Tšaba Jehova, Ea Utloang Thapelo

“Uena ea utloang thapelo. Batho bohle ba tla tla ho uena.”—PESALEME EA 65:3, “TLP.”

 1. Ke hobane’ng ha re lokela ho lebella hore Jehova a be le litlhokahalo bakeng sa ba lakatsang ho mo atamela ka thapelo?

JEHOVA MOLIMO ke “Morena oa bosafeleng.” Hape ke “Ea utloang thapelo,” eo “batho bohle ba tla tla” ho eena. (Tšenolo 15:3, NW; Pesaleme ea 65:3, TLP) Empa ba lokela ho tla ho eena joang? Marena a lefatše a laola lintho tse kang moaparo le boitšoaro ba batho ba lumelletsoeng ho kena moo ba leng teng. Ka hona, ruri re lokela ho lebella Morena ea se Nang ho Fela ho ba le litlhokahalo tse tlamehang ho finyelloa ke mang kapa mang ea lakatsang ho tla ka pele ho eena ka kōpo le teboho.—Ba-Filippi 4:6, 7.

 2. Ho phahama lipotso life tabeng ea thapelo?

² Morena ea se Nang ho Fela o hloka eng ho ba mo atamelang ka thapelo? Ke bo-mang ba ka rapelang ’me ba utluoa? ’Me ba ka rapela mabapi le eng?

Ho Atamela Morena ea se Nang ho Fela

 3. U ka fana ka mehlala efe ea lithapelo tse ileng tsa etsoa ke bahlanka ba Molimo ba pele, hona na ba ne ba o atamela ka mokena-lipakeng?

³ Pele e e-ba moetsalibe, Adama, “mora oa Molimo,” ka ho hlakileng o ne a buisana le Morena oa bosafeleng. (Luka 3:38, NW; Genese 1:26-28) Ha mora oa Adama Abele a hlahisa “matsibolo a mang a mohlape oa hae” ho Molimo, ntle ho pelaelo nyehelo ena e ile ea felehetsoa ka lipolelo tsa kōpo le thoriso. (Genese 4:2-4) Noe, Abrahama, Isaaka, le Jakobo ba ile ba haha lialetare ’me ba atamela Jehova ka thapelo ka linyehelo tsa bona. (Genese 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) ’Me lithapelo tsa Salomone, Esdrase, le bapesaleme ba neng ba bululetsoe ke Molimo li bontša hore Baiseraele ba ne ba atamela Molimo ka ntle ho mokena-lipakeng ofe kapa ofe.—1 Marena 8:22-24; Esdrase 9:5, 6; Pesaleme ea 6:1, 2; 43:1; 55:1; 61:1; 72:1; 80:1; 143:1.

 4. (a) Katamelo e ncha ho Molimo ka thapelo e ileng ea theoa lekholong la pele la lilemo ke efe? (b) Ke hobane’ng ha e le ho loketseng haholo-holo hore thapelo e etsoe ka lebitso la Jesu?

⁴ Katamelo e ncha ho Molimo ka thapelo e ile ea theoa lekholong la pele la lilemo la Mehla e Tloaelehileng ea rōna. E ne e se e le ho o atamela ka Mora oa oona, Jesu Kreste, ea neng a e-na le lerato le khethehileng ho batho. Bophelong ba hae pele e e-ba motho, Jesu o ne a sebeletsa ka thabo e le “mosebetsi oa setsebi,” ea ratang lintho tse amanang le batho. (Liproverbia 8:30, 31, NW) Ha e se e le motho lefatšeng, ka lerato Jesu o ile a thusa batho ba sa phethahalang moeeng, a phekola ba kulang, a ba a tsosa bafu. (Mattheu 9:35-38; Luka 8:1-3, 49-56) Ka holim’a tsohle, Jesu ‘o neetse bophelo ba hae ho ba topollo ea ba bangata.’ (Mattheu 20:28) Ka hona, ke ho loketseng hakaakang hore ba ithuisang molemo topollong ba atamele Molimo ka enoa ea ratang batho hakaale! Hona joale ona ke oona feela mocha oa ho atamela Morena ea se Nang ho Fela, hobane Jesu ka boeena o itse: “Ha ho motho ea ka tlang ho Ntate, ha e se ka ’na” hape, “Ntho tsohle tsee le tla li qela ho Ntate ka lebitso la ka, o tla le fa tsona.” (Johanne 14:6; 16:23) Ho kōpa lintho ka lebitso la Jesu ho bolela ho mo hlokomela e le tsela ea ho atamela Ea Utloang thapelo.

 5. Boikutlo ba Molimo ke bofe ka lefatše la batho, ’me see se ama thapelo joang?

⁵ Re lokela ho ananela haholo-holo lerato leo Jehova a le bontšitseng ka ho fana ka topollo. Jesu o itse: “Molimo o ratile lefatše [la batho] hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) Botebo ba lerato la Molimo bo hlalositsoe hantle mantsoeng a mopesaleme: “Joale ka leholimo ha le phahamile holimo ho lefatše, mohau oa hae o moholo joalo ho ba mo tšabang. Joale ka ha Bochabela bo le hole le Bophirimela, o lahlela makhopo a rōna joalo hole le rōna. Joale ka ha ntat’a motho a hauhela bana ba hae, Jehova o hauhela joalo ba mo tšabang. Hobane o tsebisisa ho bōpjoa ha rōna, o elelloa hoba re lerōle feela.” (Pesaleme ea 103:11-14) Ke ho khothatsang hakaakang ho tseba hore lithapelo tsa Lipaki tse inehetseng tsa Jehova li nyolohela ho Ntate ea lerato joalo ka Mora oa hae!

Tokelo e Lekanyelitsoeng

 6. Jehova o tlameha ho atameloa ka thapelo ka boikutlo bofe?

⁶ Marena a batho ha a lumelle mang kapa mang feela ho kena ka hare ho ntlo ea borena ho sa ka ha etsoa tsebiso. Ho ba moifong oa morena ke tokelo e lekanyelitsoeng. Hoa tšoana ka thapelo e eang ho Morena oa bosafeleng. Ka ho hlakileng, ba mo atamelang ka Jesu Kreste ba e-na le kananelo e loketseng ea boholo bo khanyang ba Molimo ba ka lebella ho utluoa. Morena ea se Nang ho Fela o tlameha ho atameloa ka boikutlo ba tlhompho, ba borapeli. ’Me ba lakatsang ho utluoa ba tlameha ho bontša “ho tšaba Jehova.”—Liproverbia 1:7.

 7. “Ho tšaba Jehova” ke eng?

⁷ “Ho tšaba Jehova” ke eng? Ke ho ba le tlhompho e tebileng ho Molimo, e tsamaeang le tšabo e ntle ea ho o halefisa. Tšabo ena e hlaha tebohong e tebileng bakeng sa mosa oa oona o sa tšoanelang le molemo. (Pesaleme ea 106:1) E akarelletsa ho o amohela e le Morena oa bosafeleng, ea nang le tokelo le matla a ho tlisa kotlo, ho akarelletsa lefu, holim’a e mong le e mong ea sa mo utloeng. Batho ba bontšang ho tšaba Jehova ba ka mo rapela ka tebello ea ho utluoa.

 8. Ke hobane’ng ha Molimo o utloa lithapelo tsa ba o tšabang?

⁸ Joalokaha ho ka lebelloa, Molimo ha o arabele lithapelo tsa batho ba khopo, ba sa tšepahaleng, le ba inkang ba lokile. (Liproverbia 15:29; Esaia 1:15; Luka 18:9-14) Empa ba tšabang Jehova baa utluoa hobane ba ikamahantse le litekanyetso tsa hae tse lokileng. Empa ba entse ho fetang hoo. Ba tšabang Jehova ba inehetse ho Molimo ka thapelo ’me ba tšoantšelitse sena ka ho kolobetsoa metsing. Ka hona ba na le tokelo e sa lekanyetsoang ea thapelo.

9, 10. Na batho ba sa kolobetsoang ba ka rapela ka tšepo ea ho utluoa?

⁹ Hore a utluoe ke Molimo, motho o tlameha ho senola likhopolo tsa borapeli tse leng tumellanong le thato ea Molimo. E, o tlameha ho tiea, empa ho hlokahala ho fetang hoo. Moapostola Pauluse o ngotse: “Empa tumelo ha e le sieo, ha ho kamoo Molimo o ka khahlisoang; ea atamelang Molimo e ka khona a lumele hobane o teng, le hoba ke oona moputsi oa ba o batlang.” (Ba-Heberu 11:6) Ka hona, na batho ba sa kolobetsoang ba ka khothalletsoa ho rapela ka tšepo ea hore ba tla utluoa?

¹⁰ Ka ho hlokomela hore thapelo ke tokelo e lekanyelitsoeng, Morena Salomone o ile a kōpa hore Jehova a utloe feela balichaba ba rapellang tempeleng ea Molimo Jerusalema. (1 Marena 8:41-43) Makholo a lilemo hamorao, Molichaba Kornele “o na a sa phetse ho rapela Molimo” joaloka monna ea chesehang. Hoba a fumane tsebo e nepahetseng, Kornele o ile a inehela ho Molimo, oo joale o ileng oa mo fa moea o halalelang. Ka mor’a sena, Kornele le Balichaba ba bang ba ile ba kolobetsoa. (Liketso 10:1-44) Joaloka Kornele, kajeno mang kapa mang ea hatelang pele ho leba boinehelong a ka khothalletsoa ho rapela. Empa motho ea sa ithuteng Mangolo ka tieo, ea sa tsebeng litlhokahalo tsa bomolimo bakeng sa thapelo, ea e-s’o bontše boikutlo bo khahlisang Molimo a ke ke a boleloa e le ea tšabang Jehova, ea nang le tumelo, kapa ea ’matlang ka tieo. Motho ea joalo ha a boemong ba ho etsa lithapelo tse amohelehang ho Molimo.

11. Ho etsahetse’ng ka ba bang ba neng ba se ba hatela pele ho leba kolobetsong, ’me ba lokela ho ipotsa eng?

¹¹ Batho ba bang bao ka nako e ’ngoe ba neng ba hatela pele ho leba boinehelong hamorao ba ka ’na ba bonahala ba tsila-tsila. Haeba ba se na lerato le lekaneng ho Molimo ka lipelong tsa bona hore ba ka inehela ho oona ba sa itšiele letho, ba tšoanela ho ipotsa hore na e be ba sa ntsane ba e-na le tokelo e babatsehang ea thapelo. Ho bonahala ho se joalo, hobane ba atamelang Molimo ba tlameha hore ka tieo ba o batle ba be ba batle ho loka le boikokobetso. (Sofonia 2:3) E mong le e mong eo kannete a tšabang Jehova ke molumeli ea inehelang ho Molimo ’me o ho tšoantšetsa ka ho kolobetsoa. (Liketso 8:13; 18:8) ’Me ke balumeli ba kolobelitsoeng feela ba nang le tokelo e sa lekanyetsoang ea ho atamela Morena ea se Nang ho Fela ka thapelo.

‘Ho Rapela ka Moea o Halalelang’

12. Ke neng ho ka thoeng motho o ‘rapela ka moea o halalelang’?

¹² Ka mor’a hore motho a inehele ho Molimo ’me a ho tšoantšetse ka ho kolobetsoa, o boemong ba ho ‘rapela ka moea o halalelang.’ Mabapi le sena, Juda o ngotse: “Empa ha e le lōna, baratuoa, le ’ne le ikhahe holim’a tumelo ea lōna e halalelang ka ho fetisisa, ’me le rapele ka Moea o Halalelang; le ipoloke leratong la Molimo, le ntse le lebeletse mohau oa Morena oa rōna Jesu Kreste, hore le fuoe bophelo bo sa feleng.” (Juda 20, 21) Motho o rapela ka moea o halalelang ha a rapela tlas’a pululelo ea moea oa Molimo, kapa matla a sebetsang, ’me e le tumellanong le lintho tse boletsoeng ka hare ho Lentsoe la Oona. Mangolo, a ngotsoeng tlas’a pululelo ea moea oa Jehova, a re bontša mokhoa oa ho rapela le seo re ka se kōpang thapelong. Ka mohlala, ka kholiseho re ka rapella hore Molimo o re fe moea oa oona o halalelang. (Luka 11:13) Ha re rapela ka moea o halalelang, lithapelo tsa rōna li senola boemo ba pelo boo Jehova a bo ratang.

13. Haeba re rapela ka moea o halalelang, re tla qoba eng, ’me ke keletso efe ea Jesu eo re tla e sebelisa?

¹³ Ha re rapela ka moea o halalelang, lithapelo tsa rōna ha li tlale mantsoe a buuoang ho khahlisa batho. Ha li etsoe ka mantsoe a phetoa-phetoang ka hlooho. Che, ha li na mantsoe a bonahalang eka ke poko e se nang moelelo, lipolelo tsa thoriso tse sa etsoeng ka tieo. Lithapelo tsa mofuta oo li atile Bokreste-’mōtoaneng le Babylona e Moholo ka kakaretso, ’muso oa lefatše oa bolumeli ba bohata. Empa Bakreste ba ’nete ba utloa keletso ea Jesu: “Ha le rapela ha lea lokela ho ba joaloka baikaketsi; hobane ba rata ho rapela ba eme masynagogeng le lihukung tsa literata tse khōlō, e le hore ba ka bonahala ho batho . . . ’Me ha le rapela le se ke la phepheretsa mantsoe joaloka bahetene; hobane [ka phoso] ba nahana hore ba tla etsa hore ba mameloe ka bongata ba seo ba se buang. Kahoo le se ke la itšoantša le bona.”—Mattheu 6:5-8, Byington.

14. Ba bang ba buile lipolelo life tse bontšang temoho mabapi le thapelo?

¹⁴ Ho phaella ho Jesu le lingoli tsa Bibele, ba bang ba buile lipolelo tse bontšang temoho mabapi le thapelo. Ka mohlala, sengoli sa Lenyesemane John Bunyan (1628-88) se itse: “Thapelo ke ho tšollela moea ho Molimo, ka Kreste, ho etsoang ka tieo, ho nang le kelello, le ho nang le kameho e mofuthu ka matla le ka thuso ea Moea, bakeng sa lintho tse kang tseo Molimo o li tšepisitseng.” Mosebeletsi oa Puritan Thomas Brooks (1608-80) o hlokometse: “Molimo ha o talime bokheleke ba lithapelo tsa hao, hore na li khahleha hakae; leha e le sona sebōpeho sa lithapelo tsa hao, hore na li telele hakae; leha e le lenane la lithapelo tsa hao, hore na li ngata hakae; ha o talime bohlale ba lithapelo tsa hao, hore na li hlophisehile hakae; empa o talima hore na li etsoa ka tieo hakae.” Lipolelo tsena li ka ’na tsa phaelloa ka tlhaloso ea Bunyan: “Thapelong ho molemo ho ba le pelo e se nang mantsoe, ho e-na le mantsoe a se nang pelo.” Empa haeba re tiile ’me re finyella litlhokahalo tsa bomolimo, re ka kholiseha joang hore Morena oa bosafeleng o tla utloa lithapelo tsa rōna?

Ha ho Mohla a Kileng a re Soetsa

15. Ha e le hantle, Jesu o itse’ng ho Luka 11:5-8?

¹⁵ Le ka mohla Jehova Molimo a ke ke a ithiba litsebe hore a se utloe lithapelo tsa bahlanka ba hae ba inehetseng. Sena se ile sa hlakisoa mantsoeng a Jesu a khothatsang ha barutuoa ba hae ba ne ba kōpa thuto mabapi le thapelo. Ka karolo o itse: “Ekare ha e mong ho lōna a e-na le motsoalle, ’me a ea ho eena bosiu bo boholo, a re ho eena: Motsoalle, nkalime mahobe a mararo; hobane molekan’a ka oa moeti o fapohetse ha ka, ’me ke hloka see nka se beang pel’a hae; ’me eo, ea leng kateng, ha a ka mo fetola, a re: Se nkhathatse, hobane monyako o se o koetsoe, ’me bana ba ka ba banyenyane ba robetse le ’na liphateng, ke sitoa ho tsoha ho u fa; ke re ho lōna: Leha a na a ke ke a tsoha ho mo fa kahobane ke motsoalle oa hae, o tla tsoha, a mo fe hohle hoo a ho hlokang ka baka la phehello ea hae.” (Luka 11:1, 5-8) Morero oa setšoantšo see e ne e le ofe?

16. Mabapi le thapelo, Jesu o ne a batla hore re etse eng?

¹⁶ Ka sebele Jesu o ne a sa bolele hore Jehova ha aa ikemisetsa ho re thusa. Ho fapana le hoo, Kreste o batla hore re tšepe Molimo ka ho felletseng ’me re o rate ka ho lekaneng hore re ka o rapela re sa phetse. Ka hona, Jesu o ile a tsoela pele: “Ke re ho lōna, Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Hobane e mong le e mong ea kōpang oa amohela, ’me e mong le e mong ea batlang oa fumana, ’me e mong le e mong ea kokotang o tla buleloa.” (Luka 11:9, 10, NW) Ka hona, ruri re lokela hore re tsoele pele ho rapela ha re hlaheloa ke mahloriso, ho tsieleha ka baka la bofokoli bo bong ba botho bo metseng ka metso, kapa teko leha e le efe e ’ngoe. Ka mehla Jehova o itokiselitse ho thusa bahlanka ba hae ba tšepahalang. Ha ho mohla a reng ho rōna: ‘Se nkhathatseng.’

17, 18. (a) Jesu o re khothallelitse ho kōpa moea o halalelang joang, hona ke eng se eketsang matla mantsoeng a hae? (b) Jesu o ile a bapisa tšebelisano ea motsoali oa lefatšeng le ea Molimo joang?

¹⁷ Hore re tle re thabele kamano e haufi le Molimo, re hloka moea oa hae o halalelang, kapa matla a sebetsang. Kahoo, Jesu o ile a tsoela pele: “Ntat’a motho ke ofe har’a lōna, ekareng ha ngoan’a hae a kōpa bohobe ho eena, a ka mo fang lejoe? Leha a kōpa hlapi, a ka hla a mo fa noha bakeng sa hlapi na? Leha a kōpile lehe, a ka mo fa phepheng na? ’Me ha esita lōna ba lonya, le tseba ho nea bana ba lōna lintho tse molemo, Ntat’a lōna ea leholimong o tla fetisisa hakakang ka ho nea Moea o Halalelang ho ba o kōpang ho eena!” (Luka 11:11-13) Mattheu 7:9-11 e bua ka ho fa lejoe sebakeng sa bohobe. Mohopolo o hatisoang ke mantsoe a Jesu oa eketseha ha re hlokomela hore bohobe ba linaheng tsa boholo-holo tsa Bibele ka boholo le ka sebōpeho bo ne bo tšoana le lejoe le sephara, le chitja. Mefuta e meng ea linoha e tšoana le mefuta e itseng ea litlhapi, ’me ho na le phepheng e nyenyane e tšoeu e batlang e tšoana le lehe. Empa haeba ntate a kōptjoa bohobe, tlhapi, kapa lehe, ke ntate oa mofuta ofe ea neng a tla fa ngoan’a hae lejoe, noha, kapa phepheng?

¹⁸ Ka mor’a moo Jesu o ile a bapisa litšebelisano tsa motsoali oa lefatšeng le tsa Molimo ho litho tsa lelapa la Oona la barapeli. Haeba rōna, le hoja ka tekanyo e itseng re le khopo ka baka la boetsalibe bo futsitsoeng, re fa bana ba rōna limpho tse ntle, re lokela ho lebella hakaakang hore Ntate oa rōna oa leholimo a fane ka mpho e hlollang ea moea oa hae o halalelang ho bahlanka ba hae ba tšepahalang ba o kōpang ka boikokobetso!

19. (a) Ke eng e bontšoang ke mantsoe a Jesu a tlalehiloeng ho Luka 11:11-13 le Mattheu 7:9-11? (b) Haeba re tsamaisoa ke moea o halalelang, re tla talima liteko tsa rōna joang?

¹⁹ Mantsoe a Jesu a bontša hore re lokela ho kōpa Molimo moea oa Oona o halalelang o eketsehileng. Haeba re tsamaisoa ke oona, re ke ke ra ‘belaela ka seo re nang le sona bophelong’ ’me ra talima liteko le lintho tse nyahamisang e le tse hlileng li re ntšang kotsi. (Juda 16, NW) Ke ’nete hore “motho ea tsoetsoeng ke mosali o na le matsatsi a se makae, ’me o khotše litsietsi,” ’me ba bangata ha baa ka ba phela ho bona ha mathata kapa masisa-pelo a bona a fela. (Jobo 14:1) Empa le ka mohla a re se keng ra talima liteko tsa rōna e le majoe, linoha, le liphepheng tseo Ea Utloang thapelo a re fileng tsona ka tsela e ’ngoe e itseng. Ke mohlala o phethahetseng oa lerato ’me ha a leke mang kapa mang ka lintho tse mpe. Ho fapana le hoo, o re fa ‘mpho e ’ngoe le e ’ngoe e ntle le neo e ’ngoe le e ’ngoe e phethehileng.’ Qetellong, o tla lokisa ntho e ’ngoe le e ’ngoe bakeng sa bohle ba mo ratang le ba mo tšabang. (Jakobo 1:12-17; 1 Johanne 4:8, NW) Ba seng ba tsamaile ’neteng ka lilemo ba tseba ho tsoa phihlelong hore ka thapelo le tumelo, tse ling tsa liteko tsa bona tse thata ka ho fetisisa li sebelelitse ho ba tsoela molemo ’me li ekelitse litholoana tsa moea oa Molimo bophelong ba bona. (3 Johanne 4) Ha e le hantle, ke tsela efe e molemo ho feta eo ea ho ithuta ho itšetleha ka Ntate oa rōna oa leholimo le ho thusoa ho hlaolela litholoana tsa moea tsa lerato, thabo, khotso, mamello, mosa, molemo, tumelo, bonolo, le boitšoaro?—Ba-Galata 5:22, 23, NW.

20. Mantsoe a Jesu a tlalehiloeng ho Luka 11:5-13 a lokela ho ba le phello efe holim’a rōna?

²⁰ Ka hona mantsoe a Jesu a tlalehiloeng ho Luka 11:5-13 a re fa tiisetso e hlohonolofetseng ea lerato la Jehova le tlhokomelo ea hae e mosa. Sena se lokela ho tlatsa lipelo tsa rōna teboho le lerato tse tebileng. Se tšoanela ho matlafatsa tumelo ea rōna le ho eketsa takatso ea rōna ea ho ea hangata bonamelong ba maoto a Morena ea se Nang ho Fela le ho lula pel’a boleng ba hae bo lerato. Ho feta moo, mantsoe a Jesu a re tiisetsa hore ha ho mohla re tla soetsoa ’me re khutle re sa fumana letho. Ntate oa rōna oa leholimo o thaba ka ho fetisisa ha re lahlela mejaro ea rōna ho eena. (Pesaleme ea 55:22; 121:1-3) ’Me ha rōna, joaloka bahlanka ba hae ba inehetseng ba tšepahalang, re kōpa moea oa hae o halalelang, o re fa oona a sa khanane. Ona ke Molimo oa rōna o lerato, ’me re ka ba le tumelo e felletseng ea hore ke Ea Utloang lithapelo tsa rōna.

Na u sa Hopola?

◻ Re tlameha ho atamela Molimo ka thapelo ka mang, hona hobane’ng?

◻ Ke ka tsela efe thapelo e leng tokelo e lekanyelitsoeng?

◻ ‘Ho rapela ka moea o halalelang’ ho bolela eng?

◻ U ka paka joang ka Mangolo hore lithapelo tsa Lipaki tsa Jehova tse kolobelitsoeng tse tšepahalang lia utluoa?

[Litšoantšo tse leqepheng la 14]

Joalokaha bo-ntate ba batho ba fa bana ba bona limpho tse ntle, Jehova o fana ka moea o halalelang ho ba mo kōpang