Na Ho Fana ha Hao ke Sehlabelo?

Pono e Leka-lekaneng ka Meneelo

KAMOR’A ho ruta batho lintho tse ngata tempeleng, Jesu a lula “malebana le polokelo ea letlotlo, a talimile kamoo batho ba nokelang lichelete polokelong ea letlotlo.” (Mareka 12:41) Se ileng sa latela ke tlaleho e tsebahalang haholo ea cheletana e nyenyane ea mohlolohali. Empa ke hobane’ng ha Jesu a ile a lula moo le ho shebella batho ha ba fana ka linyehelo tsa bona? Na ha a ka a bolella barutuoa ba hae hore ha baa lokela ho lumella esita le letsoho la bona le letšehali hore le tsebe seo le letona le se etsang ha ba ne ba etsa lineo tsa bona tsa mohau?—Mattheu 6:3.

Pejana, Jesu o ne a ile a nyatsa ka matla baeta pele ba bolumeli ka ho sebelisa mekhoa e tsoileng tseleng ho metsa “matlo a basali ba bahlolohali.” O ile a re balumeli bana ba “tla ahloloa ka kahlolo e fetisisang.” (Mareka 12:40) E le hore a ka ruta ho hong, o ile a lebisa tlhokomelo ea hae ho seo batho ba neng ba se etsa moo lipolokelong tsa letlotlo. Kajeno ha re utloa ho hongata hakana ka chelete e ngata e amehang mekhatlong e hlophisitsoeng ea likereke, tšebeliso e mpe ea lichelete tse joalo, le bophelo bo majaba-jaba ba ba ikarabellang, re tla be re etsa hantle ha re mamela ka hloko seo Jesu a tla se bolela.—Ka kōpo bala Mareka 12:41-44.

Lipolokelo tsa Letlotlo

Tlaleho e re bolella hore Jesu o ile a lula “malebana le polokelo ea letlotlo.” Ka ho totobetseng mona e ne e le Lekhotleng la Basali, moo lipolokelo tse ’maloa, kapa mabokose, li neng li beoa pel’a mabota hore batho ba akhele linyehelo tsa bona. Moetlo oa Sejode o re bolella hore ho ne ho e-na le mabokose a 13 kaofela. Ka Seheberu a ne a bitsoa literompeta, hobane a ne a e-na le masoba a manyenyane kaholimo a nang le sebopeho sa tšepe ea terompeta. Ho boleloa hore ‘ha ho ea neng a kena tempeleng a sa tšele letho kahare.’

Moprofesa oa Sefora Edmond Stapfer, bukeng ea hae Palestine in the Time of Christ (1885), o fane ka tlhaloso e batlang e qaqile ka lipolokelo tsena tsa letlotlo. Tlaleho ea hae e re nea leseli la bophelo ba bolumeli ba batho ba nakong eo, haholo-holo tabeng ea linyehelo tsa bona mabapi le litšebeletso tsa tempele.

“Polokelo ka ’ngoe e ne e le bakeng sa ntho e itseng e fapaneng, e ngotsoeng ka leleme la Seheberu. Ea pele e ne e ngotsoe: Lishekele tse ncha: ke hore, lishekele tse behelletsoeng kathoko bakeng sa selemo seo ba leng ho sona. Ea bobeli: Lishekele tsa khale: ke hore, lishekele tse behelletsoeng kathoko bakeng sa litšenyehelo tsa selemo se fetileng. Ea boraro: Maebana-khoroana le maeba a manyenyane: chelete e neng e kenngoa polokelong ena e ne e le tefiso e neng e lokela ho lefshoa ke ba neng ba lokela ho etsa nyehelo ea maebana-khoroana a mabeli kapa maeba a mabeli a manyenyane, le leng e le la secheso, le leng e le sehlabelo sa sebe. Kaholimo ho polokelo ea bone ho ne ho ngotsoe: Licheso: chelete ena e ne e koahela litšenyehelo tsa licheso tse ling. Ea bohlano e ne e e-na le mongolo ona: Patsi, ’me e ne e tšela limpho tsa batho ba tšepahalang bakeng sa ho reka patsi ea aletare. Ea botšelela: Libano (chelete ea ho reka libano). Ea bosupa: Bakeng sa sehalalelo (chelete bakeng sa setulo sa mohau). Lipolokelo tse tšeletseng tse setseng li ne li e-na le mongolo ona: Linyehelo tsa boithatelo.”

Matšoao a neng a le lipolokelong tse peli tse qalang a ne a bua ka halofo ea shekele (lidrakema tse peli tsa chelete ea Magerike) lekhetho leo monna e mong le e mong e moholo a neng a hlokoa ke molao hore a le lefe bakeng sa tlhokomelo ea tempele, le litšebeletso tse phethoang moo, le mahlabelo a letsatsi le letsatsi a neng a nyeheloa molemong oa sechaba kaofela. Hangata lekhetho lena le ne le bokelloa metseng ea sebaka ka seng e be joale le tlisoa tempeleng.—Mattheu 17:24.

Molao o ne o boetse o hloka hore batho ba etse linyehelo tse fapa-fapaneng molemong oa bona. Tse ling e ne e le bakeng sa libe tse entsoeng, tse ling e le ka mabaka a litšebeletso, ’me tse ling hape, e le ho bontša boineelo ba bona le ho bontša teboho. Mabokose a tšoailoeng “Maebana-khoroana le maeba a manyenyane” le “Licheso” e ne e tla ba bakeng sa merero e joalo. Buka The Temple, Its Ministry and Services, e re, “basali ba neng ba lokela ho tlisa maebana-khoroana bakeng sa nyehelo ea secheso kapa ea sebe ba ne ba akhela chelete e lekanang theko ea ’ona kahare ho Terompeta III, e neng e ntšoa letsatsi le letsatsi ’me ho nyeheloa lenane le loketseng la maebana-khoroana.” Ke ho utloahalang hore sena ke sona seo batsoali ba lesea Jesu ba ileng ba se etsa.—Bona Luka 2:22-24; Levitike 12:6-8.

Hape, ho ne ho e-na le linyehelo bakeng sa patsi le libano tse neng li sebelisoa aletareng le bakeng sa linyehelo tsa boithatelo. Hape, ho latela Moprofesa Stapfer, “haeba motho leha e le ofe a ne a fana ka chelete bakeng sa patsi kapa libano, ho ne ho e-na le tekanyetso e neng e beiloe, ’me ho ne ho ke ke ha etsoa nyehelo ka ho ka tlaase ho moo. Ho ne ho hlokahala hore ho fanoe bonyane ka theko ea libano tse etsang seatla, kapa mafatsa a mabeli a patsi a bolelele ba setsoe ’me e le a maholo ka chebo ea mahlo.”

Re ithuta eng ho see sohle? Ho hlakile hore Baiseraele ba ne ba e-na le boikarabelo bo bongata mabapi le tlhokomelo ea tabernakele ’me hamorao ea tempele e Jerusalema, setsi sa borapeli ba ’nete. Mahlabelo le linyehelo e ne e le karolo ea bohlokoahali ea borapeli ba bona. Ha e le hantle, Molao o ne o laela hore “ho se be ea tla hlaha pel’a Jehova a sa nka letho.” (Deuteronoma 16:16, NW) Empa ba ne ba ikutloa joang ka lintho tsee tse neng li ba tlamile?

Maikutlo a Fapaneng

Tlaleho ea Bibele e bontša hore mehleng ea Moshe le Davida ’me hamorao nakong ea puso ea Joase le Josiase, liatla tsa batho li ne li bulehile haholo ’me ba fana haholo. (Exoda 36:3-7; 1 Likronike 29:1-9; 2 Likronike 24:4-14; 34:9, 10) Ba ne ba le motlōtlō ho kopanela kahong ea ntlo ea Jehova le ho e hlokomela hape le ho atolosa borapeli ba ’nete. Boikutlo ba bona bo ile ba senoloa hantle ke mantsoe a Davida ha a re: “Ka thaba ha ba itse ho ’na: A re eeng ka tlung ea Jehova.”—Pesaleme ea 122:1.

Leha ho le joalo, e ne e se bohle ba neng ba e-na le moea ona oa ho fana. Ka mohlala, re bala hore mehleng ea Malakia, baprista ba ne ba etsetsa Jehova nyehelo ka “se utsoitsoeng, le se hlotsang, le se kulang.” Ho fapana le ho thabela tokelo ea bona ea tšebeletso, ba ne ba re: “A ntho e khathatsang!”—Malakia 1:13.

Ka ho tšoanang, mehleng ea Jesu ba bang ba ne ba nka monyetla ka boemo boo ho ntšetsa pele lithahasello tsa bona. Ka mohlala, batho ba tsebahalang ka bobe ba neng ba ananya chelete tempeleng, ba ne ba se moo feela ho ananya. Ho fapana le hoo, ba ne ba nka monyetla ka ’nete ea hore e ne e le lishekele tsa Seheberu feela tse neng li amoheloa e le linyehelo, le hore bohle ba neng ba tšoere chelete ea Seroma kapa ea Segerike ba ne ba tla lokela ho e ananya. Ho latela Alfred Edersheim, setsebi historing ea Bojode, “boralibanka ba ne ba lumelletsoe ho lefisa meah ea silevera, kapa hoo e ka bang karolo ea bone ea denare [moputso oa mosebetsi oa letsatsi ho motho ea sebetsang] holim’a halofo e ’ngoe le e ’ngoe ea shekele.” Haeba sena se nepahetse, ho bonolo ho bona hore na khoebo ena e tlameha e be e ile ea e-ba e tlisang phaello e ngata hakaakang le hore na ke hobane’ng ha baeta pele ba bolumeli ba ne ba khopehile hakana ha Jesu a leleka batho ba ananyang chelete.

“A Nkile Bofumanehing Ba Hae”

Sena sohle se mpa se hatisa setšoantšo sa Jesu ka moneelo o monyenyane oa mohlolohali ea fumanehileng, oo ntle le pelaelo a ileng a o tšela ka ho le leng la mabokose a tšoailoeng “Linyehelo tsa Boithatelo.” Joaloka mohlolohali, o ne a sa hlokoe ho ntša lekhetho, hape ka baka la ho hloka, mohlomong o ne a sa khone ho phetha tekanyetso ea se hlokoang bakeng sa licheso kapa patsi kapa linyehelo tsa libano. Empa o ne a batla ho etsa ho hong ho bontša lerato la hae ho Jehova. O ne a sa batle ho siuoa kathoko kapa a ho tlohellele ba neng ba ka ‘ho khona.’ Jesu o ile a re: “Empa enoa o noketse a nkile bofumanehing ba hae, o noketse hohle hoo a neng a na le hona, hohle hoo a neng a phela ka hona.”—Mareka 12:44.

Ho na le lintho tse ngata tsa bohlokoahali tseo re ka ithutang tsona tlalehong ena. Mohlomong e ’ngoe ea tse hlahelletseng ka ho fetisisa ke hore, le hoja kaofela ha rōna re e-na le tokelo ea ho tšehetsa borapeli ba ’nete ka lintho tsa rōna tse bonahalang, hoo e leng habohlokoa kannete mahlong a Molimo, hase ho fana ka seo re ka ’nang ra phela kantle ho sona, empa ke ho fana ka seo e leng sa bohlokoa ho rōna. Ka mantsoe a mang, na re fana ka lintho tseo re hlileng re se nang ho li hloka? Kapa na kannete ho fana ha rōna ke sehlabelo?

Ho Atolosa Borapeli ba ’Nete Kajeno

Kajeno Lipaki tsa Jehova li atolosa borapeli ba ’nete ka ho bolela ka cheseho “Evangeli ena ea ’muso . . . lefatšeng lohle.” (Mattheu 24:14) Ho finyella mosebetsi ona oa qitikoe eohle ha ho akarelletse feela ho nehelana ka boiteko, nako, le matla empa hape le litšenyehelo tse khōlō. Yearbook of Jehovah’s Witnesses ea 1987 e tlaleha hore “ka 1986, kakaretso ea [R52 324 003,56] e ile ea sebelisoa tšehetsong ea lichelete ea . . . baromuoa ba 2 762, bo-pula-maliboho ba khethehileng ba 13 351, le balebeli le basali ba bona bakeng sa lipotoloho le litereke tse 3 353 tse lefatšeng.” Hona ho ne ho ekelletsa “litšenyehelong tse ngata tsa ho reka, ho haha, le ho nchafatsa mehaho; ho kenya thepa lifekthering le liofising tse ntlo-kholo le makaleng a mokhatlo a 93; le ho hlokomela litlhokahalo tsa lintho tse bonahalang tsa baithaopi ba 8 920 ba sebeletsang mahaeng a Bethele.”

Potso e botsoang hangata ke hore na ‘Lichelete tse joalo li tsoa kae?’ Ho fapana le likereke tsa Bokreste-’mōtoana, Lipaki tsa Jehova ha li nke likoleke kapa hona ho romela lianfolopo ho qela limpho. Ho fapana le hoo, mabokose a moneelo—ho tšoana le lipolokelo tsa letlotlo tsa mehleng ea Bibele—a teng liholong tsa tsona tsa ’Muso. Ka linako tse ling, mabokose a mang a ka ’na a beoa bakeng sa meneelo e khethehileng, e kang kaho ea Liholo tsa ’Muso kapa Liholo tsa Kopano kapa ho thusa baromuoa ho ea likopanong linaheng tsa habo bona. Hape meneelo e ka ’na ea romeloa ka ho toba ho Watch Tower Society, Private Bag 2067, Krugersdorp, 1740, bakeng sa ho atolosa mosebetsi oa boboleli lefatšeng ka bophara.

U talima litsela tsee tse ngata tse fapaneng tseo meneelo e etsoang ka tsona joang? Na le uena, joaloka ba bang mehleng ea Malakia, u li talima e le moroalo o tenang, mohlomong u bile u re ka pelong ea hao: “A ntho e khathatsang!”? Kapa joaloka “mohlolohali ea fumanehileng,” u li talima e le menyetla ea ho bontša cheseho ea hao le ho tsotella ha hao borapeli ba ’nete le takatso ea hao ea ho hlonepha Jehova ka matlotlo a hao? U se ke ua lebala potso ea bohlokoahali tabeng ena: Na ho fana ha hao ke sehlabelo?

“Le nteke ka hoo, ho bolela Jehova oa makhotla, ’me le bone ha nke ke ka le thibollela liphororo tsa leholimo, ke be ke le tšollele hlohonolofatso ka tekanyo e fetisisang!” (Malakia 3:10) Nala ea moea le keketseho e lefatšeng ka bophara har’a batho ba Jehova e paka hore Jehova o se a ntse a etsa joalo. E se eka re ka tsoela pele ho nea Jehova nyehelo eo kannete e leng sehlabelo.

[Lebokose le leqepheng la 30]

KAMOO BA BANG BA ETSANG MENEELO KATENG MOSEBETSING OA ’MUSO

◻ LIMPHO: Meneelo ea boithatelo ea chelete e ka ’na ea romeloa ka ho toba ho Watch Tower Bible and Tract Society, Private Bag 2067, Krugersdorp, 1740. Thepa e kang litša tse hahiloeng, ’moho le mabenyane kapa matlotlo a mang, le tsona li ka fanoa. Meneelo ena e lokela ho tsamaea le lengolo le lekhutšoanyane le bolelang hore ke limpho ka ho felletseng,

◻ TOKISETSO EA MONEELO O KA BUSELETSOANG MONG’A OONA: Chelete e ka ’na ea neoa Mokhatlo oa Watch Tower hore e bolokoe, ka tokisetso ea hore haeba motho a e hloka, e tla khutlisetsoa ho ea faneng ka eona.

◻ INSURANCE: Mokhatlo oa Watch Tower o ka ’na oa ngolisoa e le mojalefa oa polokelo ea bophelo ea insurance kapa morerong oa penchene kapa ha motho a khaotsa mosebetsi. Mokhatlo o lokela ho tsebisoa ka litokisetso leha e le life tse joalo.

◻ MANGOLO A KABO EA LEFA: Thepa kapa chelete li ka ’na tsa sieloa Mokhatlo oa Watch Tower ka lengolo la kabo ea lefa le fetisitsoeng ka molao. Kopi e lokela ho romelloa ho Mokhatlo.

Bakeng sa boitsebiso bo eketsehileng le keletso mabapi le litaba tse joalo, ngolla Ofisi ea Ramatlotlo, Watch Tower Bible and Tract Society, Private Bag 2067, Krugersdorp, 1740.