Jesu—Bophelo le Tšebeletso tsa Hae

Ho Khutsisa Sefefo se Tšosang

LETSATSING leo Jesu o ne a phathahane, ho akarelletsa ho ruta matšoele lebopong la leoatle ’me kamorao ho moo a hlalosetsa barutuoa ba hae lipapiso ka ho khethehileng. Ha shoalane e tšoara, o re: “A re tšeleleng mose.”

Ka holim’a lebopo le ka bochabela ho Leoatle la Galilea ke sebaka se bitsoang Dekapolise, ho tsoa lentsoeng la Segerike deʹka, le bolelang “leshome,” le poʹlis, le bolelang “motse.” Metse ea Dekapolise ke setsi sa tsoelopele ea Magerike, le hoja ho se pelaelo hore e boetse ke lehae la Bajode ba bangata. Leha ho le joalo, tšebeletso ea Jesu sebakeng seo, ke e lekanyelitsoeng haholo. Joalokaha re tla bona hamorao, le ketelong ena, o ntse a sitisoa ho lula nako e telele.

Ha Jesu a kōpa hore ba tšelele ka mose, barutuoa ba hae ba mo isa seketsoaneng. Leha ho le joalo, ha ba tloha baa hlokomeloa. Ka potlako ba bang ba kena liketsoaneng tsa bona ba ba felehetsa. Ha ho hōle haholo ho tšelela ka mose oane. Ha e le hantle, Leoatle la Galilea empa e le letša le leholo le ka bang bolelele ba lik’hilomithara tse 21 le bophara ba lik’hilomithara tse 12.

Hoa utloahala hore Jesu o khathetse. Ka hona, kapele kamor’a hore ba tlohe, o robala kamorao seketsoaneng, o bea hlooho ea hae mosamong, ’me oa khaleha. Baapostola ba ’maloa ke lisesisi tsa likepe tse nang le phihlelo, kaha ba ile ba tšoasa litlhapi haholo Leoatleng la Galilea. Kahoo ba nka boikarabelo ba ho sesisa seketsoana sena.

Empa lena e ne e sa tl’o ba leeto le bonolo. Ka baka la moea o futhumetseng oa letša le ka bang limithara tse 210 ka tlaase ho bophahamo ba leoatle, le moea o batang lithabeng tse haufi, ka linako tse ling meea e matla ea foka ’me e hlahise lifefo tse mabifi ka tšohanyetso letšeng leo. Sena ke sona se etsahalang. Ka pele maqhubu a otla sekepana ’me a bile a khapatsehela ka har’a sona, hoo se batlang se tlala. Empa Jesu o sa ntse a khalehile!

Lisesisi tse nang le phihlelo ka ho ferekana li leka ho laola seketsoana sena. Ha ho pelaelo hore ba ’nile ba feta har’a lifefo pele. Empa lekhetlong lena ba feletsoe ke mekhoa ea ho ipholosa. Ka ho baballa bophelo ba bona, ba tsosa Jesu. Ba hoeletsa, ‘Morena, na ha u tsotelle? Rea teba! Re pholose, re nkoa ke metsi!’

Ha a tsoha, Jesu a khalemela moea, a re ho leoatle: “Khutsa, u re tu!” ’Me moea o befileng oa emisa le leoatle la khutsa. Ha a retelehela ho barutuoa ba hae, oa botsa: ‘Le tšohile’ng? Na ha le e-so ho be le tumelo?’

Kamor’a moo, barutuoa ba hae ba tšoha ka ho sa tloaelehang. Baa botsana, ‘Enoa ke mang? Hobane o laela esita le oona moea le metsi, ’me lia mo utloa.’

Ke matla a makaakang ao Jesu a a bonahatsang! Ke ho khothatsang hakaakang ho tseba hore Morena oa rōna o na le matla holim’a lihloliloeng le hore ha tlhokomelo ea hae e feletseng e lebisitsoe lefatšeng la rōna nakong ea puso ea ’Muso oa hae, tsohle li tla lula li sireletsehile likoluoeng tse sisimosang tsa tlhaho!

Nakoana kamor’a hore sefefo se kokobele, Jesu le barutuoa ba hae ba fihla ba sireletsehile lebopong le ka bochabela la leoatle. Mohlomong liketsoana tse ling ha lia ka tsa fumana ho befa ha sefefo ’me li ile tsa khutlela hae li sireletsehile. Mareka 4:35–5:2; Mattheu 8:18, 23-28; Luka 8:22-27.

◆ Dekapolise ke eng, ’me e sebakeng sefe?

◆ Ke lintho life tsa tlhaho tse bakang lifefo tse mabifi Leoatleng la Galilea?

◆ Ha mekhoa ea bona ea ho sesisa leoatleng e sitoa ho ba pholosa, barutuoa ba etsa joang?

[Setšoantšo se tletseng leqephe la 8]