Jesu Bophelo le Tšebeletso tsa Hae

Keletso e Eketsehileng e Laeang

HA A ntse a le ka tlung Kapernauma, ho qoqoa ka ho hong ho kathōko ho khang ea baapostola ea hore na e moholo ke mang. Ketsahalo ena le eona e ka ’na eaba e ile ea etsahala ha ba khutlela Kapernauma, ha Jesu a ne a le sieo. Moapostola Johanne oa tlaleha: “Re bone e mong ea sa re lateleng a leleka bademona ka lebitso la hao, ’me re mo hanetse, kahobane a sa re latele.”

Ka ho totobetseng Johanne o talima baapostola e le sehlopha sa baphekoli se ikhethang le se nang le tlotla eo se e tšoereng. Ka hona a lumela hore motho eo o etsa mesebetsi e matlahali eo ho sa mo lokela hobane e ne e se karolo ea sehlopha sa bona.

Leha ho le joalo, Jesu oa eletsa: “Le se ke la mo hanela; hobane ha ho motho ea ka phakisang a mpolela hampe, ha a entse mohlolo ka lebitso la ka. Hobane ea sa re loantšeng, oa re emela. E mong le e mong ea le nosang mohope oa metsi ka lebitso la ka, kahobane le le ba Kreste, ka ’nete ke re ho lōna: Ha a ka ke a timelloa ke moputso oa hae.”

Ho ne ho sa hlokahale hore motho enoa a latele Jesu ka sebele e le hore a ka ba ka lehlakoreng la hae. Phutheho ea Bokreste e ne e e-s’o theoe ka nako eo, ka hona ho se be ha hae karolo ea sehlopha sa bona ho ne ho sa bolele hore ke oa phutheho e ’ngoe e fapaneng. Motho eo ka sebele o ne a na le tumelo lebitsong la Jesu ’me kahona o ne a atleha ho leleka bademona. O ne a etsa ho hong ho tšoanang hantle le hoo Jesu a ileng a re ho tšoaneloa ke moputso. Jesu oa bontša hore, ka ho etsa joalo, a ke ke a timelloa ke moputso oa hae.

Empa ho thoe’ng haeba motho eo a ne a khopisitsoe ke mantsoe le liketso tsa baapostola? Hona e ne e tla ba ho tebileng haholo! Jesu oa hlokomela: “Ha e le ea ka khopisang e mong oa ba banyenyane bana ba lumetseng ho ’na, ho ka bang molemo ho eena ke ho tlamelloa leloala le leholo molaleng, a lahleloe leoatleng.”

Jesu o re balateli ba hae ba lokela ho tlosa ntho leha e le efe bophelong ba bona e bohlokoa ho bona joaloka letsoho, leoto, kapa leihlo e ka etsang hore ba khoptjoe. Ho molemo ho hloka ntho ena ea bohlokoa ’me u kene ’Musong oa Molimo ho e-na le ho ba le eona e be u lahleloa Gehenna (thotobolo eo ho chesoang lithōle ho eona pel’a Jerusalema), e tšoantšetsang timetso ea ka ho sa feleng.

Jesu o boetse oa lemosa: “Iponeleng, le se ke la nyelisa le a mong oa ba banyenyane bana; hobane ke re ho lōna: Maholimong, mangeloi a bona a talima ka mehla sefahleho sa Ntate ea maholimong.” Joale o hlakisa bohlokoa ba bana “ba banyenyane” ha a bua ka motho ea ruileng linku tse 100 empa a lahleheloa ke e le ’ngoe. Jesu o hlalosa hore monna eo o tla tlohela tse 99 a ee ho batla e lahlehileng, ’me ha a e fumane o tla e thabela ho feta tse 99. Eaba Jesu oa qetella, “Ka mokhoa o joalo, thato ea Ntat’a lōna ea maholimong, ke hore ho se ke ha timela le a mong oa ba banyenyane bana.”

Mohlomong a ntse a hopotse ka khang e neng e le har’a baapostola ba hae, Jesu oa phehella: “Le be le letsoai ka ho lōna, ’me le ahisane ka khotso.” Lijo tse se nang tatso li etsoa tse latsoehang haholoanyane ka letsoai. Ka hona, letsoai la tšoantšetso le etsa hore seo motho a se buang ho be bonolo ho se amohela. Ho ba le letsoai le joalo ho tla thusa ho boloka khotso.

Empa ka baka la ho se phethahale ha botho, ka linako tse ling likhang tse tebileng li tla hlaha. Jesu o boetse o fana ka tataiso ea ho sebetsana le tsona. Jesu o re: “Ekare ha ngoan’eno a u sitetsoe, e-ea, u mo laee u e-na le eena a notši; ha a u mamela, etlaba u ruile ngoan’eno.” Haeba a sa mamele, Jesu oa eletsa, “u ee le e mong, leha ba ka ba babeli, polelo tsohle li tle li tiee ka melomo ea lipaki tse peli kapa tse tharo.”

E le tharollo ea ho qetela, Jesu o re, isa taba ‘ho phutheho,’ (NW) ke hore, ho balebeli ba ikarabellang ba phutheho ba ka fanang ka qeto ea boahlōli. Jesu o qetella ka hore, haeba mofosi a ke ke a ikokobeletsa qeto ea bona, “ho uena a be joale ka mohetene le mo-lekhetho.”

Ha ba etsa qeto e joalo, balebeli ba lokela ho khomarela haufi-ufi litaelo tse ka Lentsoeng la Jehova. Ka hona, ha ba fumana motho a le molato ’me a tšoaneloa ke kotlo, kahlōlo ‘e tla be e se e ntse e tlanngoe le leholimong.’ Empa ha ba ‘lokolla lefatšeng,’ ke hore, ba mo fumana a se molato, e tla be e se e ntse e ‘lokolotsoe le leholimong.’ Lipuisanong tse joalo tsa boahlōli, Jesu o re, “moo ba babeli, kapa ba bararo, ba phuthehileng teng ka lebitso la ka, ke teng har’a bona.” Mattheu 18:6-20; Mareka 9:38-50; Luka 9:49, 50.

◆ Ke hobane’ng ha ho ne ho sa hlokahale mehleng ea Jesu ho mo latela?

◆ Taba ea ho khopisa e monyenyane e tebile hakae, ’me Jesu o ile a hlakisa bohlokoa ba banyenyane joalo joang?

◆ Ke eng e ka ’nang eaba e ile ea susumetsa Jesu hore a khothaletse baapostola ba hae ho ba le letsoai ka ho bona?

◆ Ke eng se boleloang ke ‘ho tlama’ le ‘ho lokolla’?