Ba Ile ba Etsa Thato ea Jehova

Jesu o Roma Barutuoa ba 70

E NE e le ka hoetla ea 32 C.E. Ho ne ho setse likhoeli tse tšeletseng feela pele ho lefu la Jesu. Kahoo, e le hore a potlakise mosebetsi oa ho bolela le ho koetlisa balateli ba bang ba hae ka ho eketsehileng, o ile a khetha barutuoa ba 70 ’me “a ba romela ka bobeli ka bobeli ka pele ho eena ho kena motseng o mong le o mong le sebakeng se seng le se seng seo eena ka boeena a neng a tla tla ho sona.”—Luka 10:1.a

Jesu o ile a roma barutuoa ba hae “ka pele ho eena” e le hore batho ba ka khona ho etsa qeto ka potlako hore na ba ne ba le ka lehlakoreng la Mesia kapa khahlanong le eena, nakong eo Jesu ka boeena a neng a tla fihla ka eona hamorao. Empa ke hobane’ng ha a ne a ba roma “ka bobeli ka bobeli”? Ho hlakile hore e ne e le molemong oa hore ba ka khothatsana ha ba tobane le khanyetso.

Ha a hatisa ho potlaka ha mosebetsi oa bona oa ho bolela, Jesu o ile a bolella balateli ba hae: “Ka sebele, kotulo e khōlō, empa basebetsi ha ba bakae. Ka hona kōpang Mong’a kotulo hore a romele basebetsi kotulong ea hae.” (Luka 10:2) Ho tšoantšetsa taba ka kotulo ho ne ho tšoaneleha kaha ho lieha leha e le hofe nakong ea kotulo ho ne ho ka fella ka tšenyeho ea lijalo tsa bohlokoa. Ka tsela e tšoanang, haeba barutuoa ba ne ba ka hlokomoloha kabelo ea bona ea ho bolela, ho ne ho ka ’na ha lahleha bophelo ba bohlokoa!—Ezekiele 33:6.

Basebeletsi ba se Nang Tšitiso

Jesu o ile a tsoela pele ho laea barutuoa ba hae: “Le se ke la nka sepache, leha e le mokotla oa lijo, leha e le meqathatso, ’me le se ke la kopa leha e le mang ka tumeliso tseleng.” (Luka 10:4) Motsamai o ne a tloaetse ho nka eseng feela mokotla le lijo, empa o ne a boetse a nka meqathatso e meng, kaha ho ne ho ka etsahala hore sole e fele ’me marapo a khaohe. Empa barutuoa ba Jesu ba ne ba sa lokela ho tšoenyeha ka lintho tse joalo. Ho e-na le hoo, ba ne ba lokela ho tšepa hore Jehova o ne a tla ba hlokomela ka thuso ea Baiseraele ba habo bona, ba neng ba tloaetse ho amohela baeti ka mofuthu.

Empa ke hobane’ng ha Jesu a ne a bolella barutuoa ba hae hore ba se ke ba lumelisa leha e le mang ka ho mo kopa ka matsoho? Na ba ne ba lokela ho hloka botsoalle, esita le ho hloka mekhoa e metle? Le hanyenyane! Lentsoe la Segerike a·spaʹzo·mai, le bolelang ho lumelisa ka ho kopa ka matsoho, le ka ’na la bolela ho fetang hore feela “lumela” ka tlhompho. Le ka boela la akarelletsa kako e tloaelehileng, ho kopana ka matsoho le moqoqo o molelele o neng o tla ba teng ha batho ba babeli ba tsebanang ba kopana. Motlalehi e mong oa litaba oa hlokomela: “Tumeliso ea Batho ba Linaha tsa Bochabela e ne e sa akarelletse ho inamisa hlooho hanyane kapa ho lumelisana ka letsoho joalokaha rōna re etsa, empa e ne e etsoa ka ho kopana ka matsoho hangata, ho inamisa hlooho haesitana le ho khumama. Lintho tsena kaofela li ne li hloka nako e ngata.” (Bapisa le 2 Marena 4:29.) Kahoo, Jesu o ile a thusa balateli ba hae hore ba qobe litšitiso tse sa hlokahaleng, le hoja li ne li tloaelehile.

Qetellong, Jesu o ile a bolella barutuoa ba hae hore ha ba kena ntlong ’me ba amoheloa, ba lokela ‘ho lula ntlong eo, ba e-ja ’me ba e-noa lintho tseo ba neng ba tla fana ka tsona.’ Empa haeba ba ne ba kena motseng ’me ba sa amoheloe hantle, ba ne ba lokela ho ‘tsoela litseleng tsa oona tse sephara ’me ba re, “Esita le lerōle le khomaretseng maoto a rōna le tsoang motseng oa lōna re le hlakola khahlanong le lōna.”’ (Luka 10:7, 10, 11) Ho hlakola maoto kapa ho a hlohlora lerōle ho ne ho tla bolela hore barutuoa ba ne ba siea ka khotso ntlo kapa motse o sa ba amohelang hantle bakeng sa liphello tseo qetellong Molimo a neng a tla li tlisa. Empa ba neng ba amohela barutuoa ba Jesu ka mosa ba ne ba ipeha mocheng oa litlhohonolofatso. Ketsahalong e ’ngoe, Jesu o ile a bolella baapostola ba hae: “Ea le amohelang oa nkamohela le ’na, ’me ea nkamohelang o amohela le ea nthomileng. ’Me mang kapa mang ea fang e mong oa ba banyenyane bana senoelo feela sa metsi a batang hore a noe kahobane e le morutuoa, kannete kea le bolella, ho hang ha a na ho lahleheloa ke moputso oa hae.”—Matheu 10:40, 42.

Seo re ka Ithutang Sona

Hona joale, thōmo ea ho bolela litaba tse molemo tsa ’Muso oa Molimo le ho etsa barutuoa e phethoa ke Lipaki tsa Jehova tse ka holimo ho 5000 000 lefatšeng ka bophara. (Matheu 24:14; 28:19, 20) Lia hlokomela hore molaetsa oa tsona o potlakile. Kahoo, li sebelisa nako ea tsona hamolemo, li qoba litšitiso tse ka li thibelang hore li fane ka tlhokomelo e feletseng mosebetsing ona oa tsona oa bohlokoa.

Lipaki tsa Jehova li leka ka matla ho ba le botsoalle bo mofuthu ho bohle bao li kopanang le bona. Leha ho le joalo, ha li kopanele puong ea lefeela, leha e le hona hore li kenella liphehisanong tse mabapi le litaba tsa sechaba kapa ho hlōleha ha lefatše lena ha le leka ho lokisa ho hloka toka. (Johanne 17:16) Ho e-na le hoo, li lebisa puisano ea tsona ho seo e leng eona feela tharollo ea nako e telele ea mathata a batho—’Muso oa Molimo.

Hangata Lipaki tsa Jehova li bonoa li sebetsa ka bobeli. Na ho ne ho ke ke ha finyelloa ho eketsehileng haeba li ne li sebetsa ka bomong? Mohlomong. Leha ho le joalo, kajeno Bakreste ba hlokomela molemo oa ho sebetsa le balumeli-’moho le bona. Hoo ho fana ka tšireletso e itseng ha ho pakoa libakeng tse kotsi. Ho sebetsa le motho e mong ho boetse ho nolofalletsa ba bacha ’neteng hore ba rue molemo tsebong ea bahoeletsi ba litaba tse molemo ba nang le phihlelo e eketsehileng. Ka sebele, ka bobeli ba ka khothatsana.—Liproverbia 27:17.

Ntle ho pelaelo, mosebetsi oa ho bolela ke mosebetsi o potlakileng ka ho fetisisa o etsoang “matsatsing [ana] a ho qetela.” (2 Timothea 3:1) Lipaki tsa Jehova li thabela tšehetso ea mokhatlo oa bara ba motho lefatšeng ka bophara oo, e le litho tsa oona, li sebetsang li “bapile ka mahlakore bakeng sa tumelo ea litaba tse molemo.”—Bafilippi 1:27.

[Mongolo o botlaaseng ba leqephe]