Ho Sebeletsa Morena Kreste ka Botšepehi

“[O ile] a fuoa bobusi le ho hlompheha le ’muso, hore batho, lichaba le lipuo kaofela ba mo sebeletse.”—DANIELE 7:14.

1, 2. Re tseba joang hore Kreste ha aa ka a fumana matla a feletseng a ’Muso ka 33 C.E.?

KE ’MUSI ofe ea neng a ka shoela bafo ba hae eaba o phela hape hore a buse e le morena? Ke morena ofe ea neng a ka phela lefatšeng e le hore a susumelletse bafo ba hae hore ba mo tšepe, ebe o il’o busa a le leholimong? Motho feela ea neng a ka etsa lintho tsena—le tse ling tse ngata—ke Jesu Kreste. (Luka 1:32, 33) Ka Pentekonta ea 33 C.E., ka mor’a hore Kreste a shoe ’me a tsohe bafung a be a nyolohele leholimong, Molimo ‘o ile a mo etsa hlooho holim’a lintho tsohle ho phutheho.’ (Baefese 1:20-22; Liketso 2:32-36) Kahoo, Kreste o ile a qala ho busa empa e le ka tsela e sa fellang. Bafo ba hae ba pele e ne e le Bakreste ba tlotsitsoeng ka moea, bao e neng e le litho tsa Iseraele ea moea, e leng “Iseraele ea Molimo.”—Bagalata 6:16; Bakolose 1:13.

² Hoo e ka bang lilemo tse 30 ka mor’a Pentekonta ea 33 C.E., moapostola Pauluse o ile a tiisa hore Kreste o ne a e-s’o fumane matla a feletseng a ’Muso, empa o ne a le “ka letsohong le letona la Molimo, ho tloha nakong eo ho ea pele a letile ho fihlela lira tsa hae li ka behoa joaloka setuloana sa maoto a hae.” (Baheberu 10:12, 13) Joale, ho ea qetellong ea lekholo la pele la lilemo C.E., moapostola Johanne ea neng a se a hōlile, o ile a bona ka pono esale pele ha ’Musi oa Bokahohle, e leng Jehova, a beha Kreste Jesu hore e be Morena oa ’Muso oa leholimong o neng o sa tsoa thehoa. (Tšenolo 11:15; 12:1-5) Ha re sheba maemo a litaba a histori, re ka hlahloba bopaki bo hlakileng bo tiisang hore ka 1914, Kreste o ile a qala ho busa a le leholimong e le Morena oa Bomesia.a

 3. (a) Litaba tse molemo tsa ’Muso li ’nile tsa akarelletsa tšobotsi efe e ncha ho tloha ka 1914? (b) Re ka ipotsa lipotso life?

³ Ha ho pelaelo hore ho tloha ka 1914 litaba tse molemo tsa ’Muso li ’nile tsa akarelletsa tšobotsi e ncha e hlollang. Hona joale Kreste o hlile o busa e le Morena oa ’Muso oa Molimo oa leholimo, le hoja e le “har’a lira tsa” hae. (Pesaleme ea 110:1, 2; Matheu 24:14; Tšenolo 12:7-12) Ho feta moo, lefatšeng lohle, bafo ba hae ba tšepahalang ba chesehela ho etsa lintho tumellanong le bolaoli ba hae ka ho kopanela lenaneong la thuto ea Bibele leo ho seng le kileng la tšoana le lona historing ea moloko oa batho. (Daniele 7:13, 14; Matheu 28:18) Bakreste ba tlotsitsoeng ka moea, e leng “bara ba ’muso,” ba sebetsa e le “manģosa a emeng bakeng sa Kreste.” Ba thusoa ka botšepehi ke boieane bo ntseng bo eketseha ba “linku tse ling” tsa Kreste, bo sebetsang e le baemeli ba ’Muso oa Molimo. (Matheu 13:38; 2 Bakorinthe 5:20; Johanne 10:16) Leha ho le joalo, ho hlokahala hore re sekaseke hore na re le batho ka bomong re hlile re ela hloko bolaoli ba Kreste. Na re tšepahala ho eena re sa thekesele? Re ka bontša botšepehi joang ho Morena ea busang leholimong? Leha ho le joalo, a re qaleng ka ho bua ka mabaka ao re nang le ’ona a ho tšepahala ho Kreste.

Morena ea Susumelletsang Bafo ba Hae ho Tšepahala

 4. Jesu o ile a finyella eng tšebeletsong ea hae ea lefatšeng ha e ntse e le Ea Tla Behoa Boreneng?

⁴ Re tšepahala ho Kreste ka lebaka la ho ananela seo a ileng a se etsa le ka lebaka la makhabane a hae a hlollang. (1 Petrose 1:8) Ha Jesu Ea Neng a Tla Behoa Boreneng a ntse a le lefatšeng, o ile a bontša hanyenyane feela seo a tla se etsa ha e se e le Morena ea busang lefatšeng lohle nakong eo Molimo a e behileng. O ile a fepa ba lapileng. O ile a folisa ba kulang, ba foufetseng, ba holofetseng, ba sa utloeng litsebeng le ba sa tsebeng ho bua. O ile a ba a tsosa batho ba bang ba neng ba shoele. (Matheu 15:30, 31; Luka 7:11-16; Johanne 6:5-13) Ho phaella moo, ho tseba ka bophelo ba Jesu ha a ne a le lefatšeng ho re thusa hore re tsebe makhabane ao a tla ba le ’ona nakong ea ha e tla be e le eena ’Musi oa lefatše—haholo-holo lerato la hae le bontšang boitelo. (Mareka 1:40-45) Tabeng ena, ho tlalehiloe hore Napoléon Bonaparte o kile a re: “’Na, Alexandere, Cesare, le Charlemagne, re thehile mebuso, empa motheo oa katleho ea rōna e ne e le ofe? E ne e le likhoka. Ke Jesu Kreste feela ea ileng a theha ’muso oa hae holim’a lerato, ’me mehleng ena batho ba limilione ba ka mo shoela.”

 5. Ke hobane’ng ha botho ba Jesu bo ne bo rateha hakaale?

⁵ Kaha Jesu o ne a le bonolo ’me a ikokobelitse pelong, ba neng ba imetsoe ke likhatello le meroalo ba ne ba khatholloa ke lithuto tsa hae tse matlafatsang le mosa oa hae. (Matheu 11:28-30) Bana ba ne ba phutholoha ha ba e-na le eena. Banna ba ikokobelitseng le ba nang le temoho e ile ea e-ba barutuoa ba hae ba chesehang. (Matheu 4:18-22; Mareka 10:13-16) Mokhoa oa hae oa ho nahanela le oa ho hlompha o ile oa etsa hore basali ba bangata ba tšabang Molimo, bao boholo ba bona ba ileng ba tela nako ea bona, matla a bona le matlotlo a bona, ba tšepahale ho eena, ’me ba mo hlokomele ha a ntse a phetha tšebeletso ea hae.—Luka 8:1-3.

 6. Jesu o ile a bontša maikutlo afe a bonolo ha Lazaro a ne a shoele?

⁶ Kreste o ile a senola maikutlo a hae a bonolo ka ho fetisisa ha ho ne ho shoele motsoalle oa hae ea ratoang, e leng Lazaro. O ile a angoa maikutlo haholo ke ho sithabela ha Maria le Maretha hoo a sa kang a ithiba ho bontša bohloko boo a neng a bo utloile, eaba o “ntša meokho.” O ile a “khathatseha”—a ferekana ka lebaka la pelo e bohloko le masoabi—le hoja a ne a tseba hore o tla tloha a tsosa Lazaro. Ka mor’a moo, Jesu o ile a susumetsoa ke lerato le qenehelo eaba o sebelisa matla ao Molimo a mo fileng ’ona ’me a tsosa Lazaro.—Johanne 11:11-15, 33-35, 38-44.

 7. Ke hobane’ng ha ho tšoaneleha hore re tšepahale ho Jesu? (Bona lebokose le leqepheng la 31.)

⁷ Re tsota tsela eo ka eona lerato la Jesu le neng le le matla bakeng sa se nepahetseng le tsela eo ka eona a neng a hloile boikaketsi le bokhopo. Ka makhetlo a mabeli o ile a ba sebete hore a leleke bahoebi ba meharo tempeleng. (Matheu 21:12, 13; Johanne 2:14-17) Ho feta moo, ha e ne e le motho lefatšeng, o ile a ba le matšoenyeho a mefuta-futa, e leng se ileng sa etsa hore le eena a ikutloele mathata le likhatello tseo re tobanang le tsona. (Baheberu 5:7-9) Jesu o ne a boetse a tseba hore na ho joang ho hlouoa le ho tšoaroa ka leeme. (Johanne 5:15-18; 11:53, 54; 18:38–19:16) Qetellong, ka sebete o ile a shoa lefu le sehlōhō e le hore a phethe thato ea Ntat’ae le hore a fe bafo ba hae bophelo bo sa feleng. (Johanne 3:16) Na makhabane a joalo a Kreste ha a u susumelletse hore u tsoele pele u mo sebeletsa ka botšepehi? (Baheberu 13:8; Tšenolo 5:6-10) Empa ho hlokahala eng hore motho e be mofo oa Morena Kreste?

Se Etsang Hore re Tšoanelehele ho ba Bafo ba Morena Kreste

 8. Ho hlokahala eng hore motho e be mofo oa Kreste?

⁸ Nahana ka papiso ena: Hangata ho ba mofo oa naha e ’ngoe ho hloka hore u finyelle litlhoko tse itseng tsa bohlokoa. Ho ka ’na ha hlokahala hore batho bao e tla ba bafo ba be le botumo bo botle le hore ba be ba se na maloetse a itseng. Ka ho tšoanang, bafo ba Kreste ba lokela ho phela ka melao e phahameng ea boitšoaro ’me ba phele hantle moeeng.—1 Bakorinthe 6:9-11; Bagalata 5:19-23.

 9. Re ka bontša joang hore re tšepahala ho Kreste?

⁹ Ke hantle hore ebe Jesu Kreste o boetse o hloka hore bafo ba hae ba tšepahale ho eena le ’Muso oa hae. Ba bontša botšepehi boo ka ho phela tumellanong le seo a ileng a se ruta ha a ne a le lefatšeng e le Ea Tla Behoa Boreneng. Ka mohlala, ba etelletsa lintho tse amanang le ’Muso le thato ea Molimo ka pele ho lintho tse bonahalang. (Matheu 6:31-34) Ba boetse ba leka ka tieo hore ba be le botho bo kang ba Kreste, esita leha maemo e le a lekang ka ho fetisisa. (1 Petrose 2:21-23) Ho feta moo, bafo ba Kreste ba latela mohlala oa hae ka hore e be bona ba nkang bohato pele hore ba etsetse batho ba bang molemo.—Matheu 7:12; Johanne 13:3-17.

10. Botšepehi bo ka bontšoa joang ho Kreste (a) ka lapeng le (b) ka phuthehong?

¹⁰ Balateli ba Jesu ba boetse ba bontša botšepehi ho eena ka ho bonahatsa makhabane a hae ka lapeng. Ka mohlala, banna ba bontša botšepehi ho Morena oa bona oa leholimo ka ho etsisa makhabane a Kreste ka tsela eo ba tšoarang basali ba bona le bana ba bona ka eona. (Baefese 5:25, 28-30; 6:4; 1 Petrose 3:7) Basali ba bontša botšepehi ho Kreste ka boitšoaro bo hloekileng le ka “moea o thōtseng le o bonolo.” (1 Petrose 3:1-4; Baefese 5:22-24) Bana ba tšepahala ho Kreste ha ba latela mohlala oa hae oa ho mamela. Ha e sa le ngoana, Jesu o ne a ipehile tlas’a batsoali ba hae, le hoja ba ne ba sa phethahala. (Luka 2:51, 52; Baefese 6:1) Bafo ba Kreste ba leka ka botšepehi hore ba mo etsise ka ho “bontša ho utloelana bohloko, [ba] e-na le boikutlo bo mofuthu ba bara ba motho” le ka ho ba “le qenehelo e bonolo.” Ba leka ho tšoana le Kreste, ‘ba ikokobelitse kelellong, ba sa phetetse bobe ka bobe kapa ho hlapaola ka ho hlapaola.’—1 Petrose 3:8, 9; 1 Bakorinthe 11:1.

Bafo ba Mamelang Molao

11. Bafo ba Kreste ba ikokobelletsa melao efe?

¹¹ Feela joalokaha batho ba batlang ho ba baahi naheng e ncha ba mamela melao ea naha ea habo bona e ncha, bafo ba Kreste ba ikokobelletsa “molao oa Kreste” ka ho etsa hore bophelo ba bona bo lumellane le sohle seo Jesu a ileng a se ruta le ho se laela. (Bagalata 6:2) Seo ba hlileng ba phelang ka sona ka botšepehi ke “molao oa borena” oa lerato. (Jakobo 2:8) Melao ee e akarelletsa eng?

12, 13. Re ikokobelletsa “molao oa Kreste” ka botšepehi joang?

¹² Bafo ba Kreste ha baa phethahala ebile ba etsa liphoso. (Baroma 3:23) Kahoo, ho hlokahala hore ba tsoele pele ho hlaolela “lerato la bara ba motho le se nang boikaketsi” e le hore ba “ratane ka matla haholo ho tloha pelong.” (1 Petrose 1:22) “Haeba leha e le mang a e-na le sesosa sa pelaelo khahlanong le e mong,” ka botšepehi Bakreste ba sebelisa molao oa Kreste ka ho “mamellana le ho tšoarelana ka bolokolohi.” Ho mamela molao ona ho ba thusa ho tsoela pele ba hlokomoloha ho se phethahale ha ba bang le ho fumana mabaka a ho ratana. Na ha u thabele ho ba har’a bao ka lebaka la ho ikokobelletsa Morena oa rōna ea lerato ka botšepehi ba ikapesang lerato, e leng “tlamo e phethahetseng ea bonngoe”?—Bakolose 3:13, 14.

¹³ Ho feta moo, Jesu o ile a hlalosa hore lerato leo a ileng a beha mohlala oa lona, le leholo ho feta lerato leo batho ba tloaetseng ho le bontšana. (Johanne 13:34, 35) Haeba re rata ba re ratang feela, re tla be re sa etse “ntho [leha e le] efe e fetang e tloaelehileng.” Ha re etsa joalo, lerato la rōna e ne e tla ba le sa fellang. Jesu o ile a re khothalletsa hore re etsise lerato la Ntate oa hae ka hore re bontše lerato le susumetsoang ke melao-motheo ’me re rate esita le lira tsa rōna tse re hloileng le tse re hlorisang. (Matheu 5:46-48) Lerato lena le boetse le susumelletsa bafo ba ’Muso hore ba tiisetse ka botšepehi mosebetsing oa bona o ka sehloohong. Ke mosebetsi ofe?

Botšepehi ba Bona Boa Lekoa

14. Ke hobane’ng ha mosebetsi oa boboleli e le oa bohlokoa hakaale?

¹⁴ Joale, bafo ba ’Muso oa Molimo ba na le mosebetsi oa bohlokoa ka ho fetisisa oa “ho paka ka ho phethahetseng malebana le ’muso oa Molimo.” (Liketso 28:23) Hoa hlokahala hore ba etse joalo hobane ’Muso oa Bomesia o tla tlosa qoso bobusing ba Jehova ba bokahohleng. (1 Bakorinthe 15:24-28) Ha re bolela litaba tse molemo, ba li utloang ba na le monyetla oa ho fetoha bafo ba ’Muso oa Molimo. Ho feta moo, tsela eo batho ba itšoarang ka eona ha ba bolelloa molaetsa e fetoha motheo kapa tekanyetso eo Morena Kreste a ka ahlolang moloko oa batho ka eona. (Matheu 24:14; 2 Bathesalonika 1:6-10) Kahoo, tsela e ka sehloohong eo re ka bontšang ka eona hore re tšepahala ho Kreste ke ka ho mamela taelo ea hae ea hore re bolelle ba bang ka ’Muso.—Matheu 28:18-20.

15. Ke hobane’ng ha botšepehi ba Bakreste bo lekoa?

¹⁵ Ha e le hantle, Satane o hanyetsa mosebetsi oa boboleli kahohle kamoo a ka khonang, ’me babusi ba batho ha ba amohele bolaoli boo Kreste a bo filoeng ke Molimo. (Pesaleme ea 2:1-3, 6-8) Kahoo, Jesu o ile a lemosa barutuoa ba hae tjena: “Lekhoba ha le leholo ho mong’a lona. Haeba ba ntlhorisitse, le lōna ba tla le hlorisa.” (Johanne 15:20) Kahoo, balateli ba Kreste ba ntoeng ea moea e lekang botšepehi ba bona.—2 Bakorinthe 10:3-5; Baefese 6:10-12.

16. Bafo ba ’Muso ba lefa “Molimo lintho tsa Molimo” joang?

¹⁶ Leha ho le joalo, bafo ba ’Muso oa Molimo ba tsoela pele ho tšepahala ho Morena oa bona ea sa bonahaleng empa ha ba hlompholle babusi ba batho. (Tite 3:1, 2) Jesu o ile a re: “Lefang Cesare lintho tsa Cesare, empa le lefe Molimo lintho tsa Molimo.” (Mareka 12:13-17) Ka lebaka leo, bafo ba Kreste ba mamela melao ea ’muso e seng khahlanong le melao ea Molimo. (Baroma 13:1-7) Leha ho le joalo, ha lekhotla la Bajuda le ne le hlompholla melao ea Molimo ka ho laela barutuoa ba Jesu hore ba khaotse ho bolela litaba tse molemo, ba ile ba bolela ka tieo empa e le ka tlhompho hore ba lokela ho “mamela Molimo e le ’musi ho e-na le batho.”—Liketso 1:8; 5:27-32.

17. Ke hobane’ng ha re ka thulana le liteko tsa botšepehi ka sebete?

¹⁷ Ho hlakile hore ho hlokahala sebete e le hore bafo ba Kreste ba lule ba tšepahala ho Morena oa bona ha ba hlorisoa. Ho sa tsotellehe seo, Jesu o ile a re: “Ho thaba lōna ha batho ba le nyelisa ’me ba le hlorisa ’me ka leshano ba bua ntho ea mofuta o mong le o mong e khopo ka lōna ka lebaka la ka. Thabang ’me le tlōle ke thabo, kaha moputso oa lōna o moholo maholimong.” (Matheu 5:11, 12) Balateli ba pele ba Kreste ba ile ba bona bonnete ba mantsoe ao. Esita leha ba ne ba ba shapile ka lebaka la ho ’na ba bolela ka ’Muso, ba ile ba thaba “hobane ba ne ba nkiloe e le ba tšoaneloang ke ho hlompholloa ka lebaka la lebitso la hae. Letsatsi le leng le le leng ka tempeleng le ka ntlo le ntlo ba [ile ba] tsoela pele ba sa khaotse ho ruta le ho bolela litaba tse molemo mabapi le Kreste, Jesu.” (Liketso 5:41, 42) Ha le ntse le bontša moea oo oa botšepehi ha le mamella mathata, ho kula, ho shoeloa, kapa khanyetso, le lokela ho babatsoa.—Baroma 5:3-5; Baheberu 13:6.

18. Mantsoe a Jesu ho Ponse Pilato a bontša eng?

¹⁸ Ha Jesu e sa ntse e le Ea Tla Behoa Boreneng, o ile a hlalosetsa ’Musisi oa Moroma Ponse Pilato tjena: “’Muso oa ka hase karolo ea lefatše lena. Hoja ’muso oa ka e ne e le karolo ea lefatše lena, bahlanka ba ka ba ka be ba loanne hore ho se ke ha nehelanoa ka ’na ho Bajuda. Empa, joale, ’muso oa ka ha o tsoe mohloling ona.” (Johanne 18:36) Kahoo, bafo ba ’Muso oa leholimo, ha ba nke lihlomo hore ba loantše mang kapa mang ebile ha ba jele paate likhohlanong leha e le life tsa batho. Ka lebaka la ho tšepahala ho “Khosana ea Khotso,” ho hang ha ba jele paate likarohanong tsa lefatše lena.—Esaia 2:2-4; 9:6, 7.

Meputso ea ka ho sa Feleng ea Bafo ba Tšepahalang

19. Ke hobane’ng ha bafo ba Kreste ba ka lebella bokamoso ka tšepo?

¹⁹ Bafo ba tšepahalang ba Kreste, “Morena oa marena,” ba lebeletse bokamoso ka tšepo. Ba lebeletse ka cheseho nako e ntseng e atamela eo ka eona a tla bonahatsa matla a hae a borena mona lefatšeng, a le leholimong. (Tšenolo 19:11–20:3; Matheu 24:30) Masala a tlotsitsoeng ka moea a “bara ba ’muso” a lebeletse lefa la ’ona la bohlokoa la ho ba marena le Kreste leholimong. (Matheu 13:38; Luka 12:32) “Linku tse ling” tse tšepahalang tsa Kreste li letetse mantsoe a Morena a kamohelo a reng: “Tloong, lōna ba hlohonolofalitsoeng ke Ntate, le rue [lefatše la Paradeise leo e leng] ’muso oo le o lokiselitsoeng ho tloha ho thehoeng ha lefatše.” (Johanne 10:16; Matheu 25:34) Kahoo, e se eka bafo bohle ba ’Muso ba ka ikemisetsa ho tsoela pele ba sebeletsa Morena Kreste ka botšepehi.

[Mongolo o botlaaseng ba leqephe]

Na U ka Hlalosa?

• Ke hobane’ng ha ho loketse hore re tšepahale ho Kreste?

• Bafo ba Kreste ba bontša joang hore ba tšepahala ho eena?

• Ke hobane’ng ha re batla ho tšepahala ho Morena Kreste?

[Lebokose le leqepheng la 31]

MAKHABANE A MANG A HLAHELLETSENG A KRESTE

Ho se ee ka tšobotsi—Johanne 4:7-30.

Kutloelo-bohloko—Matheu 9:35-38; 12:18-21; Mareka 6:30-34.

Lerato le bontšang boitelo—Johanne 13:1; 15:12-15.

Botšepehi—Matheu 4:1-11; 28:20; Mareka 11:15-18.

Qenehelo—Mareka 7:32-35; Luka 7:11-15; Baheberu 4:15, 16.

Kahlolo e molemo—Matheu 15:21-28.

[Setšoantšo se leqepheng la 29]

Ha re ratana, re ikokobelletsa “molao oa Kreste” ka botšepehi

[Litšoantšo tse leqepheng la 31]

Na makhabane a Kreste a u susumelletsa ho mo sebeletsa ka botšepehi?