Pono ea Bibele

U oa Bohlokoa Mahlong a Molimo!

MOSALI E MONG OA MOKRESTE O ILE A NGOLA: “KE ’NILE KA HLASELOA KE BOIKUTLO BA HORE HA KE NA THUSO KA NAKO E TELELE BOPHELONG BA KA. HO SA TSOTELLEHE HORE NA KE RATA JEHOVA HAKAE KAPA HORE NA KE ETSA BOITEKO BO BOKAE BA HO MO SEBELETSA, KAMEHLA KE UTLOA HORE SEO HA SEA LEKANA.”

NA U tseba motho e mong ea loantšanang le maikutlo a tebileng a ho se itšepe kapa a hore ha a na thuso? Kapa na ka linako tse ling u ee u be le maikutlo ao? Maikutlo a joalo a tloaelehile, esita le har’a barapeli ba tšepahalang ba Molimo. Ha ho motho ea sa angoeng ke liphello tsa ho phela ‘linakong tsena tse mahlonoko tseo ho leng thata ho sebetsana le tsona.’ Ba bangata ba ile ba hlokomolohuoa le ho hlekefetsoa ke batho “ba hlokang boitšoaro, ba bohale bo tšosang, ba hlokang lerato la se molemo”—e leng litšobotsi tse atileng “matsatsing [ana] a ho qetela.” (2 Timothea 3:1-5) Liphihlelo tse bohloko joalo li ka ’na tsa siea maqeba a tebileng maikutlong, tsa baka boikutlo bo matla ba ho hloka thuso.

Mabakeng a mang, maikutlo a fosahetseng a ka ’na a bakoa ke ha batho ba ipehela litekanyetso tse phahameng ka ho feteletseng. Ho hlōleha ho finyella litekanyetso tsena ho matlafatsa boikutlo ba hore ha ho mohla ba etsang hantle. Ho sa tsotellehe lebaka la seo, ba loantšanang le boikutlo ba hore ha ba na thuso ba ka ’na ba fumana ho le thata ho bona hore na ke hobane’ng ha Molimo—kapa motho leha e le mang e mong—a ba rata. Ha e le hantle, ba bile ba ka ’na ba lumela hore ha ba ratehe.

Empa hase kamoo Jehova Molimo a ikutloang kateng! Ka Lentsoeng la hae, Jehova o re lemosa hore re itebele khahlanong le “maqiti a bolotsana” a Sera sa hae, Satane Diabolose. (Baefese 6:11, Jewish New Testament) Satane o sebelisa maqiti a hae a bolotsana ho leka ho re thibela ho rapela Molimo oa rōna. E le hore a finyelle seo, Satane o re susumelletsa hore re be le boikutlo ba hore ha re na thuso, ba hore Jehova a ke ke a fumana letho le ratehang ka rōna. Empa Satane “ke ea leshano”—ha e le hantle, ke “ntate oa leshano.” (Johanne 8:44) Ka hona, ha rea lokela ho thetsoa ke maqiti a hae a bolotsana! Ka Bibeleng, Jehova oa ipuella, o re tiisetsa hore re ba bohlokoa mahlong a hae.

Pono e Leka-lekaneng ka Bohlokoa ba Rōna

Bibele e lemosa ka liphello tse mpe tseo ho nyahama ho ka bang le tsona ho rōna. Liproverbia 24:10 (NW) e re: “Na u iponahalitse u nyahame letsatsing la mahlomola? Matla a hao a tla fokola.” Ho ba le boikutlo bo fosahetseng ka nako e telele ho ka re amoha matla, ha etsa hore re ikutloe re fokola ’me re sa sireletseha. U ka kholiseha hore Satane o tseba sena ka botlalo. Lintho li hlile lia thatafala haeba lipelo tsa rōna li hlasetsoe ke boikutlo ba hore motho ha a na thuso. Leha ho le joalo, ha Satane a leka ho nka monyetla ka maikutlo a joalo, seo se etsa hore boemo bo be boima le ho feta.

Ka hona ke habohlokoa hore re be le pono e loketseng, e iteka-tekanetseng ka bohlokoa ba rōna. Moapostola Pauluse o ile a phehella: “Ke bolella e mong le e mong moo har’a lōna hore a se ke a inahana boeena haholo ho feta kamoo ho hlokahalang ho nahana; empa a nahane e le hore a be le kelello e hlaphohileng.” (Baroma 12:3) Phetolelo e ’ngoe e beha taba ka mantsoe ana: “Ke ne ke tla re e mong le e mong oa lōna a se ke a itekanya ho feta bohlokoa ba hae ba sebele, empa a itekanye ka ho se ithetse.” (Charles B. Williams) Ka hona, lengolo leo le re khothalletsa hore re be le pono e leka-lekaneng ka rōna. Ka lehlakoreng le leng, re lokela ho itebela khahlanong le boikhohomoso; ka ho le leng, re lokela ho leka ho se fetele ka nģ’ane, kaha Pauluse o bolela hore ho ba le kelello e hlaphohileng, hoa hlokahala bakeng sa ho inahanela ho hong. E, Pauluse a le tlas’a pululelo o bontša hore e mong le e mong oa rōna ke oa bohlokoa mahlong a Jehova.

Boikutlo bo leka-lekaneng ka pono ea motho ka ho ba oa bohlokoa bo boetse bo bontšoa ke mantsoe a Jesu ha a ne a re: “U rate moahelani oa hao joalokaha u ithata.” (Matheu 22:39) Mantsoe “joalokaha u ithata” a bontša hore re lokela ho ipona re le ba bohlokoa, kapa re be le boitlhompho. Ke ’nete hore re na le mefokolo ’me re etsa liphoso. Empa ha re leka ka matla ho khahlisa Molimo, re soabela liphoso tsa rōna, ’me re kōpa tšoarelo ea hae, re ntse re ka ba le boikutlo bo itseng ba hore re ba bohlokoa. Lipelo tsa rōna tse nyatsa-nyatsang li ka ’na tsa lebisa hosele, empa hopola hore “Molimo o moholo ho feta lipelo tsa rōna.” (1 Johanne 3:20) Ka mantsoe a mang, Jehova o re bona ka tsela e ka ’nang ea batla e fapana haholo le eo re iponang ka eona.

Lipelo Tse Robehileng, Meea e Sithabetseng

Mopesaleme Davida o ile a ngola: “Jehova o haufi le ba lipelo li robehileng; ’me o pholosa ba sithabetseng moeeng.” (Pesaleme ea 34:18, NW) Ha e hlalosa temana ena, Matthew Henry’s Commentary on the Whole Bible e re: “Ke tšobotsi ea ho loka . . . ea hore ba lipelo li robehileng ’me ba soabile moeeng, ke hore, ba ikokobelitse ka lebaka la sebe, ’me ba inka e se letho; ba inkela tlaase mahlong a bona, ’me ha ba itšepe bohlale ba bona.”

Ba “lipelo li robehileng” kapa “ba sithabetseng moeeng” ba ka ’na ba nahana hore Jehova o hōle haholo le hore hase ba bohlokoa hakaalo hore Jehova a ka ba tsotella. Empa ha ho joalo. Mantsoe a Davida a re tiisetsa hore Jehova ha a lahle ba ‘inkelang tlaase mahlong a bona.’ Molimo oa rōna ea nang le kutloelo-bohloko oa tseba hore linakong tse joalo re mo hloka ho feta leha e le neng pele, ’me o haufi.

Nka ka mohlala. Lilemong tse seng kae tse fetileng ’mè e mong o ile a potlakisetsa mor’a hae ea lilemo li peli sepetlele a kula haholo a tšoeroe ke ’metso o tsamaeang le mokhokhothoane. Ka mor’a ho hlahloba moshemane eo, lingaka li ile tsa bolella ’mè eo hore li tla lokela ho mo robatsa sepetlele bosiung boo. ’Mè eo o ile a robala hokae bosiung boo? Setulong sa kamore ea sepetlele, haufi le bethe ea mor’a hae. Moshemane oa hae e monyenyane o ne a kula, ’me o ne a lokela ho ba haufi le eena. Ka sebele re ka lebella ho eketsehileng le ho feta ho Ntate oa rōna ea lerato oa leholimo, eo re entsoeng ka setšoantšo sa hae! (Genese 1:26; Esaia 49:15) Mantsoe a thobang pelo a ho Pesaleme ea 34:18 a re tiisetsa hore ha re le ba “lipelo li robehileng,” Jehova, joaloka motsoali ea lerato, “o haufi”—o lebetse ka hloko, o seli, o bile o loketse ho thusa.—Pesaleme ea 147:1, 3.

“Le ba Bohlokoa Haholoanyane ho Feta Lirobele Tse Ngata”

Nakong ea tšebeletso ea hae ea lefatšeng, Jesu o ile a senola ho hongata ka menahano le maikutlo a Jehova, ho akarelletsa le kamoo Jehova a ikutloang kateng ka bahlanka ba Hae ba lefatšeng. Ka makhetlo a fetang le le leng, Jesu o ile a tiisetsa barutuoa ba hae ka bohlokoa ba bona mahlong a Jehova.—Matheu 6:26; 12:12.

Ka mohlala, ha a etsetsa barutuoa ba hae papiso ka bohlokoa ba motho ka mong, Jesu o ile a re: “Na lirobele tse peli ha li rekisoe ka chelete ea tšepe ea bohlokoa bo bonyenyane? Empa leha ho le joalo ha ho le se seng sa tsona se tla oela fatše ka ntle le hore Ntate oa lōna a tsebe. Empa eona meriri ea lihlooho tsa lōna e baliloe kaofela. Ka hona le se ke la ba le tšabo: le ba bohlokoa haholoanyane ho feta lirobele tse ngata.” (Matheu 10:29-31) Nahana hore na mantsoe ao a tlameha a ile a bolela eng ho bamameli ba Jesu ba lekholong la pele la lilemo.

Ka ho hlakileng lirobele e ne e le tse ling tsa linonyana tse theko e tlaase ka ho fetisisa tse neng li sebelisoa e le lijo. Hangata linonyana tsena tse nyenyane li ne li hlothoa masiba, li hlongoa thupeng, ebe li halikoa joaloka nama. Ha ho pelaelo hore Jesu o ne a kile a bona basali ba futsanehileng ba le ka ’marakeng ba bala chelete ea bona e leoana ho bona hore na ba ka khona ho reka lirobele tse kae. Linonyana tseo li ne li nkoa e le tsa bohlokoa bo fokolang hoo le ka chelete ea tšepe ea bohlokoa bo bonyenyane (ha e le hantle, ka assarion, ea boleng bo ka tlaase ho lisente tse hlano), motho a neng a ka reka lirobele tse peli.

Jesu o ile a boela a etsa papiso ena hamorao—empa e batla e fapane hanyenyane. Ho ea ka Luka 12:6, Jesu o ile a re: “Lirobele tse hlano li rekisoa ka lichelete tsa tšepe tse peli tsa bohlokoa bo bonyenyane, na ha li rekisoe ka lichelete tseo?” Nahana ka seo. Ka chelete ea tšepe ea bohlokoa bo bonyenyane, moreki o fumana lirobele tse peli. Empa haeba a ikemiselitse ho sebelisa lichelete tsa tšepe tse peli, ha a fumane lirobele tse ’nè empa o fumana tse hlano. Nonyana e ’ngoe e ne e kenyelletsoa thekisong joalokaha eka hase ea bohlokoa ba letho. Jesu o re: “Empa leha ho le joalo ha ho le se seng sa tsona [esita le sa pasela] se lebaloang ka pel’a Molimo.” Ha a hlalosa papiso eo, Jesu o phetha ka ho re: “Le ba bohlokoa haholoanyane ho feta lirobele tse ngata.” (Luka 12:7) Mantsoe ao a tlameha a ile a khothatsa bamameli ba hae hakaakang!

Na u utloisisa moelelo oa papiso ee ea Jesu e thobang pelo? Haeba Jehova a nka esita le linonyana tse nyenyane e le tsa bohlokoa, bahlanka ba hae ba lefatšeng e tlameha ebe ke ba bohlokoa le ho feta ho eena! Ho Jehova, ha ho le ea mong oa rōna ea lahlehileng har’a letšoele. E mong le e mong oa rōna ke oa bohlokoa ho Jehova hoo a hlokomelang esita le karolo e nyenyane ka ho fetisisa ea rōna—meriri ea lihlooho tsa rōna e baliloeng ka bonngoe.

Ke ’nete hore Satane o tla ’ne a tsoele pele ho sebelisa ‘maqiti a hae a bolotsana’—joaloka ho nka monyetla ka boikutlo ba ho se be le thuso—ho re thibela ho sebeletsa Jehova. Empa u se ke ua lumella Satane hore a u hlōle! Hopola mosali oa Mokreste ea qotsitsoeng sethathong. O ile a thusoa ke sehlooho sa makasine ea Molula-Qhooa se neng se lemosa ka boiteko ba Satane ba ho sebelisa maikutlo a rōna hampe.a O re: “Ho ne ho se mohla nkileng ka hlokomela hore Satane o leka ho sebelisa maikutlo a ka ho ’nyahamisa. Ho tseba sena ho ntšusumelletsa hore ke loantše maikutlo ana. Hona joale nka tobana le litlhaselo tsena tsa bosatane, ke e-na le tšepo.”

Jehova “o tseba lintho tsohle.” (1 Johanne 3:20) E, o tseba seo re fetang ho sona hona joale. Hape o tseba le seo re fetileng ho sona nakong e fetileng seo e ka ’nang eaba se ile sa senya boikutlo ba rōna ba boitlhompho. Hopola, Seo e leng sa bohlokoa ke pono ea Jehova ka rōna! Ho sa tsotellehe hore na re ka ’na ra inahana re le ba sa rateheng kapa ba se nang thuso hakae, Jehova o re tiisetsa hore mohlanka e mong le e mong oa hae ke oa bohlokoa ho eena. Re ka tšepa seo Jehova a se buang, hobane ho fapana le Sera sa hae, Molimo ‘a ke ke a bua leshano.’—Tite 1:2.

[Mongolo o botlaaseng ba leqephe]

[Ntlha e Qolotsoeng e leqepheng la 12]

Joaloka motsoali ea lerato, Jehova o haufi le ba saretsoeng pelong

[Litšoantšo tse leqepheng la 13]

Haeba Jehova ha a lebale lirobele, a ka u lebala joang?

[Litlhaloso Tsa Moo Litšoantšo li Nkiloeng Teng]

Lydekker

Illustrated Natural History