Jesu Bophelo le Tšebeletso tsa Hae

Morui le Lazaro

JESU o ne a ntse a bua le barutuoa ba hae ka tšebeliso e nepahetseng ea maruo a bonahalang, a hlalosa hore re ke ke ra ba bahlanka ba ’ona ’me ka nako e tšoanang ra ba bahlanka ba Molimo. Bafarisi le bona ba mametse, ’me ba qala ho soma Jesu hobane ba rata chelete. Joale o re ho bona: “Ha e le lōna, le ipea ba lokileng pel’a batho, empa Molimo o tseba lipelo tsa lōna, hobane se phahameng ho batho, ke manyala pel’a Molimo.”

Nako e fihlile ea hore molamu o boele sefateng holim’a batho ba ruileng lintho tsa lefatše, matla a bopolotiki, le taolo le tšusumetso ea bolumeli. Ba lokela ho kokobetsoa, ’me ba hlokomelang seo ba se hlokang moeeng ba lokela ho phahamisoa. Jesu o supa phetoho e joalo ha a tsoela pele hore a re ho Bafarisi:

“Molao le baporofeta li ile tsa tiea ho fihlela ho Johanne [Mokolobetsi]; ’me ha e sa le mohlang oo, ’muso oa Molimo oa boleloa, ’me e mong le e mong o o kena ka matla. Ho bonolo ha ho ka feta leholimo le lefatše ho e-na le hore ho oele fatše hlaku ea molao, leha e ka ba ’ngoe.”

Bangoli le Bafarisi ba motlotlo ka ho itšoarella ha bona ha boikaketsi ka Molao oa Moshe. Hopola hore ha Jesu a foufolla ka mohlolo monna e mong Jerusalema, ba ile ba ithorisa: “Re barutuoa ba Moshe. Rōna, rea tseba hobane Molimo o buile le Moshe.” Empa joale Molao oa Moshe o phethile seo o neng o se reretsoe hore ka boikokobetso o ise batho ho Jesu Kreste, Morena ea khethiloeng ke Molimo. Ho joalo le ka qaleho ea tšebeletso ea Johanne, batho ba mefuta eohle, haholo-holo baikokobetsi le bafumanehi, ba etsa ka matla ho fetoha bafo ba ’Muso oa Molimo.

Kaha joale ho phethoa Molao oa Moshe, tlamo ea ho o boloka e tla tlosoa. Molao o lumella tlhalo ka mabaka a fapa-fapaneng, empa Jesu joale o re: “E mong le e mong ea hlalang mosali oa hae ha e se ka baka la bofebe, a nyala e mong, oa feba; le ea nyalang ea hlaliloeng, le eena oa feba.” Lipuo tse joalo tse etsoang phatlalatsa li tlameha ho khopisa Bafarisi hakaakang, haholo kaha ba lumella tlhalo ka mabaka a mangata!

Ha a tsoela pele ka lipolelo tsa hae ho Bafarisi, Jesu o pheta setšoantšo se buang ka banna ba babeli bao boemo ba bona, bo qetellang bo fetohile haholo. Na u ka hakanyetsa hore na banna bao ba tšoantšetsa eng le hore na ho fetoha ha maemo a bona ho bolela eng?

Jesu oa hlalosa: “Morui e mong o na a le teng ea apereng purepera le lene e ntle, ea iketlileng menateng ka matsatsi ’ohle. Mofutsana e mong le eena o na a le teng ea bitsoang Lasaro, ea neng a beoa pel’a monyako oa eo, a tletse libebe; o na a lakatsa a ka khora makumane a oang tafoleng ea morui; hape le tsona lintja li ne li tla, li nyeka libebe tsa hae.”

Mona Jesu o sebelisa morui ho tšoantšetsa baeta-pele ba bolumeli ba Bajode, ba sa akarelletseng feela Bafarisi le bangoli empa ba akarelletsa le Basaduse le baprista ba baholo. Ke barui ntlheng ea litokelo tsa moea le menyetla, ’me ba itšoara ka tsela e tšoanang le ea morui. Liaparo tsa bona tsa purepera ea borena li tšoantšetsa boemo ba bona bo ratehang, ’me line e tšoeu e tšoantšetsa ho itokafatsa ha bona.

Sehlopha sena sa morui se ikakasang se talima mafutsana, batho feela, ka nyeliso e feletseng, ba ba bitsa ‛am ha·’aʹrets, kapa batho ba lefatše. Mokopi Lazaro kahoo o tšoantšetsa batho bana bao baeta-pele ba bolumeli ba ba hanelang ka phepo e loketseng ea moea le ka litokelo tse loketseng tsa moea. Kahoo, joaloka Lazaro ea neng a tletse libebe, batho feela ba khesoa joaloka ba kulang moeeng le ba lokeloang ke hore ba be feela har’a lintja. Leha ho le joalo, sehlopha sa Lazaro se lapetse le ho nyoreloa phepo ea moea ’me ka hona se lutse monyako se batla makumane leha e le afe a lijo tsa moea a ka ’nang a oa tafoleng ea morui.

Jesu joale o tsoela pele ho hlalosa liphetoho boemong ba morui le Lazaro? Liphetoho tsee ke life, hona li emela eng? Lipotso tsena li tla hlahlobjoa tokollong e latelang ea makasine oa rōna. Luka 16:14-21; Johanne 9:28, 29; Mattheu 19:3-9; Ba-Galata 3:24; Ba-Kolosse 2:14.

◆ Ka qaleho ea tšebeletso ea Johanne, Jesu o bontša hore ho etsahala liphetoho life?

◆ Ho tla tlosoa eng ka mor’a lefu la Jesu, ’me ntho ee e tla ama litaba tsa tlhalo joang?

◆ Setšoantšong sa Jesu, ke bo-mang ba tšoantšetsoang ke morui le Lazaro?

◆ Ke boitsebiso bofe boo re ka bo lebellang tokollong e latelang ea makasine oo?