Hantle-ntle ke Eng e Silafatsang Motho?

Paseka ea selemo sa 32 e ntse e atamela ’me Jesu o phathahane ka mosebetsi oa ho ruta Galilea. Mohlomong hamorao o ea Jerusalema ho ea keteka Paseka joalokaha Molao oa Molimo o laela. Leha ho le joalo, o etsa sena a le hlokolosi hobane Bajuda ba batla ho mo bolaea. (Johanne 7:1) Ka mor’a moo o khutlela Galilea.

Ho bonahala Jesu a le Kapernauma ha Bafarisi le bangoli ba tla ho eena ba tsoa Jerusalema. Ba tl’o etsa’ng? Ba ntse ba tsoma mabaka a ho qosa Jesu ka hore o tlotse Molao oa Molimo. Ba botsa Jesu ba re: “Ke hobane’ng ha barutuoa ba hao ba tlola neano ea banna ba linakong tsa pele? Ka mohlala, ha ba hlatsoe matsoho a bona ha ba le mothating oa ho ja lijo.” (Matheu 15:2) Ha ho mohla Molimo a kileng a re batho ba hae ba latele moetlo ona oa “hore ba hlatsoe matsoho a bona ho fihlela litsoeng.” (Mareka 7:3) Leha ho le joalo, Bafarisi ba nka ho se etse joalo e le sebe se tebileng.

Ho e-na le hore Jesu a arabe liqoso tsa bona ka ho toba, o bontša kamoo ba tlolang Melao ea Molimo ka boomo kateng. O re: “Ke hobane’ng ha le lona le tlola taelo ea Molimo ka lebaka la neano ea lona? Ka mohlala, Molimo o ile a re, ‘Hlompha ntat’ao le ’m’ao’, ’me, ‘ea hlapaolang ntat’ae kapa ’m’ae phello ea hae e be lefu.’ Empa le re, ‘Mang kapa mang ea reng ho ntat’ae kapa ’m’ae: “Eng kapa eng eo ke nang le eona eo u ka fumanang molemo ka eona ho ’na ke mpho e nehetsoeng ho Molimo,” a se ke a hlompha ntat’ae ho hang.’ ”​—Matheu 15:​3-6; Exoda 20:​12; 21:17.

Bafarisi ba re chelete, thepa, le eng kapa eng eo motho a rerileng ho e fa Molimo e le mpho, ke ea tempele kahoo e ke ke ea sebelisetsoa morero o mong. Ha e le hantle, motho eo ha a e-s’o fane ka mpho eo kaha e ntse e le matsohong a hae. Ka mohlala, ngoan’a moshanyana a ka ’na a re chelete kapa thepa ea hae ke “korbane,” e leng mpho eo a rerileng ho e fa Molimo kapa ho e isa tempeleng. O bua joalokaha eka ha a na boikhethelo ba hore na a sebelise chelete kapa thepa ea hae joang. Ha a e-s’o fane ka chelete kapa thepa eo, empa o re a ke ke a khona ho li sebelisetsa ho thusa batsoali ba hae ba holileng kapa ba hlokang. Ka ho cho joalo, o baleha boikarabello boo a nang le bona ba ho thusa batsoali ba hae.​—Mareka 7:11.

Jesu o halefa ka nepo ha ba sotha Molao oa Molimo ’me o re: “Le entse lentsoe la Molimo lefeela ka lebaka la neano ea lona. Lona baikaketsi, Esaia o ile a profeta ka ho loketseng ka lona, ha a re, ‘Sechaba sena se ntlhompha ka melomo, empa leha ho le joalo lipelo tsa sona li suthetse hole le ’na. Ke ha lefeela hore ebe se ntse se nthapela, hobane se ruta litaelo tsa batho e le lithuto.’ ” Bafarisi ba felloa ke puo, ba sitoa ho araba ha Jesu a ba nyatsa ka matla. Joale o bitsetsa letšoele haufi ’me o re ho lona: “Mamelang ’me le utloisise, se kenang molomong oa motho ha se sona se mo silafatsang, empa motho o silafatsoa ke se tsoang molomong oa hae.”​—Matheu 15:​6-11; Esaia 29:13.

Hamorao ha Jesu a se a le ka tlung, barutuoa ba hae baa mo botsa ba re: “Na oa tseba hore Bafarisi ba ile ba khoptjoa ha ba utloa seo u se buileng?” O ba araba ka ho re: “Semela se seng le se seng seo Ntate oa ka oa leholimo a sa kang a se lema se tla fotholoa. Ba tloheleng. Ke batataisi ba foufetseng. Joale, haeba sefofu se tataisa sefofu, ka bobeli li tla oela ka sekoting.”​—Matheu 15:​12-14.

Jesu o bonahala a maketse ha Petrose a botsa molemong oa barutuoa hore na ke eng e silafatsang motho. Jesu o re: “Na ha le hlokomele hore ntho e ’ngoe le e ’ngoe e kenang molomong e fetela ka maleng ’me e ntšetsoa ka sekoting se koahetsoeng sa likhoere-khoere? Leha ho le joalo, lintho tse tsoang molomong li tsoa pelong, ’me lintho tseo li silafatsa motho. Ka mohlala, pelong ho tsoa menahano e khopo, lipolao, bofebe, bohlola, bosholu, bopaki ba bohata, linyefolo. Tsena ke lintho tse silafatsang motho, empa ho ja lijo ka matsoho a sa hlatsuoang ha ho silafatse motho.”​—Matheu 15:​17-20.

Ha se hore Jesu o nyatsa bohloeki kapa hore o khahlanong le motho ea hlapang matsoho pele a lokisa lijo kapa pele a ja. Ho e-na le hoo, o mpa a nyatsa boikaketsi ba baeta-pele ba bolumeli ba sa hlompheng Melao ea Molimo ka lebaka la meetlo ea batho. Ha e le hantle motho o silafatsoa ke lintho tse khopo tse tletseng ka pelong ea hae.