U oa Bohlokoa Mahlong a Molimo!

“ke u ratile ka lerato la mehla eohle, ka u atametsa ho ’na ka kutloelo-bohlōkō.”—JEREMIA 31:3, BIBELE—PHETOLELO E NCHA.

 1. Boikutlo ba Jesu mabapi le batho feela ba tloaelehileng ba mehleng ea hae bo ile ba fapana joang le ba Bafarisi?

BA NE ba ka le bona ka mahlong a hae. Motho enoa ea bitsoang Jesu, o ne a fapane ho hang le baeta-pele ba bona ba bolumeli; o ne a tsotella. O ne a qenehela batho bana hobane “ba ne ba khathetse, ba saretsoe joalo ka linku tse se nang molisa.” (Mattheu 9:36) Baeta-pele ba bona ba bolumeli ba ne ba lokela hore e be balisa ba lerato ba emelang Molimo ea lerato, ea lereko. Ho e-na le hoo, ba ne ba khesa batho feela ba tloaelehileng ba ba nka e le mahoo-hoo—le ba rohakiloeng!a (Johanne 7:47-49; bapisa le Ezekiele 34:4.) Ho hlakile hore pono e joalo e sothehileng le eo eseng ea Mangolo e ne e fapane hōle haholo le pono ea Jehova ka batho ba hae. O ne a ile a re ho sechaba sa hae sa Iseraele: “Ke u ratile ka lerato la mehla eohle.”—Jeremia 31:3, BPN.

 2. Metsoalle ea Jobo e meraro e ile ea leka joang ho mo kholisa hore e ne e se oa bohlokoa mahlong a Molimo?

² Leha ho le joalo, Bafarisi ho hang e ne e se bona ba pele ho kholisa linku tse ratehang tsa Jehova hore hase tsa bohlokoa. Nahana ka taba oa Jobo. Ho Jehova o ne a lokile, a se na molato, empa “batšelisi” ba bararo ka bolotsana ba ile ba fana ka maikutlo a hore Jobo e ne e le mokoenehi ea boitšoaro bo bobe, ea khopo ea neng a tla shoa ho se seo a tla hopoloa ka sona. Ba ile ba tiisa hore Molimo o ne a ke ke a nka ho loka leha e le hofe ha Jobo e le habohlokoa, kaha Molimo o ne a sa tšepe le oona mangeloi a hae ’me leholimo ka bolona a le talima le le litšila!—Jobo 1:8; 4:18; 15:15, 16; 18:17-19; 22:3.

 3. Satane o sebelisa mekhoa efe kajeno ho leka ho kholisa batho hore hase ba bohlokoa ebile ha ba ratoe?

³ Kajeno, Satane o ntse a sebelisa ‘ketso ena ea bolotsana’ ea ho leka ho kholisa batho hore ha ba ratoe hape hase ba bohlokoa. (Ba-Efese 6:11, NW, mongolo o botlaaseng ba leqephe) Ke ’nete hore hangata o faposa batho ka ho ipiletsa tabeng ea hore ke ba lefeela hape o ipiletsa boikhohomosong ba bona. (2 Ba-Korinthe 11:3) Empa hape o thabela ho senya boitlhompho ba bao a ka ba hlaselang habonolo. Hona ho joalo haholo ‘mehleng ena e bohloko ea qetello.’ Ba bangata kajeno ba hōlela malapeng a se nang “lerato la hlaho”; letsatsi le letsatsi ba bangata ba tlameha ho sebetsana le bahalefi, baithati, le ba manganga. (2 Timothea 3:1-5) E ka ’na eaba lilemo tsa ho tšoaroa hampe, khethollo ea merabe, lehloeo, kapa ho hleka-hlekoa li kholisitse ba joalo hore hase ba bohlokoa ebile ba ke ke ba ratoa. Monna e mong o ile a ngola: “Ha ke ikutloe ke rata kapa ke ratoa ke mang kapa mang. Ke fumana ho le thata haholo ho lumela hore Molimo oa ntsotella.”

 4, 5. (a) Ke hobane’ng ha khopolo ea ho ikutloa u se oa bohlokoa e hanana le Mangolo? (b) Phello e ’ngoe ea hore re lumele hore ha ho boiteko ba rōna boo e leng ba bohlokoa ke efe?

⁴ Khopolo ea ho ikutloa u se oa bohlokoa e ama thuto ea thekollo, eo e leng karolo ea bohlokoa ea ’nete ea Lentsoe la Molimo. (Johanne 3:16) Haeba Molimo a ne a ka lefa ka ntho e khōlō hakaalo—bophelo ba bohlokoa ba Mora oa hae—hore a re rekele monyetla oa ho phela ka ho sa feleng, ka sebele O tlameha a be a re rata; ka sebele re tlameha ebe re ba bohlokoa mahlong a Hae!

⁵ Ho feta moo, e ne e tla ba ho nyahamisang hakaakang ho ikutloa hore ha re khahlise Molimo, hore ha ho na boiteko le bo bong ba rōna boo e leng ba bohlokoa! (Bapisa le Liproverbia 24:10.) Ka pono ena e seng ntle, esita le khothatso e etsoang ka sepheo se setle, e reretsoeng hore moo ho ka khonehang e re thuse ho ntšetsa pele tšebeletso ea rōna ho Molimo, ho ba bang e ka ’na ea utloahala e le kahlolo ho e-na le khothatso. E ka utloahala e pheta seo re kholisehileng ka sona ka ho teba hore eng kapa eng eo re e etsang ha ea lekana.

 6. Pheko e molemohali ea ho ba le mehopolo e seng metle ka rōna ka borōna ke efe?

⁶ Haeba u utloa maikutlo a seng matle joalo ka ho uena, u se ke ua nyahama. Ba bangata ba rōna nako le nako re itšoara ka thata ntle ho mabaka. ’Me hopola, Lentsoe la Molimo le reretsoe ho “otlolla lintho” le ho “liha liqhobosheane.” (2 Timothea 3:16, NW; 2 Ba-Korinthe 10:4) Moapostola Johanne o ile a ngola: “Ke ka hoo re tsebang hobane re ba ’nete, ’me re ka tšepisang lipelo tsa rōna pel’a oona. Hobane leha lipelo tse rōna li re qosa, Molimo o moholo ho lipelo tsa rōna, ’me o tseba tsohle.” (1 Johanne 3:19, 20) Joale, a re hlahlobeng litsela tse tharo tseo ka tsona Bibele e re rutang hore re ba bohlokoa ho Jehova.

Jehova o U Nka U le oa Bohlokoa

 7. Jesu o ile a ruta Bakreste bohle joang hore ke ba bohlokoa mahlong a Molimo?

⁷ Tsela ea pele, Bibele e ruta ka ho toba hore e mong le e mong oa rōna ke oa bohlokoa mahlong a Molimo. Jesu o ile a re: “Lirobele tse hlano hleka ha li rekoe ka peni tse peli na? Leha ho le joalo, Molimo ha o lebale le se seng sa tsona. Esita le qoba tsa moriri oa lihlooho tsa lōna li baliloe kaofela. Se tšabeng ke hona; le fetisa lirobele tse ngata.” (Luka 12:6, 7) Mehleng eo, serobele e ne e le nonyana e theko e tlaase ho feta tsohle tse neng li rekisetsoa ho jeoa, empa ha ho le se seng sa tsona seo ’Mōpi oa sona a neng a sa se hlokomele. Kahoo ho raliloe motheo bakeng sa papiso e hlollang: Tabeng ea batho—bao e leng ba bohlokoa haholo ho feta moo—Molimo o tseba ntlha e ’ngoe le e ’ngoe. Joalokaha eka liqoba tsa moriri oa lihlooho tsa rōna li ne li baliloe ka bomong!

 8. Ke hobane’ng ha ho utloahala ho nahana hore Jehova a ka bala meriri ea lihlooho tsa rōna?

⁸ Na liqoba tsa moriri li ka baloa? Haeba u belaela hore tšobotsi ena ea papiso ea Jesu ha e utloahale, ak’u nahane: Molimo o hopola bahlanka ba hae ba tšepahalang ka ho feletseng hoo a tsebang ho ba tsosa—a ba bōpa bocha ka botlalo kahohle, ho akarelletsa le melao e rarahaneng ea liphatsa tsa bona tsa lefutso le boitsebiso le liphihlelo tseo ba bileng le tsona ka lilemo-lemo. Ho bala meriri ea rōna (eo ka tlhaho hloohong ho melang e ka bang 100 000) e ne e tla ba mosebetsi o bonolo ha ho bapisoa!—Luka 20:37, 38.

Jehova o Bona Eng ho Rōna?

 9. (a) Litšobotsi tse ling tseo Jehova a li nkang e le tsa bohlokoa ke life? (b) U nahana hore litšobotsi tse joalo ke tsa bohlokoa ho eena hobane’ng?

⁹ Tsela ea bobeli, Bibele e re ruta seo Jehova a se nkang e le sa bohlokoa ho rōna. Ka mantsoe a bonolo, o thabela litšobotsi tsa rōna tse ntle le boiteko ba rōna. Morena Davida o ile a bolella mora oa hae Salomone: “Jehova o botsisisa [batlisisa, NW] lipelo tsohle, ’me o lekola merero eohle le mehopolo eohle.” (1 Likronike 28:9) Ha Molimo a batlisisa lipelong tsa batho tse likete tsa limilione lefatšeng lena le mabifi, le tletseng lehloeo, o tlameha ebe o thaba hakaakang ha a fumana pelo e ratang khotso, ’nete, le ho loka! (Bapisa le Johanne 1:47; 1 Petrose 3:4.) Ho etsahala’ng ha Molimo a fumana pelo e tletseng ho mo rata, e batlang ho ithuta ka eena le ho kopanela tsebo e joalo le ba bang? Ho Malakia 3:16, Jehova o re bolella hore o mamela ba buang le ba bang ka eena ’me o bile o na le “buka ea khopotso” bakeng sa bohle “ba tšabang Jehova le ba hlokomelang lebitso la hae.” Litšobotsi tse joalo ke tsa bohlokoa ho eena!

10, 11. (a) Ba bang ba ka sekamela ho eisa bopaki ba hore Jehova o nka litšobotsi tsa bona tse molemo e le tsa bohlokoa joang? (b) Mohlala oa Abija o bontša joang hore Jehova o nka litšobotsi tse molemo e le tsa bohlokoa kahohle?

¹⁰ Leha ho le joalo, pelo e ikahlolang, e ka ’na ea hanyetsa bopaki bo joalo ba hore re ba bohlokoa mahlong a Molimo. E ka ’na ea hoeshetsa ka phehello, ‘Empa ho na le ba bangata haholo ba behang mohlala litšobotsing tseo ho mpheta. E tlameha ebe Jehova o soaba hakaakang ha a mpapisa le bona!’ Jehova ha a bapise, leha e le hona hore o na le litekanyetso tse thata tsa hore motho ha a sa etse sohle a lese. (Ba-Galata 6:4) O bala lipelo ka temohisiso e fetisisang, ’me o nka litšobotsi tse molemo e le tsa bohlokoa kahohle.

¹¹ Ka mohlala, ha Jehova a ne a laela hore lesika lohle la bakoenehi la Morena Jeroboame le bolaoe, le felisoe joaloka “litšila,” O ile a laela hore, a le mong feela ho bara ba morena, e leng Abija, a patoe ka tsela e hlomphehang. Hobane’ng? “Ke ho eena ho fihletsoeng taba e ’ngoe e ntle ke Jehova, Molimo oa Iseraele.” (1 Marena 14:10, 13) Na see se ne se bolela hore Abija e ne e le morapeli ea tšepahalang oa Jehova? Eseng joalo, kaha o ile a shoa, joalokaha ho ile ha e-shoa lelapa lohle labo le khopo. (Deuteronoma 24:16) Ho ntse ho le joalo, Jehova o ile a nka “taba e ’ngoe e ntle” eo a ileng a e bona pelong ea Abija e le ea bohlokoa eaba o etsa ho tšoanelang. Matthew Henry’s Commentary on the Whole Bible ea bolela: “Moo ho nang le ho hong ho molemo ha mofuta oo, ho tla fumanoa: Molimo ea ho batlang, oa ho bona, ho sa tsotellehe hore na ho honyenyane hakae, ’me oa thaba ke hona.” Hape u se ke ua lebala hore haeba Molimo a fumana leha e le tlhasenyana feela ea tšobotsi e molemo ho uena, a ka e hōlisa hafeela u leka ho mo sebeletsa ka botšepehi.

12, 13. (a) Pesaleme ea 139:3 e bontša joang hore Jehova o nka boiteko ba rōna e le ba bohlokoa? (b) Ke ka kutloisiso efe ho ka thoeng Jehova o sefa liketso tsa rōna?

¹² Jehova o nka boiteko ba rōna e le ba bohlokoa ka mokhoa o tšoanang. Ho Pesaleme ea 139:1-3 (NW), rea bala: “Uena Jehova, u batlisisitse ka ho ’na, ’me ua ntseba. Uena ka bouena u tseba ho lula ha ka le ho phahama ha ka. U hlahlobile mohopolo oa ka o le hōle. Ho kena leetong ha ka le ho robala ha ka ke otlolohile u ho lekantse, ’me u tloaelane le litsela tsa ka kaofela.” Ka hona Jehova o elelloa liketso tsohle tsa rōna. Empa ha a felle feela ka ho elelloa. Ka Seheberu polelo “u tloaelane le litsela tsa ka kaofela” e ka boetse ea bolela hore, “u nka litsela tsa ka kaofela e le letlotlo la bohlokoa” kapa “u nka litsela tsa ka kaofela li rateha.” (Bapisa le Mattheu 6:19, 20.) Leha ho le joalo, ke joang Jehova a ka nkang litsela tsa rōna li rateha empa re sa phethahala re bile re tletse boetsalibe hakana?

¹³ Ho khahlisang, ho ea ka litsebi tse ling, ha Davida a ngola hore Jehova o ne a “lekantse” maeto a hae le linako tsa hae tsa ho phomola, Seheberu ka ho toba se ne se bolela “ho sefa” kapa “ho olosa.” Buka e ’ngoe ea litšupiso e ile ea hlalosa: “Se boleloang ke . . . ho olosa hore ’mōkō kaofela o tsoe, le ho siea lijo-thollo tsohle—ho boloka sohle sa bohlokoa. Ka hona se boleloang mona ke hore Molimo, ka puo ea tšoantšetso, o ile a mo sefa. . . . O ile a hasanya sohle seo e neng e le ’mōkō, kapa sohle seo e neng e se sa bohlokoa, ’me a bona se neng se setse seo e neng e le sa ’nete le sa bohlokoa.” Pelo e ikahlolang e ka ’na ea sefa liketso tsa rōna ka tsela e fapaneng, e re nyatsa ntle ho qenehelo ka liphoso tsa nako e fetileng ’me e qhela seo re se finyelletseng ka hore hase letho. Empa Jehova o re tšoarela libe tsa rōna haeba re baka ka tieo ’me re leka ka matla hore re se ke ra pheta liphoso tsa rōna. (Pesaleme ea 103:10-14; Liketso 3:19) Oa sefa ’me o hopola mesebetsi ea rōna e molemo. Ha e le hantle, o e hopola ka ho sa feleng hafeela re lula re tšepahala ho eena. O ne a tla nka hore ho e lebala ke ho se loke, ’me ha ho mohla e leng ea sa lokang!—Ba-Heberu 6:10.

14. Ke eng e bontšang hore Jehova o nka mesebetsi ea rōna tšebeletsong ea Bokreste e le ea bohlokoa?

¹⁴ E meng ea mesebetsi e molemo eo Molimo a e nkang e le ea bohlokoa ke efe? Hoo e ka bang ntho leha e le efe eo ka ho e etsa re etsisang Mora oa hae, Jesu Kreste. (1 Petrose 2:21) Ka sebele mosebetsi o le mong oa bohlokoahali, ha ho le joalo, ke ho jaloa ha litaba tse molemo tsa ’Muso oa Molimo. Ho Ba-Roma 10:15, rea bala: “Maoto a ba bolelang Evangeli [litaba tse molemo, NW] ea khotso a matle hakakang!” Le hoja ka tloaelo re ka se nahane hore maoto a rōna a tloaelehileng “a matle,” lentsoe leo Pauluse a ileng a le sebelisa mona le ne le tšoana le le neng le sebelisitsoe phetolelong ea Septuagint ea Segerike ho hlalosa Rebeka, Ragele, le Josefa—bao boraro ba bona kaofela ba neng ba tsejoa ka botle ba bona. (Genese 26:7; 29:17; 39:6) Ka hona ho kopanela ha rōna tšebeletsong ea Molimo oa rōna, Jehova, ho hotle haholo ebile ke habohlokoa mahlong a hae.—Mattheu 24:14; 28:19, 20.

15, 16. Ke hobane’ng ha Jehova a nka mamello ea rōna e le ea bohlokoa, ’me mantsoe a Morena Davida ho Pesaleme ea 56:8 a hatisa ’nete ee joang?

¹⁵ Tšobotsi e ’ngoe eo Molimo a e nkang e le ea bohlokoa ke mamello ea rōna. (Mattheu 24:13) Hopola hore Satane o batla hore u furalle Jehova. Letsatsi ka leng leo u lulang u tšepahetse ho Jehova ka lona ke le leng leo ka lona u thusitseng ho fana ka karabo litšomong tsa Satane. (Liproverbia 27:11) Ka linako tse ling ho mamella ho thata haholo. Mathata a ho kula, likhathatso tsa lichelete, ho tepella maikutlo, le litšitiso tse ling li ka etsa hore letsatsi ka leng le fetang e be teko. Ho mamella liteko tse joalo ke habohlokoa ka ho khethehileng ho Jehova. Ke ka lebaka leo Morena Davida a ileng a kōpa Jehova hore a bokelle meokho ea hae ka “lekukeng” la tšoantšetso, a botsa ka tšepo, “Ha ke re, e ngoliloe bukeng ea hao na?” (Pesaleme ea 56:8) E, Jehova o nka meokho eohle le mahlomola ao re a mamellang ha re lutse re tšepahala ho eena e le letlotlo la bohlokoa ’me oa li hopola. Le tsona ke tsa bohlokoa mahlong a hae.

¹⁶ Ka lebaka la litšobotsi tsa rōna tse ntle haholoanyane le boiteko ba rōna, ho hlaka hakaakang hore Jehova o fumana ho hongata hoo a ho nkang e le habohlokoa ho e mong le e mong oa rōna! Ho sa tsotellehe hore na lefatše la Satane le ’nile la re tšoara joang, Jehova o re talima re le ba bohlokoa ’me re le karolo ea “tse lakatsehang tsa lichaba tsohle.”—Haggai 2:7.

Seo Jehova a se Entseng ho Bontša Lerato la Hae

17. Ke hobane’ng ha sehlabelo sa Kreste sa thekollo se re kholisa hore Jehova le Jesu ba re rata re le motho ka mong?

¹⁷ Tsela ea boraro, Jehova o etsa ho hongata ho paka hore oa re rata. Ka sebele, sehlabelo sa thekollo sa Kreste ke karabo e matla ka ho fetisisa leshanong la bosatane la hore ha re ba bohlokoa kapa ha re ratoe. Le ka mohla re se ke ra lebala hore lefu le otlang pelo leo Jesu a ileng a utloa bohloko ke lona thupeng ea tlhokofatso le bohloko bo tebileng haholoanyane boo Jehova a ileng a bo mamella ha a shebeletse lefu la Mora ea ratoang oa hae e ne e le bopaki ba hore baa re rata. Ho feta moo, lerato leo le sebetsa ho rōna ka borōna. Ke kamoo moapostola Pauluse a ileng a le bona kateng, hobane o ile a ngola: ‘Mor’a Molimo o nthatile a ba a itella ’na.’—Ba-Galata 2:20.

18. Ke ka kutloisiso efe Jehova a re hulelang ho Kreste?

¹⁸ Jehova o pakile hore oa re rata ka ho re thusa ka bomong hore re sebelise melemo ea sehlabelo sa Kreste. Ho Johanne 6:44 Jesu o itse: “Ha ho motho ea ka tlang ho ’na, ha a sa huloe ke Ntate ea nthomileng.” Ka mosebetsi oa boboleli, o fihlang ho rōna ka bomong, le ka moea oa hae o halalelang, oo Jehova a o sebelisang ho re thusa ho utloisisa le ho sebelisa linnete tsa moea ho sa tsotellehe likhaello tsa rōna le ho se phethahale, Jehova ka boeena o re hulela ho Mora oa hae le tšepong ea bophelo bo sa feleng. Ka hona Jehova a ka re ho rōna joalokaha a ile a bolella Iseraele: “Ke u ratile ka lerato la mehla eohle, ka u atametsa ho ’na ka kutloelo-bohlōkō.”—Jeremia 31:3, BPN.

19. Ke hobane’ng ha tokelo ea thapelo e lokela ho re kholisa hore Jehova ka boeena oa re rata?

¹⁹ Leha ho le joalo, mohlomong ke ka tokelo ea thapelo re latsoang lerato la Jehova ka tsela e tebileng ka ho fetisisa. O mema e mong le e mong oa rōna hore a ‘se phetse ho mo rapela.’ (1 Ba-Thessalonika 5:17) Oa mamela! O bile o bitsoa “ea utloang merapelo.” (Pesaleme ea 65:2) Tšebeletso ena ha aa e abela motho leha e le ofe, esita le eena Mora oa hae. Ak’u nahane: ’Mōpi oa bokahohle o re phehella hore re mo atamele ka thapelo, re bua ka bolokolohi. Likōpo tsa hao tse tiileng li ka ba tsa susumelletsa Jehova hore a etse seo haeba maemo e ne e se ao mohlomong a ka beng a sa se etsa.—Ba-Heberu 4:16; Jakobo 5:16; bona Esaia 38:1-16.

20. Ke hobane’ng ha lerato la Molimo ho rōna e se lebaka la ho inka re le ba bohlokoa ho tlōla kapa la ho iphahamisa?

²⁰ Ha ho Mokreste ea etsang lintho ka tekanyetso ea neng a ka nka bopaki bo joalo ba lerato la Molimo le kananelo ea Hae e le lebaka la ho inka e le oa bohlokoa ho tlōla. Pauluse o ile a ngola: “Ka mohau oo ke o neiloeng, ke bolella motho e mong le e mong har’a lōna, hore a se ke a itekanya boholo bo tlōlisang moo a tšoanetseng ho lekanya teng; a mpe a ikhopole ka se mo lekaneng [e le hore a hlaphoheloe kelellong, NW], e mong le e mong ka tekanyo ea tumelo eo Molimo o mo abetseng eona.” (Ba-Roma 12:3) Ka hona, ha re ntse re thabela mofuthu oa lerato la Ntate oa rōna oa leholimo, a re hlaphoheloeng likelellong ’me re hopole hore mosa o lerato oa Molimo ke o sa tšoanelang.—Bapisa le Luka 17:10.

21. Ke leshano lefe la bosatane leo re tlamehang ho tsoela pele re le hanela, hona ke ’nete efe ea bomolimo eo re tlamehang ho nahana ka eona kamehla?

²¹ E mong le e mong oa rōna a etse sohle se matleng a hae ho hanela maikutlo ’ohle ao Satane a a buellang lefatšeng lena la khale le shoang. Seo se akarelletsa ho hana khopolo ea hore ha re ba bohlokoa kapa ha re ratoe. Haeba bophelo tsamaisong ena bo u rutile hore u ipone u le tšitiso e nyahamisang hoo le lerato le leholo la Molimo le ke keng la e hlōla, kapa u bone mesebetsi e molemo ea hao e se letho hoo le mahlo a hae a bonang hohle a ke keng a e hlokomela, kapa libe tsa hao e le tse khōlō haholo hoo esita le lefu la Mora oa hae oa bohlokoa le ke keng la li koahela, u rutiloe leshano. Hana mashano a joalo ka ho nyonya hohle ho a lokelang! Kamehla re hopole mantsoe a bululetsoeng a moapostola Pauluse a ho Ba-Roma 8:38, 39: “Ke tsebisisa ruri hore, leha e le lefu, leha e le bophelo, leha e le mangeloi, leha e le borena, leha e le mebuso e matla, leha e le ntho tse leng teng joale, leha e le tse tlang ho tla, leha e le boholimo, leha e le botlase, leha e le sebopuoa se seng, ha ho letho le tla tseba ho re arohanya le lerato la Molimo, le leng ho Jesu Kreste, Morena oa rōna.”

[Mongolo o botlaaseng ba leqephe]

Maikutlo a Hao ke Afe?

◻ Ke hobane’ng ha Satane a leka ho re kholisa hore ha re ba bohlokoa ebile ha re ratoe?

◻ Jesu o ile a ruta joang hore Jehova o nka e mong le e mong oa rōna e le oa bohlokoa?

◻ Re tseba joang hore Jehova o nka litšobotsi tse molemo tsa rōna e le tsa bohlokoa?

◻ Re ka kholiseha joang hore Jehova o nka boiteko ba rōna e le ba bohlokoa?

◻ Jehova o pakile joang hore o re rata re le batho ka bomong?

[Setšoantšo se leqepheng la 13]

Jehova oa hlokomela ’me o hopola bohle ba nahanang ka lebitso la hae