Jesu Bophelo le Tšebeletso tsa Hae

Ho Folisoa Moshanyana ea Nang le Modemona

HA JESU, Petrose, Jakobo le Johanne ba le mosikong oa Thaba ea Hermone, barutuoa ba bang ba kena bothateng. Ha a khutla, Jesu o phakisa o bona hore ho na le ntho e ’ngoe e phoso. Ho na le letšoele la batho le bokanetseng barutuoa ba hae, ’me bangoli ba pheile khang le bona. Ha ba bona Jesu, batho ba makala haholo ’me ba mathela ho mo lumelisa. “Le pheile khang ea eng le bona?” oa botsa.

Ho tsoa har’a letšoele, monna o khumana ka pel’a Jesu ’me oa hlalosa: “Moruti, ke tlisitse mora oa ka ho uena, o na le moea o sa bueng. Hohle ha o mo tšoara, o mo teanya fatše, a ntše makoeba, a tsikitlanye meno, a omelle; ke boleletse barutuoa ba hao hore ba o leleke, ba mpa ba sitoa.”

Ka moo ho bonahalang kateng bangoli ba thabela ho hlōleha ha barutuoa ba Jesu ho folisa moshanyana, mohlomong ba soma boiteko ba bona. Motsotsong ona oa bohlokoa, Jesu oa fihla. O re, “Jo! moloko o sa lumeleng, ke tla ba le lōna ho isa kae? Ke tla le behela pelo ho isa kae?”

Ho bonahala Jesu a lebisitse mantsoe a hae ho e mong le e mong ea leng teng, empa ha ho pelaelo hore a lebisitsoe haholo-holo ho bangoli, ba ’nileng ba tšoenya barutuoa ba hae. Ho latelang, Jesu o re ho moshanyana: “Mo tliseng ho ’na.” Empa ha moshanyana a e tla ho Jesu, modemona o mo tšoereng o mo lihela fatše ’me o mo sisinya ka bohale. Moshanyana o bilikana fatše ’me o ntša makoeba ka molomo.

“Motsotso o se o le okae a hlahetsoe ke hona hoo?” Jesu oa botsa.

“Ke ha a sa le monyenyane,” ho araba ntat’ae. “’Me [modemona] o mo lahletse hangata mollong le metsing, o tle o mo timetse.” Joale ntate oa kōpa: “Empa ha u ka tseba ho thusa, re utloele bohloko, ’me u re thuse.”

Mohlomong ntate o ’nile a batla thuso ka lilemo-lemo. ’Me joale, ha e le mona barutuoa ba Jesu ba hlōlehile, masoabi a hae a maholo. Ha a amohela kōpo ea monna ea masoabing, Jesu ka ho khothatsang o re: “U re’ng ha u re, ha nka tseba ho thusa? Lumela: Tsohle li tla etsetsoa ea lumelang.”

“Kea lumela, Morena!” Ntate o phakisa a araba, empa oa kōpa: “Nthuse ho se lumeleng ha ka.”

Ha a bona hobane letšoele le ea ba titimela, Jesu a khalemela modemona: “Moea o sa bueng, o sa utloeng, kea u laela, ’na, ke re: Tsoa ho eena, ’me u se ke ua hlola u kena ho eena.” Ha modemona o tsoa, o boetse o llisa moshanyana ’me o mo sisinya ka bohale. Joale moshanyana o robetse fatše a sa sisinyehe, batho ba bangata ba qala ho re: “O shoele.” Empa Jesu o tšoara moshanyana ka letsoho, oa tsoha.

Pelenyana, ha barutuoa ba ne ba rometsoe ho ea ruta, ba ile ba leleka bademona. Kahoo hona joale, ha ba kena ka tlung, ba botsa Jesu boinotšing: “Rōna ha rea ka ra tseba ke eng ho leleka modemona eo?”

Ha a bontša hore ebile ka lebaka la ho haelloa ha bona ke tumelo, Jesu o arabela ka hore: “Mofuta oo ha o tsoe, ha e se ka thapelo le ka ho itima lijo.” Ka ho hlakileng ho ile ha etsoa tokisetso ea ho leleka modemona ea matla ea amehang tabeng ena. Tumelo e matla hammoho le thapelo tse kōpang thuso ea Molimo e matla li ne li hlokahala.

Joale oa phaella: “Hobane ka ’nete ke re ho lōna: Hoja le na le tumelo e ka ka hlaku ea mosetareta, leha le be le ka re ho thaba ena: Fallela mane; e ka fallela teng, ’me ho ka be ho se letho le sitang.”

Tumelo e ka ba matla hakaakang! Litšitiso le mathata tse sitisang tsoelopele tšebeletsong ea Jehova li ka bonahala e le mathata a maholo le a sa sutheng joaloka thaba ea sebele e khōlō. Leha ho le joalo, Jesu o bontša hore haeba re hlaolela tumelo lipelong tsa rōna, re e nosetsa ’me re e hōlisa, e tla hōla ’me e tla re nolofaletsa ho tlosa mathata le litšitiso tse kang thaba. Mareka 9:14-29; Mattheu 17:19, 20; Luka 9:37-43.

◆ Ke boemo bofe boo Jesu a bo fumanang ha a e-tsoa Thabeng ea Hermone?

◆ Ke khothatso efe eo Jesu a e fileng ntate oa ngoana ea tšoereng ke modemona?

◆ Ke hobane’ng ha barutuoa ba ile ba thatafalloa ke ho leleka modemona?

◆ Jesu o bontša hore tumelo e ka ba matla hakae?