Ke Naleli ea Mofuta Ofe e Ileng ea Isa “Banna ba Bohlale” ho Jesu?
Lipale tse tummeng tsa Keresemese li re naleli eo e ne e le pontšo e ntle e tsoang leholimong. Na ho hlile ho joalo?
◼ Mongoli oa Bibele ea bitsoang Matheu o hlalosa hore tsela eo naleli eo e neng e ikhetha ka eona e ile ea hapa mahlo a “banna ba bohlale” ba tsoang Bochabela, ’me qetellong ea ba isa ho lesea Jesu. (Matheu 2:1-12, King James Version) Lipale tse tummeng tsa Keresemese li re naleli eo e ne e le pontšo e ntle e tsoang leholimong. Buka e ’ngoe e re naleli eo e ne e le e ’ngoe ea “lintho tseo Molimo a li lokiselitseng esale pele tseo ka tsona . . . lesea Jesu le ileng la tlotloa le ho amoheloa ke Ntate e le Mora ea ratoang.” Esita le lipina tse binoang ka Keresemese li tlotla naleli eo. Naleli ee e ne e le eng?
Ba bang ba ’nile ba bolela hore ho hlahella ha naleli eo, e ne e le ketsahalo feela ea tlhaho e bang teng leholimong. Litsebi tse ngata li hlalosa hore e ne e le moo lipolanete li fetanang teng. Empa joalokaha The New Bible Dictionary e bontša, “ketsahalo eo e ne e ke ke ea hlalosoa ka hore ke ‘naleli.’” Ha lipolanete li fetana li atamelane, hoa bonahala hore li ngata ’me ha li hlahelle eka ke naleli e le ’ngoe feela. Litsebi tse ling li ’nile tsa hlalosa ketsahalo eo e le e ’ngoe ea tse bang teng leholimong, joaloka ho hlahella ha mochochonono kapa ho phatloha ha naleli. Empa ha ho le e ’ngoe ea liketsahalo tsena e neng e ka etsahala sepakapakeng ka tsela e neng e ka isa banna bao motseng o itseng ka ho khetheha le ho ema holim’a ntlo e itseng.
Na ho ka etsahala hore ebe naleli eo e ne e le ketsahalo ea tlhaho kapa e bile teng ka tataiso ea bomolimo? Nahana ka lintlha tsena: “Banna ba bohlale” e ne e se batho bao kajeno re ka ba bitsang litsebi; hape e ne e se marena. E ne e le “linohe tsa linaleli,” joalokaha liphetolelo tse ngata tsa Senyesemane li ba bitsa joalo. Ba ne ba etsa seo Mangolo a Halalelang a se nyatsang. (Deuteronoma 18:10-12) Hlokomela hore ke linohe tsena feela tsa linaleli tseo ho tlalehoang hore li “bone” naleli eo. Haeba naleli eo e ne e hlile e le ea sebele, batho bohle ba ka be ba e bone joaloka lebone le holim’a leralla. Empa esita le Morena Heroda o ile a tlameha ho li kōpa hore li mo hlalosetse ka naleli eo. Naleli eo e ile ea qala ka ho isa linohe tsa linaleli Jerusalema ho Heroda ea neng a hloile Mesia ea tlang ’me a batla ho mo bolaea. O ne a rerile ho bolaea lesea Jesu. Ho tloha moo, naleli eo ea li isa boroa, Bethlehema moo Jesu a neng a le hona teng, kahoo ea beha bophelo ba Jesu kotsing.
Lintlha tsena li fana ka bopaki ba hore naleli eo e ne e tsoa mohloling o khopo, oo e ka ’nang eaba e ne e le Satane Diabolose. Bibele e re o sebelisa “lipontšo le limakatso tsa leshano.” (2 Bathesalonika 2:9) Bakreste ba ’nete ha baa lokela ho makatsoa ke hore ebe Satane a ka bontša linohe tsa linaleli feela ntho eo e kang ke naleli le ho etsa hore “naleli” eo e li ise ho Mora oa Molimo, eo a neng a batla ho mo timetsa. Ke ’nete hore ha ho motho ea ka qhekellang Jehova Molimo. Kahoo, ha ho makatse hore ebe leqheka la Diabolose la ho bolaea Jesu esale lesea le ile la nyopa.
Empa ka ho thahasellisang, Molimo o ile a tsebahatsa ka tsela ea mohlolo ho tsoaloa ha Jesu. Bosiung boo Jesu a hlahileng ka bona, lengeloi le ile la hlahella ho balisa ’me la tsebahatsa hore ho hlahile “Mopholosi.” Lengeloi leo le ile la boela la fa balisa bao litaelo e le hore ba ka etela Jesu. Ka mor’a moo ho ile ha hlahella mangeloi a mangata ’me a rorisa Molimo. (Luka 2:8-14) Molimo o ile a sebelisa mangeloi ana eseng naleli hore a tsebise batho ka tsoalo ea Jesu.