Na U Talima Batho ba Bang Kamoo Jehova a ba Talimang Kateng?
“Ho se ke ha e-ba le karohano ’meleng . . . Litho tsa oona li [lokela ho hlokomelana] ka tsela e tšoanang.”—1 BAKOR. 12:25.
1. U ile ua ikutloa joang ha u ne u qala ho kena paradeiseng ea moea?
HA RE ne re qala ho tsoa lefatšeng le khopo ’me re qala ho kopanela le batho ba Jehova, ha ho pelaelo hore re ne re thabetse ho utloa lerato le mofuthu le teng har’a bona. Ba fapane hakaakang le batho ba hlaha, ba lehloeo le ba ratang likhang ba laoloang ke Satane! Re ile ra kena paradeiseng ea moea eo ho eona ho renang khotso le bonngoe.—Esa. 48:17, 18; 60:18; 65:25.
2. (a) Ke eng e ka amang tsela eo re talimang batho ba bang ka eona? (b) Ho ka ’na ha hlokahala hore re etse’ng?
2 Leha ho le joalo, ka lebaka la ho se phethahale re ka ’na ra qala ho ba le pono e fosahetseng ka barab’abo rōna. Ho se phethahale ha rōna ho ka etsa hore re hōlise liphoso tsa barab’abo rōna ho e-na le hore re shebe litšobotsi tsa moea tseo ba nang le tsona ka kakaretso. Ka mantsoe a mang, re lebala ho ba talima kamoo Jehova a ba talimang kateng. Haeba sena se etsahala ho rōna, ke nako ea hore re hlahlobe tsela eo re talimang ba bang ka eona ’me re etse hore e lumellane le pono ea Jehova e hlakileng.—Ex. 33:13.
Tsela eo Jehova a Bonang Barab’abo Rōna ka Eona
3. Bibele e bapisa phutheho ea Bokreste le eng?
3 Joalokaha ho tlalehiloe ho 1 Bakorinthe 12:2-26, moapostola Pauluse o ile a bapisa phutheho ea Bakreste ba tlotsitsoeng le ’mele o nang le “litho tse ngata.” Feela joalokaha litho tsa ’mele li fapana, litho tsa phutheho li na le botho bo fapaneng haholo ebile li na le bokhoni bo sa tšoaneng. Leha ho le joalo, Jehova o amohela ho se tšoane hona. O rata setho se seng le se seng ebile o se nka e le sa bohlokoa. Kahoo, Pauluse le eena o re eletsa hore litho tsa phutheho li lokela ho ‘hlokomelana ka tsela e tšoanang.’ Sena se ka ’na sa e-ba thata hobane botho ba batho ba bang bo ka fapana le ba rōna.
4. Ke hobane’ng ha ho ka ’na ha hlokahala hore re fetole tsela eo re talimang barab’abo rōna ka eona?
4 Mohlomong re ka ba ra ba le tšekamelo ea ho sheba mefokolo ea barab’abo rōna haholo. Haeba re etsa joalo, ha e le hantle ho tšoana le ha re sebelisa k’hamera e nang le lense e bonang lintho tse haufi feela. Empa tsela eo Jehova a talimang barab’abo rōna ka eona e tšoana le ho sebelisa lense e nkang setšoantšo se seholoanyane, e akarelletsang libaka tse pota-potileng ntho e fotoang. Re ka ’na ra ba le tšekamelo ea ho sheba feela ntho eo re sa e rateng, athe Jehova eena o bona motho kaofela, ho akarelletsa le litšobotsi tse ntle tseo a nang le tsona. Haeba re loanela ho tšoana le Jehova, seo se tla thusa haholo ho hōlisa moea oa lerato le bonngoe ka phuthehong.—Baef. 4:1-3; 5:1, 2.
5. Ke hobane’ng ha ho sa lokela hore re ahlole batho ba bang?
5 Jesu o ne a tseba hantle hore hangata batho ba sa phethahalang ba na le tšekamelo ea ho ahlola ba bang. O ile a eletsa: “Khaotsang ho ahlola e le hore le se ke la ahloloa.” (Mat. 7:1) Hlokomela hore Jesu ha aa ka a re: “Le se ke la ahlola”; o itse: “Khaotsang ho ahlola.” O ne a tseba hore bamameli ba hae ba bangata ba ne ba se ba ntse ba tloaetse ho ahlola ba bang. Na ebe mohlomong le rōna re se re e-na le mokhoa o joalo? Haeba re e-na le mokhoa o joalo, re lokela ho sebetsa ka thata hore re o tlohele, e le hore re se ke ra ahloloa habohloko. Ha e le hantle, ke mang ea re fileng tokelo ea ho ahlola motho eo Jehova a mo khethetseng mosebetsi o itseng kapa ho bolela hore motho eo ha aa lokela ho ba karolo ea phutheho? E ka ’na eaba mor’abo rōna o na le bofokoli bo itseng, empa haeba Jehova a ntse a mo amohela, na ho tla be ho loketse hore rōna re mo nyatse? (Joh. 6:44) Na kannete rea lumela hore Jehova ke eena ea etellang mokhatlo oa hae pele le hore haeba ho hlokahala hore ho etsoe liphetoho, o tla nka khato ka nako ea hae e loketseng?—Bala Baroma 14:1-4.
6. Jehova o talima bahlanka ba hae joang?
6 Ntho e ntle ka Jehova ke hore o khona ho bona seo Bakreste ka bomong ba tla khona ho ba sona ha ba se ba phethahetse lefatšeng le lecha. O boetse o tseba tsoelo-pele ea moea eo ba seng ba e entse. Ka hona, ha a na lebaka la hore a ’ne a shebe bofokoli bo bong le bo bong boo ba nang le bona. Ho Pesaleme ea 103:12 rea bala: “Joalokaha bochaba-tsatsi bo le hōle le bophirima-tsatsi, ka ho tšoanang o suthiselitse litlōlo tsa rōna hōle le rōna.” Re le batho ka bomong re lokela ho leboha seo hakaakang!—Pes. 130:3.
7. Re ithuta’ng ka tsela eo Jehova a ileng a talima Davida ka eona?
7 Ka Mangolong re bona bopaki ba hore Jehova o na le bokhoni bo makatsang ba ho bona litšobotsi tse ntle tseo motho a nang le tsona. Molimo o ile a hlalosa Davida e le “mohlanka oa ka Davida, ea ileng a boloka litaelo tsa ka le ea ntatetseng ka pelo eohle ea hae ka ho etsa feela se neng se nepahetse mahlong a ka.” (1 Mar. 14:8) Ha e le hantle, rea tseba hore Davida o ile a etsa liphoso. Leha ho le joalo, Jehova o ile a khetha hore a shebe litšobotsi tse ntle tsa Davida hobane o ne a tseba hore pelo ea Davida e ne e lokile.—1 Likron. 29:17.
Bona Barab’eno ka Tsela eo Jehova a ba Bonang ka Eona
8, 9. (a) Re ka tšoana le Jehova ka tsela efe? (b) Taba ee e ka bontšoa joang, hona e ka re ruta eng?
8 Jehova o khona ho bona se ka lipelong tsa batho, empa rōna re ke ke. Sena ka bosona ke lebaka le utloahalang la hore re se ke ra ahlola ba bang. Ho hang ha re tsebe sepheo sa motho e mong. Re lokela ho leka ho etsisa Jehova ka hore re se ke ra sheba haholo-holo mefokolo ea batho, eo qetellong e tla nyamela. Na e ne e ke ke ea e-ba hantle hore re ikemisetse ho tšoana le Jehova tabeng ee? Ha re etsa joalo, seo se tla thusa haholo hore ho rene moea oa khotso ha re e-na le bara le baralib’abo rōna.—Baef. 4:23, 24.
9 Ho etsa mohlala, nahana ka serutha sa ntlo—liphaepe tse khakeletsang metsi li soahlamane, lifensetere li pshatlehile ’me siling e sentsoe ke metsi. Batho ba bangata ba ka ’na ba sheba ntlo eo eaba ba etsa qeto ea hore e lokela ho qhaqhoa; e shebahala hampe. Empa ho ka ’na ha hlaha motho e mong ea nang le maikutlo a fapaneng ka ho feletseng. A ka ’na a se ke a siroa kelello ke tsela eo ntlo e shebahalang ka eona empa a ka bona hore mohaho o ntse o tiile le hore ntlo eo e ka tsosolosoa. O reka ntlo eo, oa e lokisa ’me o ntlafatsa chebahalo ea eona. Ka mor’a moo, batho ba fetang ka tsela ba bolela kamoo ntlo eo e leng ntle kateng. Na re ka tšoana le motho eo ea entseng matsapa a ho lokisa ntlo eo? Ho e-na le ho sheba feela mefokolo ea barab’abo rōna e bonahalang, na re ka hlokomela litšobotsi tsa bona tse ntle ra ba ra elelloa hore ba ka khona ho hatela pele moeeng? Haeba re etsa joalo, re tla be re etsisa Jehova ka ho rata barab’abo rōna ka lebaka la litšobotsi tsa bona tsa moea tse ntle.—Bala Baheberu 6:10.
10. Keletso e ho Bafilipi 2:3, 4 e ka re thusa joang?
10 Moapostola Pauluse o ile a fana ka keletso e ka re thusang likamanong tsa rōna le batho bohle ka phuthehong. O ile a khothalletsa Bakreste: “Le [se] etse letho ka lebaka la ho rata likhang kapa ka lebaka la ho ipolelisa, empa ka ho ikokobetsa kelellong le nka hore ba bang ba le phahametse, le sa hlokomele lithahasello tsa litaba tsa lōna feela, empa hape le hlokomela lithahasello tsa ba bang.” (Bafil. 2:3, 4) Boikokobetso bo tla re thusa hore re be le pono e nepahetseng ka batho ba bang. Ho rata batho le ho sheba litšobotsi tsa bona tse ntle ho tla boela ho re thuse ho ba talima kamoo Jehova a ba talimang kateng.
11. Liphutheho tse ling li anngoe ke liphetoho life?
11 Lilemong tsa morao tjena, liphetoho tse etsahalang lefatšeng lohle li entse hore batho ba tlohe ka bongata libakeng tse ling ho ea ho tse ling. Hona joale metseng e meng e meholo ho lula batho ba tsoang linaheng tse fapa-fapaneng. Ba bang ba batho ba fallelang libakeng tseo re lulang ho tsona ba thahasella ’nete ea Bibele, ’me ba rapela Jehova le rōna. Batho bana ba “tsoa lichabeng tsohle le melokong eohle le bathong bohle le malemeng ’ohle.” (Tšen. 7:9) Ka lebaka leo, hona joale liphutheho tse ngata tsa rōna li se li e-na le batho ba tsoang lichabeng tsohle tsa lefatše.
12. Re lokela ho ba le pono efe e mong ka e mong, hona ke hobane’ng ha ho ka ’na ha e-ba thata ho etsa see ka linako tse ling?
12 Ho ka ’na ha hlokahala hore ka phuthehong ea habo rōna, re ele hloko haholo-holo taba ea hore re be le pono e nepahetseng e mong ka e mong. Seo se hloka hore re ele hloko keletso ea moapostola Petrose ea hore re bontše “lerato la bara ba motho le se nang boikaketsi” re be re “ratane ka matla haholo ho tloha pelong.” (1 Pet. 1:22) Ho ka ba thata ho hlaolela lerato le kameho ea sebele moo ho nang le batho ba tsoang lichabeng tse sa tšoaneng tsa lefatše. Re ka ’na ra fapana haholo le barapeli-’moho le rōna ka setso, thuto, boemo ba moruo le morabe. Na u thatafalloa ke ho utloisisa tsela eo barapeli-’moho le uena ba morabe o mong ba nahanang ka eona le eo ba itšoarang ka eona? E ka ’na eaba ba nahana ka tsela e tšoanang ka uena. Ho sa tsotellehe seo, kaofela ha rōna rea laeloa: “Le be le lerato bakeng sa mokhatlo oohle oa barab’abo rōna.”—1 Pet. 2:17.
13. Ke liphetoho life tseo ho ka ’nang ha hlokahala hore re li etse mokhoeng oo re nahanang ka oona?
13 Ho ka ’na ha hlokahala hore re etse liphetoho tse itseng mokhoeng oo re nahanang ka oona e le hore re atolose lerato la rōna hore le akarelletse barab’abo rōna bohle. (Bala 2 Bakorinthe 6:12, 13.) Na ka linako tse ling re iphumana re bua mantsoe a kang “’na ha ke leeme, empa . . . ” ebe ka mor’a moo re thathamisa litšobotsi tse seng ntle tseo re nahanang hore batho ba morabe o itseng ba na le tsona? Maikutlo a joalo a ka ’na a bontša hore ho hlokahala hore re ntše leeme leo re ntseng re e-na le lona botebong ba lipelo tsa rōna. Re ka ’na ra ipotsa, ‘Na kamehla ke etsa matsapa a ho tseba batho ba setso se seng?’ Ho itlhahloba ho joalo ho ka ’na ha re thusa hore re ntlafatse mabapi le ho sebelisana le mokhatlo oa barab’abo rōna oa machaba le hore re o rate.
14, 15. (a) Fana ka mehlala ea ba ileng ba fetola pono ea bona ka batho ba bang? (b) Re ka ba etsisa joang?
14 Bibele e re bolella ka mehlala e metle ea batho ba ileng ba fetola pono ea bona, e mong oa bona e ne e le moapostola Petrose. Kaha Petrose e ne e le Mojuda, a ka be a ile a qoba ho kena ntlong ea Molichaba. U ka inahanela feela hore na o ile a ikutloa joang ha a ne a kōptjoa hore a ee ntlong ea Korneliase, Molichaba ea sa bollang! Petrose o ile a fetoha ha a lemoha hore e ne e le thato ea Molimo hore batho ba lichaba tsohle e be karolo ea phutheho ea Bokreste. (Lik. 10:9-35) Saule, eo hamorao e ileng ea e-ba moapostola Pauluse, le eena o ile a tlameha ho etsa liphetoho le ho khaotsa ho ba leeme. O ile a lumela hore o ne a hloile Bakreste hoo ‘a ileng a hlorisa phutheho ea Molimo ka ho feteletseng le ho e ripitla.’ Leha ho le joalo, ha Morena Jesu a ne a mo khalemela, Pauluse o ile a etsa liphetoho tse khōlō a ba a qala le ho amohela litaelo ho batho bao a neng a kile a ba hlorisa.—Bagal. 1:13-20.
15 Ha ho pelaelo hore moea oa Jehova o ka re thusa ho fetola boikutlo ba rōna. Haeba re hlokomela hore ho sa na le leeme le ntseng le saletse ka hare ho rōna, a re loaneleng ho le ntša ka metso ’me re “[boloke] bonngoe ba moea ka tlamo e kopanyang ea khotso.” (Baef. 4:3-6) Bibele e re khothalletsa hore re “ikapese lerato, etsoe ke tlamo e phethahetseng ea bonngoe.”—Bakol. 3:14.
Ho Etsisa Jehova Tšebeletsong ea Rōna
16. Thato ea Molimo ke efe malebana le batho?
16 Moapostola Pauluse o ile a ngola a re: “Molimo ha a leeme.” (Bar. 2:11) Morero oa Jehova ke hore batho ba tsoang lichabeng tsohle ba kopanele tokisetsong ea hae ea borapeli. (Bala 1 Timothea 2:3, 4.) Ho finyella seo, o entse tokisetso ea hore “litaba tse molemo tse sa feleng” li bolelloe “sechaba se seng le se seng le moloko o mong le o mong le leleme le leng le le leng le batho ba bang le ba bang.” (Tšen. 14:6) Jesu o itse: “Tšimo ke lefatše.” (Mat. 13:38) See se bohlokoa hakae ho uena le ho ba lelapa la hao?
17. Re ka thusa batho ba mefuta eohle joang?
17 Hase bohle ba ka khonang ho isetsa ba bang molaetsa oa ’Muso likarolong tse hōle tsa lefatše. Leha ho le joalo, re ka khona ho isa molaetsa ona ho batho ba tsoang likarolong tsohle tsa lefatše ba lulang tšimong ea rōna. Na re falimehela menyetla ea ho pakela batho ba mefuta eohle, eseng feela bao re qetileng lilemo re ntse re ba pakela? Ke hobane’ng ha u sa ikemisetse ho nka khato ea ho pakela ba e-s’o pakeloe ka botlalo?—Bar. 15:20, 21.
18. Jesu o ile a bontša joang hore o ne a amehile ka batho?
18 Jesu o ne a labalabela ho thusa batho bohle. Ha aa ka a bolela sebakeng se le seng feela. Tlaleho e ’ngoe ea Bibele e re bolella hore o ile “a qala ho etela metse le metsana eohle.” ’Me eitse “ha a bona bongata a bo hauhela” eaba o bontša hore ho hlokahala hore bo thusoe.—Mat. 9:35-37.
19, 20. Tse ling tsa litsela tseo ka tsona re ka bontšang hore re amehile ka mefuta eohle ea batho joaloka Jehova le Jesu, ke life?
19 Ke litsela life tse ling tseo u ka bontšang boikutlo bo tšoanang ka tsona? Ba bang ba entse matsapa a ho paka likarolong tsa tšimo ea bona tse sa sebetsoeng khafetsa. Sena se ka akarelletsa ho paka libakeng tsa khoebo, lirapeng tsa boikhathollo, boemelong ba lipalangoang, kapa ka pel’a mehaho ea bolulo eo ho seng bonolo ho kena ho eona. Ba bang ba entse boiteko ba ho ithuta puo e ncha e le hore ba ka pakela batho ba merabe e meng ba lulang tikolohong ea bona kapa batho ba sa kang ba pakeloa khafetsa nakong e fetileng. Ho ithuta ho lumelisa batho bao ka puo ea bona ho ka bontša hore u hlile ua ba tsotella. Haeba ho sa khonehe hore rōna re ithute puo e ’ngoe, na re ka khothatsa ba ntseng ba ithuta? Ho hang ha re batle ho nyahamisa ba ntseng ba etsa boiteko ba hore ba pakele batho ba tsoang naheng e ’ngoe kapa ho belaella sepheo sa bona. Bophelo ba batho bohle ke ba bohlokoa mahlong a Molimo, ’me re batla ho talima lintho ka tsela e tšoanang.—Bakol. 3:10, 11.
20 Ho talima batho kamoo Molimo a ba talimang kateng ho boetse ho bolela ho pakela batho bohle, ho sa tsotellehe maemo a bona. Ba bang e ka ’na eaba ke batho ba se nang mahae, ba bokhoahlapa, kapa bao ho totobetseng hore ba phela bophelo ba boitšoaro bo bobe. Haeba batho ba itseng ba re tšoara hampe, seo ha sea lokela ho etsa hore re be le maikutlo a seng matle ka batho bohle ba sechaba seo kapa ba morabe oo. Batho ba bang ba ile ba tšoara Pauluse hampe, empa ha aa ka a lumella seo hore se etse hore a khaotse ho pakela batho ba sechaba seo. (Lik. 14:5-7, 19-22) O ile a ba le tšepo ea hore batho ba bang ba ne ba tla thabela ho mamela.
21. Ho talima ba bang kamoo Jehova a ba talimang kateng ho tla u thusa joang?
21 Joale ho hlakile ho feta leha e le neng pele hore ho ba le pono e nepahetseng—e leng pono ea Jehova—hoa hlokahala ha re sebelisana le barab’abo rōna ka phuthehong, mokhatlong oa machaba oa barab’abo rōna, le batho ba tšimong. Haeba re ka bonahatsa pono ea Jehova haholo, re tla etsa hore ho be le khotso le bonngoe. ’Me re tla ba boemong bo molemo ba ho thusa ba bang hore ba rate Jehova, Molimo ‘ea sa kang a bontša leeme’ empa a rata batho bohle, hobane “kaofela ha bona ke mosebetsi oa matsoho a hae.”—Jobo 34:19.
Na U ka Araba?
• Re lokela ho loanela ho qoba ho ba le pono efe ka barab’abo rōna?
• Re ka etsisa Jehova joang mabapi le kamoo re talimang barab’abo rōna kateng?
• U ithutile eng mabapi le kamoo re lokelang ho talima mokhatlo oa machaba oa barab’abo rōna kateng?
• Re ka etsisa tsela eo Jehova a talimang batho ka eona joang ha re le tšebeletsong?
[Setšoantšo se leqepheng la 26]
U ka etsa joang hore u tsebe batho ba litso tse ling?
[Litšoantšo leqepheng la 28]
Ke ka litsela life u ka finyellang batho ba eketsehileng ka litaba tse molemo?