Na Ua Amohela Hore Kreste ke Moeta-pele oa Rōna?
“Leha e le hore le bitsoe ‘baeta-pele,’ kaha Moeta-pele oa lōna o mong, Kreste.”—MATHEU 23:10.
1. Ke mang eo e leng eena feela Moeta-pele oa Bakreste ba ’nete?
E NE e le Labobeli la la 11 Nisane. Matsatsi a mararo hamorao, Jesu Kreste o ne a tla bolaoa. O ne a le tempeleng ka lekhetlo la ho qetela. Letsatsing lena, Jesu o ile a ruta matšoele a neng a khobokane moo le barutuoa ba hae thuto ea bohlokoa. O ile a re: “Le se ke la bitsoa Rabi, kaha mosuoe oa lōna o mong, athe lōna bohle le bara ba motho. Ho feta moo, le se ke la bitsa mang kapa mang ntat’a lōna lefatšeng, kaha Ntat’a lōna o mong, Oa leholimo. Leha e le hore le bitsoe ‘baeta-pele,’ kaha Moeta-pele oa lōna o mong, Kreste.” (Matheu 23:8-10) Ho hlakile hore Jesu Kreste ke eena Moeta-pele oa Bakreste ba ’nete.
2, 3. Ho mamela Jehova le ho amohela Moeta-pele eo a mo khethileng ho fella ka eng bophelong ba rōna?
2 Boeta-pele ba Jesu bo na le liphello tse molemo hakaakang bophelong ba rōna haeba re bo amohela! Ka moprofeta Esaia, Jehova Molimo o ile a bolela esale pele ho tla ha Moeta-pele enoa, a re: “Helang, lōna bohle ba nyoriloeng! Tloong metsing. Le ba se nang chelete! Tloong, le reke ’me le je. E, tloong, le reke veine le lebese ntle ho chelete le ntle ho tefello. . . . ’Mameleng ka hloko, ’me le je se molemo, ’me meea ea lōna e fumane thabo e phethehileng mononong. . . . Bonang! Ke fane ka eena e le paki ho lichaba, e le moeta-pele le molaoli oa lichaba.”—Esaia 55:1-4.
3 Esaia o ile a sebelisa metsi a tloaelehileng le lintho tse tloaelehileng tse metsi—lebese le veine—ho tšoantšetsa kamoo bophelo ba rōna bo amehang kateng ha re mamela Jehova le ha re latela Moeta-pele le Molaoli eo a re fileng eena. Ho etsa joalo hoa khatholla. Ho tšoana le ho noa metsi a pholileng ha ho chesa. Ha re ne re nyoretsoe ’nete le ho loka, rea nyoroloha. Joalokaha lebese le matlafatsa masea le ho a hōlisa, ‘lebese la lentsoe’ lea re tiisa ’me le re thusa hore re hōle moeeng kamanong ea rōna le Molimo. (1 Petrose 2:1-3) Hona ke mang ea ka latolang hore veine e etsa hore ho be le thabo meketeng? Ka tsela e tšoanang, ho rapela Molimo oa ’nete le ho hata mehlaleng ea Moeta-pele eo a mo khethileng ho etsa hore ‘bophelo e be thabo feela.’ (Deuteronoma 16:15) Kahoo, ke habohlokoa hore rōna bohle—ba bacha le ba baholo, ba batona le ba batšehali—re bontše hore rea amohela hore Kreste ke moeta-pele oa rōna. Leha ho le joalo, re ka bontša joang hore Mesia ke Moeta-pele oa rōna bophelong ba rōna ba letsatsi le letsatsi?
Bacha—‘Hatelang Pele Bohlaleng’
4. (a) Ho ile ha etsahala’ng ha Jesu ea lilemo li 12 a ne a etetse Jerusalema nakong ea Paseka? (b) Jesu o ne a e-na le tsebo e ntle hakae ha a le lilemo li 12 feela?
4 Hlahloba mohlala oo Moeta-pele oa rōna a ileng a o behela bacha. Le hoja ho tsejoa ho honyenyane ka bongoana ba Jesu, bo senoloa ka matla ke ketsahalo e ’ngoe. Ha Jesu a ne a le lilemo li 12, batsoali ba hae ba ile ba tsamaea le eena ha ba e-ea Jerusalema leetong la bona la selemo le selemo bakeng sa Paseka. Ketsahalong ena o ile a tšoareha puisanong ea Mangolo, ’me lelapa labo la mo siea le sa hlokomela. Matsatsi a mararo hamorao, batsoali ba hae ba tšoenyehileng, Josefa le Maria, ba ile ba mo fumana ka tempeleng, “a lutse har’a mesuoe ’me a e mamela le ho e botsa.” Ho feta moo, “bohle ba neng ba mo mametse ba ne ba makatsoa ka nako eohle ke kutloisiso ea hae le likarabo tsa hae.” Nahana, ha Jesu a le lilemo li 12 feela, o ne a tseba ho botsa lipotso tse fatang maikutlo le tse bontšang thahasello litabeng tsa moea a bile a fana ka likarabo tse bohlale! Ha ho pelaelo hore o ne a thusitsoe ke thuto ea batsoali.—Luka 2:41-50.
5. Bacha ba ka ahlola boikutlo ba bona mabapi le thuto ea lelapa ea Bibele joang?
5 Mohlomong u mocha. Haeba batsoali ba hao ke bahlanka ba inehetseng ba Molimo, ho ka etsahala hore ebe lapeng heno ho na le lenaneo la kamehla la thuto ea lelapa ea Bibele. U ikutloa joang ka thuto ee ea lelapa? Ke hobane’ng ha u sa nahane ka lipotso tse kang: ‘Na ke tšehetsa ka pelo eohle tokisetso ea thuto ea Bibele lapeng? Na ke kopanela ho eona, ke sa etse letho le kena-kenanang le nako e behetsoeng thuto eo?’ (Bafilipi 3:16) ‘Na ke kopanela ka mafolofolo thutong ee? Ha ho loketse, na ke botsa lipotso mabapi le taba e ithutoang le ho hlalosa hore na e sebetsa joang? Ha ke ntse ke tsoela pele moeeng, na ke hlaolela tatso ea “lijo tse tiileng . . . tsa batho ba hōlileng ka ho feletseng”?’—Baheberu 5:13, 14.
6, 7. Lenaneo la ho bala Bibele letsatsi le leng le le leng e ka ba la bohlokoa joang ho bacha?
6 Lenaneo la ho bala Bibele letsatsi le letsatsi le lona ke la bohlokoa. Mopesaleme o ile a bina, a re: “Ho thaba motho ea sa kang a tsamaea keletsong ea ba khopo, . . . empa o thabela molao oa Jehova, Molao oa hae o o bala ka lentsoe le tlaase bosiu le motšehare.” (Pesaleme ea 1:1, 2) Mohlahlami oa Moshe, e leng Joshua, ‘o ne a bala buka ea molao ka lentsoe le tlaase bosiu le motšehare.’ Sena se ne se mo nolofalletsa ho etsa lintho ka bohlale le ho atleha ha a phethahatsa kabelo eo a e filoeng ke Molimo. (Joshua 1:8) Moeta-pele oa rōna, e leng Jesu Kreste, o ile a re: “Ho ngoliloe, ‘Motho a ke ke a phela ka bohobe feela, empa o tla phela ka polelo e ’ngoe le e ’ngoe e tsoang molomong oa Jehova.’” (Matheu 4:4) Haeba re hloka lijo tsa nama letsatsi le leng le le leng, re hloka lijo tsa moea haholo hakaakang kamehla!
7 Nicole ea lilemo li 13 o ile a hlokomela seo a se hlokang moeeng ’me a qala ho bala Bibele letsatsi le leng le le leng.a Hona joale ha a le lilemo li 16, o balile Bibele eohle ka lekhetlo le le leng ’me o bohareng ba eona a e bala ka lekhetlo la bobeli. Mokhoa oa hae o bonolo. O re: “Ke tiisa hore bonyane ke bala khaolo e le ’ngoe ka letsatsi.” Ho bala ha hae Bibele letsatsi le leng le le leng ho mo thusitse joang? O araba ka ho re: “Litšusumetso tse mpe li ngata kajeno. Letsatsi le leng le le leng ke kopana le likhatello sekolong le libakeng tse ling tse lekang tumelo ea ka. Ho bala Bibele letsatsi le leng le le leng ho nthusa hore ke hopole kapele litaelo tsa Bibele le melao-motheo ea eona tse nkhothatsang hore ke hanele likhatello tsena. Ka lebaka leo, ke utloa ke atametse ho Jehova le Jesu.”
8. Jesu o ne a tloaetse ho etsa eng synagogeng, ’me bacha ba ka mo etsisa joang?
8 Jesu o ne a tloaetse ho mamela le ho nka karolo ha ho baloa Mangolo synagogeng. (Luka 4:16; Liketso 15:21) Ho molemo hakaakang hore bacha ba latele mohlala oo ka ho ba teng kamehla libokeng tsa Bokreste, moo ho baloang Bibele le moo e ithutoang teng! Richard, ea lilemo li 14 o ananela liboka tse joalo ka mantsoe a reng: “Liboka ke tsa bohlokoa ho ’na. Kamehla libokeng ke hopotsoa se setle le se sebe, boitšoaro bo botle le bo bobe le botho bo kang ba Kreste le boo e seng bona. Ho ’na ho tseba tsietsi hase ho feta ho eona.” E, “khopotso ea Jehova ea tšepahala, e hlalefisa ea se nang phihlelo.” (Pesaleme ea 19:7) Nicole le eena o tiisa hore o ba teng libokeng tsohle tse hlano tsa phutheho beke e ’ngoe le e ’ngoe. O boetse o nka lihora tse peli ho isa ho tse tharo a li lokisetsa.—Baefese 5:15, 16.
9. Bacha ba ka “hatela pele bohlaleng” joang?
9 Nako ea bocha ke monyetla o motle oa ho fumana ‘tsebo ka Molimo a le mong feela oa ’nete, le ka eo a mo romileng, Jesu Kreste.’ (Johanne 17:3) Mohlomong u tseba bacha ba bangata ba qetang nako e ngata ba bala libuka tsa metlae, ba shebeletse thelevishene, ba bapala lipapali tsa video, kapa ba tloboka boitsebiso ho Internet. Ho hang u se ke ua ba etsisa empa u latele mohlala o phethahetseng oa Moeta-pele oa rōna. Ha e le moshemane, o ne a thabela ho ithuta ka Jehova. Phello e ile ea e-ba efe? Ka lebaka la lerato la hae la lintho tsa moea, “Jesu a ’na a hatela pele bohlaleng.” (Luka 2:52) Le uena u ka etsa joalo.
“E Mong a Ipehe Tlaase ho e Mong”
10. Ke’ng e ka thusang hore bophelo ba lelapa e be mohloli oa khotso le thabo?
10 Lelapa e ka ba sebaka se sireletsehileng sa khotso le khotsofalo kapa sa liqabang le likhang. (Liproverbia 21:19; 26:21) Ho amohela boeta-pele ba Kreste ho re ekeletsa khotso le thabo ka lapeng. Ha e le hantle, seo Jesu a neng a le sona ke mohlala o ka etsisoang likamanong tsa lelapa. Mangolo a re: “E mong a ipehe tlaase ho e mong ka ho tšaba Kreste. Basali ba ke ba ipehe tlas’a banna ba bona joalokaha ba ipeha tlas’a Morena, hobane monna ke hlooho ea mosali oa hae joalokaha Kreste le eena e le hlooho ea phutheho, kaha e le mopholosi oa ’mele ona. . . . Banna, le tsoele pele le rata basali ba lōna, feela joalokaha Kreste le eena a ile a rata phutheho ’me a inehela bakeng sa eona.” (Baefese 5:21-25) Moapostola Pauluse o ile a ngolla phutheho ea Kolose, a re: “Lōna bana, le mamele batsoali ba lōna nthong e ’ngoe le e ’ngoe, etsoe sena se khahlisa haholo Moreneng.”—Bakolose 3:18-20.
11. Monna a ka bontša joang hore o amohela hore Kreste ke moeta-pele oa hae?
11 Ho latela keletso ena ho bolela hore monna o etella pele ka lapeng, mosali oa hae o mo tšehetsa ka botšepehi, ’me bana ba mamela batsoali. Leha ho le joalo, bohlooho ba monna bo tlisa thabo hafeela bo sebelisoa ka tšoanelo. Monna ea bohlale o lokela ho ithuta mokhoa oa ho sebelisa bohlooho ka ho etsisa Kreste Jesu eo e leng Hlooho ea hae le Moeta-pele. (1 Bakorinthe 11:3) Le hoja hamorao Jesu e ile ea e-ba “hlooho holim’a lintho tsohle ho phutheho,” ha aa ka a tla lefatšeng ‘ho tla sebeletsoa empa ho tla sebeletsa.’ (Baefese 1:22; Matheu 20:28) Ka tsela e tšoanang, monna oa Mokreste ha a sebelise bohlooho ba hae bakeng sa melemo ea boithati empa o bo sebelisetsa ho hlokomela lithahasello tsa mosali oa hae le bana ba hae—e, molemong oa lelapa lohle. (1 Bakorinthe 13:4, 5) O loanela ho etsisa litšoaneleho tsa bomolimo tsa Jesu Kreste, hlooho ea hae. Joaloka Jesu, o na le maikutlo a bonolo ’me o ikokobelitse pelong. (Matheu 11:28-30) Ha a fositse, ha a thatafalloe ke ho bua mantsoe a kang “ke kōpa tšoarelo” kapa “u nepile.” Mohlala oa hae o motle o nolofalletsa mosali oa hae ho ba “mothusi,” kapa “motlatsi” le “molekane” oa monna ea joalo, ho ithuta ho eena le ho tšoarisana le eena.—Genese 2:20; Malakia 2:14.
12. Ke eng se tla thusa mosali ho hlompha molao-motheo oa bohlooho?
12 Mosali eena o lokela ho ipeha tlas’a monna oa hae. Leha ho le joalo, haeba a kenoa ke moea oa lefatše, sena se ka ’na sa qala ho senya maikutlo a hae mabapi le molao-motheo oa bohlooho ’me khopolo ea ho ipeha tlas’a monna e ke ke ea ipiletsa ho eena. Mangolo ha a fane ka maikutlo a hore monna e be mohatelli, empa a hloka hore basali ba ipehe tlas’a banna ba bona. (Baefese 5:24) Se seng se hlokahalang ho ea ka Bibele ke hore monna kapa ntate a phethe boikarabelo ba hae ka lapeng, ’me ha ho sebelisoa keletso ea eona, ho ba le khotso le taolo ka lapeng.—Bafilipi 2:5.
13. Jesu o behetse bana mohlala ofe oa ho ipeha tlas’a batsoali?
13 Bana ba lokela ho mamela batsoali ba bona. Ntlheng ena, Jesu o ile a beha mohlala o babatsehang. Ka mor’a se ileng sa etsahala tempeleng ha Jesu ea lilemo li 12 a sala moo ka matsatsi a mararo, ‘o ile a theohela le [batsoali ba hae] Nazaretha, ’me a tsoela pele ho ipeha tlas’a bona.’ (Luka 2:51) Ha bana ba ipeha tlas’a batsoali ba bona, sena se eketsa khotso le kutloano ka lapeng. Ha e mong le e mong ka lapeng a ipeha tlas’a boeta-pele ba Kreste, sena se fella ka lelapa le thabileng.
14, 15. Ke’ng e tla re thusa ho atleha ha re talimane le boemo bo phephetsang ka lapeng? Fana ka mohlala.
14 Esita leha ho hlaha maemo a thata ka lapeng, katleho e hlaha ha ho etsisoa Jesu ’me ho amoheloa tataiso ea hae. Ka mohlala, lenyalo la Jerry ea lilemo li 35 le Lana, ’mè ea nang le ngoana oa moroetsana, le ile la ba hlahisetsa phephetso eo ba neng ba sa e nahana bobeli ba bona. Jerry oa hlalosa: “Ke ne ke tseba hore e le hore ke be hlooho e atlehileng, ke lokela ho sebelisa melao-motheo eona eo ea Bibele e etsang hore ho be le thabo malapeng a mang. Empa kapele ke ile ka lemoha hore ke tlameha ho e sebelisa ka bohlale le temoho e khōloanyane.” Morali enoa oa mosali oa hae o ne a nka hore o mo arohantse le ’m’ae ’me o ne a mo tenehela ka ho feletseng. Ho ne ho hlokahala temoho hore Jerry a utloisise hore boikutlo bona bo ama seo ngoanana enoa a se buang le ho se etsa. O ile a sebetsa boemo boo joang? Jerry oa araba: “’Na le Lana re ile ra lumellana hore qalong, Lana e be eena ea khalemelang joaloka motsoali ha ’na ke sebeletsa ho haheng kamano e ntle le morali oa hae. Ka mor’a nako, mokhoa ona o ile oa beha litholoana tse molemo.”
15 Ha re tobane le maemo a thata ka lapeng, ho hlokahala temoho ho fumana hore na ke hobane’ng ha litho tsa lelapa li bua kapa li etsa lintho ka tsela eo li etsang ka eona. Ho boetse ho hlokahala bohlale hore re sebelise melao-motheo ea Molimo ka tsela e tšoanetseng. Ka mohlala, ho hlakile hore Jesu o ile a utloisisa hore na ke hobane’ng ha mosali ea nang le phallo ea mali a mo amme, ’me o ile a mo tšoara ka bohlale le ka qenehelo. (Levitike 15:25-27; Mareka 5:30-34) Moeta-pele oa rōna o tsebahala ka bohlale le kutloisiso. (Liproverbia 8:12) Rea thaba ha re itšoara ka tsela eo a neng a tla itšoara ka eona.
“Le ’ne le Batle ’Muso Pele”
16. Ke’ng e lokelang ho nka sebaka sa bohlokoa bophelong ba rōna, ’me Jesu o ile a bontša see ka mohlala oa hae joang?
16 Jesu ha aa ka a siea pelaelo ea hore na ke eng e lokelang ho nka sebaka sa bohlokoa bophelong ba ba amohelang boeta-pele ba hae. O itse: “Joale, le ’ne le batle ’muso pele le ho loka ha [Molimo].” (Matheu 6:33) Ka mohlala oa hae, o ile a re bontša hore na sena se etsoa joang. Ka mor’a matsatsi a 40 a ho itima lijo, ho thuisa le ho rapela hoba a kolobetsoe, Jesu o ile a oeloa ke moleko. Satane Diabolose o ile a teka ka pel’a hae mpho ea ho busa “mebuso eohle ea lefatše.” Nahana hore na Jesu a ka be a ile a phela bophelo ba mofuta ofe hoja a amohela mpho ea Diabolose! Leha ho le joalo, Kreste o ne a tsepame tabeng ea ho etsa thato ea Ntat’ae. Ntho e ’ngoe hape, o ile a lemoha hore bophelo bo joalo lefatšeng la Satane bo ne bo tla ba bokhutšoanyane. Ka potlako feela o ile a hana mpho ea Diabolose, a re: “Ho ngoliloe, ‘Ke Jehova Molimo oa hao eo u tla mo rapela, ’me ke eena feela eo u tla mo etsetsa tšebeletso e halalelang.’” Nakoana ka mor’a moo, Jesu “a qala ho bolela ’me a re: ‘Bakang, kaha ’muso oa maholimo o atametse.’” (Matheu 4:2, 8-10, 17) Bophelong bohle ba hae lefatšeng, Kreste e ne e le ’moleli oa nako e tletseng oa ’Muso oa Molimo.
17. Re ka bontša joang hore lithahasello tsa ’Muso li nka sebaka sa pele bophelong ba rōna?
17 Re lokela ho etsisa Moeta-pele oa rōna ’me re se ke ra lumella lefatše la Satane ho re hohella pakaneng ea ho hahamalla mosebetsi o lefang haholo bophelong. (Mareka 1:17-21) E ka ba booatla bo bokaakang hore re tšoasehe lerabeng la ho phehella lintho tsa lefatše hoo lithahasello tsa ’Muso li nkang boemo bo tlaase! Jesu o re file boikarabelo ba mosebetsi oa ho bolela ’Muso le ho etsa barutuoa. (Matheu 24:14; 28:19, 20) Ha ho pelaelo hore re ka ’na ra ba le lelapa kapa boikarabelo bo bong boo re lokelang ho bo hlokomela, empa na ha re thabele ho sebelisa linako tsa mantsiboea le mafelo-beke hore re phethe boikarabelo ba rōna ba Bokreste ba ho bolela le ho ruta? Ke ho khothatsang hakaakang hore ebe selemong sa tšebeletso sa 2001, ba ka bang 780 000 ba ile ba khona ho sebetsa e le basebeletsi ba nako e tletseng, kapa bo-pula-maliboho!
18. Ke eng se re thusang ho fumana thabo tšebeletsong?
18 Litlalehong tsa Kosepele Jesu o hlaha e le motho ea nkang khato e tiileng ebile e le motho ea qenehelang. Ha a bona litlhoko tsa moea tsa ba mo potolohileng, o ne a ba qenehela ’me a ba thusa ka cheseho. (Mareka 6:31-34) Tšebeletso ea rōna e thabisa ha re kopanela ho eona ka lebaka la ho rata batho ba bang le hobane re lakatsa ka tieo ho ba thusa. Empa takatso e joalo re ka e fumana joang? Mohlankana e mong ea bitsoang Jayson o re: “Ha ke sa le ka tlaase ho lilemo tse 20, ke ne ke sa thabele tšebeletso hakaalo.” Ke’ng se ileng sa mo thusa ho rata mosebetsi oo? Jayson o araba ka ho re: “Lapeng leso, Moqebelo o mong le o mong hoseng, e ne e le nako ea ho ea tšebeletsong ea tšimo. Hona ho ne ho le molemo ho ’na hobane ka ho tsoela tšebeletsong haholo, ke ne ke bona molemo oo e o finyellang ’me ka e thabela haholo.” Le rōna re lokela ho khothalla tšebeletso le ho kopanela ho eona kamehla.
19. Boikemisetso ba rōna e lokela ho ba bofe mabapi le boeta-pele ba Kreste?
19 Ka sebele ke ntho e khathollang le e putsang ho amohela boeta-pele ba Kreste. Ha re etsa joalo, nako ea bocha e ba ea ho hatela pele tsebong le bohlaleng. Bophelo ba lelapa e ba mohloli oa khotso le thabo, ’me tšebeletso e ba mosebetsi o thabisang le o khotsofatsang. Joale, ka sebele a re ikemisetseng ho bontša bophelong ba rōna ba letsatsi le letsatsi le liqetong tseo re li etsang hore rea amohela hore Kreste ke moeta-pele oa rōna. (Bakolose 3:23, 24) Leha ho le joalo, Jesu Kreste e boetse ke moeta-pele ka phuthehong ea Bokreste. Sehloohong se latelang re tla tšohla kamoo re ka ruang molemo kateng tokisetsong ena.
[Mongolo o botlaaseng ba leqephe]
a Mabitso a mang a fetotsoe.
Na Ua Hopola?
• Re rua molemo joang ha re latela Moeta-pele oa rōna ea khethiloeng ke Molimo?
• Bacha ba ka bontša joang hore ba batla ho latela boeta-pele ba Jesu?
• Boeta-pele ba Kreste bo na le phello efe bophelong ba lelapa la ba ipehang tlas’a bona?
• Tšebeletso ea rōna e ka bontša joang hore rea amohela hore Kreste ke moeta-pele oa rōna?
[Setšoantšo se leqepheng la 9]
Nako ea bocha e molemo bakeng sa ho fumana tsebo ka Molimo le Moeta-pele oa rōna ea khethiloeng
[Setšoantšo se leqepheng la 10]
Ho ikokobelletsa boeta-pele ba Kreste ho eketsa thabo ea lelapa
[Setšoantšo se leqepheng la 12]
Jesu o ne a batla ’Muso pele. Uena?