Jesu Bophelo le Tšebeletso Tsa Hae

Kholiseho Nakong ea Mehla ea Qetello

HA LABOBELI, la 11 Nisane, le atamela qetellong, Jesu o na le baapostola ba hae Thabeng ea Mehloaare. Ba sa tsoa tloha sebakeng sa tempele, seo ba ka se bonelang tlaasana, ’me Jesu o ne a ntse a buisana le bona ka pontšo ea boteng ba hae matleng a ’Muso le ea bofelo ba tsamaiso ea lintho.

Ha a ntšetsa pele litlhaloso tsa hae, Jesu o ba lemosa ka ho matha ka mor’a bo-Kreste ba bohata. O re boiteko bo tla etsoa, ba ho ‘thetsa le bona bakhethoa, hola ke ntho e ka etsoang.’ Empa, joaloka lintsu tse bonelang hōle, bakhethoa bana ba tla bokana moo lijo tsa moea tsa ’nete li ka fumanoang teng, ke hore, ho Kreste oa ’nete botenng ba hae bo sa bonahaleng. Ba ke ke ba thetsoa eaba ba bokana ’moho ho Kreste oa bohata.

Bo-Kreste ba bohata ba ka hlaha feela ka tsela e bonahalang. Ka ho fapaneng, boteng ba Jesu bo ke ke ba bonahala. Bo tla etsahala nakong e tšosang historing ea motho, joalokaha Jesu a re: “Letsatsi le tla fifala, khoeli e tla hloka leseli.” E, ena e tla ba nako e lefifi ka ho fetisisa ea ho phela ha motho. Ho tla ba joalokaha eka khoeli e ne e sa ka ea fana ka leseli la eona bosiu.

Jesu o tsoela pele: “Tse matla tsa leholimo li tla sisinyeha.” Ka hona o bontša hore maholimo a sebele a tla bonahala ka tsela e lelekelang ho hong. Maholimo e ke ke ea e-ba feela sebaka se laoloang ke linonyana, empa a tla tlala lifofane tsa ntoa, lirokete, le lifofa-sebakeng tse romellang boitsebiso bo tsoang sebakeng. Tšabo le pefo li tla feta ntho leha e le efe eo ho kileng ha fetoa ho eona historing e fetileng ea motho.

Ka baka leo, Jesu o re “lichaba li tla tsieleha, li be le matsoalo, leoatle le ntse le luma le maqhubu a lona. Batho ba tla neela moea ke tšabo le ke tebello ea tse tla tla lefatšeng.” Joalokaha Jesu a bolela, ka sebele nako ena e lefifi ka ho fetisisa ea ho phela ha motho e tla lebisa nakong ea ha, “pontšo ea Mor’a Motho e tla hlaha leholimong, merabe eohle ea lefatše e tla ikotla lifuba ka lillo.”—TLP.

Empa hase bohle ba tla beng ba lla ha ‘Mor’a motho a e-tla ka matla’ ho felisa tsamaiso ena ea lintho e khopo. “Bakhethoa,” ba 144 000 ba tla kopanela le Kreste ’Musong oa hae oa leholimo, ba ke ke ba lla, leha e le hore metsoalle ea bona, eo pejana Jesu a ileng a e bitsa “linku tse ling” tsa hae, e tla lla. Ho sa tsotellehe ho phela nakong e lefifi ka ho fetisisa historing ea motho, bana ba arabela khothatsong ena ea Jesu: “Etlare ha tseo li qala ho hlaha, emisang lihlooho, ’me le lelale holimo, hobane topollo ea lōna e tla be e atametse.”

E le hore barutuoa ba hae ba neng ba tla be ba phela nakong ea mehla ea qetello ba ka hlokomela ho atamela ha bofelo, Jesu o fana ka setšoantšo sena: “Bonang sefate sa feie le lifate tsohle. Ha le li bona li se li hlahisa mahlaku, le ee le tsebe le lōna hoba lehlabula le haufi. Ka mokhoa o joalo le lōna, etlare ha le bona tseo li hlaha, le tsebe hoba ’muso oa Molimo o haufi. Ka ’nete ke re ho lōna: Moloko ona o ke ke oa feta, tseo li e-so ho hlahe.”

Ka hona, ha barutuoa ba hae ba bona litšobotsi tse ngata tse fapaneng tsa pontšo li phethahatsoa, ba lokela ho hlokomela hore bofelo ba tsamaiso ea lintho bo haufi le hore ’Muso oa Molimo o tla tloha o felisa bokhopo bohle. Ha e le hantle, bofelo bo tla etsahala nakong ea bophelo ba batho ba bonang phethahatso ea lintho tsohle tseo Jesu a li bolelang esale pele! Ha a khothatsa barutuoa bao ba neng ba tla be ba phela nakong ea mehla ea qetello ea makhaola-khang, Jesu o re:

“Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehloho; hobane le tla oela ba ahileng lefatšeng lohle joalo ka sefi. Falimehang ke hona, ’me le rapele ka mehla, le tle le neoe tokelo ea ho phonyoha ho tseo tsohle tse tla etsahala, le ea ho ema pel’a Mor’a motho.” Mattheu 24:23-51; Mareka 13:21-37; Luka 21:25-36; Tšenolo 14:1, 3; Johanne 10:16.

◆ Ke maemo afe a lefatše a tšoaeang boteng ba Kreste?

◆ “Merabe eohle ea lefatše e tla ikotla lifuba ka lillo” neng, empa balateli ba Kreste ba tla be ba ntse ba etsa’ng?

◆ Jesu o fana ka setšoantšo sefe ho thusa barutuoa ba hae ba ka moso ho lemoha ha bofelo bo se bo atametse?

◆ Jesu o fana ka khothatso efe ho ba bang ba barutuoa ba hae ba neng ba tla be ba phela nakong ea mehla ea qetello?