Jesu Bophelo le Tšebeletso tsa Hae

Ho Kena ha Kreste ka Tlhōlo Jerusalema

HOSENG ho latelang, Sontaha, la 9 Nisane, Jesu o tloha Bethania le barutuoa ba hae ’me o leba Thabeng ea Mehloare mabapa le Jerusalema. Ka mor’a nakoana, ba atamela Bethefage, e lutseng holim’a Thaba ea Mehloare. Jesu o laela barutuoa ba hae ba babeli:

“E-eang motsaneng oo le o lebileng; etlare le sa fihla, le tla be le fumane esele e holehiloeng, e nang le petsana ea eona; le li lokolle, ’me le ntlisetse tsona. Etlare ha motho a le botsa taba, le tle le re ho eena: Morena oa li hloka; ’me o tla phakisa a li romele.”

Le hoja qalehong barutuoa ba sitoa ho elelloa hore litaelo tsena li na le moo li amanang le ho phethahatsoa ha boprofeta ba Bibele, hamorao baa hlokomela hore li amana le hona. Moprofeta Zakaria o ile a bolela esale pele hore Morena ea tšepisitsoeng ke Molimo o ne a tla kena Jerusalema a kaletse esele, e, “petsana, namane ea esele e tšehali.” Morena Salomone o ne a ile a kalla petsana ea esele ka mokhoa o tšoanang ha a il’o tlotsoa.

Ha barutuoa ba kena Bethefage ’me ba nka petsana le ’m’a eona, ba bang ba emeng moo ba re: “Le etsa’ng na?” Empa ha ba bolelloa hore liphoofolo tseo li isetsoa Morena, banna bao ba tlohela barutuoa ba Jesu hore ba li nke. Barutuoa ba ala liaparo tsa bona holim’a esele le petsana ea eona, empa Jesu o kalla petsana.

Ha Jesu a kalla a lebile Jerusalema, letšoele lea eketseha. Boholo ba batho ba ala liaparo tsa bona ’mileng, ha ba bang ba khaola makala lifateng ’me ba a ala. Ba hoa: “Ho bokoe monghali ea tlang ka lebitso la Morena! Khotso e be leholimong, le khanya maholimong a holimo-limo!”

Bafarisi ba bang har’a letšoele ba khopisoa ke liphatlalatso tsena ’me ba isa pelaelo ho Jesu: “Moruti, khalemela barutuoa ba hao.” Empa Jesu oa arabela: “Kea le bolella, ke re: Bao ha ba ka khutsa, majoe a ka hoa.”

Ha Jesu a atamela Jerusalema, o talima motse ’me o qala ho o llela, a re: “Jo! hoja ebe le uena u tsebile, le ka tsatsi lena la hao, tse ka beng li u hlahisetsa khotso! Empa joale li patetsoe mahlo a hao.” Ka baka la ho se utloe ha eona ha ka boomo, Jerusalema e tlameha ho lefa molato, joalokaha Jesu a bolela esale pele:

“Bao e leng lira [Baroma, tlas’a Molaoli Tite] ho uena ba tla cheka lengope, ba u teele hare ka lona, ba u thibelle ka nģa tsohle; ba tla u lihela fatše, uena le bana ba hao ba ho uena, ’me ba ke ke ba lesa ha hao lejoe holim’a lejoe le leng.” Timetso ena ea Jerusalema e boletsoeng ke Jesu esale pele ha e le hantle e etsahala lilemo tse 37 hamorao, ka 70 C.E.

Libeke tse seng kae pejana, ba bangata har’a letšoele ba ne ba ile ba bona ha Jesu a tsosa Lazaro. Joale ba tsoela pele ho bolella ba bang ka mohlolo oo. Kahoo ha Jesu a kena Jerusalema, motse oohle oa hoerehana. Batho ba batla ho tseba, “Enoa ke mang na?” ’Me matšoele a tsoela pele ho bolela: “Ke Jesu, moprofeta ea tsoang Nazaretha oa Galilea.” Ha ba bona se etsahalang, Bafarisi ba tletleba ka hore bona ha ba atlehe ho hang, hobane, joalokaha ba bolela: “Lefatše lohle le mo setse morao.”

Joalokaha e le tloaelo ea hae ha a etetse Jerusalema, Jesu o ea tempeleng ho ea ruta. Mono lifofu le lihlotsa li tla ho eena, ’me oa li phekola! Ha baprista ba baholo le bangoli ba bona lintho tse babatsehang tseo Jesu a li etsang le ha ba utloa bashanyana ba hoa tempeleng, “Hosanna ho mor’a Davida!” ba halefa haholo. Baa belaela: “Na u utloa seo ba se bolelang na?”

Jesu oa arabela: “E; na ha le e-so ho ka le bala taba e reng: U tumisitse lithoko tsa hao ka melomo ea bana le ea ba anyang, na?”

Jesu o tsoela pele ho ruta, ’me o lekola lintho tsohle tse ka tempeleng. Ka potlako e se e e-ba mantsiboea. Kahoo o tloha a e-na le ba 12 ’me o khutlela Bethania sebaka sa bohōle ba lik’hilomithara tse tharo kapa ho isa moo. O qeta bosiu ba Sontaha moo, mohlomong a le lapeng la motsoalle oa hae Lazaro. Mattheu 21:1-11, 14-17; Mareka 11:1-11, NW; Luka 19:29-44; Johanne 12:12-19; Zakaria 9:9.

◆ Jesu o kena Jerusalema e le Morena neng ’me o kena ka mokhoa ofe?

◆ Ke habohlokoa hakae hore matšoele a rorise Jesu?

◆ Jesu o ikutloa joang ha a talima Jerusalema, ’me o fana ka boprofeta bofe?

◆ Ho etsahala joang ha Jesu a kena tempeleng?