Kamoo Tsoalo ea Jesu e Tlisang Khotso Kateng
PHATLALATSO e reng “khotso e be har’a batho bao a khahloang ke bona” e ne e se bona feela boprofeta bo amanang le tsoalo ea Jesu. Ho phaella ho seo mangeloi a ileng a se bolella balisa ba neng ba maketse, manģosa ana a tsoang leholimong a ne a ile a bolella Maria le monna oa hae Josefa melaetsa e bululetsoeng ke Molimo e mabapi le Jesu ea neng a sa tsoa tsoaloa. Ho hlahloba melaetsa ena ho tla re thusa ho utloisisa pale ea tsoalo ea Jesu ka botlalo le ho utloisisa bohlokoa ba tšepiso e entsoeng ke lengeloi ea hore ho tla ba le khotso har’a batho.
Pele ho tsoalo ea Jesu, le pele Maria e e-ba moimana, o ile a eteloa ke lengeloi leo Bibele e reng ke Gabriele. Lengeloi le ile la mo lumelisa ka mantsoe a reng: “Lumela, uena ea hauhetsoeng haholo, Jehova o na le uena.” Joalokaha u ka inahanela, sena se ile sa ferekanya Maria, mohlomong sa ba sa mo tšosa. Ebe tumeliso ea mofuta oo e ne e bolela’ng?
Gabriele o ile a hlalosa tjena: “Bona! u tla emola ka pōpelong ea hao u tsoale mora, ’me u tla mo reha lebitso la Jesu. O tla ba moholo ’me o tla bitsoa Mora oa Ea Phahameng ka ho Fetisisa; Jehova Molimo o tla mo fa terone ea ntat’ae Davida, ’me o tla busa e le morena oa ntlo ea Jakobo ka ho sa feleng, ’me ’muso oa hae o ke ke oa e-ba le bofelo.” Maria o ile a botsa hore na sena se ne se ka etsahala joang, kaha e ne e le moroetsana ’me a e-s’o kopanele liphate le monna. Gabriele o ile a arabela ka ho re ngoana eo o ne a tla emoloa ka moea o halalelang oa Molimo. Enoa e ne e sa tl’o ba ngoana feela ea tloaelehileng.—Luka 1:28-35.
Morena ea Boletsoeng Esale Pele
E tlameha ebe mantsoe a Gabriele a ile a hlokomelisa Maria hore mora eo a neng a tla mo beleha ke eena eo boprofeta ba boholo-holo bo buileng ka eena. Ho tseba taba ea hore Jehova o ne a tla fa mora oa Maria “terone ea ntat’ae Davida” ho ne ho tla etsa hore Maria—esita le Mojuda ofe kapa ofe ea tsebang Mangolo—a nahane ka seo Molimo a neng a se tšepisitse Morena Davida oa Iseraele.
Ka moprofeta Nathane, Jehova o ne a ile a bolella Davida sena: “Ntlo ea hao le ’muso oa hao e tla ba tse tiileng ka pel’a hao ho isa nakong e sa lekanyetsoang; terone ea hao e tla tiisoa ka thata ho isa nakong e sa lekanyetsoang.” (2 Samuele 7:4, 16) Ha a bua ka Davida teng Jehova o ile a re: “Ka sebele ke tla hloma peō ea hae ka ho sa feleng le terone ea hae joaloka matsatsi a leholimo. Peō ea hae e tla ba teng ho isa nakong e sa lekanyetsoang, le terone ea hae joaloka letsatsi ka pel’a ka.” (Pesaleme ea 89:20, 29, 35, 36) Kahoo, ho ne ho sa etsahala ka tsietsi feela hore ebe Maria le Josefa e ne e le ba ntlo ea Davida.
Bona e ne e se bona feela boprofeta bo hlahang Mangolong a Seheberu bo buang ka mora oa Davida eo e neng e tla ba morena. E tlameha ebe hape Maria o ne a tseba boprofeta ba Esaia bo reng: “Re tsoaletsoe ngoana, re filoe mora; ’me puso ea bohosana e tla ba lehetleng la hae. O tla rehoa lebitso la Moeletsi ea Hlollang, Molimo ea Matla, Ntate oa ka ho sa Feleng, Khosana ea Khotso. Ho ke ke ha e-ba le bofelo bongateng ba puso ea bohosana le khotso, teroneng ea Davida le ’musong oa hae e le ho o tiisa ka thata le ho o tšehetsa ka toka le ka ho loka, ho tloha joale ho isa nakong e sa lekanyetsoang. Cheseho ea Jehova oa mabotho e tla etsa sena.”—Esaia 9:6, 7.
Ka hona, seo Gabriele a ileng a se bolella Maria e ne e se molaetsa feela oa ho tsoaloa ha ngoana oa moshanyana ka mohlolo. Mora oa hae e ne e tla ba mojalefa boreneng ba Morena Davida—mojalefa ea tla lula a le teng, eo e tla boela e be mojalefa oa ka ho sa feleng oa ’Muso o hlomiloeng ke Molimo. Boprofeta ba Gabriele bo mabapi le karolo eo Jesu a tla e phetha ka moso ke ba bohlokoa haholo ho rōna.
Ha Josefa a fumana hore mosali eo a neng a tl’o mo nyala o imme, o ile a etsa qeto ea ho mo tlohela le hoja a ne a mo lebelelitse. O ne a tseba hore ngoana eo e ne e se oa hae kaha eena le molebeletsuoa oa hae ba ne ba e-s’o ka ba kopanela liphate. U ka inahanela hore na ho ile ha e-ba thata hakae hore Josefa a kholoe seo Maria a neng a mo bolella sona mabapi le hore na ho tlile joang hore a ime. Tlaleho ea Kosepele e re: “Lengeloi la Jehova la bonahala ho eena torong, le re: ‘Josefa, mora oa Davida, u se ke ua tšaba ho isa Maria mosali oa hao lapeng, etsoe se emotsoeng ka ho eena se teng ka moea o halalelang. O tla tsoala mora, ’me u tla mo reha lebitso la Jesu, etsoe o tla pholosa batho ba habo libeng tsa bona.’”—Matheu 1:20, 21.
Bibele ha e hlalose hore na Josefa o ne a utloisisa hakae hore na ngoana enoa o ne a tla “pholosa batho ba habo libeng tsa bona” joang. Leha ho le joalo, molaetsa ona o ne o lekane ho kholisa Josefa hore ho ne ho se letho le phoso leo moimana enoa a neng a le entse. O ile a etsa seo lengeloi le ileng la mo laela hore a se etse, a isa Maria lapeng, e leng se neng se hlile se tšoana le lechato.
Boitsebiso bo fumanehang Mangolong a mang bo re thusa ho utloisisa hore na lengeloi le ne le bolela’ng. Qalong feela ea moloko oa batho, lengeloi le leng la lerabele le ile la phephetsa bobusi ba Jehova. Mangolo a Seheberu a bontša hore har’a tse ling, lerabele lena le ile la bolela hore tsela eo Molimo a busang ka eona e ne e sa loka le hore ha ho na motho ea ka lulang a tšepahala ho Jehova ha a lekoa. (Genese 3:2-5; Jobo 1:6-12) Adama ke e mong oa ba sa kang ba lula ba tšepahala. Ka lebaka la sebe sa hae, batho bohle ba futsa sebe, ’me litholoana tsa sebe seo ke lefu. (Baroma 5:12; 6:23) Leha ho le joalo, Jesu eena o tsoetsoe a se na sebe hobane o ne a sa tsoaloa ke ntate oa motho. Ka hore ka ho rata a fane ka bophelo ba hae bo phethahetseng ba botho e le sehlabelo se lekanang hantle le seo Adama a se lahlileng, Jesu o ile a tseba ho pholosa batho libeng tsa bona le ho ba fa tšepo ea bophelo bo sa feleng.—1 Timothea 2:3-6; Tite 3:6, 7; 1 Johanne 2:25.
Nakong ea tšebeletso ea hae lefatšeng, Jesu o ile a bontša batho esale pele hore na ho tla ba joang ha ho se ho tlositsoe litholoana tsa sebe. O ile a folisa batho mafu a mefuta eohle a ba a tsosa bafu. (Matheu 4:23; Johanne 11:1-44) Mehlolo eo e ne e bontša seo a tla se etsa ka moso. Jesu ka seqo o ile a re: “Hora ea tla eo ka eona bohle ba mabitleng a khopotso ba tla utloa lentsoe la [ka] ’me ba tsoe.”—Johanne 5:28, 29.
Tšepiso eo ea tsoho ea ka moso e bontša hore na ke hobane’ng ha tsoalo ea Jesu e le ea bohlokoa hakana ho rōna, ebile e bontša hore lefu la hae ke la bohlokoa le ho feta. Johanne 3:17 e re Molimo o rometse Mora oa hae lefatšeng e le “hore lefatše le pholosoe ka eena.” Litaba tsena tse monate li re hopotsa tsebiso e ileng ea fuoa balisa ba neng ba hlokometse mehlape ea bona bosiung boo Jesu a tsoetsoeng ka bona.
“Litaba Tse Molemo Tsa Thabo e Khōlō”
Ruri e ne e le “litaba tse molemo tsa thabo e khōlō” ho batho ha mangeloi a ne a ba tsebisa ka ho tsoaloa ha “Mopholosi, e leng Kreste Morena.” (Luka 2:10, 11) Ngoana enoa e ne e tla ba Mesia, e be Moprofeta e moholo ebile e ne e tla ba ’Musi eo e leng khale batho ba Molimo ba mo letetse. (Deuteronoma 18:18; Mikea 5:2) Bophelo ba hae le lefu la hae lefatšeng li ne li tla phetha karolo e khōlō tabeng ea ho tlosa qoso bobusing ba Jehova ba bokahohleng, ke ka lebaka leo mangeloi a ileng a re: “Khanya e be ho Molimo bophahamong bo holimo.”—Luka 2:14.
Jesu, eo Bibele e reng ke “Adama oa ho qetela,” o bontšitse hore ke ntho e ka etsahalang hore motho a tšepahale ho Jehova leha a le tlas’a teko e thata ka ho fetisisa. (1 Bakorinthe 15:45) Kahoo o bontšitse hore Satane ke raleshano ea khopo. Lena ke lebaka le ileng la etsa hore mangeloi a tšepahalang leholimong a thabe.
Leha ho le joalo, a re hlahlobeng hape potso e reng, “Na ho na lebaka le utloahalang la ho tšepa hore se phatlalalitsoeng ke lengeloi bosiung boo Jesu a tsoetsoeng ka bona se tla ke se phethahale?” Karabo ke e, e hlakileng! Ho hlokahala khotso e le hore morero oa Molimo ka lefatše o phethahale, ’me morero oo o akarelletsa ho khutlisa maemo a paradeise. Ha seo se fihletsoe lefatšeng lohle, batho bohle ba tla susumetsoa ke lerato le botšepehi. Ka lebaka leo, ho phethahala ha morero oa Jehova ho boetse ho bolela ho tlosa ntho e ’ngoe le e ’ngoe e khahlanong le bobusi ba hae. Tsena hase litaba tse monate ho batho bafe kapa bafe ba tšehetsang Satane ha a re melao ea Jehova ha ea loka. Batho ba joalo ba tla timetsoa.—Pesaleme ea 37:11; Liproverbia 2:21, 22.
Hlokomela hore mangeloi ha aa ka a bolella balisa hore batho bohle ba tla ba le khotso le hore Molimo o khahloa ke batho bohle. Ho e-na le hoo, a ile a phatlalatsa hore “khotso e be har’a batho bao a khahloang ke bona.” Sena se bolela hore tsena li tla etsahala ho batho ba amohetsoeng ke Molimo le bao a khahloang ke bona. Ba bontšang tumelo ea ’nete ho Jehova e ba balateli ba Jesu ba tšepahalang ebile ba etsisa mohlala oa hae. Banna bana le basali bana ba ikemiselitse hore e be ba fanang le ba bontšang kutloelo-bohloko ho ba bang, eseng ka matsatsi a se makae feela ka selemo, empa letsatsi le leng le le leng.
Na Moea oa Bokreste o Tla ke o be Teng Selemo Sohle?
Matla ao litaba tse molemo tseo Jesu a neng a li bolela li nang le ’ona a amme bophelo ba batho ba se nang palo. Ba bangata ba qalile ho sebelisa melao-motheo ea Bokreste likarolong tsohle tsa bophelo ba bona. Batho bao pele ba neng ba ichebile bobona feela ba se ba qalile ho ipotsa hore na Jesu a ka be a entse’ng haeba a ne a le boemong boo ba leng ho bona. Ba bang bao pele ba neng shebane le maruo le menate feela joale ba hlokomela bohlokoa ba matlotlo a moea le ho arolelana matlotlo ana le baahisani ba bona. Batho ba etsang sena ba ikitlaelletsa ho fana le ho ba mosa selemo sohle. Na see hase sona seo u neng u ka se lebella ho Bakreste ba ’nete?
Haeba batho bohle ba tšepahalang ba ne ba ka ema hanyenyane ’me ba nahanisisa ka hore na ha e le hantle molaetsa oa lengeloi oa khotso o bolela’ng ’me ba etsa se lumellanang le molaetsa oo, lefatše le ka be le se ka tsela eo le leng ka eona hona joale.
Boprofeta bo mabapi le tsoalo ea Jesu bo kholisa batho bao Molimo a khahloang ke bona hore ba ka thabela khotso ea sebele ka ho sa feleng. Na seo hase sona seo u se labalabelang? Re ka kholiseha hore boprofeta bo babatsehang bo buang ka khotso bo phatlalalitsoeng ke mangeloi ha Jesu a ne a tsoaloa joang kapa joang bo tla phethahala. Ho e-na le ho ba mantsoe feela a sa reng letho a buuoang nakong ea Keresemese, khotso e tla hle e be teng ka ho sa feleng.
[Ntlha e Qolotsoeng e leqepheng la 7]
Moea oa Bokreste o ka bonahatsoa ebile o lokela ho bonahatsoa selemo sohle