ba sebelisoang ho e etsa ke bo-mang?

◆ Pitso ea bobeli e atolosoa neng, hona ke bo-mang ba mengoang hamorao?

◆ Ke bo-mang ba tšoantšetsoang ke monna ea se nang seaparo sa lenyalo?

◆ Ba bangata ba bitsoang ke bo-mang, le ba seng bakae ba khethoang?