Baapostola ba Boetse ba Batla Maemo

Ha Jesu le barutuoa ba hae ba phethela leeto la bona ka boroa ho Perea ho ea Jerusalema, ba tšela Noka ea Jordane pela Jeriko. Ho na le ba tsamaeang le bona ho ea keteka Paseka ea selemo sa 33.

Jesu o tsamaella pele, o batla hore ha Paseka e qala a be a fihlile motseng. Leha ho le joalo, barutuoa ba tšohile. Pejana ha Lazaro a ne a hlokahetse ’me Jesu a le mothating oa ho tloha Perea ho leba Judea, Thomase o ile a re ho ba bang: “Le rona a re eeng, e le hore re ka shoa le eena.” (Johanne 11:​16, 47-53) Kahoo ho ea Jerusalema ho kotsi, ’me hoa utloahala hore ebe barutuoa ba tšohile.

E le ho ba lokisetsa se larileng ka pele, Jesu o ba nkela thokoana ’me o re ho bona: “Re nyolohela Jerusalema, ’me ho tla nehelanoa ka Mor’a motho ho baprista ba ka sehloohong le bangoli, ba tla mo ahlolela lefu, ’me ba tla nehelana ka eena ho batho ba lichaba hore ba mo fetole litšeho le ho mo shapa le ho mo khokhothela thupeng, ’me o tla tsosoa ka letsatsi la boraro.”​—Matheu 20:​18, 19.

Lena ke lekhetlo la boraro Jesu a bolella barutuoa ka lefu le tsoho ea hae. (Matheu 16:​21; 17:​22, 23) Leha ho le joalo, lekhetlong lena o re o tl’o bolaeloa thupeng kapa palong. Ba mo mametse, empa ha ba utloisise hore na o bolela’ng. Mohlomong ba lebelletse hore ho tl’o tsosolosoa ’muso oa Iseraele o lefatšeng, ’me ba batla ho fumana khanya le tlhompho ’musong o lefatšeng ba e-na le Kreste.

E mong oa batho ba ntseng ba tsamaea le Jesu ke Salome e leng ’mè oa baapostola ba babeli e leng Jakobo le Johanne. Jesu o rehile baapostola bana ba babeli lebitso le bolelang “Bara ba Sealuma,” ’me ha ho potang hore ke hobane ba cheseha. (Mareka 3:​17; Luka 9:​54) E se e le nako joale baapostola bana ba babeli ba labalabela ho ba ba hlaheletseng ’Musong oa Kreste. ’Mè oa bona o tseba taba ena. Joale o ea ho Jesu, o khumama ka pela hae, ’me oa ba buella. Ha Jesu a araba o re: “U batla’ng?” O re ho eena: “Laela hore bara bana ba ka ba babeli ba lule, e mong ka letsohong la hao le letona ’me e mong ka ho le letšehali, ’Musong oa hao.”​—Matheu 20:​20, 21.

Ha e le hantle, ke Jakobo le Johanne ba etsang kopo ena. Kaha Jesu o sa tsoa hlalosa nyeliso le ho tlotlolloa hoo a tl’o tobana le hona, o re ho bona: “Ha le tsebe seo le se kopang. Na le ka noa senoelo seo ke leng haufi le ho se noa?” Ba re ho eena: “Re ka se noa.” (Matheu 20:​22) Ho ntse ho le joalo, e ka ’na eaba ba ntse ba sa utloisise hore na sena se bolela’ng.

Leha ho le joalo, Jesu o re ho bona: “Ka sebele le tla noa senoelo sa ka, empa ha e le ho lula ka letsohong la ka le letona le ka ho le letšehali ha se ’na ea ka fanang ka hona, empa ke ha ba ho lokiselitsoeng ke Ntate.”​—Matheu 20:23.

Ha baapostola ba bang ba leshome ba utloa ka kopo ea Jakobo le Johanne, ba halefa haholo. Na ho ka etsahala hore ebe Jakobo le Johanne ke bona ba neng ba le kapele-pele phehisanong eo baapostola ba neng ba e-na le eona pejana ea hore na ke mang e moholo har’a bona? (Luka 9:​46-48) Ho sa tsotellehe hore na ho etsahetse’ng, kopo ena e bontša hore baapostola bana ba 12 ha baa sebelisa keletso eo Jesu a faneng ka eona ea hore motho a itšoare joaloka e monyenyane. Ba ntse ba rata maemo.

Jesu o etsa qeto ea ho rarolla qabang ena e bakang bora. O bitsa baapostola ba 12 hore a tl’o ba khalemela, o re ho bona: “Lea tseba hore bao ho bonahalang ba busa lichaba ba rena ka thata holim’a tsona ’me ba baholo ba tsona ba sebelisa bolaoli holim’a tsona. Ha hoa lokela ho ba ka tsela ena har’a lona, empa mang kapa mang ea batlang ho ba moholo har’a lona e lokela ho ba mosebeletsi oa lona, ’me mang kapa mang ea batlang ho ba oa pele har’a lona e tla ba lekhoba la bohle.”​—Mareka 10:​42-44.

Jesu o bua ka mohlala oo ba lokelang ho o etsisa, e leng mohlala oa hae. O re: “Feela joalokaha Mor’a motho a sa ka a tlela ho sebeletsoa, empa ho sebeletsa le ho fana ka moea oa hae hore e be thekollo e le phapanyetsano bakeng sa ba bangata.” (Matheu 20:​28) Jesu o se a e-na le lilemo tse tharo a sebeletsa batho ba bang, ’me o tla tsoela pele ho etsa joalo ho fihlela a shoela moloko oa batho. Barutuoa le bona ba hloka ho ba le boikutlo boo bo kang ba Kreste ba ho batla ho sebeletsa ho e-na le ho sebeletsoa, ho ba e monyenyane ho e-na le ho ba ea hlaheletseng.