O ne a sa Tsofala Haholo Hore a ka Sebeletsa Jehova

BATHO ba bangata ba tsofetseng ba ikutloa hore lilemo tsa bona tse setseng li fupere tšepo e fokolang ea ho thaba. Motšoantšisi e mong oa mosali ea tsebahalang haholo ea tsofetseng o bile a re: “Ke sentse bophelo ba ka, ’me e se e le morao haholo hore nka bo fetola . . . Ha ke tsamaea ke le mong, ke nahana ka lilemo tse fetileng tsa bophelo ba ka, ’me ha ke thabele tsela eo ke bo phetseng ka eona . . . Ha ke na phomolo hohle ’me ke sitoa ho tsitsa.”

Mosali ea tsofetseng ea phetseng hoo e ka bang lilemo tse 2 000 tse fetileng o ne a se na bothata ba mofuta oo. E ne e le mohlolohali ea lilemo li 84, empa o ne a le mafolo-folo, a thabile, ’me a ratoa ke Molimo ka mokhoa o babatsehang. Lebitso la hae e ne e le Anna, ’me o ne a e-na le lebaka le khethehileng la ho thaba. E ne e le lefe?

“O ne a sa Tlohe Tempeleng”

Mongoli oa Kosepele Luka o re tsebisa Anna. O re: “Hape, ho no ho le Anna, moporofeta oa mosali, morali oa Fanuele, oa leloko la Asere” Iseraeleng. Joaloka moprofeta oa mosali, o ne a e-na le mpho ea moea o halalelang oa Molimo, kapa matla a sebetsang, ka kutloisiso e khethehileng. ’Me Anna o ile a ba le monyetla o motle oa ho profeta haholo-holo ketsahalong e le ’ngoe e hlokomelehang.

Luka oa hlalosa: “O ne a se a holile haholo, a kile a ba le monna lilemo tse supileng ho tloha boroetsaneng ba hae; ’me joale, e ne e se e le mohlolohali oa lilemo tse batlileng ho ba mashome a robileng meno e le ’meli a metso e mene.” (Luka 2:36, 37) Mohlomong, Anna e ile ea e-ba mohlolohali a sa le monyenyane haholo. Basali ba Bakreste bao e leng bahlolohali ba lilemong leha e le life baa tseba kamoo ho utloisang pelo bohloko kateng ho lahleheloa ke monna ea ratoang ka lefu. Leha ho le joalo, joaloka basali ba bangata ba tšabang Molimo ba mehleng ea rōna, Anna haa ka a lumella phihlelo ena e bohloko ho emisa tšebeletso ea hae ho Molimo.

Luka o re bolella hore Anna “o ne a sa tlohe tempeleng” Jerusalema. (Luka 2:37) Ka thahasello e khōlō o ne a ananela tlhohonolofatso e tlisoang ke tšebeletso ntlong ea Molimo. Liketso tsa hae li ne li senola hore eena, joaloka Davida morena oa Iseraele oa mopesaleme, o ne a kōpa ntho e le ’ngoe feela ho Jehova. Ebe e ne e le eng eona eo? Davida o ile a bina: “Ntho e teng eo ke e kōpang ho Jehova, eo ke ratang ho e bona, ke hobane ke lule ka tlung ea Jehova ka litšiu tsohle tsa bophelo ba ka, ke tle ke bohe bokhabane ba Jehova, ke lekolisise tempele ea hae.” (Pesaleme ea 27:4) Ka ho tšoanang, tabeng ena, Anna o tšoana le basali ba Bakreste kajeno ba fumanang thabo ka ho ba teng ka mehla sebakeng sa Jehova sa borapeli.

Anna o ne a nehelana ka tšebeletso e halalelang ho Jehova bosiu le motšehare. O ne a etsa sena “ka ho itima lijo le ka ho rapela,” a bontša ho sareloa le tlholohelo ea ’nete. (Luka 2:37) Ho ikokobeletsa ha Bajuda puso ea Balichaba ka makholo-kholo a lilemo, hammoho le ho theoha ha boemo ba bolumeli ho ileng ha ba ha fihla tempeleng le ho boprista ba eona, ka ho utloahalang e ne e ka ’na ea e-ba lebaka la ho itima ha Anna lijo le lithapelo tsa hae ho Jehova Molimo. Empa o ne a boetse a e-na le lebaka la ho thaba, haholo-holo ka lebaka la ntho e ’ngoe e ikhethang e ileng ea etsahala letsatsing la bohlokoahali ka selemo sa 2 B.C.E.

Tlhohonolofatso e sa Lebelloang

Letsatsing lena la bohlokoahali, lesea Jesu le ile la tlisoa tempeleng ea Jerusalema ke ’m’a lona, Maria, le ntat’a lona oa moholisi, Josefa. Simeone ea tsofetseng o ile a bona lesea ’me a bua mantsoe a boprofeta ketsahalong eo. (Luka 2:25-35) Anna o ne a ntse a le tempeleng joaloka ka mehla. Luka oa tlaleha: “Ka nako eona eo, o ile a atamela.” (Luka 2:38, NW) E tlameha e be Anna o ile a thaba hakaakang ha mahlo a hae a tsofetseng a bona Messia oa kamoso!

Matsatsi a 40 pejana, lengeloi la Molimo le ne le ile la makatsa balisa pel’a Bethlehema ka mantsoe a reng: “Se tšabeng, hobane bonang, ke le bolella thabo e kholo, e monate, ee e tla ba ea sechaba kaofela; ke ho re, kajeno, le tsoaletsoe ’Moloki, motseng oa Davida; ke Kreste, Morena.” Lekhotla le leholo la leholimo le ile la rorisa Jehova ’me la phaella: “Khanya e be ho Molimo maholimong a holimo, khotso e be lefatšeng ho batho bao o khahloang ke bona.” (Luka 2:8-14) Ka ho tšoanang, Anna joale o ile a susumeletseha ho fana ka bopaki ka Eo e neng e tla ba Messia!

Ha a bona lesea Jesu, Anna o ile a qala ho “boka Morena, ’me a bolela tsa Jesu ho bohle ba lebeletseng topollo Jerusalema.” (Luka 2:38) Joaloka Simeone ea tsofetseng, eo le eena a bileng le tokelo ea ho bona lesea Jesu tempeleng, ntle ho pelaelo o ne a ’nile a hloloheloa, a rapella, le ho letela ho tla ha Molopolli ea tšepisitsoeng. Litaba tse molemo tsa hore Jesu e ne e le eena Eo li ne li le molemo haholo hore a ka ipolokela tsona.

Le hoja Anna mohlomong a ne a sa lebella hore o ne a tla be a ntse a phela ha Jesu a se a hōlile, o ile a etsa eng? Ka thabo o ile a pakela ba bang ka tokoloho e neng e lokela ho tlisoa ka Messia enoa ea tlang.

Mohlala o Motle oa Anna

Ke batho ba bakae ba lefatše bao e leng litho tsa bolumeli ba ka fanang ka bopaki bo joalo kapa ba ntseng ba nehelana ka borapeli bosiu le motšehare ba le lilemo li 84? Mohlomong ba ka be ba se ba kōpile penshene lilemo tse itseng pejana. Anna le Simeone ba ne ba fapane. Ba fane ka mohlala o motle ho bahlanka bohle ba Jehova ba tsofetseng. Ruri, ba ne ba rata ntlo ea Jehova ea borapeli ’me ba mo rorisa ka lipelo tsohle tsa bona.

Ho Anna re na le mohlala o motle haholo oa mohlolohali ea tšabang Molimo. Ha e le hantle, tlhaloso ea Luka ka mosali-moholo enoa ea ikokobelitseng e tšoana hantle le litšoaneleho tsa mohlolohali ea tšoanelehang tse hlalositsoeng ho 1 Timothea 5:3-16. Mono moapostola Pauluse o bolela hore mohlolohali ea joalo “o tiisetsa liqelong le merapelong, bosiu le motšehare,” ke “mosali oa monna a le mong feela,” le ‘ea hlokomelang mesebetsi eohle e molemo.’ Anna e ne e le mosali oa mofuta oo.

Kajeno, re fumana bahlolohali ba tsofetseng ba nehelanang ka tšebeletso e halalelang ho Molimo bosiu le motšehare liphuthehong tse likete-kete tsa Lipaki tsa Jehova ho pota lefatše. Re ananela hakaakang ho ba le “bo-Anna” baa ba mehleng ea kajeno har’a rōna!

Esita leha ba se ba tsofetse haholo, banna le basali ba ka inehela ho Molimo ’me ba tšoantšetsa sena ka kolobetso ea metsing. Ba hōlileng ha baa tsofala haholo hore ba ka sebeletsa Jehova le ho paka ka ’Muso oa Bomessia oo hona joale o hlonngoeng maholimong le oo haufinyane o tla tlisetsa moloko oa batho ba utloang litlhohonolofatso tse enneng. Batho ba tsofetseng bao hona joale ba nehelanang ka tšebeletso e halalelang ho Molimo ba ka pakahatsa litlhohonolofatso tsa Jehova ho bona, feela joalokaha Anna a ile a hlohonolofatsoa ka ho khethehileng makholo a lilemo a fetileng. O ne a sa tsofala haholo hore a ka sebeletsa Jehova le ho rorisa lebitso la hae le halalelang—’me le bona ka ho tšoanang.