Jesu Kreste ke Mang?

NAHANA kamoo e tlamehang ebe mocha e mong oa Mojuda ea bitsoang Andrease o ile a thaba kateng ha a qala ho utloa mantsoe a Jesu oa Nazaretha! Bibele e bolela hore Andrease o ile a mathela ho mor’abo ’me a re: “Re fumane Mesia [kapa, Kreste].” (Johanne 1:41) Mantsoe a atisang ho fetoleloa e le “Mesia” le “Kreste,” a bolela “Motlotsuoa” ka puo ea Seheberu le ea Segerike. Jesu e ne e le Motlotsuoa, kapa Mokhethoa oa Molimo—Moeta-pele eo ho neng ho tšepisitsoe hore o tla tla. (Esaia 55:4) Mangolo a ne a e-na le boprofeta bo buang ka eena, ’me nakong eo, Bajuda ba ne ba mo lebeletse.—Luka 3:15.

Re tseba joang hore Jesu e ne e hlile e le Mokhethoa oa Molimo? A re nahaneng ka se ileng sa etsahala ka selemo sa 29 C.E. ha Jesu a ne a e-na le lilemo tse 30. O ile a ea ho Johanne Mokolobetsi hore a mo kolobetse ka metsing a Nōka ea Jordane. Bibele e re: “Ka mor’a hore Jesu a kolobetsoe kapele-pele a nyoloha a tsoa ka metsing; ’me, bonang! maholimo a buleha, ’me a bona moea oa Molimo o theoha joaloka leeba o tla holim’a hae. Bonang! Hape, ha e-ba le lentsoe le tsoang maholimong le reng: ‘Enoa ke Mora oa ka, ea ratoang, eo ke mo amohetseng.’” (Matheu 3:16, 17) Ha Johanne a qeta ho utloa Molimo a amohela Jesu ka tsela eo, na o ne a ka ba le khoao ea hore Jesu e ne e le Mokhethoa oa Molimo? Jehova Molimo o ile a tšollela moea oa hae o halalelang ho Jesu e le hore a mo tlotse kapa a mo khethe hore e tle e be Morena oa ’Muso oa Hae o neng o tla tla. Kahoo, Jesu e ile ea e-ba Jesu Kreste, kapa Jesu Motlotsuoa. Leha ho le joalo, ke hobane’ng ha Jesu a ile a bitsoa Mora oa Molimo? O ne a tsoa lesikeng lefe?

Lesika la Hae le Tsoa “Linakong Tsa Pele”

Bophelo ba Jesu bo ka aroloa ka mekhahlelo e meraro. Mokhahlelo oa pele o ile oa qala khale pele a tsoaloa e le motho oa nama. Mikea 5:2 e re: Lesika la hae ‘le tsoa linakong tsa pele, matsatsing a nako e sa lekanyetsoang.’ Jesu ka boeena o ile a re: “Ke tsoa libakeng tse holimo”—ke hore, leholimong. (Johanne 8:23) O ne a phetse leholimong e le motho oa moea ea matla.

Kaha ho na le moo lintho tsohle tse bōpiloeng li qalileng teng, ho na le nako eo ka eona Molimo a neng a lula a le mong. Leha ho le joalo, lilemong tse ngata haholo tse fetileng, Molimo o ile a qala ho bōpa. O ile a bōpa mang pele? Buka ea ho qetela ea Bibele e bitsa Jesu “tšimoloho ea pōpo ea Molimo.” (Tšenolo 3:14) Jesu ke “letsibolo la pōpo eohle.” Ho joalo hobane “lintho tse ling tsohle tse maholimong le tse lefatšeng li ile tsa bōptjoa ho sebelisoa eena, lintho tse bonahalang le lintho tse sa bonahaleng.” (Bakolose 1:15, 16) Ha ho pelaelo hore ke Jesu feela eo Molimo a ileng a mo bōpa ka boeena. Kahoo, o bitsoa “Mora . . . ea tsoetsoeng a ’notši” oa Molimo. (Johanne 3:16) Lebitso le leng leo Mora enoa oa letsibolo a bitsoang ka lona ke “Lentsoe.” (Johanne 1:14) Hobane’ng? Hobane pele a tsoaloa e le motho oa nama, e ne e le eena ea buang lebitsong la Molimo leholimong.

“Tšimolohong” ha ho ne ho bōptjoa “maholimo le lefatše,” “Lentsoe” o ne a e-na le Jehova Molimo. Ke eena eo Molimo a ileng a re ho eena: “A re etse motho ka setšoantšo sa rōna.” (Johanne 1:1; Genese 1:1, 26) Mora oa Jehova oa letsibolo o ne a le pel’a Ntat’ae, a sebetsa le eena ka mafolofolo. Ho Liproverbia 8:22-31, ho boleloa hore o ile a re: “Ke ile ka ba mabapa le [’Mōpi] ke le mosebetsi ea hloahloa, ’me ka ba eo a neng a mo rata ka ho khethehileng letsatsi le letsatsi, ke ntse ke nyakaletse ka pel’a hae ka nako eohle.”

Ka sebele e tlameha ebe Jehova Molimo le Mora oa hae ea tsoetsoeng a ’notši ba ile ba tsebanelana haufi haholo ha ba ntse ba sebetsa hammoho! Ho ba motsoalle oa Jehova ka lilemo-lemo ho ile ha ama Mora enoa oa Molimo ka botebo. Mora enoa ea ikokobelitseng o ile a tšoana hantle le Ntate oa hae, Jehova. Ha e le hantle, Bakolose 1:15 e re Jesu ke “setšoantšo sa Molimo ea sa bonahaleng.” Ke ka lebaka leo ho hlokahalang hore re tsebe Jesu haeba re batla ho finyella seo re se hlokang moeeng le haeba re batla ho khotsofatsa takatso ea rōna ea tlhaho ea ho tseba Molimo. Sohle seo Jesu a ileng a se etsa ha a ne a le lefatšeng, ke sona seo Jehova a neng a lebeletse hore a se etse. Kahoo, ho tseba Jesu ho boetse ho bolela ho tseba Jehova haholoanyane. (Johanne 8:28; 14:8-10) Hantle-ntle Jesu o ile a tla joang lefatšeng?

O Ile a Phela Lefatšeng e le Motho oa Nama

Mokhahlelo oa bobeli oa bophelo ba Jesu o ile oa qala ha Molimo a ne a romela Mora oa hae lefatšeng. Jehova o entse sena ka ho tlosa bophelo ba hae leholimong ka mohlolo, ’me a bo kenya ka pōpelong ea moroetsana ea tšepahalang oa Mojuda ea bitsoang Maria. Jesu ha aa ka a futsa ho se phethahale hobane ha aa ka a tsoaloa ke ntate oa nama le mali. Moea o halalelang oa Jehova, kapa matla a hae a sebetsang, o ile oa theohela ho Maria, eaba matla a hae aa mo “koahela,” a mo emolisa ka mokhoa oa mohlolo. (Luka 1:34, 35) Kahoo, Maria o ile a beleha ngoana ea phethahetseng. Kaha e ne e le ngoana ea nketsoeng ka molao ka lapeng la Josefa, o ile a hōlisetsoa lelapeng la maemo a tlaase ’me e ne e le letsibolo lelapeng la bana ba bangata.—Esaia 7:14; Matheu 1:22, 23; Mareka 6:3.

Ha re bolelloe hakaalo ka tsa khōlo ea Jesu, empa ho na le ketsahalo e le ’ngoe e hlahelletseng. Ha Jesu a e-na le lilemo tse 12, o ile a tsamaea le batsoali ba hae leetong la bona la selemo le selemo la ho ea Jerusalema moketeng oa Paseka. Ha a ntse a le moo, o ile a qeta nako e ngata tempeleng, “a lutse har’a mesuoe ’me a e mamela le ho e botsa.” Ho feta moo, “bohle ba neng ba mo mametse ba ne ba makatsoa ka nako eohle ke kutloisiso ea hae le likarabo tsa hae.” Bonneteng le hoja Jesu a ne a le monyenyane o ne a sa botse feela lipotso tse fatang maikutlo tsa bolumeli empa hape o ne a fana ka likarabo tse nang le kelello tse neng li etsa hore ba bang ba hlolloe. (Luka 2:41-50) Ha a ntse a hōla motseng oa Nazaretha, o ile a ithuta ho betla mapolanka. Ha ho pelaelo hore ke Josefa, e leng ntat’ae ea neng a mo nketse ka lelapeng la hae, ea ileng a mo ruta ho betla mapolanka.—Matheu 13:55.

Jesu o ile a lula Nazaretha ho fihlela a e-na le lilemo tse 30. Ka mor’a moo o ile a ea ho Johanne hore a mo kolobetse. Ka mor’a ho kolobetsoa, Jesu o ile a qalisa tšebeletso ea hae e matla. O ile a haola naha ea habo ka lilemo tse tharo le halofo, a ntse a bolela litaba tse molemo tsa ’Muso oa Molimo. O ile a bontša hore o ne a romiloe ke Molimo. O ile a bontša seo joang? Ka ho etsa mehlolo e mengata—e leng mesebetsi e matla e neng e ke ke ea etsoa ke motho.—Matheu 4:17; Luka 19:37, 38.

Jesu e ne e boetse e le motho ea bonolo haholo le ea amehang ka botebo. Bonolo ba hae bo ne bo bonahala haholo ka maikutlo a hae ka batho le ka tsela eo a neng a ba tšoara ka eona. Kaha Jesu o ne a atameleha a bile a le mosa, o ne a hohela batho. Esita le bana ba ne ba phutholoha moo a neng a le teng. (Mareka 10:13-16) Le hoja batho ba bang ba mehleng ea Jesu ba ne ba khesa basali, eena o ne a ba tšoara ka tlhompho. (Johanne 4:9, 27) O ile a thusa mafutsana le ba hateletsoeng hore ba ‘fumanele meea ea bona khatholoho.’ (Matheu 11:28-30) O ne a ruta ka mokhoa o hlakileng, o bonolo le o atlehang. Hape, seo a neng a se ruta se ne se bonahatsa takatso ea hae e tebileng ea hore bamameli ba hae ba tsebe Molimo oa ’nete, Jehova.—Johanne 17:6-8.

Jesu o ile a phekola ba kulang le ba mahlomoleng hobane a ne a ba qenehela, ’me o ne a etsa mehlolo ena ka moea o halalelang oa Molimo. (Matheu 15:30, 31) Ka mohlala, molepera o ile a tla ho eena ’me a re: “Haeba feela u batla, u ka ntlhoekisa.” Jesu o ile a etsa’ng? O ile a otlolla letsoho la hae eaba o ama monna eo, a re ho eena: “Kea batla. Hloeka.” Eaba monna eo ea kulang oa phekoleha!—Matheu 8:2-4.

Hape, nahana ka ketsahalo eo ho eona bongata bo boholo bo ileng ba hlola le Jesu ka matsatsi a mararo bo se na seo bo se jang. O ile a utloela batho bohloko eaba ka mohlolo o fepa “banna ba likete tse ’nè, ntle ho basali le bana ba banyenyane.” (Matheu 15:32-38) Ketsahalong e ’ngoe, Jesu o ile a khutsisa sefefo se neng se ka bolaea metsoalle ea hae. (Mareka 4:37-39) O ile a tsosa batho ba neng ba shoele.a (Luka 7:22; Johanne 11:43, 44) Jesu o bile a ikhethela ho tela bophelo ba hae bo phethahetseng e le hore batho ba sa phethahalang ba ka ba le tšepo ea bokamoso. Ka sebele Jesu o ne a rata batho haholo!

Jesu o Hokae Kajeno?

Jesu o ile a shoela thupeng ea tlhokofatso ha a ne a e-na le lilemo tse 33 le halofo.b Empa bophelo ba hae ha boa ka ba fella moo. Mokhahlelo oa boraro oa bophelo ba hae o ile oa qala hoo e ka bang matsatsi a mararo hamorao ha Jehova Molimo a tsosa Mora enoa oa hae e le motho oa moea. Ha Jesu a se a tsohile, o ile a bonahala ho batho ba makholo ba neng ba phela ka nako eo. (1 Bakorinthe 15:3-8) Ka mor’a moo, o ile a “lula ka letsohong le letona la Molimo” eaba o letela hore a fuoe borena. (Baheberu 10:12, 13) Ha nako eo e fihla, Jesu o ile a qala ho busa e le Morena. Kahoo re lokela ho talima Jesu joang kajeno? Na re lokela ho nahana ka eena e le motho ea mahlomoleng ea bolaoang? Kapa na re lokela ho mo nka e le motho ea lokelang ho rapeloa? Hona joale Jesu hase motho oa nama ebile hase Molimo ea Matla ’Ohle. Ho e-na le hoo, ke sebōpuoa se matla sa moea, ke Morena ea busang. Haufinyane ho tla bonahala hore ke eena ea busang lefatše lena la rōna le matšoenyehong.

Ka puo ea tšoantšetso, Tšenolo 19:11-16 e hlalosa Jesu Kreste e le morena ea palameng pere e tšoeu le ea tlil’o ahlola le ho loana ka ho loka. O na le “sabole e telele e bohale, e le hore a ka hlatha lichaba ka eona.” Ha ho pelaelo hore Jesu o tla sebelisa matla a hae a maholo ho timetsa ba babe. Ho tla etsahala’ng ka ba lekang ho latela mohlala oo a ileng a o beha ha a ntse a le lefatšeng? (1 Petrose 2:21) Jesu le Ntat’ae ba tla ba pholosa “ntoeng ea letsatsi le leholo la Molimo ea Matla ’Ohle”—eo hangata e bitsoang Armagedone—e le hore ba ka phela ka ho sa feleng e le bafo ba ’Muso oa Molimo oa leholimo.—Tšenolo 7:9, 14; 16:14, 16; 21:3, 4.

Pusong ea hae ea khotso, Jesu o tla etsa mehlolo e mengata e babatsehang molemong oa moloko ’ohle oa batho. (Esaia 9:6, 7; 11:1-10) O tla felisa ho kula le lefu. Molimo o tla sebelisa Jesu hore a tsose batho ba likete tse limilione, e le hore a ba fe monyetla oa ho phela ka ho sa feleng lefatšeng. (Johanne 5:28, 29) Ho thata hore re utloisise hore na pusong ea ’Muso oo re tla phela bophelo bo babatsehang hakae. Kahoo, ke habohlokoa hore re tsoele pele ho rua tsebo ea Bibele le ho tseba Jesu Kreste hamolemo.

[Mongolo o botlaaseng ba leqephe]

[Lebokose le leqepheng la 7]

NA JESU KE MOLIMO EA MATLA ’OHLE?

Batho ba bangata ba bolumeli ba re Jesu ke Molimo. Ba bang ba re Molimo ke Boraro-bo-bong. Ho latela thuto ena, “Ntate ke Molimo, Mora ke Molimo le Moea o Halalelang ke Molimo, ’me leha ho le joalo hase Melimo e meraro empa ke Molimo a le mong.” Ho boleloa hore boraro ba bona “ha ba na qalo le qetello ’me baa lekana.” (The Catholic Encyclopedia) Na maikutlo a joalo a nepahetse?

Jehova Molimo ke ’Mōpi. (Tšenolo 4:11) Ha a na qalo kapa qetello, ebile o matla ’ohle. (Pesaleme ea 90:2) Empa Jesu eena o bōpiloe. (Bakolose 1:15, 16) Jesu o ile a bolela hore Molimo ke Ntat’ae ha a ne a re: “Ntate o moholo ho ’na.” (Johanne 14:28) Hape, Jesu o ile a hlalosa hore ho ne ho e-na le lintho tse ling tseo eena kapa mangeloi ba neng ba sa li tsebe empa li tsejoa ke Ntat’ae.—Mareka 13:32.

Ho feta moo, Jesu o ile a rapela Ntat’ae tjena: “Ho ke ho etsahale thato ea hao, eseng ea ka.” (Luka 22:42) Jesu o ne a ka rapela mang ntle ho Motho e mong ea mo phahametseng? Ho feta moo, Molimo ke eena ea ileng a tsosa Jesu bafung, Jesu ha aa ka a itsosa. (Liketso 2:32) Ho hlakile hore Ntate le Mora ba ne ba sa lekane pele Jesu a tla lefatšeng esita le ha a ne a le lefatšeng. Na teng ka mor’a hore Jesu a tsohele leholimong ba ile ba lekana? Bakorinthe ba Pele 11:3 e re: “Hlooho ea Kreste ke Molimo.” Ha e le hantle, Mora o tla ba tlas’a Ntat’ae kamehla. (1 Bakorinthe 15:28) Kahoo, Mangolo a bontša hore Jesu hase Molimo ea Matla ’Ohle. Ho e-na le hoo, ke Mora oa Molimo.

Seo ho thoeng ke motho oa boraro oa Boraro-bo-bong, e leng moea o halalelang, hase motho. Mopesaleme o ile a bua tjena le Molimo thapelong: “Ha u romela moea oa hao, lia bōptjoa.” (Pesaleme ea 104:30) Moea ona hase Molimo ka boeena, ke matla a sebetsang ao a a romelang ho etsa lintho tse itseng kapa a a sebelisang ho etsa eng kapa eng eo a e batlang. Molimo o ile a a sebelisa ha a bōpa maholimo, lefatše le lintho tsohle tse phelang. (Genese 1:2; Pesaleme ea 33:6) Molimo o ile a sebelisa moea oa hae o halalelang ho susumetsa banna ba ileng ba ngola Bibele. (2 Petrose 1:20, 21) Kahoo, Mangolo ha a rute thuto ea Boraro-bo-bong.c Bibele e re: “Jehova Molimo oa rōna ke Jehova a le mong.”—Deuteronoma 6:4.

[Mongolo o botlaaseng ba leqephe]

[Setšoantšo se leqepheng la 5]

Jesu e ile ea e-ba Motlotsuoa oa Molimo ha a ne a kolobetsoa

[Setšoantšo se leqepheng la 7]

Jesu o ile a tela matla a hae mosebetsing oo Molimo a neng a mo file oona

[Setšoantšo se leqepheng la 7]

Kajeno, Jesu ke Morena ea matla