KHAOLO EA 23

Ho Kolobetsoa ke Qeto e Molemo eo U ka e Etsang

E Hatisitsoeng

Jesu o ile a re Bakreste ba lokela ho kolobetsoa. (Bala Matheu 28:19, 20.) Empa kolobetso ke eng? Hona motho o lokela ho etsa’ng hore a kolobetsoe?

1. Kolobetso ke eng?

Lentsoe “kolobetso” le tsoa lentsoeng la Segerike le bolelang ho kenngoa ka har’a metsi ka ’mele kaofela. Ha Jesu a kolobetsoa, o ile a kenngoa ka ’mele kaofela ka har’a Noka ea Jordane, eaba ‘o tsoa ka metsing.’ (Mareka 1:9, 10) Ka tsela e tšoanang, Bakreste ba ’nete ba kolobetsoa ka hore ba kenngoe ka ’mele kaofela ka har’a metsi.

2. Kolobetso e bontša’ng?

Ha motho a kolobetsoa, o bontša hore o inehetse ho Jehova Molimo. Motho o inehela ho Jehova joang? Pele a kolobetsoa, o rapela a le mong ’me o bolella Jehova hore o batla ho mo sebeletsa ka ho sa feleng. O tšepisa Jehova hore o tla sebeletsa eena feela le hore ho etsa thato ea hae e tla ba eona ntho ea bohlokoa ka ho fetisisa bophelong ba hae. O etsa qeto ea ho itatola ’me o latela mohlala oa Jesu le lithuto tsa hae. (Matheu 16:24) Ha a inehela ’me a kolobetsoa, o ba le setsoalle se matla le Jehova le Bakreste-’moho le eena.

3. Motho o lokela ho etsa’ng pele a kolobetsoa?

Pele u kolobetsoa ho bohlokoa hore u ithute ka Jehova le hore u be le tumelo e matla ho eena. (Bala Baheberu 11:6.) Ha u ntse u tsoela pele ho ithuta ka Jehova haholoanyane ’me tumelo ea hao e e-ba matla, u tla mo rata le ho feta. Ha ho pelaelo hore u tla batla ho bolella batho ba bang ka eena le ho phela ka melao ea hae. (2 Timothea 4:2; 1 Johanne 5:3) Ha motho a ‘tsamaea ka mokhoa o tšoanelang Jehova e le hore a mo khahlise ka botlalo,’ a ka batla ho nehela bophelo ba hae ho Molimo ’me a kolobetsoe.—Bakolose 1:9, 10.a

ITHUTE LINTLHA TSE LING

Bona hore na u ka ithuta’ng kolobetsong ea Jesu le hore na u lokela ho etsa’ng hore u itokisetse mohato ona oa bohlokoa.

4. Ho na le ntho eo re ka ithutang eona kolobetsong ea Jesu

Bala Matheu 3:13-17 e le hore u ka ithuta lintlha tse ling ka kolobetso ea Jesu ebe le buisana ka lipotso tsena:

Na Jesu e ne e le lesea ha a ne a kolobetsoa?
O ile a kolobetsoa joang? Na o ile a fafatsoa feela ka metsi?

Jesu o ile a qala ho etsa mosebetsi oa hae o khethehileng oo Molimo a neng a mo file oona hore a o etse lefatšeng ha a ne a qeta ho kolobetsoa. Bala Luka 3:21-23 le Johanne 6:38 ebe le buisana ka potso e latelang:

Ka mor’a hore Jesu a kolobetsoe, ke mosebetsi ofe o neng o tla pele bophelong ba hae?

5. Ho ka khoneha hore u kolobetsoe

Qalong taba ea ho inehela le ho kolobetsoa e ka bonahala e le ntho e thata. Leha ho le joalo, u ka tsoela pele u ithuta ho fihlela u kholisehile hore u batla ho etsa qeto ena ea bohlokoa. Bapala VIDEO e le hore u bone batho ba bang ba ileng ba etsa seo.

VIDEO: Kamoo U ka Bang Motsoalle oa Jehova Kateng (1:11)

Bala Johanne 17:3 le Jakobo 1:5 ebe le buisana ka potso e latelang:

Ke eng e ka thusang motho hore a itokisetse ho kolobetsoa?

B. Eena ’mè eo oa kolobetsoa hore e be Paki ea Jehova ’me o kenngoa ka ’mele kaofela ka metsing.

Re inehela ho Jehova ka hore re mo bolelle hore re batla ho mo sebeletsa ka ho sa feleng
Ha re kolobetsoa, re bontša batho ba shebileng hore re inehetse ho Molimo

6. Ha re kolobetsoa re ba karolo ea lelapa la Jehova

Ha re kolobetsoa re ba karolo ea lelapa le momahaneng lefatšeng lohle. Le hoja re tsoa libakeng le litsong tse sa tšoaneng, kaofela ha rona re lumela ntho e tšoanang ’me re phela ka melao e tšoanang. Bala Pesaleme ea 25:14 le 1 Petrose 2:17 ebe le buisana ka potso e latelang:

Kolobetso e ama setsoalle sa rona le Jehova le setsoalle sa rona le batho ba mo sebeletsang joang?

Litšoantšo: Morali oa bo rona ea kolobelitsoeng o thabile ha a nahana kamoo a utloanang le ba bang ka phuthehong. 1. O bolella morali o abo rona kamoo a ikutloang kateng. 2. O thusa morali oa bo rona ea holileng ho tsamaea. 3. O ja le metsoalle e nang le lilemo tse sa tšoaneng. 4. O bua le Ntate ka molaetsa oa Bibele a thusoa ke morali e mong oa bo rona. 5. O inka senepe le Lipaki tse peli tsa merabe e sa tšoaneng kopanong.

BATHO BA BANG BA RE: “Ha ke e-s’o ikemisetse ho kolobetsoa.”

Haeba le uena u ikutloa joalo, na u nahana hore ho na le nako eo ka eona u tla batla ho kolobetsoa?

KAKARETSO

Jesu o ile a ruta hore Bakreste ba lokela ho kolobetsoa. Empa pele motho a kolobetsoa, o lokela ho ba le tumelo e matla ho Jehova, a phele ka melao ea hae ’me a inehele ho eena.

Re Ithutile’ng?

Kolobetso ke eng ’me ke hobane’ng ha e le bohlokoa?
Ha motho a kolobetsoa, o bontša’ng?
Ke eng seo motho a lokelang ho se etsa pele a inehela le ho kolobetsoa?

Re qetile khaolo ka la:

Seo U ka se Etsang

Hlahloba lethathamo le qetellong ea Karolo ea 4 le nang le sehlooho se reng: “Na ke se ke Itokiselitse ho Ruta Bibele le Phutheho?” le “Na ke Itokiselitse ho Kolobetsoa?,” e le hore u bone hore na u se u loketse ho kolobetsa.

Ntho e ’ngoe:

Ntho e ’ngoe

BATLA

Ithute hore na kolobetso ke eng le hore na ha se eng.

“Kolobetso ke Eng?” (Sehlooho se websaeteng)

Hlahloba lintho tseo motho a ka li etsang e le hore a kolobetsoe.

“Ho Rata Jehova ho ka U Susumeletsa Hore U Kolobetsoe” (Molula-Qhooa, March 2020)

Hlokomela hore na ntate e mong o ile a thusoa ke’ng hore a kolobetsoe.

“Ba ne ba Batla Hore ke Iponele Seo e Leng ’Nete” (Molula-Qhooa, February 1, 2013)

Ithute hore na hobane’ng ha ho kolobetsoa e le ntho ea bohlokoa eo u ka e etsang le hore na u ka itokisetsa eona joang.

“Na ke Lokela ho Kolobetsoa?” (Lipotso Bacha Baa Botsa—Likarabo tse Sebetsang, Buka ea 2, khaolo ea 37)

a Haeba motho a ile a kolobetsoa bolumeling bo bong, o tla lokela ho kolobetsoa hape. Hobane’ng? Hobane bolumeli boo bo ne bo sa rute ’nete e ka Bibeleng.—Sheba Liketso 19:1-5 le Khaolo ea 13.