Ba Ile ba Etsa Thato ea Jehova

Maria o Khetha “Karolo e Ntle”

MEHLENG ea Jesu, basali ba Bajuda ba ne ba khinnoe ke lineano tsa bo-rabi. Kahoo ba ne ba thibeloa ho ithuta Molao. Ha e le hantle, maikutlo a mang a qotsitsoeng ho Mishnah a ne a re: “Haeba monna leha e le ofe a fa morali oa hae tsebo ea Molao ho joalokaha eka o mo rutile boitšoaro bo litšila ba botona le botšehali.”—Sotah 3:4.

Ka lebaka leo, basali ba bangata ba Judea lekholong la pele la lilemo ba ne ba sa ruteha. The Anchor Bible Dictionary ea bontša: “Ha ho na bopaki ba hore pele ho tšebeletso ea Jesu basali ba Bajuda ba ne ba kile ba lumelloa hore e be barutuoa ba tichere e khōlō, ho se ho sa thoe letho ka ho tsamaea le tichere e joalo, kapa ho ruta motho leha e le ofe ntle le bana.” E le ho nyenyefatsa basali le ho feta, baeta-pele ba bang ba bolumeli ba ne ba behile molao o bolelang hore monna ha aa lokela ho bua le mosali phatlalatsa!

Jesu o ile a hlokomoloha boikutlo bo joalo bo bontšang ho se tšabe Molimo. O ne a ruta basali hammoho le banna, ’me har’a balateli ba hae ho ne ho e-na le banna le basali. (Luka 8:1-3) Ketsahalong e ’ngoe Jesu o ile a memeloa hore e be moeti oa Maretha le Maria. (Luka 10:38) Basali bana ba babeli e ne e le likhaitseli tsa Lazaro, ’me boraro ba bona e ne e le barutuoa ba Jesu ebile e le metsoalle e molemo ea hae. (Johanne 11:5) Mohlomong lelapa lena le ne le tumme, ha re nahana ka palo e ngata ea batho ba ileng ba tla ho tla tšelisa Maretha le Maria ha Lazaro a shoele. Ho sa tsotellehe hore na boemo e ne e le bofe, se ileng sa etsahala lelapeng la bona ha Jesu a ne a ba etetse se fane ka thuto ea bohlokoa, eseng ho bona feela empa le ho rōna.

Ho Ithuta Maotong a Jesu

Ntle ho pelaelo, Maretha le Maria ba ne ba chesehela ho etsetsa Jesu mokete oa semetletsa, ’me mohlomong ba ne ba ka khona ho etsa seo. (Bapisa le Johanne 12:1-3.) Leha ho le joalo, ha moeti oa bona a fihla, Maria “a lula fatše maotong a Morena ’me a lula a mametse lentsoe la hae.” (Luka 10:39) Ho ne ho se neano ea batho e neng e ka thibela Jesu hore a rute mosali eo ea tšepahalang ea neng a chesehela ho ithuta hakaalo! Re ka nahana ka Maria a lutse ka pel’a Jesu, a le boemong ba morutoana ea thehileng tsebe ka ho feletseng hore a mamele thuto ea Monghali oa hae.—Bapisa le Deuteronoma 33:3; Liketso 22:3.

Ho fapana le Maria, Maretha o ile “a sitisoa ke ho hlokomela mesebetsi e mengata.” Kaha o ne a lokisetsa lijo tse ngata, o ne a hlile a phathahantsoe ke mesebetsi ea hae e hlokang nako e ngata. Kapele, Maretha o ile a khopisoa ke hore ebe o ne a tlohetsoe a le mong ho etsa mosebetsi oo oohle ha morali’abo eena a ne a lutse maotong a Jesu! Kahoo Maretha o ile a kena Jesu hanong ha a ntse a bua le Maria, mohlomong e le ka potlako, a re: “Morena, na ha ho tsotellehe ho uena hore morali’eso o ntšiile ke le mong hore ke hlokomele lintho? Ka hona, mo bolelle hore a kopanele ho nthuseng.”—Luka 10:40.

Kōpo ea Maretha ka boeona e ne e sa fosahala. Etsoe ho lokisetsa sehlopha sa batho lijo ke mosebetsi o boima, ’me moroalo oa hona ha oa lokela ho jarisoa motho a le mong. Leha ho le joalo, ho seo Maretha a se buileng, Jesu o ile a fumana monyetla oa ho ruta thuto ea bohlokoa. O ile a re: “Maretha, Maretha, u tšoenyehile le ho khathatseha ka lintho tse ngata. Leha ho le joalo, ho hlokahala lintho tse seng kae, kapa e le ’ngoe feela. Ka lehlakoreng la hae, Maria o khethile karolo e ntle, ’me ha e na ho tlosoa ho eena.”—Luka 10:41, 42.

Jesu o ne a sa bolele hore Maretha ha a na thahasello linthong tsa moea. Ho e-na le hoo, o ne a tseba hore ke mosali ea nang le boinehelo bo tebileng ba bomolimo.a Ha ho pelaelo hore seo ke sona se mo susumelitseng hore a memele Jesu lehaeng labo. Leha ho le joalo, ka khalemelo eo e bonolo, Jesu o ne a bolela hore Maretha, ka hore ebe o khathatsehile ka lijo, o ne a lahleheloa ke monyetla o sa tloaelehang oa hore ka boeena a fumane thuto e tsoang ho Mora oa Molimo.

Ke ’nete hore e ka ’na eaba moetlo oa mehleng eo o ne o tšehetsa maikutlo a hore bohlokoa ba mosali bo bonahala haholo ka ho ipabola ha hae mesebetsing ea lelapa. Empa mantsoe a Jesu a bontšitse hore basali, feela joaloka banna, ba ne ba ka lula maotong a Mor’a Molimo ’me ba amohela lipolelo tsa bophelo bo sa feleng! (Johanne 4:7-15; Liketso 5:14) Ka lebaka lena, ho ne ho tla ba molemo haholo ho Maretha hore a lokisetse lijo tse seng kae—kapa esita le sejo se le seng feela—haeba a ne a ka fumana monyetla oa ho lula maotong a Monghali ’me a ithute ho eena.—Bapisa le Matheu 6:25.

Thuto ho Rōna

Kajeno, ho fumaneha banna le basali har’a batho ba arabelang memong ea Jesu ea hore ba “nke feela metsi a bophelo.” (Tšenolo 22:17) Ba susumelitsoe ke lerato, ba bang—feela joaloka Maretha—ba etsa sohle seo ba ka se khonang ho thusa balumeli-’moho le bona ka litlhoko tsa bona. Ke batho ba nahanang ka liketso ’me ba potlakela ho nka bohato, ’me Jehova o tšepisa hore o tla putsa mesebetsi ea bona ea lerato. (Baheberu 6:10; 13:16) Mohlomong ba bang ba batla ba tšoana le Maria haholoanyane. Ke batho ba mosa ba ratang ho nahanisisa ka lintho tsa moea. Ho chesehela ha bona ho nahana ka Lentsoe la Molimo ho ba thusa hore ba lule ba tiile ’me ba metse ka metso tumelong.—Baefese 3:17-19.

Batho ba mofuta oo ka bobeli ba phetha karolo ea bohlokoa phuthehong ea Bokreste. Leha ho le joalo, qetellong, bohle ba lokela ho ‘khetha karolo e ntle’ ka ho talima lintho tsa bohlokoa haholo-holo e le tsa moea. Ka ho nepisisa lintho tsa bohlokoa haholoanyane, re tla fumana kamohelo ea Jehova le tlhohonolofatso ea hae.—Bafilippi 1:9-11.

[Mongolo o botlaaseng ba leqephe]