Tsela e Tšesaane e Isang Tokolohong
BATHO ba seng bakae ba hlalefileng ba pheha khang ea hore bokahohle bo laoloa ke melao ea tlhaho. Melao ena e laola ntho e ’ngoe le e ’ngoe, ho tloha ho liathomo tse nyenyane ho isa ho lihlopha tsa linaleli tse nang le limilione tse likete tsa linaleli. Haeba ho ne ho se joalo, ho ne ho ke ke ha reroa ’me ho ne ho ke ke ha e-ba le kutloisiso; bophelo ka bobona bo ne bo ke ke ba e-ba teng. Ka ho utloisisa melao ea tlhaho le ho sebelisana le eona, motho o khonne ho finyella mesebetsi e tsotehang, e kang ho tsamaea khoeling le ho hasetsa lithelevisheneng tse malapeng a rōna litšoantšo tse mebala tse tsoang sebakeng leha e le sefe se lefatšeng kapa esita le tse hōle sepaka-pakeng.
Empa ho thoe’ng ka melao ea boitšoaro? Na ho e khomarela ho na le molemo le litholoana ka tsela e tšoanang? Ho bonahala ba bangata ba ikutloa hore ha ho melao ea boitšoaro ’me ba khetha filosofi e se nang lithibelo kapa bolumeli bo lumellanang le litakatso tsa bona.
Leha ho le joalo, ho na le ba bang ba khethang tsela e ’ngoe, ‘tsela e tšesane e lebisang bophelong’ joalokaha e bontšitsoe ka Bibeleng. Ha rea lokela ho makatsoa ke hore ke palo e fokolang feela e e khethang, kaha Jesu o ile a re ka tsela e tšesaane: “Ba e fumanang ha ba bakae.” (Mattheu 7:14) Ke hobane’ng ha e le ba seng bakae feela?
Hobane tsela e tšesaane e na le lithibelo tsa melao le melao-motheo ea Molimo. E tla ipiletsa feela ho motho eo ka botšepehi a lakatsang hore bophelo ba hae bo be tumellanong le litekanyetso tsa Molimo. Ka ho fapaneng haholo le tsela e sephara, e etsang hore eke ho na le tokoloho empa ha e le hantle e fetola batho makhoba, tsela e tšesaane, e shebahalang e na le lithibelo, e lokolla motho ka litsela tsohle tseo e leng tsa bohlokoa. Meeli ea eona e behoa ke ‘molao o phethehileng, e leng oa tokoloho.’—Jakobo 1:25.
Kamoo Tsela e Tšesaane e Lokollang
’Nete ke hore hase kamehla ho leng bonolo ho lula tseleng e tšesaane. Motho e mong le e mong ea phelang ha aa phethahala ’me o futsitse tšekamelo ea ho etsa bobe. Kahoo, motho a ka ’na a ba le tšekamelo ea ho kheloha hanyenyane. Leha ho le joalo, melemo ea ho khomarela ‘tsela ena e patisaneng’ e tšoaneloa ke ho ikhalemela leha e le hofe ho hlokahalang kapa ho etsa liphetoho, hobane Molimo o ‘re ruta se re tšoanelang.’—Esaia 48:17; Ba-Roma 3:23.
Ho etsa mohlala: Batsoali ba bohlale ba ngola fatše ‘tsela e patisaneng’ ea lijo tseo ba li fepang bana ba bona. Ka linako tse ling sena se bolela hore ba lokela ho ema ho seo ba se buileng nakong ea lijo. Empa ha bana ba hōla, ba tla ananela taeo e lerato ea batsoali ba bona. Ha e se e le batho ba baholo, ba tla be ba se ba e-na le tatso ea lijo tse matlafatsang. ’Me, mefuta e sa tšoaneng e fumanehang ea lijo tse matlafatsang ’mele e tla tlosa boikutlo bane ba hore ba kile ba fuoa lithibelo.
Ka tsela ea moea, Molimo o etsa se tšoanang ho ba tseleng e tšesaane e lebisang bophelong. O hōlisa ka hare ho ba bonolo litakatso tse hahang tse lebisang thabong le tokolohong ea ’nete. Sena o se etsa ka ho fana ka Lentsoe la hae, Bibele. Ho feta moo, o re memela ho rapella moea oa hae hore o re thuse, ’me o re laela hore re kopanele le Bakreste ’moho le rōna, e leng bona ba ka re khothatsang hore re lule tseleng e tšesaane. (Ba-Heberu 10:24, 25) E, Molimo o lerato, ’me tšobotsi ena e phahameng ka ho fetisisa e tšehetsa merero le litsela tsohle tsa hae.—1 Johanne 4:8.
Ha lerato, khotso, molemo, boitšoaro le litholoana tse ling tsa moea oa Molimo li hlōla, tsela e tšesaane ha e bonahale e na le lithibelo. Joalokaha lengolo le bolela, “ha ho molao o hanang tse joalo.” (Ba-Galata 5:22, 23) “Moo Moea oa Morena o leng teng, tokoloho e teng.” (2 Ba-Korinthe 3:17) Esita le hona joale, Bakreste ba ’nete ba latsoa tokoloho ena. Ba lokolohile linthong tse ngata tse tlisetsang batho tšabo kajeno, tse kang tšabo ea bokamoso le tšabo ea tumela-khoela ka lefu. Ho hlasimolla hakaakang ho nahanisisa ka bokamoso boo ho bona “lefatše le tla tlala tsebo ea Jehova, joalo ka ha metsi a aparetse leoatle”! (Esaia 11:9) Joale, esita le eona tšabo ea bonokoane e tla be e felile. Liloto le litšepe tsa tšireletso li ke ke tsa hlola li e-ba teng. Bohle ba tla ikutloa ba lokolohile ba bile ba sireletsehile—motšehare le bosiu, ha ba le hae leha ba se teng. Eo e tla ba tokoloho ka sebele!
Re Kholisehile ka Thuso ea Molimo
’Nete ke hore, ho phela ka litekanyetso tsa Molimo ho hloka boiteko, empa “litaelo tsa oona ha li boima,” esita le ho batho ba sa phethahalang. (1 Johanne 5:3) Ha re ntse re leka ho tšoaneleha tseleng e tšesaane ’me re fumana melemo ea ho tsamaea ho eona, re hōlisa lehloeo la rōna bakeng sa liketso le monahano o khethollang bao ba tsamaeang tseleng e sephara. (Pesaleme ea 97:10) Ke ho ipiletsang letsoalong la e mong le e mong oa rōna ho mamela molao oa Molimo. Ho e-na le “bohloko ba pelo” le “moea o soabileng” tse bonahalang ho ba bangata, Molimo o-oa tšepisa: “Bonang, bahlanka ba ka ba tla bina, ka baka la thabo ea lipelo tsa bona.” E, pelo e koetlisitsoeng ke Jehova e thabile ebile e lokolohile.—Esaia 65:14.
Jesu o ile a shoa e le hore ho ka ba bonolo hore re fumane tokoloho ea ’nete. Bibele e re: “Molimo o ratile lefatše hakalo, o bile oa le nea Mora oa oona ea tsoetsoeng a ’notši, hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) Hona joale, e le Morena oa ’Muso oa Molimo oa leholimo, Jesu o laola melemo ea sehlabelo seo. Kapele ka mor’a ‘mahlomola a maholo,’ ha tsela e sephara le ba tsamaeang ho eona ba timetsoa, ka mamello o tla qala ho tsamaisa moloko oa batho o mamelang ho o lebisa qetellong ea tsela e tšesaane, phethehong ea batho. (Tšenolo 7:14-17; Mattheu 24:21, 29-31) Qetellong, re tla bona ho phethahala ha tšepiso ena e hlollang: “Le tsona tse bōpiloeng li tla holloa bohlankeng ba tšenyeho, li tle li be tokollong ea khanya ea bana ba Molimo.” Tokoloho ena e fanoeng ke Molimo e ke ke ea fetisoa ke letho. Esita le lona lefu le tla be le felisitsoe.—Ba-Roma 8:21; Tšenolo 21:3, 4.
Ka ho bona le ho utloisisa ka ho hlakileng hore na tsela e tšesaane e lebisa kae, motho o khona ho khetha tsela ena hamolemo ’me a tsoela pele ho tsamaea ho eona. Ka ho khetheha ba banyenyane ba thusoa hore ba se shebele lintho haufi le ho se ikutloe ba tenoa ke hoo ba ho nkang e le lithibelo tse phahamisoang ke litekanyetso tsa Molimo. Ba ithuta ho li bona e le bopaki ba lerato la Molimo hape e le tširelo khahlanong le bobe bohle bo fumanoang tseleng e sephara. (Ba-Heberu 12:5, 6) Ho hlakile hore ho hlokahala hore motho a be le mamello, a hopola hore ho nka nako ho hōlisa litšoaneleho le litakatso tsa bomolimo, joalo feela kaha ho nka nako hore sefate sa litholoana se behe litholoana tse ntle. Empa sefate se tla beha haeba se hlaoleloa le ho nosetsoa.
Kahoo, ithute Lentsoe la Molimo, kopanela le Bakreste ba bang ’me o ‘se phetse ho rapella’ moea o halalelang. (1 Ba-Thessalonika 5:17) Tšepa Molimo hore a u thuse ho “u tsamaisa litseleng tsohle tsa hao.” (Liproverbia 3:5, 6) Empa na tsee tsohle lia sebetsa? Na e hlile lia thusa? E, li ile tsa thusa Tom hammoho le Mary, bao ho builoeng ka bona sehloohong se fetileng.
Ba Ile ba Emisa ho Tsamaea Tseleng e Sephara
Tom o-oa ngola: “Bohareng ba lilemo tsa bo-1970, re ile ra kopana le Lipaki tsa Jehova ha e mong oa tsona a ne a etetse ha rōna. Puisano e ile ea lebisa thutong ea Bibele. Butle-butle, ke ile ka qalella ho hloekisa bophelo ba ka. Ke ile ka kolobetsoa ka 1982 ’me hona joale ke sebeletsa phuthehong e sebakeng sena. Mora oa rōna le eena hona joale o kolobelitsoe. Ke leboha mosali oa ka ka ho ’mamella lilemong tseo tsohle tsa pele ke ithuta ’nete. ’Me ka holim’a tsohle ke leboha Jehova le Mora oa hae, Kreste Jesu, ka tsohle tseo ba re fileng tsona le ka tšepo eo hona joale re nang le eona ka bokamoso.”
Joale ho thoe’ng ka Mary? Ha e le hantle, o ne a nahana hore Molimo a ke ke a mo tšoarela le ka mohla, empa o ile a batla ho ithuta ka eena molemong oa bana ba hae. Ha a utloa hore Lipaki tsa Jehova li ithuta Bibele le moahisani oa hae, le eena o ile a kōpa thuso. Leha ho le joalo, mekhoa ea hae e mebe e neng e se e metse ka metso e ile ea etsa hore a thatafalloe ke ho hatela pele. Thuto e ne e ee e tsoele pele hantle, e re kae-kae e nyahamise. Leha ho le joalo, moralinyana oa hae ea lilemo li supileng o ne a lula a mo khothatsa. O ne a ee a re: “’Mè, tsoela pele. U ka khona!” Joale Mary o ne a ee a iteke haholoanyane.
Ha monna oa hae eo a lulang le eena empa ba sa nyalana ka molao, eo le eena a sebelisang lithethefatsi hampe, a khutlela lapeng, ka ho tšoanang le eena o ile a kopanela thutong. Qetellong bobeli ba bona ba ile ba hlōla mekhoa ea bona e mebe. Joale, ka mor’a hore ba tiise lenyalo la bona ka molao le ho inehela ka kolobetso, ba ile ba e-ba le thabo e khōlō ’me ka lekhetlo la pele ba ikutloa joaloka lelapa la sebele. Ka masoabi, Mary o ile a qetella a bolailoe ke AIDS, empa o ile a shoa pelo ea hae e tsepame tšepisong ea Bibele ea tsoho ea bafu le bophelo lefatšeng la paradeise, moo ho tla beng ho hloekisitsoe moneketsela leha e le ofe oa tsela e sephara e tletseng bokhopo.
E, ho bonolo ho tsoa tseleng e sephara le e pharaletseng e lebisang tšenyehong. Kreste Jesu o ile a re: “’Me bophelo bo sa feleng, ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Johanne 17:3) Joale, ke hobane’ng ha u sa etse qeto e tiileng ea hore u tsamaee tseleng e tšesaane e lebisang bophelong? Ka ho nka ka botebo le ka ho sebelisa seo u ithutileng sona Lentsoeng la Molimo, uena ka bouena u ka ’na oa bona tšepiso ena ea Bibele e thobang pelo e phethahala: ‘U tla tseba ’nete ’me ’nete e tla u lokolla.’—Johanne 8:32.