Na Motho a ka Etsa Mesebetsi e Metle ka Sabatha?

Jesu o entse mesebetsi e mengata Galilea. Leha ho le joalo, ha a re, “ke tla bolela litaba tse molemo tsa ’Muso oa Molimo le metseng e meng,” o bontša hore ha aa nahana ka Galilea feela. Kahoo oa tloha e le hore a il’o bolela le “lisynagogeng tsa Judea.” (Luka 4:​43, 44) Hoa utloahala hore a ee Judea hobane joale ke nako ea selemo ’me le nako ea mokete e ntse e atamela Jerusalema.

Ha re bala likosepele, re hlokomela hore mosebetsi oo Jesu a o entseng Galilea o mongata ho feta oo a o entseng Judea. Le hoja batho ba Judea ba sa mamele molaetsa oa hae hakaalo, seo ha se mo sitise ho etsa mosebetsi oa hae hohle moo a fihlang.

Joale, Jesu o ea Jerusalema e leng toropo e kholo ea Judea bakeng sa mokete oa Paseka ea selemo sa 31. Tempeleng, ho na le letša le leholo le bitsoang Bethzatha le haufi le Heke ea Linku, ’me moo ho lula ho phethesela. Batho ba bangata ba kulang, ba foufetseng le ba holofetseng ba tla letšeng lena. Ba lumela hore ba ka fola ha ba ka kena ka letšeng leo ha metsi a fuluhuoa.

Ke letsatsi la Sabatha, ’me Jesu o bona monna ea kutseng ka lilemo tse 38 a lutse pel’a letša. Jesu o re ho monna enoa: “Na u batla ho phela hantle?” Ha monna eo a mo araba o re: “Mohlomphehi, ha ke na motho ea ka nkenyang ka letamong ha metsi a fuluhuoa, empa ha ke ntse ke tla e mong o theohela pele ho ’na.”​—Johanne 5:​6, 7.

Jesu o bua ntho e ka makatsang monna enoa hammoho le batho ba haufi ba mametseng. O re: “Ema, u nke lempara la hao ’me u tsamaee.” (Johanne 5:8) Monna enoa o etsa sona seo. O fola hang-hang ’me o nka lempara la hae oa tsamaea.

Ho e-na le hore Bajuda ba thabe hore monna enoa o folile, ba mo tšoaea phoso ba re: “Ke Sabatha, ’me ha ho lumelloe ke molao hore u nke lempara la hao.” Monna enoa ha a ba araba o re: “Ea entseng hore ke phele hantle o itse ho ’na, ‘nka lempara la hao ’me u tsamaee.’ ” (Johanne 5:​10, 11) Bajuda bana ba nyatsa hore ho na le motho ea phekolang ba bang ka letsatsi la Sabatha.

Baa mo botsa ba re: “Ke mang motho ea itseng ho uena, ‘le nke ’me u tsamaee’?” Ke hobane’ng ha ba botsa potso ee? Ke hobane Jesu o ile a kenella har’a letšoele eaba monna enoa oa timelloa hore na o ile hokae. Hape o ne a sa tsebe lebitso la Jesu. (Johanne 5:​12, 13) Leha ho le joalo, hamorao monna enoa o kopana le Jesu ka tempeleng ’me oa elelloa hore ke eena ea mo phekotseng ha a le letšeng.

Joale monna enoa o batla Bajuda ba mo botsitseng hore na ke mang ea mo phekotseng. Ha a ba fumana o ba bolella hore ke Jesu ea mo folisitseng. Ha ba utloa sena, ba ea ho Jesu. Ha ba ee ho eena hobane ba batla ho tseba hore na o khona joang ho etsa lintho tsena tse tsotehang. Ba batla ho mo qosa ka hore na ke hobane’ng ha a etsa lintho tse ntle ka Sabatha. Kahoo ba qala ho mo hlorisa.