Jesu Bophelo le Tšebeletso Tsa Hae

Ho Ekoa le ho Tšoaroa

BOSIU bo boholo bo se bo fetile ha Judase a etelletse pele letšoele le leholo la masole, baprista ba baholo, Bafarisi, le ba bang ho ea tšimong ea Gethsemane. Baprista ba lumetse ho lefa Judase lichelete tsa silevera tse 30 ho eka Jesu.

Pejana, ha Judase a ne a tloheloa hore a tsamaee sejong sa Paseka, ho bonahala hore o ile a ea ho baprista ba baholo. Baprista bana hang-hang ba bokella liofisiri tsa bona, hammoho le sehlopha sa masole. Mohlomong Judase o ile a ba isa pele moo Jesu le baapostola ba hae ba keteketseng Paseka teng. Ha ba fumana hore ba tlohile, letšoele le leholo le nang le libetsa ’me le nkile lilampi le lirumula la latela Judase ho tsoa Jerusalema le ho tšela Khohlo ea Kedrone.

Ha Judase a etelletse pele mokoloko ho hloa Thaba ea Mehloare, o ikutloa a kholisehile ka hore o tseba moo a tla fumana Jesu teng. Bekeng e fetileng, ha Jesu le baapostola ba tsamaea ho ea le ho khutla pakeng tsa Bethania le Jerusalema, ba ne ba atisa ho emisa tšimong ea Gethsemane ho phomola le ho qoqa. Empa, joale, erekaha mohlomong Jesu o patehile lefifing tlas’a lifate tsa mehloare, masole a tla mo tseba joang? Mohlomong ha e-s’o ho ka a ’mona pele. Judase o fana ka pontšo, o re: “Eo ke tla mo aka, ke eena; le mo tšoare, ’me, le ee le eena, le mo tiisitse.”

Judase o etella pele letšoele le leholo la batho ho kena tšimong, o bona Jesu le baapostola ba hae, ’me o ea a lebile hantle ho eena. A bua a mo aka ka bonolo, o re: “Lumela, Rabbi.”

Jesu a fetola a re: “U tletse’ng mona, molekan’a ka.” Joale ha a ikaraba, o re: “Judase, hleka u eka Mor’a motho ka kako na?” Empa oa teneha ka lebaka la moeki oa hae! Jesu a ea leseling la lirumula le lilampi ’me a botsa: “Le batla mang?”

Karabo e re: “Jesu oa Nazaretha.”

Jesu o araba a eme ka sebete ka pel’a bona: “Ke ’na enoa.” Ba makalitsoe ke ho tiea hoa hae ’me ba sa tsebe hore ba lebelle eng, banna ba sutha ka santhao ’me ba oela fatše.

Jesu o tsoela pele ka bonolo: “Ke le boleletse hore ke ’na enoa. Ha le fela le batla ’na, lesang batho bana ba ikele.” Nakoana pele ka kamoreng e ka holimo, Jesu o boleletse Ntat’ae thapelong hore o bolokile baapostola ba hae ba tšepahalang ’me ha ho lea mong oa bona ea timetseng “ha e se mor’a timelo.” Joale, e le hore lentsoe la hae le ka phethahala, o kōpa hore balateli ba hae ba lesoe ba ikele.

Ha masole a hlaphoheloa likelellong, a ema, ’me a qala ho tlama Jesu, baapostola ba hlokomela se tla tloha se etsahala. Baa botsa: “Morena, a re tla hlatha ka sabole na?” Pele Jesu a arabela, Petrose, a tsomola e ’ngoe ea lisabole tse peli tseo baapostola ba tlileng le tsona, o hlasela Malkuse, mohlanka oa moprista e moholo. Sabole ea Petrose e fosa hlooho ea mohlanka empa e khaola tsebe ea hae e ka letsohong le letona.

Jesu a bua a namola o re: “Ba leseleng ho fihlela hona!” A ama tsebe, o folisa leqeba. Joale o ruta thuto ea bohlokoa, o laela Petrose: “Busetsa sabole ea hao selateng sa eona, hobane bohle ba tšoereng sabole, ba tla bolaoa ka sabole. Kapa na u re, nka sitoa ho rapela Ntate hona joale, ’me o ba a ea ’nea lilegione tsa mangeloi tse leshome le metso e ’meli, le tse fetisang?”

Jesu o lumela ho tšoaroa. Hobane oa hlalosa: “Mangolo a ka phethahala joang, a boletseng hore e ka khona ho be joalo?” ’Me oa eketsa: “Na nke ke ka noa senoelo see ke se neiloeng ke Ntate?” O lumellana ka ho felletseng le thato ea Molimo ka eena!

Joale Jesu o bua le letšoele. Oa botsa: “Le tsoile hae ho tla ntšoara ka lisabole le ka melamu, joale ka ha eka ke lesholu! Ke ne ke ntse ke lula le lōna tempeleng ka tsatsi le leng le le leng, ke ruta, ’me ha lea ka la ntšoara! Empa hoo hohle ho etsahetse, hore mangolo a baprofeta a phethahale.”

Ka nako eo sehlopha sa masole le molaoli oa sesole le liofisiri tsa Bajode ba tšoara Jesu ’me baa mo tlama. Ha baapostola ba bona sena, ba tlohela Jesu ’me baa baleha. Leha ho le joalo, mohlankana—eo e ka ’nang eaba ke morutuoa Mareka—o sala har’a letšoele. Mohlomong o ne a le ka tlung eo Jesu a keteketseng Paseka ho eona, ’me hamorao a latela letšoele ho tloha moo. Leha ho le joalo, hona joale, o hlokometsoe, ’me boiteko bo entsoe hore a tšoaroe. Empa o ba tlohella kobo ea hae ea line ’me o baleha a apere liaparo tse fokolang. Mattheu 26:47-56; Mareka 14:43-52; Luka 22:47-53; Johanne 17:12; 18:3-12.

◆ Ke hobane’ng ha Judase a ne a ikutloa a kholisehile hore o tla fumana Jesu tšimong ea Gethsemane?

◆ Jesu o bontša ho ameha ka baapostola ba hae joang?

◆ Ke bohato bofe boo Petrose a bo nkang ho sireletsa Jesu, empa Jesu o re’ng ho eena?

◆ Jesu o senola joang hore o lumellana ka ho felletseng le thato ea Molimo ka eena?

◆ Ha baapostola ba tlohela Jesu, ke mang ea salang, ’me ke eng se etsahalang ho eena?