Ho Khomarela Lentsoe la Molimo le Bululetsoeng ka Botšepehi

“Re hlobohile lintho tsa sekhukhu tseo re lokelang ho ba lihlong ka tsona, re sa tsamaee ka mano, leha e le ho tsoaka lentsoe la Molimo.”—2 BAKORINTHE 4:2.

 1. (a) Ho ’nile ha hlokahala eng hore ho finyelloe mosebetsi o hlalositsoeng ho Matheu 24:14 le 28:19, 20? (b) Bibele e ne e fumaneha ho isa kae ka lipuo tsa batho ha matsatsi a ho qetela a qaleha?

BOPROFETENG ba hae bo boholo bo mabapi le nako ea ho ba teng ha hae e le morena le qetello ea tsamaiso ea lintho ea khale, Jesu Kreste o ile a bolela esale pele: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; ’me joale e ntan’o ba hona bofelo bo tla tla.” O ile a boela a laela balateli ba hae: “Le etse batho ba lichaba tsohle barutuoa, . . . le ba ruta ho boloka lintho tsohle tseo ke le laetseng tsona.” (Matheu 24:14; 28:19, 20) Phethahatso ea boprofeta boo e akarelletsa mosebetsi o mongata oa ho fetolela le ho hatisa Bibele, oa ho ruta batho seo e se bolelang, le ho ba thusa ho e sebelisa bophelong ba bona. Ho kopanela mosebetsing o joalo ke tokelo e kaakang! Ka 1914 ho ne ho se ho hatisitsoe Bibele kapa likarolo tse itseng tsa eona ka lipuo tse 570. Empa ho tloha ka nako eo lipuo tse ling tse makholo le maleme a mangata li ’nile tsa ekelletsoa, ’me lipuong tse ngata, ho ile ha etsoa hore ho be le liphetolelo tse fetang e le ’ngoe.a

 2. Ke mabaka afe a sa tšoaneng a ileng a susumetsa mosebetsi oa bafetoleli le bahatisi ba Bibele?

² Ho etsa hore boitsebiso bo ngotsoeng ka puo e ’ngoe bo utloisisoe ke ba balang le ho utloa puo e ’ngoe esele ke phephetso ho mofetoleli ofe kapa ofe. Bafetoleli ba bang ba Bibele ba entse mosebetsi oa bona ka ho lemoha ka matla hore seo ba se fetolelang ke Lentsoe la Molimo. Ba bang ba mpile feela ba hlolloa ke hore mosebetsi ona oa thahasellisa ho litsebi. E ka ’na eaba ba ile ba talima se fuperoeng ke Bibele e le feela lefa la bohlokoa la litloaelo tse itseng tsa sechaba. Ho ba bang, bolumeli ke khoebo ea bona, ’me ho hatisa buka eo ho eona mabitso a bona a bontšitsoeng e le a bafetoleli kapa bahatisi ke mokhoa o mong oa ho iphelisa. Ho totobetse hore sepheo sa bona se susumetsa tsela eo ba etsang mosebetsi oa bona ka eona.

 3. Komiti ea Phetolelo ea Bibele ea Lefatše le Lecha e ile ea talima mosebetsi oa eona joang?

³ Se hapang tlhokomelo ke polelo ena e ileng ea etsoa ke Komiti ea Phetolelo ea Bibele ea Lefatše le Lecha: “Ho fetolela Mangolo a Halalelang ho bolela ho fetolela puong e ’ngoe mehopolo le lipolelo tsa Jehova Molimo . . . Oo ke mohopolo o tebileng haholo. Bafetoleli ba buka ena, ba tšabang le ba ratang Moqapi oa Bomolimo oa Mangolo a Halalelang, ba ikutloa ba ikarabella ho Eena ka ho khethehileng bakeng sa ho fetisa mehopolo le lipolelo tsa hae ka nepo kamoo ho ka khonehang. Ba boetse ba ikutloa ba e-na le boikarabelo mabapi le babali ba batlisisang ba itšetlehileng ka phetolelo ea Lentsoe le bululetsoeng la Molimo ea Holimo-limo bakeng sa poloko ea bona ea ka ho sa feleng. E bile ka maikutlo a joalo a boikarabelo bo tebileng komiti ena ea banna ba inehetseng e ileng ea hatisa New World Translation of the Holy Scriptures ho theosa le lilemo tse ngata.” Sepheo sa komiti ena e ne e le ho ba le phetolelo ea Bibele e neng e tla hlaka le ho utloisiseha le e neng e tla khomarela Seheberu sa pele le Segerike sa pele haufi-ufi hoo e neng e tla fana ka motheo oa ho eketseha ha tsebo e nepahetseng.

Ho Etsahetse’ng ka Lebitso la Molimo?

 4. Lebitso la Molimo ke la bohlokoa hakae ka Bibeleng?

⁴ E ’ngoe ea lipakane tse ka sehloohong tsa Bibele ke ho thusa batho hore ba tsebe Molimo oa ’nete. (Exoda 20:2-7; 34:1-7; Esaia 52:6) Jesu Kreste o ile a ruta balateli ba hae ho rapela hore lebitso la Ntate oa hae “le halaletsoe,” le nkoe le halalela, kapa le tšoaroe joaloka le halalelang. (Matheu 6:9) Molimo o entse hore lebitso la hae le hlahe ka makhetlo a ka holimo ho 7000 ka Bibeleng. O batla hore batho ba tsebe lebitso leo le litšoaneleho tsa Mong’a lona.—Malakia 1:11.

 5. Bafetoleli ba sa tšoaneng ba ngotse lebitso la Molimo joang?

⁵ Bafetoleli ba bangata ba Bibele ba bontšitse tlhompho ea sebele bakeng sa lebitso la Molimo ’me ba le sebelisitse ka mokhoa o tsitsitseng liphetolelong tsa bona. Bafetoleli ba bang ba rata Yahweh. Ba bang ba khethile mofuta oa lebitso la Molimo o lumellanang le puo ea bona le hoja o ntse o tšoana le o hlahang tabeng e ngotsoeng ea Seheberu, mohlomong e le mofuta o tsebahalang haholo ka lebaka la ho sebelisoa ka nako e telele. New World Translation of the Holy Scriptures e sebelisa Jehova ka makhetlo a 7210 tabeng ea eona e ngotsoeng ea sehlooho.

 6. (a) Lilemong tsa morao tjee, bafetoleli ba entse eng ka taba e buang ka lebitso la Molimo? (b) Mokhoa ona o atile hakae?

⁶ Lilemong tsa morao tjena, le hoja bafetoleli ba Bibele ba boloka mabitso a melingoana ea bohetene e kang Baale le Moloke, ba ntse ba tlosa lebitso la Molimo oa ’nete ka ho eketsehileng liphetolelong tsa Lentsoe la hae le bululetsoeng. (Exoda 3:15; Jeremia 32:35) Litemaneng tse kang Matheu 6:9 le Johanne 17:6, 26, phetolelo ea Sealbania e ajoang haholo e fetolela polelo ea Segerike bakeng sa “lebitso la hao” (ke hore, lebitso la Molimo) e le feela “uena,” joalokaha eka litemana tseo ha lia bolela lebitso. Ho Pesaleme ea 83:18, The New English Bible le Today’s English Version li tlosa lebitso la Molimo le taba efe kapa efe e buang ka hore Molimo o na le lebitso. Le hoja lebitso la Molimo le ne le hlaha liphetolelong tsa khajana tsa Mangolo a Seheberu ka lipuo tse ngata ka ho fetisisa, hangata liphetolelo tse nchanyana lia le tlosa kapa li bua ka lona litlhalosong tse mahlakoreng a maqephe feela. Ho joalo Senyesemaneng, esita le lipuong tse ngata tsa Europe, Afrika, Amerika Boroa, India le lihlekehleke tsa Pacific.

 7. (a) Bafetoleli ba Libibele tse ling tsa Maafrika ba etsa’ng ka lebitso la Molimo? (b) U ikutloa joang ka seo?

⁷ Ba fetolelang Bibele lipuong tse itseng tsa Afrika ba fetela pejana. Ho e-na le hore feela ba nkele lebitso la Molimo sebaka ka tlotla ea Mangolo, e kang Molimo kapa Morena, ba kenya mabitso a litumelo tsa habo bona. Ho The New Testament and Psalms in Zulu (phetolelo ea 1986), tlotla Molimo (uNkulunkulu) e ne e sebelisitsoe ka phapanyetsano le lebitso (uMvelinqangi) leo Mazulu a utloisisang hore le bolela ‘moholo-holo ea bileng teng pele ea rapeloang ka balimo.’ Sehlooho se seng sa koranta ea The Bible Translator, ea October 1992, se ile sa tlaleha hore ha bafetoleli ba fetolela Bibele ea Sechichewa eo ho thoeng ke Buku Loyera, ba ne ba sebelisa Chauta e le lebitso le lokelang ho nka sebaka sa Jehova. Sehlooho sena se hlalositse hore Chauta ke “Molimo eo ba ’nileng ba mo tseba le ho mo rapela.” Empa, bongata ba batho bana bo boetse bo rapela seo bo lumelang hore ke meea ea bafu. Na ke ’nete hore haeba batho ba etsa likōpo tse matla ho ‘Motho ea itseng ea Phahameng,’ lebitso lefe kapa lefe leo ba le sebelisang bakeng sa ‘Motho eo ea Phahameng’ lea tšoaneleha bakeng sa ho tšoantšoa le lebitso la Jehova, ho sa tsotellehe hore na borapeli ba bona bo ka akarelletsa lintho life tse ling? Le hanyenyane! (Esaia 42:8; 1 Bakorinthe 10:20) Ho nkela lebitso la Molimo sebaka ka ntho e ’ngoe e etsang hore batho ba ikutloe hore ha e le hantle litumelo tsa bona tsa lineano li nepahetse ha ho ba thuse ho atamela haufi le Molimo oa ’nete.

 8. Ke hobane’ng ha morero oa Molimo oa ho etsa hore lebitso la hae le tsejoe o sa ka oa nyopisoa?

⁸ Sena sohle ha sea fetola kapa hona ho nyopisa morero oa Jehova oa ho etsa hore lebitso la hae le tsejoe. Ho ntse ho e-na le Libibele tse ngata tse ajoang ka lipuo tsa Europe, Afrika, Linaha tsa Amerika, Bochabela le lihlekehleke tsa leoatle, tse nang le lebitso la Molimo. Ho boetse ho na le Lipaki tsa Jehova tse ka holimo ho 5400 000 linaheng le libakeng tse 233 tseo kaofela ha tsona li nkang lihora tse fetang limilione tse sekete ka selemo li bolella ba bang ka lebitso la Molimo oa ’nete le morero oa hae. Li hatisa le ho aba Libibele—tse sebelisang lebitso la Molimo—ka lipuo tse buuoang ke baahi ba lefatše ba ka bang 3600 000 000, ho akarelletsa le Senyesemane, Sechaena, Serussia, Sepanishe, Sepotoketsi, Sefora le Sedache. Hape li hatisa lithuso tsa ho ithuta Bibele ka lipuo tse tsejoang ke baahi ba lefatše ba bangata haholo. Haufinyane Molimo ka boeena o tla nka bohato ka tsela eo ntle ho pelaelo e tla phethahatsa polelo ea hae ea hore lichaba li “tla tseba hoba ke [eena] Jehova.”—Ezekiele 38:23.

Ha Litumelo Tsa Batho li Fetola Phetolelo

 9. Bibele e bontša boikarabelo bo tebileng ba ba tšoarang Lentsoe la Molimo joang?

⁹ Ba fetolelang Lentsoe la Molimo hammoho le ba le rutang ba na le boikarabelo bo tebileng. Moapostola Pauluse o itse mabapi le tšebeletso ea hae le ea basebetsi-’moho le eena: “Re hlobohile lintho tsa sekhukhu tseo re lokelang ho ba lihlong ka tsona, re sa tsamaee ka mano, leha e le ho tsoaka lentsoe la Molimo, empa ka ho bonahatsa ’nete re ipuella letsoalong le leng le le leng la motho mahlong a Molimo.” (2 Bakorinthe 4:2) Ho tsoaka ho bolela ho senya ka ho kenya ntho e ’ngoe esele kapa ea boleng bo tlaase. Moapostola Pauluse o ne a sa tšoane le balisa ba Iseraele ba sa tšepahaleng ba mehleng ea Jeremia ba ileng ba khalemeloa ke Jehova hobane ba ne ba bolela likhopolo tsa bona ho e-na le ho bolela seo Molimo a se buileng. (Jeremia 23:16, 22) Empa ho etsahetse’ng linakong tsa kajeno?

10. (a) Mabaka a mang ntle le ho tšepahala ho Molimo a ile a susumetsa bafetoleli ba bang joang linakong tsa kajeno? (b) Ke karolo efe eo ba neng ba inkela eona ka ho sa lokelang?

¹⁰ Ntoeng ea II ea Lefatše, komiti ea litsebi tsa thuto ea bolumeli le baruti e ile ea sebelisana le ’muso oa Manazi, Jeremane, bakeng sa ho hatisa “Testamente e Ncha” e ntlafalitsoeng e ileng ea tlosa litšupiso tsohle tse buang hamolemo ka Bajuda le sohle se neng se bontša hore Jesu Kreste o tsoa lelokong la Juda. Haufinyane haholo, bafetoleli ba ileng ba fetolela The New Testament and Psalms: An Inclusive Version ba ile ba sekamela ka lehlakoreng le leng lesele, ba leka ka matla ho tlosa sohle se neng se bontša hore Bajuda baa ikarabella lefung la Kreste. Bafetoleli bao le bona ba ile ba ba le maikutlo a hore babali ba lumelang hore basali ba na le litokelo tse lekanang le tsa banna ba ne ba tla thaba haholoanyane haeba ho ne ho ke ke ha thoe Molimo ke Ntate, empa ho ka thoe ke Ntate-’Mè le haeba ho ne ho ke ke ha thoe Jesu ke Mora oa Molimo, empa ho ka thoe ke Ngoana oa hae. (Matheu 11:27) Ha ba sa ntse ba sebetsana le eona, ba ile ba tlosa molao-motheo oa hore basali ba ipehe tlas’a banna le oa hore bana ba mamele batsoali. (Bakolose 3:18, 20) Ho hlakile hore bahatisi ba liphetolelo tseo ha baa ka ba kopanela boikemisetso ba moapostola Pauluse ba ho se ‘tsoake lentsoe la Molimo.’ Ba ne ba lebala karolo ea mofetoleli, ba nka sebaka sa moqapi, ba hatisa libuka tse neng li sebelisa botumo bo botle ba Bibele e le tsela ea ho buella maikutlo a bona.

11. Lithuto tsa Bokreste-’mōtoana li hohlana joang le seo Bibele e se buang ka moea le lefu?

¹¹ Likereke tsa Bokreste-’mōtoana ka kakaretso li ruta hore moea (soul) oa motho ke moea (spirit), hore o siea ’mele lefung, le hore ha o shoe. Ho fapana le hoo, liphetolelo tsa Bibele tsa lipuo tse ngata tsa khajana li bolela hore batho ke meea, hore liphoofolo ke meea, le hore moea oa shoa. (Genese 12:5; 36:6; Numere 31:28; Jakobo 5:20) Seo se soabisitse baruti.

12. Liphetolelo tse ling tsa morao tjena li pata linnete tsa motheo tsa Bibele ka tsela efe?

¹² Joale liphetolelo tse nchanyana li pata linnete tsena. Joang? Li mpa feela li qoba phetolelo e tobileng ea lereo la Seheberu neʹphesh (moea) litemaneng tse itseng. Ho Genese 2:7, li ka ’na tsa bolela hore motho oa pele o “ile a qala ho phela” (ho e-na le ho re e “ile ea e-ba moea o phelang”). Kapa li ka ’na tsa bua ka “sebōpuoa” ho e-na le “moea” tabeng ea liphoofolo. (Genese 1:21) Litemaneng tse joaloka Ezekiele 18:4, 20, li bua ka “motho” kapa “motho ka mong” (ho e-na le “moea”) e le ea shoang. Mohlomong ho mofetoleli, liphetolelo tse joalo li khona ho lokafatsoa. Empa li fana ka thuso e kae ho motho eo ka sebele a batlang ’nete eo monahano oa hae o seng o fetotsoe ke lithuto tsa Bokreste-’mōtoana tse sa lumellaneng le Mangolo?b

13. Liphetolelo tse ling tsa Bibele li patile morero oa Molimo ka lefatše ka litsela life?

¹³ Boitekong ba ho tšehetsa tumelo ea bona ea hore batho bohle ba lokileng ba ea leholimong, bafetoleli—kapa litsebi tsa thuto ea bolumeli tse hlahlobang mosebetsi oa bona—ba ka ’na ba boela ba leka ka matla ho pata seo Bibele e se buang mabapi le morero oa Molimo ka lefatše. Ho Pesaleme ea 37:11, liphetolelo tse ’maloa li re baikokobetsi ba tla rua “naha.” Ho ka etsahala hore ebe “naha” ke phetolelo ea lentsoe (ʼeʹrets) le sebelisitsoeng tabeng e ngotsoeng ea Seheberu. Leha ho le joalo, Today’s English Version (e sebelitseng e le motheo oa ho fetolela lipuong tse ling tse ngata) e fetela pejana. Le hoja phetolelo ena e fetolela lentsoe la Segerike ge e le “lefatše” ka makhetlo a 17 Kosepeleng ea Matheu, ho Matheu 5:5, e nkela “lefatše” sebaka ka poleloana “seo Molimo a se tšepisitseng.” Ka tloaelo, litho tsa kereke li nahana ka leholimo. Ha li bolelloe ka kotloloho hore, Thutong ea hae ea Thabeng, Jesu Kreste o ile a bolela hore ba maikutlo a bonolo, ba mosa kapa baikokobetsi ba tla “rua lefatše.”

14. Ke lebaka lefe la boithati le totobalang liphetolelong tse itseng tsa Bibele?

¹⁴ Ho totobetse hore liphetolelo tse ling tsa Mangolo li ngotsoe ka maikutlo a ho thusa baruti ho fumana moputso o motle. Ke ’nete hore Bibele e re: “Mosebetsi o tšoaneloa ke moputso oa hae.” (1 Timothea 5:18) Empa ho 1 Timothea 5:17, moo e bolelang hore banna ba baholo ba okamelang ka tsela e ntle ba lokela hore “ba nkoe ba tšoaneloa ke tlhompho e habeli,” tlhompho feela eo ba bang ba bona ba e nkang e loketse hore e ka boleloa ke e amanang le chelete. (Bapisa le 1 Petrose 5:2.) Kahoo, The New English Bible e bolela hore baholo bana “ba lokela ho nkoa ba tšoaneloa ke moputso oa chelete o mennoeng habeli,” ’me Contemporary English Version e bolela hore ba “tšoaneloa ke ho lefshoa moputso o mennoeng habeli.”

Ho Khomarela Lentsoe la Molimo ka Botšepehi

15. Re ka lekanyetsa joang hore na ke liphetolelo life tsa Bibele tseo re ka li sebelisang?

¹⁵ See sohle se bolela’ng ho motho ka mong ea balang Bibele le ho ba sebelisang Bibele ho ruta ba bang? Lipuong tse ngata tse sebelisoang haholo, ho na le liphetolelo tsa Bibele tse fetang e le ’ngoe tseo motho a ka khethang ho tsona. Bontša temoho ha u khetha Bibele eo u e sebelisang. (Liproverbia 19:8) Haeba phetolelo e itseng e sa tšepahale mabapi le seo Molimo a leng sona—ho tlosa lebitso la hae Lentsoeng la hae le bululetsoeng ka lebaka lefe kapa lefe—na ho ka etsahala hore ebe bafetoleli bao ba boetse ba kena-kenane le likarolo tse ling tsa taba e ngotsoeng ea Bibele? Ha u belaella ho tšoaneleha ha phetolelo e itseng, leka ka matla ho e bapisa le liphetolelo tsa khajana. Haeba u mosuoe oa Lentsoe la Molimo, khetha liphetolelo tse khomarelang haufi-ufi se leng tabeng e ngotsoeng ea Seheberu sa pele le Segerike sa pele.

16. Ka bomong re ka bontša botšepehi joang tšebelisong ea rōna ea Lentsoe la Molimo le bululetsoeng?

¹⁶ Kaofela ha rōna re lokela hore ka bomong re tšepahale Lentsoeng la Molimo. Re etsa seo ka ho tsotella ka ho lekaneng seo le se fupereng e le hore, haeba ho khoneha, re nke nako e itseng letsatsi le letsatsi re bala Bibele. (Pesaleme ea 1:1-3) Re etsa sena ka ho sebelisa seo e se buang ka botlalo bophelong ba rōna, ka ho ithuta ho sebelisa melao-motheo le mehlala ea eona e le motheo oa ho etsa liqeto tse nepahetseng. (Baroma 12:2; Baheberu 5:14) Re bontša hore re babuelli ba Lentsoe la Molimo ba tšepahalang ka ho le bolela ho ba bang ka cheseho. Hape, joaloka mesuoe re etsa sena ka ho sebelisa Bibele ka hloko, le ka mohla re sa sothe kapa ho eketsa seo e se bolelang hore se lumellane le maikutlo a rōna. (2 Timothea 2:15) Seo Molimo a se boletseng esale pele se tla fela se etsahale. Oa tšepahala ha a phethahatsa Lentsoe la hae. E se eka re ka tšepahala ha re le khomarela.

[Mongolo o botlaaseng ba leqephe]

Na U sa Hopola?

◻ Ke mabaka afe a susumelitseng mosebetsi oa bafetoleli ba Bibele linakong tsa kajeno?

◻ Ke hobane’ng ha mekhoa ea kajeno ea phetolelo e sa nyopisa morero oa Molimo mabapi le lebitso la hae?

◻ Liphetolelo tse ling li pata linnete tsa Bibele joang mabapi le moea, lefu le lefatše?

◻ Re ka bontša ka litsela life hore re khomarela Lentsoe la Molimo ka botšepehi?

[Setšoantšo se leqepheng la 16]

U lokela ho sebelisa phetolelo efe ea Bibele?