Ho Lekoa le ho Hlokoloa Mehleng ea Kajeno
“Ke mang ea ka mamellang letsatsi la ho tla ha hae? Ke mang ea ka emang ho hlaheng ha hae?”—MALAKIA 3:2.
1. Ha Jehova a e-tla tempeleng ea moea mehleng ea kajeno, o ile a fumana eng, ho mema potso efe?
HA ‘MORENA oa ’nete’ a e-tla tempeleng ea moea a e-na le ‘lenģosa la hae la selekane’ nakoana kamor’a hore ’Muso o hlongoe leholimong ka 1914, Jehova o ile a fumana eng? Batho ba hae ho ne ho hlokahala hore ba tšekoe le ho hloekisoa. Na ba ne ba tla ikokobeletsa see ’me ba mamelle tlhatsuo leha e le efe e hlokahalang ea mokhatlo o hlophisitsoeng oa bona, tšebetso ea bona, thuto ea bona le boitšoaro ba bona? Joalokaha Malakia a ile a bolela: “Ke mang ea ka mamellang letsatsi la ho tla ha hae? Ke mang ea ka emang ho hlaheng ha hae.”—Malakia 3:1, 2.
2. Mehleng ea kajeno, “bara ba Levi” ba Malakia 3:3 ke bafe?
2 Jehova o amohela boikarabelo ba ho hlatsoa le ho hloekisa “bara ba Levi.” (Malakia 3:3) Iseraeleng ea boholo-holo, baprista le bathusi tempeleng ba ne ba hlaha lelokong la Levi. “Bara ba Levi” ba joalo ba lumellana le sehlopha sa batlotsuoa ba kajeno ba sebeletsang e le baprista tlas’a Jesu, Moprista e Moholo. (1 Petrose 2:7-9; Ba-Heberu 3:1) Ke bona ba pele ba ileng ba lekoa ha Jehova a e-tla tempeleng ea moea le ‘lenģosa la hae la selekane.’ Joale, ho na le bopaki bofe ba hore tlhoekiso ena e ile ea etsahala ho tloha matsatsing a qetellang a Ntoa ea I ea Lefatše ho ea pele?
Nako ea Liteko tse Matla
3. Selemo ka 1918, boemo ba Lipaki tsa Molimo e ne e le bofe?
3 Ha Jehova a ne a tsamaea le ‘lenģosa la hae la selekane’ ho ea tempeleng ea moea, o fumane masala a hloka ho hloekisoa le ho tšekoa. Ka mohlala, Molula-Qhooa (oa Senyesemane) o ne o khothallelitse babali ba oona hore ba khethe la 30 Motšeanong, 1918, e le letsatsi la ho rapella hore mebuso ea puso ea sechaba ka sechaba e hlōle, joalokaha ho ne ho laetse lekhotla la sechaba la U.S. le Mopresidente Wilson. Hona ha tšoana le ho fapoha ho se jele paate ha Bokreste.—Johanne 17:14, 16.
4. Ho hlorisoa ha bahlanka ba Jehova ho ile ha hlahisa eng?
4 Baruti le mebuso ba ile ba hatella ka matla bahlanka ba tlotsitsoeng ba Jehova. A nģositsoe ka bohata hore ke baeki, masala a tlotsitsoeng a ile a leka ho iponahatsa pontšeng hore ha a na molato. Leha ho le joalo, ka la 7 Motšeanong, 1918, ho ile ha ntšoa mangolo a hore ho tšoaroe litho tse robeli tsa basebeletsi ba botsamaisi le ba bongoli ba Watch Tower Bible and Tract Society, ho akarelletsa mookameli, J. F. Rutherford. Nyeoe ea bona ea qala ka ’Mantaha, la 3 Phuptjane. Ka la 20 Phuptjane baahloli ba tlisa kahlolo ea hore ba molato liqosong tse ’nè. Joale ka la 4 Phupu, 1918, banna bana ba ineetseng ba Bakreste ba ile ba nkoa ka terene ho ea chankaneng ea Atlanta, Georgia, U.S.A.
5. Ho ile ha totobala joang hore ho ne ho hlokahala hore ba sebeletsang Molimo ba hlokoloe, ’me ke eng e bontšang hore hona ho ile ha etsahala?
5 Hoetla ka 1918, molumo oa lentsoe la batlotsuoa le neng le kile la e-ba matla le le neng le hlophisitsoe la ho bolela phatlalatsa ’Muso oa Jehova o ile oa fokolisoa haholo. Ho bile joalokaha eka ba ‘bolailoe’ mabapi le mosebetsi oa bona oa pontšeng. (Tšenolo 11:3, 7) Nakong ea likopano tsa Mokhatlo lehlabuleng leo, bakoenehi ba bang ba tsoa ’me ba thea lihlopha tsa bona tsa bohanyetsi tsa bolumeli. Ba bonahatsa litšobotsi tsa ‘mohlanka ea khopo,’ ba ile ba olosoa joaloka “mooko” o arohanngoang le masala a tšepahalang a Jehova. (Mattheu 3:12; 24:48-51) Sehopotso sa lefu la Kreste sa ketekoa ka Sontaha, la 13 ’Mesa, 1919, ka ba 17 961 ba bileng teng linaheng tse ngata. Ha ho bapisoa le tlaleho e sa fellang ea 1917, ba bileng teng Sehopotsong ba ne ba fokotsehile ka ba fetang 3 000, ho neng ho bontša liphello tsa ho hlokola.
6. Jehova o lumelletse liteko tse joalo a hopotse tlhohonolofatso e neng e tla tlela batho ba hae joang?
6 Leha ho le joalo, hore Jehova a lumelle liteko tse matla joalo hore li oele batho ba hae e ne e le hore qetellong ba tle ba hlohonolofatsoe. Ha ho mohla a kileng a ba lahla ho hang. Ka Labobeli, la 25 Tlhakubele, 1919, J. F. Rutherford le basebetsi-’moho le eena ba supileng ba ile ba lokolloa chankaneng ka beile ’me hamorao ba hlakoloa molato ka ho feletseng. Baphonyohi bana ba hloekisitsoeng ba nako ena ea teko, ba ne ba lokolohile botlamuoeng ka tšohanyetso! E, ‘moea oa bophelo o tsoang ho Molimo o ile oa kena ho bona; ba ema ka maoto a bona,’ ba loketse mosebetsi.—Tšenolo 11:11.
7. (a) Lipaki tsee tse tsosolositsoeng joale li ile tsa etsa eng? (b) Ho hloekisa le ho tšeka hona ho felletse ka eng?
7 E be joale ba ne ba tla etsa joang? E le sechaba se tsosolositsoeng sa Bokreste, masala a itlhahlobisisa. A rapella tšoarelo ea Jehova bakeng sa libe leha e le life tsa ho sekisetsa. (Bapisa Pesaleme ea 106:6; Esaia 42:24.) A tsoela pele e le batho ba hloekisitsoeng. Ka baka la ho hloekisoa, masala a lipelo li tšepahalang ‘a fetoha ho Jehova ho ba batho ba hlahisang sehlabelo sa ho loka.’ (Malakia 3:3) Mahlabelo a moea a poko ao a ileng a fana ka oona a fetoha a khahlisang ho Molimo. (Ba-Heberu 13:15) A thabela hore nakoana eo ea bohale ba Jehova e ne e fetile. A ne a kholisehile hore tšebeletso ea oona ea kamoso e ne e tla amoheleha ho eena. (Esaia 12:1) Ho tloha ka la 1 ho ea ho la 8 Loetse, 1919, kopano e thabisang e ile ea tšoareloa Cedar Point, Ohio, ho le teng ba 7 000 ’me ha kolobetsoa ba 200. Hona hohle ho ile ha bontša ho tsosolosoa le ho utloisisa ho phetha mosebetsi oa Jehova oa ho bolela.
8. (a) Mosebetsi oa ho hlatsoa le ho tšeka o re ama joang kajeno? (b) Ntle ho “bara ba Levi” ba kajeno, ke bo-mang hape ba tlamehang ho lekoa le ho hlokoloa?
8 Hoo hohle ho ama batho ba Molimo ba phelang kajeno joang? Ho ea ka boprofeta, Jehova, a e-na le lenģosa la hae, ba ne ba tla tla ’me ba ‘lule joale ka mohloekisi le mohlatsoi.’ (Malakia 3:3) E, mosebetsi oa ho hloekisa le ho hlatsoa o ne o tla tsoela pele, ’me o ne a tla ‘lula’ a shebe ka hloko. ’Nete ea hore masala ana a tšepahalang a fetile nako ea liteko tse matla mathoasong a lekholo lena la lilemo e ne e sa bolele hore Mohloekisi e Moholo o ne a qetile ho ba hlatsoa. Ho leka le ho hlokola ho tsoetse pele ho fihlela mehleng ea rōna. Jehova o sa ntsane a le tempeleng ea hae, a lutse ho ahlola. Ha a hloekise feela “bara ba Levi,” masala a tlotsitsoeng. Boprofeta ba Malakia bo ile ba bontša kameho ea Hae bakeng sa “mo-lichaba,” ea lekanyetsang “bongata bo boholo ba batho,” bo lebelletseng ho phela lefatšeng. (Malakia 3:5; Tšenolo 7:9, 10) E, nakong ea lilemo tse fetileng tse 69, batho ba Jehova ba hloekisitsoe ho ea pele ka litsela tse ’nè tse akaretsang.
Tlhoekiso ea Tlhophiso
9. Tse ling tsa liphetoho tse tsoelang pele kahehong ea tlhophiso ke life ho tloha ka 1919?
9 Ea pele, tlhoekiso e etsahetse ka hore butle-butle ho lumelanngoe phutheho ea lefatše ka bophara le melao-metheo e ntseng e utloisisoa bocha ea Mangolo. Ho ne ho tlameha hore butle-butle ho ’ne ho lahloe litsela tsa puso ea sechaba ka sechaba tsa ho tsamaisa litaba tsa phutheho. Hlahloba liphetoho tse ling tse ileng tsa etsoa ntlheng ena.
1919: Ho khetha ho etsoang ke Sehlopha se Busang ho qalile ka hore ho tloha ntlo-kholo ea Mokhatlo oa Watch Tower ho thonngoe motsamaisi oa kamehla oa tšebeletso bakeng sa phutheho e ’ngoe le e ’ngoe hore a laole mesebetsi ea tšebeletso ea tšimo.
1932: Khetho ea selemo le selemo ea baholo le badiakone e ile ea emisoa; khetho ea phutheho ea banna bakeng sa litulo tsena ea nkeloa sebaka ka hore ho khethoe komiti ea tšebeletso, e thusang (’me e akarelletsa) motsamaisi oa tšebeletso ea khethiloeng ke Mokhatlo.
1937: Ho ile ha hlokomeloa hore “Majonadabe” [ba nang le tšepo ea lefatše] ba ka ’na ba e-ba litulong tsa boikarabelo ka phuthehong.
1938: Balebeli bohle le batlatsi ba bona ba ne ba tla khethoa ke Mokhatlo ka mokhoa oa puso ea Molimo.
1972: Ho ile ha hlakisoa hore mokhoa oa Mangolo oa ho busa phutheho e ’ngoe le e ’ngoe e ne e se feela ka monna a le mong oa Mokreste ea hōlileng tsebong empa ka sehlopha sa baholo, joalokaha ba khethoa ke Mokhatlo.
1975: Ho theoa ha likomiti tsa Sehlopha se Busang bakeng sa ho hlokomela boikarabelo bo fapa-fapaneng; litaba li ne li sa tl’o tsamaisoa ke monna a le mong, empa bohle ka komiting ba ne ba tla lekana ka lentsoe ’me ba momahane ho sheba boeta peleng ba Kreste Jesu.
10. (a) Tlhoekiso e joalo e felletse ka eng? (b) U ikutloa joang ka litokiso tsohle tse joalo?
10 Phello ea litokiso tse joalo e bile efe? Ha ho pelaelo hore tlhohonolofatso ea Jehova e bile khōlo, joalokaha ho totobatsoa ke khōlo ea moea le keketseho ea barapeli ba hae. (Bapisa Liketso 6:7; 16:5.) Ke ’nete, balebeli ba bang le batho ba bang ba ’nile ba hlokoleloa ka ntle ka lebaka la hobane ba ne ba sa ikokobetse ka botšepehi tseleng e tsamaisoang ke Molimo. Leha ho le joalo, boholo ba batho ba Jehova, bo ipakile e le bo utloang le bo ikokobetsang ntlafatsong ea tlhophiso. (Ba-Heberu 13:17) Ba ananela hore ka litokiso tse joalo Mohloekisi e Moholo o ba tlisitse tumellanong e haufi haholoanyane le mekhoa ea Mangolo bakeng sa liphutheho.
Tšebeletso ea Tšimo
11. Mosebetsi oa ho bolela o nkile libopeho life tse tsoetseng pele lilemong tse mashome-shome tsa morao tjee?
11 Ea bobeli, tlhoekiso e ’nile ea etsahala ka liteko tse mabapi le ho kopanela tšebeletsong ea tšimo.
1922: Bohle ba kopanelang le liphutheho ba ile ba phehelloa ho kopanela tšebeletsong ea tšimo ea ntlo le ntlo. Ho ile ha fumaneha Bulletin (hona joale Tšebeletso ea Rōna ea ’Muso) ea khoeli le khoeli e nang le litaelo tsa tšebeletso.
1927: Ho bolela ka mehla ka ntlo le ntlo ka Sontaha ho ile ha qala; libuka le libukana tsa abjoa ka moneelo.
1937: Ha amoheloa bukana ea pele ea Model Study bakeng sa lithuto tsa mahae tsa Bibele.
1939: Phutuho ea pele ea selemo le selemo ea peeletso ea Molula-Qhooa ea qala; ha fumaneha lipeeletso tse ncha tse fetang 93 000.
1940: Mosebetsi oa limakasine oa seterata oa qala.
Boboleli bona ba pontšeng ba e-ba le mefuta e meng e tsoetseng pele, ho akarelletsa ho etsa maeto a ho boela le ho etsa lithuto tsa mahae tsa Bibele.
12. (a) Liphello tsa tlhoekiso e joalo ea tšebeletso ea tšimo e bile life? (b) Re ka bontša botšepehi ba rōna joang tseleng eo Jehova a hloekisitseng batho ba hae ka eona?
12 Liphello e bile life? Ha lilemo li ntse li e-ea ba bang ba ’nile ba hlokoleloa ka ntle hobane ba sa utloisise hore e be Bakreste ba beang litholoana. (Johanne 15:5) Empa boholo ba batho ba Jehova ba arabetse ka sebele pitsong ea baboleli ba ’Muso. E, sehlotšoana sane sa bahoeletsi ba ’Muso ba ka tlaase ho 8 000 morao koo ka 1919 se eketsehile ho ba ba 3 229 022 ka 1986! Ho thoe’ng ka tšebeletso ea nako e tletseng? Ha ho bapisoa le barekisi ba libuka (bo-pula-maliboho) ba mafolo-folo ba 150 selemo ka 1919, ngoahola ho bonahetse karolelano ea bahoeletsi ba mafolo-folo ba bo-pula-maliboho ba fetang 391 000 khoeli e ’ngoe le e ’ngoe—palo e phahameng ka ho fetisisa historing ea Lipaki tsa Jehova tsa kajeno! Ka ho ba le karolo e mafolo-folo ho boleleng litaba tse molemo, re bontša hore re tšehetsa ka botšepehi tsela eo Jehova a tsoetseng pele ho hloekisa batho ba hae ka eona.—1 Ba-Korinthe 9:16.
Leseli le Ntseng le Eketseha
13. E meng ea mehlala ea kamoo Jehova a beileng batho ba hae leseling ka eona ke efe?
13 Ea boraro, tlhoekiso e etsahetse ha batho ba Molimo ba lekoa mabapi le ho amohela leseli le ntseng le hōla la moea le tsoang ka Bibeleng. (Liproverbia 4:18) Ho tloha ka 1919 ho tla fihlela joale ho ’nile ha phalla letoto la sebele la linnete tse utloisisitsoeng bocha.
1925: Ho ile ha lemohuoa ka ho hlakileng hore ho na le mekhatlo e ’meli e hlophisitsoeng e totobetseng le e hanyetsanang—oa Jehova le oa Satane.
1931: Lebitso le lecha la Lipaki tsa Jehova le ile la amoheloa.
1935: “Bongata bo boholo ba batho” ba Tšenolo 7:9-15 bo ile ba tsebahatsoa e le sehlopha seo qetello ea sona e leng [ho phela] lefatšeng.
1941: Tokelo ea borena ba bokahohle ba Jehova ea bontšoa hore ke khang e khōlō e tsositsoeng ke phephetso ea Satane.
1962: ‘Marena’ a Ba-Roma 13:1 a tsebahatsoa ka nepo e le baholo ba mebuso ea lefatše, bao Bakreste ba lokelang ho ikokobeletsa bona tlas’a maemo a itseng.
1986: Ho ile ha ananeloa hore masala le “bongata bo boholo ba batho” ba tlameha hore ka tšoantšetso ba je nama ea Jesu le ho noa mali a hae ka ho amohela sehlabelo sa hae e le hore ba ka ba kutloanong le eena.—Johanne 6:53-56.
Ho theosa le mashome a lilemo, ha Jehova a ntse a bea batho ba hae leseling, ho ile ha hlaka hore ho hlokahala tlhokomelo ea phutheho hore ho bolokoe mokhatlo o hlophisitsoeng o hloekileng le o sa jeleng paate o hlonephang khalalelo ea mali.—1 Ba-Korinthe 5:11-13; Johanne 17:14, 16; Liketso 15:28, 29.
14. (a) Batho ba Jehova ba arabetse joang leseling le joalo le tsoelang pele? (b) Boikemisetso ba hao ke bofe mabapi le mocha oa Jehova oa puisano?
14 Batho ba Molimo ba ile ba arabela joang leseling le joalo le hōlang? Ka nako ena eohle, ho ’nile ha e-ba le ba ’maloa ba neng ba sitoa ho amohela litokiso tse itseng. Bana ba ile ba ‘olosetsoa ka ntle.’ (Mattheu 3:12) Ka lehlakoreng le leng, bahlanka ba tšepahalang ba Jehova ba thabile hakaakang bakeng sa leseli le joalo la moea! Nakong ea ha Bokreste-’mōtoana bo tlatselela lefifing la moea, tsela ea batho ba Jehova e ntse e khanya ho ea pele. Na ha rea lokela ho ikemisetsa ho khomarela haufi-ufi mocheng oa puisano o sebelisoang ke Jehova, re amohela leseli lohle le joalo le hōlang e le “lijo nakong ea teng”?—Mattheu 24:45.
Ho Lahla Mekhoa e Litšila
15. Jehova o hloekisitse batho ba hae joang butle-butle mabapi le mekhoa e litšila kapa ea Bobabylona?
15 Ea bone, tlhoekiso e etsahetse ha ho fetoha tlamo ho lahla mekhoa e litšila kapa ea Bobabylona. Ka bo-1920 batho ba Molimo ba ile ba khaotsa ho keteka Keresemese le matsatsi a mang a phomolo ao ho ileng ha bontšoa hore a simolohile boheteneng. Ka 1945 ho ile ha hlalosoa boemo ba Bokreste ka litšelo tsa mali. Ka bo-1960 le bo-1970 ha moea oa boitšoaro lefatšeng o tsoela pele ho hlepha, Molula-Qhooa o ile oa tsoela pele ho fana ka keletso e tobileng bakeng sa batho ba Molimo litabeng tse kang boitšoaro bo loketseng pakeng tsa ba batona le ba batšehali le bohlokoa ba ho itokolla koaeng le lithethefatsing tse ling.
16. Litokiso tse joalo tse mabapi le mekhoa e litšila li lokela ho talingoa joang?
16 Koana, litokiso tse joalo tse amanang le mekhoa e litšila hangata li ’nile tsa sebeletsa e le teko ea botšepehi ho batho ba Molimo. Leha ho le joalo, ba entseng litokiso tse hlokahalang ba ile ba talima liphetoho tse joalo e le thuso ho hlobola seaparo se silafetseng. (Ba-Kolosse 3:9, 10) Ba ile ba hlokomela hore le hoja meetlo e amanang le a mang a matsatsi a phomolo e ka ’na ea bonahala e se kotsi, ke maikutlo a Jehova a lokelang ho re ama, o bone sethathong mekhoa ea bolumeli ea bohetene eo ena e simolohileng ho eona. Tabeng ea seo Molimo o se hlokang boitšoarong, ba talimile hona e le tšireletso ho e-na le tšitiso, ka hona Jehova o ile a ba hlohonolofaletsa ho hloeka. Haeba ho ne ho bonahala ho le thata ho utloisisa tokiso, ba bile le tšepo ea hore Jehova ‘o ba ruta ho itsoela molemo.’—Esaia 48:17, NW.
17, 18. (a) Rōna ka bomong re lekoa joang ke Mohloekisi e Moholo? (b) Boikemisetso ba rōna e lokela ho ba bofe ha re ntse re letetse letsatsi la Jehova?
17 Selemo le selemo Jehova o tsoela pele ho hloekisa le ho tšeka batho ba hae. E le sehlopha, ba ikokobelelitse mosebetsi ona oa ho hloekisoa ha mokhatlo oa bona o hlophisitsoeng, liketso tsa bona, thuto ea bona le ho hloeka ha bona boitšoarong. Empa ho thoe’ng ka rōna re le motho ka mong? Ka mokhatlo oa hae o hlophisitsoeng Jehova o tsoela pele ho fana ka “lijo tse tiileng” bakeng sa tataiso e hloekisang pelo. Lipheo tsa rōna lia hlahlobjoa li bile lia lekoloa. (Ba-Heberu 4:12; 5:14) Ka ho lumellana le mosebetsi oa ho hloekisoa le ho tšekoa oa Mohloekisi e Moholo, re lula re hloekile ha re ntse re emetse “letsatsi la Jehova, le leholo, le tšabehang.”—Malakia 4:5.
18 Liteboho li lebisoa ho Jehova, ‘Morena oa ’nete’ le ‘lenģosa la hae la selekane,’ Jesu Kreste, ba re hloekisang le ba re ntšang litšileng nakong ena ea ho lekoa le ho hlokoloa. E se eka bohle re ka ikemisetsa ho tsoela pele re ntse re tsamaea litseleng tse hloekileng tsa Jehova tsa khotso tlas’a “morena oa khotso,” Kreste Jesu, ’me kahoo re boloke kamano ea rōna e thabileng le Jehova.—Esaia 9:6; Pesaleme ea 72:7.
Jehova O Hloekisitse Batho Ba Hae Joang Mabapi Le—
◻ Litokiso tlhophisong?
◻ Ho kopanela tšebeletsong ea tšimo?
◻ Ho amohela leseli le ntseng le hōla?
◻ Ho lahla mekhoa e litšila?
Ntlha e Qolotsoeng e leqepheng la 16]
Ka lebaka la ho tšekoa le ho hloekisoa, masala a lipelo li tšepahalang la fetohile ho Jehova batho ba hlahisang sehlabelo sa ho loka’
Ntlha e Qolotsoeng e leqepheng la 19]
Selemo le selemo Jehova o ntse a hloekisa le ho tšeka batho ba hae
[Setšoantšo se leqepheng la 17]
Mohloekisi oa boholo-holo o ne a okola litšila, kapa manya. Ka ho tšoanang, Jehova o lumella ho lekoa le ho hlokoloa ho hloekisa batho ba hae
[Setšoantšo se leqepheng la 18]
Ba seng ba kae ba ‘olositsoe’ joaloka “mooko,” empa bahlanka ba tšepahalang ba Jehova ka thabo ba amohela leselile hōlang la moea
[Tlhaloso ea Moo Setšoantšo se Nkiloeng Teng]
Ntlo ea Polokelo ea Litšoantšo (Histori ea Linaha tse Bochabela ho Mediterranean) Est.