Jesu—Bophelo le Tšebeletso tsa Hae

Mohloli oa Thabo

NAKONG ea tšebeletso ea hae Galilea, Jesu o ile a etsa mehlolo, ’me joale o e pheta Judea. Ka mohlala, o leleka ho monna e mong modemona o mo sitisang ho bua. Matšoele aa hlolloa, empa basomi ba hlahisa khanyetso e tšoanang le e ileng ea hlahisoa Galilea. Ba tseka hore, “o leleka bademona ka Beelesebule, morena oa bademona.” (TLP) Ba bang ba batla bopaki bo tōmanyana bo tsoang ho Jesu hore na ke mang, ’me ba leka ho mo leka ka ho mo kōpa pontšo e tsoang leholimong.

A tseba seo ba se nahanneng, Jesu o arabela basomi bana ba Judea ka karabelo e tšoanang le eo a e fileng ba Galilea. O hlokomela hore ’muso o mong le o mong o arohaneng ho itoantša o tla oa. “Ka baka leo,” oa botsa, “Satane le eena, ha a ka arohana ho itoantša, ’muso oa hae o tla tiea joang?” O bontša boemo bo kotsi ba basomi ka ho re: “Ekare ha ke leleka batemona ka monoana oa Molimo, ’muso oa Molimo o le fihletse [o le rakile, NW] ruri.”

Ba shebeletseng mehlolo ea Jesu ba lokela ho arabela ho eona ka tsela e tšoanang le ea bao makholo a lilemo pele ho moo ba ileng ba bona Moshe ha a etsa mohlolo. Ba tsota: “Ke monoana oa Molimo”! E ne e ntse e le “monoana oa Molimo” o ileng oa betla Melao e Leshome matlapeng a lejoe. ’Me “monoana oa Molimo”—moea oa oona o halalelang, kapa matla a sebetsang—ke oona o nolofaletsang Jesu ho leleka bademona le ho phekola ba kulang. Kahona ’Muso oa Molimo ka sebele o rakile basomi bao, kaha Jesu, ea khethetsoeng ho ba Morena oa ’Muso oo, o hona har’a bona moo.

Jesu joale o bontša hore matla a hae a ho leleka bademona ke bopaki ba matla a hae holim’a Satane, joalokaha monna ea matla haholoanyane a e-tla ’me a hlōla monna ea hlometseng hantle ea lebetseng ntlo ea hae e khōlō. O boetse o pheta setšoantšo seo a se boletseng Galilea mabapi le moea o sa hloekang o tlohang ho motho e mong, empa ha motho eo a sa tlatse sebaka se feela ka lintho tse molemo, moea o khutla le e meng e supileng, ’me boemo ba motho eo bo fetoha bo bobe haholoanyane ho feta pele.

Ha a ntse a mametse lithuto tsena, mosali e mong ea har’a letšoele o susumeletseha ho tsota ka lentsoe le phahameng: “Ho lehlohonolo popelo e u emereng, le matsoèlè ao u a antseng.” Kaha takatso ea mosali e mong le e mong oa Mojode ke ho ba ’mè oa moprofeta ’me haholo-holo oa Messia, hoa utloahala hore mosali enoa o ne a ka bua sena. Ka ho hlakileng o ne a nahana hore Maria o ne a ka thaba ka ho khethehileng ka lebaka la ho ba ’mè oa Jesu.

Leha ho le joalo, Jesu o khalemela mosali enoa ka potlako mabapi le mohloli oa ’nete oa thabo. Oa arabela, “E, empa haholo ho lehlohonolo ba utloang lentsoe la Molimo, ’me ba le boloka.” Ha ho mohla Jesu a kileng a fana ka maikutlo a hore ’m’ae, Maria, o lokela ho fuoa tlhompho e khethehileng. Ho e-na le hoo, o bontšitse hore thabo ea ’nete e fumanoa ka ho ba mohlanka ea tšepahalang oa Molimo, e seng ka ho amana ka mali leha e le hofe kapa lintho leha e le life tse finyelloang.

Joalokaha a entse Galilea, Jesu o boetse o tsoela pele ho khalemela batho ka ho kōpa pontšo e tsoang leholimong. O ba bolella hore ha ho pontšo e tla fanoa haese pontšo ea Jonase. Jonase e bile pontšo ka matsatsi a hae a mararo ka har’a tlhapi le ka ho bolela ha hae ka sebete, ho ileng ha fella ka hore Baninive ba susumeletsehe ho baka. Jesu o re, “bonang, e moholo ho Jonase o teng mona.” Ka ho tšoanang, mofumahali oa Sheba o ile a hlolloa ke bohlale ba Salomone. Jesu o boetse o re, “bonang, e moholo ho Salomone o teng mona.”

Jesu o hlalosa hore ha motho a bonesa lebone, ha a le bee sephiring kapa tlas’a morula empa holim’a seluloana sa lebone e le hore batho ba ka bona khanya. Mohlomong o fana ka maikutlo a hore ho ruta ha hae le ho etsa ha hae mehlolo ka pel’a batho bana ba manganga ba har’a bamameli ba hae ho tšoana le ho pata khanya ea lebone. Mahlo a bashebelli ba joalo ha aa loka, kapa ha aa tobisoa hantle moo a tšoanetseng ho sheba, kahoo se reretsoeng mehlolo ea hae ha se finyelloe.

Jesu o sa tsoa leleka modemona ’me a etsa hore semumu se bue. Sena se lokela ho susumetsa batho ba nang le mahlo a lokileng kapa a tobileng hantle moo a tšoanetseng ho sheba teng ho rorisa ketso ena e khanyang ’me ba bolele litaba tse molemo! Empa, ho basomi bana, ha ho etsahale joalo. Kahona Jesu o qeta hore: “U iponele ke hona, hore leseli le ho uena e se ke ea e-ba lefifi. Ekare ha ’mele oohle oa hao o e-na le leseli, ho se moo ho leng lefifi, ke hona o tla ba le leseli hohle, joale ka ha lebone le u bonesa ka leseli la lona.” Luka 11:14-36; Exoda 8:18, 19; 31:18; Mattheu 12:22, 28.

◆ Karabo ke efe ha Jesu a phekola motho?

◆ Monoana oa Molimo ke eng, hona ’Muso oa Molimo o ne o rakile bamameli ba Jesu joang?

◆ Mohloli oa thabo ea ’nete ke eng?

◆ Motho a ka ba le leihlo le lokileng joang?