Pono ea Bibele

Ho Reteletsa Lerama le Leng ho Bolela’ng?

THUTONG ea hae e tsebahalang ea thabeng, Jesu Kreste o ile a re: “U se ke ua hanyetsa ea khopo; empa mang kapa mang ea u jabelang lerameng la hao le letona, u mo reteletse le le leng.”—Matheu 5:39.

O ne a bolela’ng? Na o ne a khothalletsa Bakreste hore ba se ke ba etsa letho ho itšireletsa ha ba hlaseloa? Na ho lebeletsoe hore Bakreste ba khutse feela ha ba hlekefetsoa ’me ba se ke ba batla tšireletso ea molao?

Seo Jesu a Neng a se Bolela

E le hore re utloisise seo Jesu a neng a se bolela, re lokela ho nahana ka taba eo a neng a bua ka eona, hammoho le batho bao a neng a bua le bona. Pele Jesu a fana ka keletso e boletsoeng ka holimo o ile a bua ka seo bamameli ba hae ba neng ba se ba ntse ba se tseba ho tsoa Mangolong a Halalelang. O ile a re: “Le utloile hore ho itsoe, ‘Leihlo bakeng sa leihlo le leino bakeng sa leino.’”—Matheu 5:38.

Litemana tseo Jesu a neng a bua ka tsona ke Exoda 21:24 le Levitike 24:20. Ke ho thahasellisang hore tumellanong le Molao oa Molimo, kahlolo ea “leihlo bakeng sa leihlo,” e ne e fanoa ka tsela e loketseng ka mor’a hore mofosi a qosoe ka pel’a baprista le baahloli ba neng ba sekaseka maemo le hore na mofosi o ne a ikemiselitse hakae ho etsa tlōlo.—Deuteronoma 19:15-21.

Ha nako e ntse e ea, Bajuda ba ile ba khopamisa tsela eo molao oo o neng o sebelisoa ka eona. Tlhalosong ea Bibele e ngotsoeng ke Adam Clarke, lekholong la bo19 la lilemo o ile a re: “Ho bonahala eka Bajuda ba ne ba sebelisa molao ona [oa leihlo bakeng sa leihlo le leino bakeng sa leino] e le lebaka la ho jarana ka pelo le ho etsa liketso tsohle tsa boiphetetso. Hangata liketso tsa boiphetetso li ne li etsoa ka tsela e fetelletseng ’me motho a etsa bobe bo fetang boo a bo entsoeng.” Leha ho le joalo, Mangolo a ne a sa lumelle batho hore ba jarane ka pelo.

Seo Jesu a ileng a se ruta Thutong ea hae ea Thabeng mabapi le ‘ho reteletsa lerama le leng’ se bontša se neng se hlile se boleloa ke Molao oo Molimo a neng a o file Baiseraele. Jesu o ne a sa bolele hore ha balateli ba hae ba jabeloa lerameng le leng, ba lokela ho therekela ebe ba tlisa le leng. Mehleng ea ha ho ne ho ngoloa Bibele, e leng se atisang ho etsahala le kajeno, ho jabela motho lerameng ho ne ho sa etsoe ka sepheo sa ho mo lematsa empa sa ho mo tlotlolla e le ho mo qholotsa hore a loane.

Kahoo, ho hlakile hore Jesu o ne a bolela hore haeba motho a jabela e mong lerameng—kapa a mo hlaba ka mantsoe—e le ha a leka ho mo qholotsa hore a loane, motho eo ha aa lokela ho iphetetsa. Ho e-na le hoo, o lokela ho qoba ho etsa lintho tse ka etsang hore ba lule ba iphetetsa.—Baroma 12:17.

Mantsoe a Jesu a tšoana le a ileng a buuoa ke Morena Solomone ha a ne a re: “U se ke ua re: ‘Feela joalokaha a nkentse, ke tla mo etsa joalo. Ke tla buseletsa e mong le e mong ho ea ka liketso tsa hae.’” (Liproverbia 24:29) Molateli oa Jesu o tla reteletsa lerama le leng ka kutloisiso ea ho se lumelle ba bang ho mo qobella hore a kene ‘tlhōlisanong.’—Bagalata 5:26.

Ho Thoe’ng ka ho Itšireletsa?

Ho reteletsa lerama le leng ha ho bolele hore Mokreste ha aa lokela ho itšireletsa ha batho ba mo hlasela. Jesu o ne a sa bolele hore ha rea lokela ho itšireletsa empa o ne a bolela hore ha rea lokela ho busetsa molamu sefateng le ho lumella batho hore ba re susumelletse ho iphetetsa. Le hoja e le bohlale ho ikhula ha ho hlokahala e le hore re qobe ntoa, ho loketse hore re itšireletse ’me re batle thuso ea mapolesa haeba re hlaseloa.

Balateli ba Jesu ba mehleng ea pele ba ile ba sebelisa molao-motheo ona ka tsela e nepahetseng ha ba ne ba sireletsa litokelo tsa bona tsa molao. Ka mohlala, moapostola Pauluse o ile a sebelisa tsamaiso ea molao ea mehleng ea hae ho sireletsa tokelo ea hae ea ho phetha taelo ea Jesu ea hore balateli ba hae ba bolele. (Matheu 28:19, 20) Ha ba le leetong la bona la boboleli motseng oa Filipi, Pauluse le Silase, eo e neng e le moromuoa-’moho le eena ba ile ba tšoaroa ke ba boholong pusong ’me ba qosoa ka hore ke batlōli ba molao.

Ka bobeli ba ile ba shapuoa phatlalatsa ’me ba kenngoa chankaneng empa ho sa buuoa le nyeoe. Ha Pauluse a fumana monyetla, o ile a sebelisa litokelo tsa hae e le moahi oa Roma. Ha ba boholong ba utloa hore Pauluse ke moahi oa Roma, ba ile ba tšoha liphello tsa seo ’me ba kōpa Pauluse le Silase hore ba tsamaee ntle le ho ba bakela mathata. Kahoo, Pauluse o re behetse mohlala ka hore a ‘sireletse le ho theha ka molao litaba tse molemo.’—Liketso 16:19-24, 35-40; Bafilipi 1:7.

Joaloka Pauluse, Lipaki Tsa Jehova li ile tsa tlameha ho ea makhotleng a linyeoe ka makhetlo e le hore li sireletse mosebetsi oa tsona oa Bokreste. Li ’nile tsa tlameha ho etsa sena esita le linaheng tse ipolelang hore li fa baahi ba tsona tokoloho ea bolumeli. Le litabeng tse amang tlōlo ea molao le tšireletseho, Lipaki Tsa Jehova ha lia lebelloa hore li reteletse lerama le leng—ebe li phutha matsoho feela ha li hlekefetsoa. Li nka bohato ba molao ho itšireletsa.

Kahoo, joaloka Bakreste, Lipaki li nka mehato e loketseng hore li sebelise litokelo tse itseng tsa molao, le hoja li tseba hore hangata mehato e joalo ha e atlehe hakaalo. Joaloka Jesu, li tlohella litaba ka ho feletseng matsohong a Molimo, li kholisehile hore o tla nka khato a tseba lintlha tse amehang ka botlalo ’me phetetso leha e le efe ea hae e tla bontša toka ka ho feletseng. (Matheu 26:51-53; Juda 9) Bakreste ba ’nete baa hopola hore phetetso ke ea Jehova.—Baroma 12:17-19.

NA U KILE UA IPOTSA?

● Bakreste ba lokela ho qoba liketso life?—Baroma 12:17.

● Na Bibele e hanela motho hore a batle tšireletso ea molao?—Bafilipi 1:7.

● Jesu o ne a kholisehile hore Ntate oa hae o tla etsa’ng?—Matheu 26:51-53.