Se Hlileng se Hlokahalang Hore Motho a Thabe

JEHOVA, “Molimo ea thabileng,” le Jesu Kreste, “ea thabileng le eo e leng eena feela ’Musi ea Matla a Maholo,” ba tseba ho feta mang kapa mang hore na ho hlokahala eng hore motho a thabe. (1 Timothea 1:11; 6:15) Kahoo, ha ho makatse hore ebe ntho ea bohlokoa e tlisang thabo e fumanoa ka Lentsoeng la Molimo, e leng Bibele.—Tšenolo 1:3; 22:7.

Thutong ea hae e tummeng ea Thabeng, Jesu o ile a hlalosa se hlokahalang hore motho a thabe. O re: “Ho thaba ba” (1) elang hloko tlhoko ea bona ea moea, (2) ba siameng, (3) ba maikutlo a bonolo, (4) ba lapelang le ho nyoreloa ho loka, (5) ba mohau, (6) ba lipelo li hloekileng, (7) ba nang le khotso, (8) ba hlorisetsoang ho loka le (9) ba nyelisoang le ho hlorisoa ka lebaka la hae.—Matheu 5:3-11.a

Na Lipolelo Tsa Jesu li Nepahetse?

’Nete ea lipolelo tse ling tsa Jesu ha e hloke tlhaloso e kaalo. Ke mang ea ka hanang hore motho ea maikutlo a bonolo, ea mohau le ea nang le khotso ea susumetsoang ke pelo e hloekileng o tla thaba haholo ho feta motho ea khenneng, ea mabifi le ea se nang mohau?

Leha ho le joalo, re ka ’na ra ipotsa hore na ke joang batho ba lapelang le ho nyoreloa ho loka kapa ba siameng ho ka thoe’ng ba thabile. Batho ba joalo ba na le pono ea sebele ka maemo a lefatše. Ba ‘feheloa le ho bobola ka lebaka la lintho tsohle tse manyala tse ntseng li etsoa’ mehleng ea rōna. (Ezekiele 9:4) Seo ka bosona ha se ba thabise. Leha ho le joalo, ha ba ithuta ka morero oa Molimo oa ho tlisa maemo a lokileng lefatšeng le ho tlisetsa batho ba hateletsoeng toka, thabo ea bona ea khaphatseha.—Esaia 11:4.

Ho rata ho loka ho boetse ho etsa hore batho ba bang ba siame ha bona ka bobona ba hlōleha khafetsa ho etsa se lokileng. Kahoo, ba ela hloko tlhoko ea bona ea moea. Batho ba joalo ba ikemiselitse ho batla tataiso ho Molimo hobane baa hlokomela hore ke eena feela ea ka thusang batho ho hlōla mefokolo ea bona.—Liproverbia 16:3, 9; 20:24.

Batho ba siamang, ba lapelang le ho nyoreloa ho loka le ba elang hloko tlhoko ea bona ea moea baa tseba hore na ke habohlokoa hakae ho ba le kamano e ntle le ’Mōpi. Kamano e ntle le batho ba bang e tlisa thabo empa, thabo e khōloanyane e tlisoa ke ho ba le kamano e ntle le Molimo. E, bao ka tieo ba ratang se lokileng, ba ikemiselitseng ho amohela tataiso ea Molimo, ba ka thaba e le kannete.

Leha ho le joalo, u ka ’na ua nka hore ho thata ho lumela hore motho ea hlorisoang le ho nyelisoa a ka thaba. Empa, a ka thaba, kaha ke Jesu ka boeena ea buileng mantsoe ao. Kahoo, mantsoe a hae a lokela ho utloisisoa joang?

Baa Hlorisoa Empa ba Thabile—Seo se ka Khoneha Joang?

Hlokomela hore Jesu ha aa ka a re ho nyelisoa le ho hlorisoa ka botsona lia thabisa. O ile a hlakisa taba tjena: “Ho thaba ba hlorisitsoeng ka lebaka la ho loka, . . . ha batho ba le nyelisa ’me ba le hlorisa . . . ka lebaka la ka.” (Matheu 5:10, 11) Kahoo, motho o thaba feela ha a utloa bohloko ka lebaka la ho nyelisetsoa ho ba molateli oa Kreste le ha a lumellanya bophelo ba hae le litekanyetso tse lokileng tseo Jesu a li rutileng.

Sena se hlakisoa ke se etsahaletseng Bakreste ba pele. Litho tsa Sanhedrine, e leng lekhotla le phahameng la Bajuda, li ile tsa ‘bitsa baapostola, tsa ba shapa, ’me tsa ba laela hore ba khaotse ho bua ka lebitso la Jesu, eaba lia ba tlohela hore ba tsamaee.’ Baapostola ba ile ba itšoara joang? “Ka hona, ba tloha ka pel’a Sanhedrine, ba thabile hobane ba ne ba nkiloe e le ba tšoaneloang ke ho hlompholloa ka lebaka la lebitso la hae. Letsatsi le leng le le leng ka tempeleng le ka ntlo le ntlo ba tsoela pele ba sa khaotse ho ruta le ho bolela litaba tse molemo mabapi le Kreste, Jesu.”—Liketso 5:40-42; 13:50-52.

Moapostola Petrose o ile a hlakisa hape hore na nyeliso le thabo li tsamaea ’moho ka kutloisiso efe. O ile a ngola tjena: “Haeba le ntse le nyelisetsoa lebitso la Kreste, lea thaba, hobane moea oa khanya, moea oa Molimo, o lutse holim’a lōna.” (1 Petrose 4:14) E, ho Mokreste ho utloa bohloko ka lebaka la ho etsa se lokileng, ho tlisa thabo ea ho tseba hore o amohela moea o halalelang oa Molimo le hoja ho utloa bohloko joalo ho se monate. Moea oa Molimo o amana joang le thabo?

Mesebetsi ea Nama Kapa Litholoana Tsa Moea?

Moea o halalelang oa Molimo o lula feela ho ba mamelang Molimo e le ’musi. (Liketso 5:32) Jehova ha a fe ba etsang “mesebetsi ea nama” moea oa hae. Mesebetsi eo ke “bohlola, ho se hloeke, boitšoaro bo hlephileng, borapeli ba litšoantšo, tšebelisano le meea, bora, ho qabana, poulelo, ho tlakoloha ka bohale, ho rata likhang, likarohano, maquloana, mohono, ho inehella botahoa, mekete e lerata, le lintho tse joaloka tsena.” (Bagalata 5:19-21) Ke ’nete hore lefatšeng la kajeno “mesebetsi ea nama” e tloaelehile haholo. Empa, ba e etsang ha ba be le thabo ea sebele le ea nako e telele. Ho e-na le hoo, ho etsa lintho tseo ho ka senya kamano e ntle eo motho a nang le eona le beng ka eena, metsoalle ea hae le batho bao a tloaelaneng le bona. Ho feta moo, Lentsoe la Molimo le bolela hore ba ‘etsang lintho tse joalo ba ke ke ba rua ’muso oa Molimo.’

Ka lehlakoreng le leng, ba hlaolelang “litholoana tsa moea,” Molimo o ba fa moea oa hae. Litšobotsi tseo litholoana tsena li bonoang ka tsona ke “lerato, thabo, khotso, tiisetso, mosa, molemo, tumelo, bonolo, boitšoaro.” (Bagalata 5:22, 23) Ha re bonahatsa litšobotsi tsena, re bōpa likamano tsa khotso le batho ba bang le Molimo, ’me seo se fella ka thabo ea sebele. (Bona lebokose.) Sa bohlokoa le ho feta ke hore, ka ho bontša lerato, mosa, molemo le litšobotsi tse ling tsa bomolimo, re thabisa Jehova ’me re ba le tšepo e thabisang ea bophelo bo sa feleng lefatšeng le lecha la Molimo la ho loka.

Thabo ke Ntho e ka Khethoang

Ha banyalani ba bang ba Jeremane, e leng Wolfgang le Brigitte ba qala ho ithuta Bibele ka tieo, ba ne ba e-na le lintho tse ngata tse bonahalang tseo batho ba nahanang hore lia hlokahala hore motho a thabe. Ba ne ba sa le bacha ba bile ba phela hantle. Ba ne ba apara liaparo tsa theko e boima, ba lula ntlong e khabisitsoeng ka tsela e majaba-jaba ba bile ba e-na le khoebo e atlehileng. Nako e ngata ea bona ba ne ba e qeta ba batla lintho tse bonahalang tse eketsehileng, empa seo ha sea ka sa ba tlisetsa thabo ea sebele. Leha ho le joalo, hamorao Wolfgang le Brigitte ba ile ba khetha ho etsa ntho e ’ngoe ea bohlokoa. Ba ile ba qala ho sebelisa nako e ngata le ho etsa boiteko bo boholoanyane ba ho hahamalla lintho tse ka ba tsoelang molemo moeeng ’me ba batla menyetla ea ho atamela haufi le Jehova. Khetho ea bona e ile ea etsa hore boikutlo ba bona bo fetohe ka potlako, e leng se ileng sa ba susumelletsa ho nolofatsa bophelo ba bona le hore e be bo-pula-maliboho, kapa baevangeli ba ’Muso ba nako e tletseng. Kajeno, ba sebeletsa e le baithaopi ofising ea lekala ea Lipaki Tsa Jehova, Jeremane. Ho feta moo, ba ntse ba ithuta puo e ’ngoe ea Asia e le hore ba thuse batho ba tsoang linaheng tse ling ho ithuta ’nete e tsoang ka Lentsoeng la Molimo, Bibele.

Na banyalani baa ba ile ba fumana thabo ea sebele? Wolfgang o re: “Haesale re tšoareha haholo ka lintho tsa moea, re thabile haholo re bile re khotsofetse haholoanyane. Ho sebeletsa Jehova ka pelo eohle ho boetse ho tiisitse lenyalo la rōna. Re ne re ntse re thabile lenyalong la rōna, empa re e-na le boikarabelo le lithahasello tse neng li etsa hore re be le lipakane tse fapaneng. Hona joale, re hahamalla pakane e le ’ngoe hammoho.”

Ho Hlokahala Eng Hore Motho a Thabe?

Ha re li otla mabal’a-nkoe, re ka re: Qoba “mesebetsi ea nama” ’me u hlaolele “litholoana tsa moea” oa Molimo. E le hore motho a thabe, o lokela ho labalabela ho ba le kamano e haufi le Molimo. Motho ea ikitlaelletsang ho finyella seo, o tla tšoaneloa ke tlhaloso ea Jesu ea motho ea thabileng.

Kahoo, u se ke ua etsa phoso ea ho etsa qeto ea hore ho ke ke ha khoneha hore motho a thabe. Ke ’nete hore hona joale e ka ’na eaba ua kula kapa mohlomong u na le mathata lenyalong la hao. Mohlomong ho se ho sa khonehe hore u be le bana, kapa ho ka etsahala hore ebe u ntse u sokola mosebetsi o motle. Mohlomong hona joale letsatsi le se le chabetse ka pokothong. Leha ho le joalo, e-ba sebete; ha u na lebaka la ho nyahama! Puso ea ’Muso oa Molimo e tla felisa mathata ana le a mang a mangata a teng. Ka sebele, haufinyane Jehova Molimo o tla phethahatsa tšepiso ea hae eo mopesaleme a e boletseng tjena: “Borena ba hao ke borena ho isa linakong tsohle tse sa lekanyetsoang . . . U fuparolla seatla sa hao u khotsofatsa takatso ea ntho e ’ngoe le e ’ngoe e phelang.” (Pesaleme ea 145:13, 16) Joalokaha bahlanka ba Jehova ba limilione lefatšeng ka bophara ba ka paka sena, ho lula u hopotse tšepiso ena e kholisang ea Jehova ho tla etsa hore u thabe haholo kajeno.—Tšenolo 21:3.

[Mongolo o botlaaseng ba leqephe]

[Lebokose le leqepheng la 6]

Lintho Tse Etsang Hore Motho a Thabe

Lerato le tla etsa hore le uena batho ba bang ba u rate.

Thabo e u fa matla a ho sebetsana le liteko ka katleho.

Khotso e u thusa hore likamano tsa hao le batho ba bang li lule li se na likhohlano.

Tiisetso e u thusa hore u lule u thabile esita leha u lekoa.

Mosa o etsa hore u atamelehe.

Molemo o etsa hore ha u hloka thuso batho ba bang ba thabele ho u thusa.

Tumelo e tla etsa hore u kholisehe hore u tla fumana tataiso ea Molimo e lerato.

Bonolo bo tla etsa hore u be le khutso pelong, monahanong ’me ’mele oa hao o tla khatholoha.

Boitšoaro bo tla fokotsa liphoso tsa hao.

[Litšoantšo tse leqepheng la 7]

E le hore u be le thabo, u tlameha ho hlokomela litlhoko tsa hao tsa moea