Na U Amohela Thuso ea Jehova?
“Jehova ke mothusi oa ka; nke ke ka tšaba.”—BAHEBERU 13:6.
1, 2. Ke hobane’ng ha e le habohlokoa hore re amohele thuso le tataiso ea Jehova bophelong?
IPONE u tsamaea tselaneng e thabeng. Leha ho le joalo, ha u tsamaee u le mong hobane u na le motataisi ea ithaopetseng ho u tsamaisa tsela, ’me ke motataisi ea hloahloa ka ho fetisisa. O u feta hōle ka tsebo le ka mokoka, empa o tsamaea ka mamello pel’a hao. Oa hlokomela hore u khothometseha khafetsa. Kaha o tšoenyehile ka hore u se ke ua lemala, o u tšoara ka letsoho hore u fete sebakeng se kotsi haholo. Na u ne u tla hana thuso ea hae? Che! Hobane u ka ’na ua lemala.
2 Kaha re Bakreste, re tlameha ho tsamaea tseleng e thata. Na re tlameha ho tsamaea re le bang tseleng eo e patisaneng? (Matheu 7:14) Che, Bibele e bontša hore Jehova Molimo, Motataisi ea hloahloa ka ho fetisisa, o lumella batho ho tsamaea le eena. (Genese 5:24; 6:9) Na Jehova o thusa bahlanka ba hae ha ba ntse ba tsamaea? O re: “’Na, Jehova Molimo oa hao, ke u tšoara ka letsoho la hao le letona, ke ’na Ea reng ho uena, ‘U se ke ua tšoha. Ke tla u thusa.’” (Esaia 41:13) Joaloka motataisi oa papisong ea rōna, Jehova o tšoara batho ba batlang ho tsamaea le eena ka letsoho la hae le thusang ebile e ba motsoalle oa bona. Ka sebele har’a rōna ha ho ea batlang ho hana thuso ea hae!
3. Re tla tšohla lipotso life sehloohong see?
3 Sehloohong se fetileng, re ile ra tšohla litsela tse ’nè tseo ka tsona Jehova a ileng a thusa batho ba hae mehleng ea boholo-holo. Na o thusa batho ba hae ka litsela tse tšoanang kajeno? Hona re ka etsa eng ho tiisa hore re amohela thuso leha e le efe ea mofuta oo? A re tšohleng lipotso tseo. Ka ho li tšohla, re ka kholiseha haholo hore Jehova ke Mothusi oa rōna e le kannete.—Baheberu 13:6.
Thuso ea Mangeloi
4. Ke hobane’ng ha bahlanka ba Molimo ba ka kholiseha hore mangeloi aa ba tšehetsa kajeno?
4 Na mangeloi a thusa bahlanka ba Jehova ba kajeno? E, aa ba thusa. Ke ’nete hore kajeno ha a bonahale ka ho toba e le hore a lopolle barapeli ba ’nete kotsing. Esita le mehleng ea Bibele, mangeloi a ne a bonahala ka seoelo ha a thusa. Boholo ba seo a neng a se etsa se ne se sa bonahale ho batho, joalokaha ho le joalo le kajeno. Leha ho le joalo, bahlanka ba Molimo ba ne ba khothala haholo ha ba hlokomela hore mangeloi aa ba tšehetsa. (2 Marena 6:14-17) Le rōna re na le mabaka a utloahalang a ho ikutloa re khothetse.
5. Bibele e bontša joang hore mangeloi a kentse letsoho mosebetsing oa ho bolela kajeno?
5 Mangeloi a Jehova a thahasella haholo mosebetsi o khethehileng oo re o etsang. Ke mosebetsi ofe? Re ka fumana karabo ho Tšenolo 14:6: “Ka bona lengeloi le leng le fofa sebakeng, ’me le ne le e-na le litaba tse molemo tse sa feleng hore le li bolele e le litaba tse nyakallisang ho ba lulang lefatšeng, le ho sechaba se seng le se seng le moloko o mong le o mong le leleme le leng le le leng le batho ba bang le ba bang.” Ho hlakile hore “litaba [tsena] tse molemo tse sa feleng” ke ntho e le ’ngoe le “litaba tsena tse molemo tsa ’muso,” tseo Jesu a ileng a bolela esale pele hore “li tla boleloa lefatšeng lohle leo ho ahiloeng ho lona hore e be bopaki ho lichaba tsohle” pele bofelo ba tsamaiso ena ea lintho bo tla. (Matheu 24:14) Ha e le hantle, hase mangeloi a bolelang. Jesu o file batho mosebetsi ona oa bohlokoa. (Matheu 28:19, 20) Na ha ho khothatse ho tseba hore ha re ntse re etsa mosebetsi oo, re thusoa ke mangeloi a halalelang, e leng libōpuoa tsa moea tse bohlale le tse matla?
6, 7. (a) Ke eng se bontšang hore mangeloi a tšehelitse mosebetsi oa rōna oa ho bolela? (b) Re lokela ho etsa eng ho tiisa hore re fumana thuso ea mangeloi a Jehova?
6 Ho na le bopaki bo bongata ba hore mangeloi a tšehelitse mosebetsi oa rōna. Ka mohlala, hangata re utloa hore ha Lipaki Tsa Jehova li le tšebeletsong, li fumana batho ba neng ba sa tsoa rapela Molimo hore a ba thuse ho fumana ’nete. Liphihlelo tsena li etsahala hangata hoo re ke keng ra re ke liketsahalo tsa tšohanyetso feela. Ka lebaka la thuso ena ea mangeloi, batho ba eketsehileng ba ntse ba ithuta ho etsa se boleloang ke ‘lengeloi le leng le fofang sebakeng’ le reng: “Tšabang Molimo ’me le mo tlotlise.”—Tšenolo 14:7.
7 Na u labalabela ho tšehetsoa ke mangeloi a matla a Jehova? Haeba ho joalo, ikakhele ka setotsoana tšebeletsong. (1 Bakorinthe 15:58) Ha re itella ho etsa mosebetsi ona o khethehileng oa Jehova, re ka kholiseha hore mangeloi a hae a tla re thusa.
Thuso ea Mookameli oa Mangeloi
8. Jesu o boemong bofe bo phahameng leholimong, ’me ke hobane’ng ha taba eo e re tiisa moko?
8 Jehova o boetse o re thusa ka tsela e ’ngoe ka mangeloi. Tšenolo 10:1 e hlalosa “lengeloi le leng le matla” a tšosang leo ‘sefahleho sa lona se neng se le joaloka letsatsi.’ Ho hlakile hore lengeloi lena le bonoeng ponong le tšoantšetsa Jesu Kreste ea tlotlisitsoeng ea nang le matla leholimong. (Tšenolo 1:13, 16) Na kannete Jesu ke lengeloi? Re ka re ke lona hobane ke lengeloi le ka sehloohong. (1 Bathesalonika 4:16) Jesu ke eena ea matla ka ho fetisisa har’a bara bohle ba Jehova ba moea. Jehova o mo entse molaoli oa mabotho ’ohle a Hae a mangeloi. Ka sebele lengeloi lena le ka sehloohong, ke mohloli o matla oa thuso. Ka litsela life?
9, 10. (a) Jesu o re sebeletsa joaloka “mothusi” joang ha re etsa sebe? (b) Re ka fumana thuso efe mohlaleng oa Jesu?
9 Moapostola Johanne ea hōlileng o ile a ngola a re: “Haeba mang kapa mang a etsa sebe, re na le mothusi ho Ntate, e leng Jesu Kreste, ea lokileng.” (1 Johanne 2:1) Ke hobane’ng ha Johanne a ile a bolela hore Jesu ke “mothusi” oa rōna, haholo-holo ha re “etsa sebe”? ’Nete ke hore letsatsi le leng le le leng re etsa sebe, ’me sebe se isa lefung. (Moeklesia 7:20; Baroma 6:23) Ho sa tsotellehe seo, Jesu o ile a etsa bophelo ba hae sehlabelo ka lebaka la libe tsa rōna. ’Me o haufi le Ntat’a rōna ea mohau hore a re buelle. E mong le e mong oa rōna o hloka thuso eo. Ebe re ka e fumana joang? Ka hore re bakele libe tsa rōna re be re kōpe tšoarelo ka sehlabelo sa Jesu. Hape re lokela ho qoba ho pheta libe tsa rōna.
10 Jesu ha aa ka a re shoela feela, empa o boetse o re behetse mohlala o phethahetseng. (1 Petrose 2:21) Mohlala oa hae oa re tataisa, o re thusa ho rala tsela eo re tla tsamaea ka eona e le hore re ka qoba sebe se tebileng ’me ra khahlisa Jehova Molimo. Na ha re thabele hore ebe re na le thuso ea mofuta oo? Jesu o ile a tšepisa balateli ba hae hore ho ne ho tla lokisetsoa hore ho be le mothusi e mong.
Thuso ea Moea o Halalelang
11, 12. Moea oa Jehova ke eng, o matla hakae, hona ke hobane’ng ha re o hloka kajeno?
11 Jesu o ile a etsa tšepiso ena: “Ke tla kōpa Ntate ’me o tla le fa mothusi e mong hore a be le lōna ka ho sa feleng, moea oa ’nete, oo lefatše le ke keng la o amohela.” (Johanne 14:16, 17) “Moea [ona] oa ’nete,” kapa moea o halalelang, hase motho empa ke matla—matla a sebetsang a Jehova ka boeena. Ke matla a se nang moeli. Ke matla ao Jehova a ileng a a sebelisa ha a ne a bōpa bokahohle, ha a ne a etsa mehlolo e makatsang leha a ne a senola thato ea hae ka lipono. Kaha kajeno Jehova ha a sebelise moea oa hae ka litsela tsena tse khethehileng, na see se bolela hore ha re o hloke?
12 Che, ha ho joalo. ‘Linakong tsena tse mahlonoko tseo ho leng thata ho sebetsana le tsona,’ re hloka moea oa Jehova ho feta neng kapa neng. (2 Timothea 3:1) O re thusa ho mamella liteko. O re thusa ho hlaolela litšobotsi tse ntle tse re atametsang ho Jehova le bara le baralib’abo rōna ba moea. (Bagalata 5:22, 23) Ebe joale re ka rua molemo joang thusong ee e babatsehang ea Jehova?
13, 14. (a) Ke hobane’ng ha re ka kholiseha hore Jehova o ikemiselitse ho fa batho ba hae moea oa hae o halalelang? (b) Ke ketso ea mofuta ofe eo re ka bontšang ka eona hore ha re hlile ha re batle ho amohela mpho ea moea o halalelang?
13 Tsela ea pele, ho hlokahala re rapelle moea o halalelang. Jesu o ile a re: “Haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!” (Luka 11:13) E, Jehova ke Ntate ea molemo ho feta bohle. Haeba ka tumelo re hlile re mo kōpa moea o halalelang, ka sebele o tla hle a re fe mpho ena. Joale, potso ke ena, Na rea o kōpa? Re na le mabaka a utloahalang a ho o kōpa letsatsi ka leng lithapelong tsa rōna.
14 Tsela ea bobeli, re fumana mpho ena ka ho etsa lintho tse lumellanang le eona. Mohlala ke ona: Mohlomong Mokreste o loana le tloaelo ea ho sheba litšoantšo tse manyala tse hlephisang boitšoaro. O rapelletse moea o halalelang hore o mo thuse hore a hlōle tloaelo ena e litšila. O batlile keletso ho baholo ba Bakreste, ’me ba mo elelitse hore a ikitlaetse, le hore ho hang a se ke a atamela haufi le lintho tseo tse hlephisang boitšoaro. (Matheu 5:29) Ho etsahala joang haeba a hlokomoloha keletso ea bona ’me a tsoela pele ho li shebella ha a lekeha? Na o sebetsa tumellanong le thapelo ea hae ea hore moea o halalelang o mo thuse? Kapa na, ho e-na le hoo, o ipeha kotsing ea ho soabisa moea o halalelang oa Molimo le ho thibela hore a se ke a fumana mpho ee? (Baefese 4:30) Ka sebele, bohle re lokela ho etsa sohle seo re ka se khonang ho tiisa hore re tsoela pele ho amohela thuso ena e babatsehang ea Jehova.
Thuso e Tsoang Lentsoeng la Molimo
15. Re ka bontša joang hore ha re halale Bibele?
15 Ka makholo a lilemo, Bibele e bile mohloli oa thuso ho bahlanka ba tšepahalang ba Jehova. Ho e-na le ho halala Mangolo a Halalelang, ho hlokahala hore re hopole hore ke mohloli o moholo haholo oa thuso. Mpho ena e fumanoa ka ho ikitlaetsa. Re lokela ho itloaetsa ho bala Bibele kamehla.
16, 17. (a) Pesaleme ea 1:2, 3 e hlalosa meputso ea ho bala molao oa Molimo joang? (b) Pesaleme ea 1:3 e re bontša joang hore re lokela ho sebetsa ka thata?
16 Pesaleme ea 1:2, 3 e re ka motho ea khahlisang Molimo: “O thabela molao oa Jehova, molao oa hae o o bala ka lentsoe le tlaase bosiu le motšehare. Ka sebele o tla ba joaloka sefate se lenngoeng haufi le melapo ea metsi, se fanang ka litholoana tsa sona nakong ea tsona le seo makhasi a sona a sa poneng, ntho e ’ngoe le e ’ngoe eo a e etsang e tla atleha.” Na u utloisisa moelelo oa litemana tsee? Ho bonolo hore motho a bale mantsoe ao ebe o etsa qeto ea hore a mpa a bontša khutso le khotso e teng sefateng sa moriti se metseng pel’a nōka. E ka ba ho khathollang hakaakang ha motho a ka re shoa! thapama sebakeng se joalo! Empa pesaleme ena ha e re khothalletse ho phomola. E re bontša taba e ’ngoe e fapaneng le eo, e leng hore re lokela ho sebetsa ka thata. Ke hobane’ng ha re bua joalo?
17 Hlokomela hore tabeng ena ha ho buuoe ka sefate feela tjee sa moriti se imeletseng feela haufi le nōka. Ke sefate sa litholoana, se “lenngoeng” ka morero sebakeng se khethiloeng—“haufi le melapo ea metsi.” Sefate se le seng se ka mela joang haufi le melapo? Se etsahalang ke hore, mong’a serapa sa lifate tsa litholoana a ka ’na a epa liforo tse nosetsang metso ea lifate tsa hae tsa bohlokoa. Taba ena ea hlaka joale! Ha re atleha moeeng joaloka sefate seo, ke hobane ba bang ba ile ba ikitlaelletsa ho re thusa. Re kopanela le mokhatlo o hlophisitsoeng o re tlisetsang metsi a hloekileng a ’nete moo re leng teng, empa re lokela ho phetha karolo ea rōna. Ho hlokahala hore re iphumantše molemo metsing ana a bohlokoa, re thuise, hape re etse lipatlisiso tse hlokahalang e le hore re kenye linnete tsa Lentsoe la Molimo likelellong le lipelong tsa rōna. Ka tsela eo, le rōna re tla beha litholoana tse molemo.
18. Ho hlokahala eng hore re fumanele lipotso tsa rōna likarabo tsa Bibele?
18 Bibele ha e re tsoele molemo oa letho ha e lutse rakeng e sa phetloe. Ebile hase buka ea mahlohonolo, kapa thatho—joalokaha eka re ka tutubala, ra phetla Bibele kae kapa kae, eaba re lebella hore karabo ea potso ea rōna e hlahe leqepheng leo re le phetlileng. Ha re talimane le liqeto, re lokela ho rafa “tsebo ea Molimo” joalokaha eka re rafa letlotlo le patiloeng. (Liproverbia 2:1-5) Hangata ho hlokahala patlisiso e etsoang ka phehello le ka hloko e le hore re fumane keletso ea Mangolo e sebetsanang le litlhoko tsa rōna ka ho toba. Re na le lingoliloeng tse ngata tse thehiloeng Bibeleng tse re thusang ho batlisisa. Ha re ntse re li sebelisa ka cheseho hore re epe mahakoe a bohlale a leng ka Lentsoeng la Molimo, ka sebele re sebelisa thuso ea Jehova.
Thuso ea Balumeli-’moho le Rōna
19. (a) Ke hobane’ng ha lihlooho tsa Molula-Qhooa le tsa Tsoha! li ka nkoa e le thuso e fanoang ka balumeli-’moho le rōna? (b) U ile ua thusoa joang ke sehlooho se seng sa limakasine tsa rōna?
19 Haesale batho ba sebeletsang Jehova ba ntse ba thusana. Na Jehova o fetohile? Le hanyenyane. Ha ho pelaelo hore e mong le e mong oa rōna a ka hopola makhetlo ao ka ’ona balumeli-’moho le eena ba ileng ba mo thusa ka nako e nepahetseng ha ho ne ho hlokahala. Ka mohlala, na u ka hopola sehlooho sa Molula-Qhooa kapa sa Tsoha! se ileng sa u tšelisa ha u ne u hloka matšeliso kapa se ileng sa u thusa ho rarolla bothata kapa ho tobana le se neng se qholotsa tumelo ea hao? Jehova o ile a u tlisetsa thuso eo ka “lekhoba le tšepahalang le le masene” le abetsoeng ho fana ka “lijo . . . ka nako e tšoanetseng.”—Matheu 24:45-47.
20. Baholo ba Bakreste ba bontša ka litsela life hore ke “limpho tseo e leng banna”?
20 Leha ho le joalo, hangata thuso eo re e fumanang ka balumeli-’moho le rōna e batla e tobile haholoanyane. Moholo oa Mokreste o fana ka puo e re susumetsang, kapa o re etsetsa leeto la bolisa leo ka lona a re thusang nakong e thata, kapa o re fa keletso e mosa e re thusang ho bona le ho hlōla bofokoli bo itseng. Mokreste e mong ea motlōtlō o ngola se latelang mabapi le kamoo moholo e mong a ileng a mo thusa kateng: “Ha re le tšebeletsong ea tšimo, o ile a ipha nako ea ho nkhothaletsa ho bua. Bosiu ba pele ho sena, ke ne ke rapetse Jehova, ke kōpa motho eo nka buang le eena. Letsatsing le latelang, mora enoa oeso o ile a bua le ’na ka qenehelo. O ile a nthusa hore ke bone hore haesale Jehova a ntse a nthusa ka nako e telele. Ke leboha Jehova ha a ile a nthomella moholo enoa.” Ka litsela tseo tsohle, baholo ba Bakreste ba bontša hore ke “limpho tseo e leng banna,” tseo Jehova a faneng ka tsona ka Jesu Kreste ho re thusa hore re mamelle tseleng ena ea bophelo.—Baefese 4:8.
21, 22. (a) Ho etsahala’ng ha litho tsa phutheho li sebelisa keletso e ho Bafilipi 2:4? (b) Ke hobane’ng ha liketso tse nyenyane tse etsoang ka mosa le tsona e le tsa bohlokoa?
21 Ntle ho baholo, Mokreste e mong le e mong ea tšepahalang o batla ho sebelisa keletso ena e bululetsoeng e reng a se ke a ‘hlokomela lithahasello tsa litaba tsa hae feela, empa hape a hlokomele lithahasello tsa ba bang.’ (Bafilipi 2:4) Ha litho tsa phutheho ea Bokreste li sebelisa keletso ena, ho etsoa liketso tse ntle tse bontšang mosa. Ka mohlala, lelapa le leng le ile la oeloa ke tlokotsi ea tšohanyetso, e ileng ea baka mathata a mang. Ntate o ne a ile lebenkeleng le morali oa hae e monyenyane. Tseleng ha ba khutlela lapeng, ba ile ba hlaheloa ke kotsi ea koloi. Morali o ile a hlokahala, empa Ntate eena o ile a tsoa likotsi tse mpe. Ha a tsoa sepetlele, o ne a holofetse hoo qalong a neng a sa khone ho iketsetsa letho. Mosali oa hae o ne a ferekane hoo a neng a sa khone ho mo hlokomela a le mong. Kahoo, banyalani ba bang ka phuthehong ba ile ba nka banyalani bana ba mahlomoleng, ba ba hlokomella lapeng ha bona ka libeke tse ngata.
22 ’Nete ke hore hase liketso tsohle tse bontšang mosa tseo ho tsona ho amehang tlokotsi e joalo le boitelo. Thuso e ’ngoe eo re e fumanang e nyenyane haholo. Empa ho sa tsotellehe hore na ke mosa o monyenyane hakae, rea o ananela, na ha ho joalo? Na u ka hopola linako tseo ka tsona lentsoe le buuoang ka mosa kapa ketso e bontšang ho nahanela ea mora kapa morali oabo rōna e ileng ea u thusa ka seo u neng u hlile u se hloka? Hangata Jehova o re hlokomela ka litsela tseo.—Liproverbia 17:17; 18:24.
23. Jehova o nka boiteko ba rōna ba ho thusana joang?
23 Na u ka rata hore Jehova a u sebelisetse ho thusa ba bang? Monyetla oo o u bulehetse. Ha e le hantle, Jehova o ananela boiteko boo u bo etsang ntlheng ena. Lentsoe la hae le re: “Ea bontšang mohau ho ea tlaase o alima Jehova, ’me O tla mo buseletsa tšoaro ea hae.” (Liproverbia 19:17) Re thaba haholo ha re itella bara le baralib’abo rōna. (Liketso 20:35) Ba itšehlang thajana ka boomo ha ba fumane thabo e tlisoang ke ho thusa ka tsela eo ebile ha ba fumane khothatso e tlisoang ke ho thusoa. (Liproverbia 18:1) Kahoo, a re tšepahalleng ho kopanela kamehla libokeng tsa Bokreste e le hore re ka khothatsana.—Baheberu 10:24, 25.
24. Ke hobane’ng ha re sa lokela ho nahana hore rea fetoa hobane re sa bone mehlolo e makatsang ea Jehova ea nakong e fetileng?
24 Na ha ho thabise ho nahana ka litsela tseo Jehova a re thusang ka tsona? Le hoja re sa phele nakong eo Jehova a phethang merero ea hae ka ho etsa mehlolo e makatsang, ha ho hlokahale hore re nahane hore rea fetoa. Ntho ea bohlokoa ka sebele, ke hore Jehova o re thusa ka hohle hore re lule re tšepahala. ’Me ha re mamella hammoho tumelong, re tla phela ho fihlela re bona liketso tse hlollang le tse tsotehang ka ho fetisisa tseo Jehova a kileng a li etsa haesale! A re ikemisetseng ho amohela le ho sebelisa ka botlalo thuso ea Jehova e lerato e le hore re ka bua mantsoe a temana ea rōna ea selemo sa 2005 a reng: “Thuso ea ka e tsoa ho Jehova.”—Pesaleme ea 121:2.
Maikutlo a Hao ke Afe?
Ke joang Jehova a fanang ka thuso eo re e hlokang kajeno ka—
• mangeloi?
• moea oa hae o halalelang?
• Lentsoe la hae le bululetsoeng?
• balumeli-’moho le rōna?
[Setšoantšo se leqepheng la 18]
Hoa khothatsa ho tseba hore mangeloi a tšehelitse mosebetsi oa boboleli
[Setšoantšo se leqepheng la 21]
Jehova a ka re tlisetsa matšeliso ao re a hlokang ka e mong oa balumeli-’moho le rōna