Bacha Baa Botsa . . .

Ke Hobane’ng ha ke Lokela ho Itella Batho ba Bang?

“KE LITHAHASELLO tsa mang tse tlang pele bophelong ba hao?” Moqolotsi oa litaba oa Tsoha! o ile a botsa sehlopha sa bacha ba neng ba bokane seterateng potso ena. “Lithasello tsa ka. Ke batla ho ba oa ‘pele’ ka mehla,” ho boletse Mike. Susie ea lilemo li 17 o itse: “Haeba lithahasello tsena li tlela boiketlo ba lelapa la rōna kapa ’na, lithahasello tsa ka ke tsona tse neng li tla tla pele.”

Ka masoabi, lipolelo tse joalo li tloaelehile. Buka e bitsoang The Postponed Generation e bua ka tlhahlobo ea liithuti tse 1 125 moo liithuti tse peli tsa kahisano li lekileng ho fuputsa hore na bacha ba ne ba amehile haholo ka bobona kapa sechaba. Phello ebile efe? Hoo e ka bang karolo ea 80 lekholong e ipakile e “ipatlela lithahasello tsa eona ntle le ho tsotella maikutlo a sechaba.”

Ha ho makatse ha batho ba ’maloa ba ikemiselitse ho itella batho ba bang, ho sitisoa kapa ho tlohela seo ba se etsang e le hore ba thuse batho ba bang. Libuka tse kang The Art of Selfishness le Looking Out for Number One ebile libuka tse rekisoang haholo, ’me li sebelelitse feela ho ntšetsa pele boithati. Joalokaha Bibele e boletse esale pele, kajeno batho ke “baithati.”—2 Timothea 3:1, 2.

Leha ho le joalo uena u arabela joang litlhokong tsa ba bang? Ka mohlala, haeba u ikemiselitse ho lula fatše ho shebella lenaneo la thelevishine leo u le ratang ’me ’Mè kapa Ntate a u kōpa ho ea lebenkeleng, na ua halefa? Na u hana ho sebetsa mesebetsi ea lapeng, ho abelana le bana beno liaparo kapa bolulo, kapa mohlomong ho etsetsa motho molemo ‘ha ho se bonolo’? Joale ke nako hore u etse liphetoho. Empa hobane’ng? Habohlokoa ka ho fetisisa, joang?

Tšimoloho ea Boithati

Molao oa Molimo ho batho ba oona ke ona: “Rata oa heno joale ka ha u ithata.” (Mattheu 23:39) Sena se bolela hore re tlameha ho ba ba hlokomelang, ba tsotellang, le ba elang hloko litlhoko tsa ba bang. Leha ho le joalo, ha se ka mehla re finyellang mohopolo ona o khanyang, ’me Bibele e re thusa ho utloisisa hore na ke hobane’ng. Ho Genese 8:21 (NW) e re: “Tšekamelo ea pelo ea motho e mpe ho tloha bocheng ba hae ho ea pele.”

Ntat’a rōna moholo, Adama, ha a ka a tsotella kamoo ketso ea hae ea borabele e neng e tla ama ba bang kateng. Leha ho le joalo, sena ha se ea lokela ho re makatsa hore e be rōna, litloholo tsa hae, re tsoetsoe re e-na le tšekamelo ea boithati. (Bapisa Pesaleme ea 51:5.) Sena se totobala ka ho makatsang esale pele bophelong. Makasine oa Parents oa hlokomela: “Masea ’ohle ke baithati. . . . A u thahasella feela ha u a etsetsa ntho e ’ngoe.” Haeba boithati bo sa hlokomeloe, bo ka ’na ba fetoha tloaelo e tsoelang pele ka ho phehellang.

Tloaelo e ’ngoe e thibelang motho ho itella batho ba bang ke botsoa. (Liproverbia 21:25) Ka sebele, ha botsoa bo rena, motho u tla fana ka mabaka a sa utloahaleng hore a qobe ho etsa lintho. Liproverbia 22:13 e re: “Motho ea sekhoba o re: Tau e teng kantle, nka bolaoa mapatlelong.”

Se Kopanyeletsoang ke ho Thusa ba Bang

Setšoantšo sa Mosamaria ea molemo se ngotsoeng ho Luka 10:29-37 se bontša hore ho thusa batho ba bang ho akareletsa ho intša sehlabelo e le ka ’nete. Ha Jesu a arabela potso, “Oa heso ke mang?” o ile a ba phetela ka monna e mong oa Mojode ea neng a lemalitsoe ke lihlola ’me tsa mo siea a le makhatheng a lefu. Ho sa tsotellehe likhatello tsa morabe tse neng li le teng mahareng a Bajode le Basamaria, monna oa Mosamaria o ile a itela ho thusa mohlaseluoa. O ile a tlamella maqeba a monna enoa ka veine le oli tseo a neng a li nkile. Joale ka bonolo a hloesetsa monna eona peleseng ea hae ’me a mo isa tlung ea baeti. O ile a lefa mong’a ntlo hoo e ka bang moputso oa matsatsi a mabeli ’me a tšepisa ho lefa litšenyehelo tse ling tse ka bang teng.

Setšoantšo sena se susumetsang se hlalosa se boleloang ke ho itella batho ba bang: ho nka bohato ba pele, ho iketsa moahisani le batho ba bang. Sena se akareletsa ho ikemisetsa ho fana ka nako ea hao, matla le chelete. A re buisaneng ka litsela tse ling tsa ho etsa sena.

Ho Itella Lelapa la Heno

Baahisani ba hao ba haufi haholo ke litho tsa lelapa la heno—batsoali, baena le likhaitseli. Leha ho le joalo, u ka ’na ua ikutloa hore ba leng haufi haholo le uena ke ba utloisisang bophelo ba hao bo maphatha-phathe ’me ba sa batle lintho tse sa hlokahaleng ho uena. Leha ho le joalo, Bibele ea phehella: “E mong le e mong a amohele baeti a sa khanane.” (1 Petrose 4:9, TLP) Leka ho talima lintho tse seng bonolo tse ka hlahang e seng joaloka tse tenang empa joaloka monyetla oa ho matlafatsa kamano ea lelapa.

Eddie o sa hopola: “Hangata kemiso ea ’Mè e ne e mo khathatsa haholo. Empa nke ke ka lebala ponahalo ea sefahleho sa hae ha a bula monyako ’me a fumana lijana li hlatsoitsoe, fuluru e hloekisitsoe, ’me tafole e se e lokiselitsoe lijo tsa motšehare. Ke lokela ho lumela hore ka linako tse ling ke rata ho bapala bolo, empa ho itella batho ba bang ho nthusitse ho kopanya lelapa la rōna.” Na u ka nahana ka litsela tse ling tsa ho itella litho tsa lelapa la heno?

Ho ba Mosa ho Bakreste-’moho

Moapostola Pauluse o itse: “Ka baka leo, ha re sa na le sebaka, a re etseng bohle hantle, empa haholo ba ntlo ea tumelo.” (Ba-Galata 6:10) U fumana thabo e ngata ha u itella Bakreste-’moho.—Liketso 20:35.

Ka mohlala, Chris ea lilemo li 16 ke e mong oa Lipaki tsa Jehova. O thabela ho thusa setho se seng se tsofetseng phuthehong ea sebakeng seo. Ka nako e ’ngoe se ile sa mo letsetsa se batla thuso. Mochine o hloesetsang batho mehahong le ho ba theosa moo se lulang teng o ne o sa sebetse, ’me se ne se sa tsebe ho hloa methati ea mekato e mehlano, ’me se ne se le tsietsing. Ha Chris a fihla, o ile a re: “Pepa, ’me ke tla u jara haeba ho lokile ho uena.” Ba ile ba hloa ho fihlela mekatong e mehlano! Na o ne a khathetse? Che. Empa Chris ha a ka putsoa feela ke kananelo ea motsoalle enoa oa hae ea holileng empa hape le ka tsebo ea hore liketso tsa hae li thabisitse Molimo!

Leha ho le joalo, ha ho hlokahale hore u emele maemo a joalo hore u bontše kameho ea hao bakeng sa batho ba bang. Ka mohlala, pele ho liboka tsa Bokreste le ka mor’a tsona bacha ba bang ba rata ho bokana hammoho. Sena se khahlanong le keletso ea Bibele ea ho “bontša kameho” ho ba holileng. (Levitike 19:32, NW) Ka linako tse ling tumeliso ea botsoalle kapa puisano e khutšoanyane ke sona feela se hlokahalang ho khothatsa motho ea holileng. U ka ’na ua ipelaetsa ka hore, ‘Empa ’na ke thatafalloa ho buisana le batho ba holileng. Ha re rate lintho tse tšoanang.’

Doug eo hona joale a sebeletsang e le moholo phuthehong ea Bokreste, ka thabo o sa hopola: “Ha ke le lilemo li 19 metsoalle ea ka ea hlooho ea khomo e ne e le batho ba baholo hoo e neng e ka ba batsoali ba ka kapa bo-ntate le bo-nkhono ba ka. Ba tlatselitse hakaakang khōlong ea ka ea moea!” Ke hobane’ng ha u sa itele haholoanyane ho etsa setsoalle le batho ba holileng, mohlomong sebokeng sa lōna se latelang sa Bokreste? U tla hlokomela hore le na le lintho tse ngata tse tšoanang ho feta kamoo u neng u nahana kateng! Joaloka Doug, u tla fumana hore u ka ithuta phihlelong ea bona ea bohlokoa bophelong.

Ho Thusa “Ba Kantle”

Ho Ba-Kolosse 4:5 moapostola Pauluse o itse: “Tsamaeang ka bohlale pel’a ba kantle, le ntse le lopolla linako.” Lipaki tsa Jehova li bontša kameho ho batho ba bang ka ho bolela molaetsa oa Bibele. (Mattheu 24:14) Bacha bao ka botebo ba nkang boikarabelo ba bona ka pel’a Molimo ba susumeletseha hore ba kopanele mosebetsing ona haholo kamoo ba ka khonang.

“Ke ikitlaetsa ka matla mosebetsing oa boboleli hobane ke rata Jehova,” ho bolela Tamitha. Le hoja a e-na le lilemo tse 11, o sebetsa nako e ngata khoeli e ’ngoe le e ’ngoe mosebetsing oa boboleli. “Boboleli bo boetse bo mpha monyetla oa ho bontša lerato ho baahisani ba ka.” Ho e-na le ho batla mesebetsi e lefang haholo, bacha ba Bakreste ba likete ba entse pakane ea ho sebeletsa e le baboleli ba nako e tletseng ’me hangata ba na le mosebetsi oa nakoana ho iphelisa. Bang ba ithaopetse ho ba baromuoa kapa basebetsi makaleng a fapaneng a liofisi tsa Mokhatlo oa Watch Tower.

U Rua ka ho Fana

“Batho ba hloka batho ba bang bakeng sa bophelo ba bona bo botle,” ho boletse makasine oa American Health. Bafuputsi ba bile ba bolela hore batho ba itellang ba bang ba rua melemo e mengata ea bophelo bo botle. Leha ho le joalo, Jesu Kreste o bontšitse molemo o mong ha a re: “Fanang, ’me le tla fuoa.” (Luka 6:38) Motho ea fanang o hapa maikutlo a batho ba bang; hamorao ke eena ea fumanang mosa ka boeena!—Bapisa Liproverbia 11:25.

Kahoo ithute ho fana, ikemisetse ho itella ba bang. Neng kapa neng ha litšobotsi tsa boithati li batla ho hlahella, hopola hore Lentsoe la Molimo le re: “Ho se ke ha e-ba motho ea batlang tse tšoanelang eena a ’notši, empa motho ka mong a ke a batle le tse tšoanelang ba bang.” (1 Ba-Korinthe 10:24) Ka ho etsa joalo, u ke ke ua amohela botsoalle ba batho ba bang feela empa u tla fumana kamohelo ea Molimo o Phahameng.

[Setšoantšo se leqepheng la 18]

Ho itella batho ba bang ho tlisa thabo e khōlō