Ho Tsamaea le Molimo—ka Tebello ea Bosafeleng
“Re tla tsamaea ka lebitso la Jehova, Molimo oa rona, ka mehla le mehla.”—MIKEA 4:5.
1. Ke hobane’ng ha Jehova a ka bitsoa “Morena oa bosafeleng”?
JEHOVA MOLIMO ha aa ka a ba le qalo. Ka ho loketseng o bitsoa “Moholo oa Matsatsi,” kaha boteng ba hae bo atolohela nakong e se nang qalo e fetileng. (Daniele 7:9, 13) Hape Jehova o tla ba le bokamoso bo sa feleng. Ke eena feela “Morena oa bosafeleng.” (Tšenolo 10:6; 15:3) ’Me mahlong a hae, lilemo tse sekete “li joalo ka tsatsi la maobane, ha le se le fetile, le joalo ka tebelo ea bosiu.”—Pesaleme ea 90:4.
2. (a) Morero oa Molimo ke ofe ka batho ba mamelang? (b) Re lokela ho tsepamisa tšepo le merero ea rōna ho eng?
2 Kaha Mofani oa bophelo ke oa ka ho sa feleng, o ne a ka neha banyalani ba pele ba batho, Adama le Eva, tebello ea ho phela ka ho sa feleng Paradeiseng. Leha ho le joalo, ka lebaka la ho se mamele, Adama o ile a lahleheloa ke tokelo ea ho phela ka ho sa feleng, a fetisetsa sebe le lefu ho bana ba hae. (Baroma 5:12) Leha ho le joalo, borabele ba Adama ha boa ka ba nyopisa morero oa Molimo oa qalong. Ke thato ea Jehova hore batho ba mamelang ba phele ka ho sa feleng, ’me ha ho potang o tla phetha morero oa hae. (Esaia 55:11) Ka hona, ke ho loketseng hakaakang hore re tsepamise tšepo ea rōna le merero ea rōna ho sebeletseng Jehova re e-na le tebello ea bosafeleng. Le hoja re batla ho lula re ntse re hopola “letsatsi la Jehova,” ke habohlokoa ho hopola hore pakane ea rōna ke ho tsamaea le Molimo ka ho sa feleng.—2 Petrose 3:12.
Jehova o Nka Bohato ka Nako ea Hae e Behiloeng
3. Re tseba joang hore Jehova o na le “nako e behiloeng” ea ho phethahatsa merero ea hae?
3 Joaloka ba tsamaeang le Molimo, re thahasella ka matla ho phetha thato ea hae. Rea tseba hore Jehova ke ’Moloki e Moholo oa Nako, ’me re kholisehile hore ha ho mohla a tla hlōleha ho phetha merero ea hae ka nako ea hae e behiloeng. Ka mohlala, “ha tekanyo e feletseng ea nako e fihla, Molimo o ile a romela Mora oa hae.” (Bagalata 4:4) Moapostola Johanne o ile a bolelloa hore ho ne ho e-na le “nako e behiloeng” bakeng sa phethahatso ea lintho tsa boprofeta tseo a li boneng lipontšong. (Tšenolo 1:1-3) Ho na le “nako e behiloeng bakeng sa hore bafu ba ahloloe.” (Tšenolo 11:18) Lilemo tse fetang 1900 tse fetileng, moapostola Pauluse o ile a bululeloa hore a bolele hore Molimo “o behile letsatsi leo ka lona a rerang ho ahlola ka ho loka lefatše leo ho ahiloeng ho lona.”—Liketso 17:31.
4. Re tseba joang hore Jehova o lakatsa ho felisa tsamaiso ee e khopo ea lintho?
4 Jehova o tla felisa tsamaiso ena e khopo ea lintho, kaha lebitso la hae le ’nile la rohakoa lefatšeng lena la kajeno. Ba khopo ba ’nile ba atleha. (Pesaleme ea 92:7) Ka mantsoe le liketso tsa bona, ba rohaka Molimo, ’me ke ntho e mo utloisang bohloko ho bona bahlanka ba hae ba nyefoloa ba bile ba hlorisoa. (Zakaria 2:8) Hase feela Jehova a laetseng hore haufinyane mokhatlo oohle oa Satane o tla felisoa! Molimo o se a lekanyelitse hantle hore na sena se tla etsahala neng, ’me ho phethahala ha boprofeta ba Bibele ho bontša ka ho hlaka hore hona joale re phela “nakong ea bofelo.” (Daniele 12:4) Haufinyane o tla nka bohato ba ho hlohonolofatsa bohle ba mo ratang.
5. Lota le Habakuke ba ile ba talima maemo a neng a ba pota-potile joang?
5 Bahlanka ba Jehova ba nakong e fetileng ba ile ba labalabela ho bona ha ho felisoa bokhopo. Lota ea lokileng o ile a ba “mahlomoleng haholo ke ho inehella boitšoaro bo hlephileng ha batho ba nyelisang molao.” (2 Petrose 2:7) A utloisitsoe bohloko ke maemo a neng a mo pota-potile, moprofeta Habakuke o ile a etsa kōpo e tiileng: “Jehova, ke tla hooeletsa ho le hokae, u sa nkutloe? Ke tla bitsa ho uena ho le hokae ka baka la ho tsoheloa matla, u sa mpholose? U mpontšetsang bolotsana, ’me u talimela’ng hloriso? Tšenyeho le bothata li pel’a ka; hoa omanngoa, ho bo ho tsohe le liphapang.”—Habakuke 1:2, 3.
6. Jehova o ile a re’ng ha a arabela thapelo ea Habakuke, hona re ithuta eng ho see?
6 Karolo ea mantsoe ao Jehova a ileng a araba Habakuke ka ’ona ke ena: ‘Tšenolo eo e sa luletse nako ea teng, empa e tla itlhahanela qetellong, e ke ke ea thetsa. Ha e ka lieha, u e lebelle, hobane e tla etsahala ruri, e ke ke ea fela.’ (Habakuke 2:3) Kahoo, Molimo o ile a tsebahatsa hore o ne a tla nka khato ka “nako e behiloeng.” Le hoja ho ka ’na ha bonahala eka tieho e teng, Jehova o tla phetha morero oa hae—a ke ke a hlōleha!—2 Petrose 3:9.
Ho Sebetsa ka Cheseho e sa Khathaleng
7. Le hoja Jesu a ne a sa tsebe hantle-ntle hore na letsatsi la Jehova le tla tla neng, o ile a etsa mosebetsi oa hae joang?
7 Na ho tseba ha rōna nako ea Jehova e tobileng bakeng sa liketsahalo tse itseng ke habohlokoa bakeng sa rōna hore re tsamaee le Molimo ka cheseho? Che, ha ho joalo. Nahana ka mehlala e seng mekae. Jesu o ne a thahasella haholo nako eo ka eona thato ea Molimo e neng e tla etsoa lefatšeng joalokaha e etsoa leholimong. Ka sebele, Kreste o ile a ruta balateli ba hae ho rapela: “Ntate oa rōna ea maholimong, lebitso la hao a le halaletsoe. ’Muso oa hao a o tle. Thato ea hao a e etsahale, joaloka leholimong, hape le lefatšeng.” (Matheu 6:9, 10) Le hoja Jesu a ne a tseba hore kōpo ena e ne e tla arabeloa, o ne a sa tsebe nako e tobileng ea seo. Boprofeteng ba hae bo boholo mabapi le bofelo ba tsamaiso ena ea lintho, o ile a re: “Malebana le letsatsi leo le hora eo ha ho ea tsebang, leha e le mangeloi a maholimo kapa Mora, haese Ntate feela.” (Matheu 24:36) Kaha Jesu Kreste ke eena ea ka sehloohong ho phethahatseng merero ea Molimo, o tla ameha ka ho toba ho timetseng lira tsa Ntate oa hae oa leholimo. Leha ho le joalo, ha Jesu a sa le lefatšeng, le eena o ne a sa tsebe nako eo Molimo a neng a tla nka khato ka eona. Na seo se ile sa fokolisa cheseho ea hae tšebeletsong ea Jehova? Le hanyenyane! Ha ba bona Jesu a hloekisa tempele ka cheseho, “barutuoa ba hae ba hopola hore ho ngoliloe: ‘Cheseho ea ntlo ea hao e tla ntja kaofela.’” (Johanne 2:17; Pesaleme ea 69:9) Jesu o ile a ipoloka a tšoarehile mosebetsing oo a neng a rometsoe ho tla o etsa, ’me o ile a o etsa ka cheseho e sa tapeng. Hape o ile a sebeletsa Molimo a e-na le tebello ea bosafeleng.
8, 9. Ha barutuoa ba ne ba botsa ka ho tsosolosoa ha ’Muso, ba ile ba bolelloa eng, hona ba ile ba itšoara joang?
8 E ne e boetse e le ’nete le ka barutuoa ba Kreste. Jesu o ile a kopana le bona nakoana pele a nyolohela leholimong. Tlaleho e re: “Joale, ha ba bokane, ba qala ho mo botsa: ‘Morena, na u khutlisetsa ’muso ho Iseraele nakong ee?’” Joaloka Mong’a bona, ba ne ba labalabela hore ’Muso o tle. Leha ho le joalo, Jesu o ile a araba: “Hase ha lōna hore le fumane tsebo ea linako kapa mehla tseo Ntate a li behileng ka taolo ea hae; empa le tla amohela matla ha moea o halalelang o fihla holim’a lōna, ’me le tla ba lipaki tsa ka Jerusalema hammoho le Judea le Samaria kaofela le ho isa karolong e hōle-hōle ea lefatše.”—Liketso 1:6-8.
9 Ha ho letho le bontšang hore barutuoa ba ile ba nyahamisoa ke karabo ena. Ho e-na le hoo, ba ile ba tšoareha mosebetsing oa boboleli. Ka mor’a libeke li se kae, ba ne ba tlatsitse Jerusalema ka thuto ea bona. (Liketso 5:28) ’Me ka mor’a lilemo tse 30, ba ne ba atolositse mosebetsi oa bona oa boboleli ho isa bohōleng boo Pauluse a neng a ka re litaba tse molemo ‘li ile tsa boleloa pōpong eohle e tlas’a leholimo.’ (Bakolose 1:23) Le hoja ’Muso o sa ka oa ‘khutlisetsoa ho Iseraele’ joalokaha barutuoa ba ne ba lebeletse ka phoso hape o sa ka oa hlongoa leholimong nakong ea bophelo ba bona, ba ile ba tsoela pele ho sebeletsa Jehova ka cheseho ba e-na le tebello ea bosafeleng.
Ho Hlahloba Sepheo sa Rōna
10. Ho se tsebe ha rōna nako eo Molimo a tlang ho timetsa tsamaiso ea Satane ho re fa monyetla oa ho paka eng?
10 Bahlanka ba Jehova ba kajeno le bona ba labalabela ho bona bofelo ba tsamaiso ena e khopo ea lintho. Leha ho le joalo, kameho ea rōna e ka sehloohong hase ho pholohela ha rōna lefatšeng le lecha le tšepisitsoeng la Molimo. Re batla ho bona lebitso la Jehova le halaletsoa ’me ho tlosoa qoso bobusing ba hae. Ka lebaka la sena, re ka thaba hore ebe Molimo ha aa re bolella ‘letsatsi kapa hora’ e behiloeng bakeng sa timetso ea tsamaiso ena ea Satane. Sena se re lumella ho fana ka bopaki ba hore re ikemiselitse ho tsamaea le Molimo ka ho sa feleng hobane re mo rata eseng hobane re e-na le lipakane tsa nakoana, tsa boithati.
11, 12. Botšepehi ba Jobo bo ile ba lekoa joang, hona teko eo e re ama joang?
11 Ho boloka ha rōna botšepehi ho Molimo ho boetse ho re thusa ho paka hore Diabolose o ne a fositse ha a ne a qosa monna ea lokileng Jobo—hammoho le batho ba tšoanang le eena—hore ba sebeletsa Molimo ka lebaka la boithati. Ka mor’a hore Jehova a hlalose mohlanka oa hae Jobo e le motho ea sa tšoauoeng phoso, ea lokileng, ea tšabang Molimo, ka bokhopo Satane o ile a hlahisa qoso: “Na ke feela ha Jobo a tšaba Molimo na? Na ha ua ka ua mo sireletsa, eena le ntlo ea hae, le tsohle tsa hae, ka ’nga tsohle na? Na ha ua ka ua atisa mosebetsi oa matsoho a hae, le ho atisa mehlape ea hae lefatšeng na? U mpe u otlolle letsoho la hao joale, u ame tseo a nang le tsona kaofela, ’me u tla bona hore na a ke ke a u rohaka pontšeng.” (Jobo 1:8-11) Ka ho boloka botšepehi ba hae tlas’a teko, Jobo o ile a paka hore qoso ena e lonya ke ea bohata.
12 Ka ho tšoanang ka ho tšoarella tseleng ea botšepehi, re ka hanyetsa qoso leha e le efe ea bosatane ea hore re sebeletsa Molimo feela hobane re tseba hore moputso o atametse. Ho se tsebe ha rōna nako e tobileng eo ka eona phetetso ea Molimo e tlang ho liheloa holim’a ba khopo ho re fa monyetla oa ho paka hore re fela re rata Jehova le hore re batla ho tsamaea litseleng tsa hae ka ho sa feleng. Ho bontša hore re tšepahala ka ho sa sekisetseng ho Molimo ’me re tšepa tsela eo a sebetsang lintho ka eona. Ho feta moo, ho se tsebe ha rōna letsatsi le hora ho re thusa hore re lule re lebetse ’me re falimehile moeeng hobane re hlokomela hore bofelo bo ka ’na ba fihla ka nako leha e le efe, joaloka lesholu la bosiu. (Matheu 24:42-44) Ka ho tsamaea le Jehova kamehla, re thabisa pelo ea hae ’me re mo fa karabo ea ho araba Diabolose, ea mo somang.—Liproverbia 27:11.
Morero oa ka ho sa Feleng!
13. Bibele e re’ng ka ho rera bokamoso?
13 Ba tsamaeang le Molimo baa tseba hore ke bohlale ho rera bokamoso ka tsela e molemo. Ka ho hlokomela mathata le litšitiso tse hlahang botsofaling, batho ba bangata ba leka ho sebelisa bocha ba bona le matla a bona hamolemo e le hore bophelo ba bona ba boqhekung e-be bo sireletsehileng licheleteng. Joale, ho thoe’ng ka bokamoso ba moea boo e leng ba bohlokoa haholo ho rōna? Liproverbia 21:5 e re: “Merero ea motho ea mahlaha-hlaha e isa khoreng; empa ea potlakang o tla oela bofumeng.” Ka sebele ho rerela lintho pele ka tebello ea bosafeleng ho molemo. Kaha ha re tsebe ka ho toba nako eo bofelo ba tsamaiso ena bo tlang ho fihla ka eona, re lokela ho nahanela litlhoko tsa rōna tsa kamoso. Empa a re bolokeng ho leka-lekana ’me re behe lithahasello tsa bomolimo pele bophelong ba rōna. Batho ba se nang tumelo ba ka ’na ba etsa qeto ea hore motho ea behang lithahasello tsa hae ho etseng thato ea Molimo o bonela lintho haufinyane. Empa na ho joalo?
14, 15. (a) Jesu o ile a bolela papiso efe mabapi le ho rera bokamoso? (b) Ke hobane’ng ha monna ea ruileng oa papisong ea Jesu a ile a bonela lintho haufinyane?
14 Jesu o ile a bolela papiso e rutang tabeng ena. O ile a re: “Tšimo ea motho ea itseng ea ruileng e ile ea beha hantle. Ka lebaka leo a qala ho nahana ka ho eena, a re, ‘Ke tla etsa joang, kaha joale ha ke na moo ke bokellelang lijalo tsa ka teng?’ Kahoo a re, ‘Ka sebele ke tla etsa sena: Ka sebele ke tla qhaqha matlo a ka a polokelo ’me ke hahe a maholoanyane, ’me moo ka sebele ke tla bokellela lijo-thollo tsohle tsa ka le lintho tsohle tsa ka tse molemo; ’me ka sebele ke tla re ho soule ea ka: “Soule, u na le lintho tse ngata tse molemo tse bolokiloeng ka lilemo tse ngata; khatholoha, u je, u noe, u ithabise.”’ Empa Molimo a re ho eena, ‘Uena ea se nang kahlolo e molemo, bosiung bona ba batla soule ea hao ho uena. Joale, ke mang ea tla ba le lintho tseo u li bokeletseng?’ Kahoo ho ba joalo ka motho ea ipolokelang letlotlo empa a sa ruela ho Molimo.”—Luka 12:16-21.
15 Na Jesu o ne a buella hore monna eo ea ruileng o ne a sa lokela ho etsa boiteko ba ho ba le bokamoso bo sireletsehileng ba lintho tse bonahalang? Che, hobane Mangolo a khothalletsa ho sebetsa ka thata. (2 Bathesalonika 3:10) Phoso ea monna ea ruileng e bile hore ha aa ka a etsa se neng se hlokahala hore a ‘ruele ho Molimo.’ Esita le haeba a ne a ile a thabela leruo la hae la lintho tse bonahalang ka lilemo tse ngata, o ne a tla ’ne a shoe qetellong. O ile a bonela lintho haufinyane, a se ke a nahana ka bosafeleng.
16. Ke hobane’ng ha re ka itšetleha ka Jehova ka kholiseho bakeng sa bokamoso?
16 Ho tsamaea le Jehova ka tebello ea bosafeleng ke ho utloahalang ebile ke ho bonela lintho hōle. Ke tsela e molemo ka ho fetisisa ea ho lokisetsa bokamoso. Le hoja e le bohlale ho rala metheo e sebetsang litabeng tsa sekolo, mosebetsi le boikarabelo ba lelapa, kamehla re lokela ho hopola hore ha ho mohla Jehova a lahlang bahlanka ba hae ba tšepahalang. Morena Davida o ile a bina: “Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.” (Pesaleme ea 37:25) Jesu le eena o ile a tšepisa hore Molimo o tla hlokomela bohle ba batlang ’Muso pele le ba tsamaeang litseleng tsa Jehova tsa ho loka.—Matheu 6:33.
17. Re tseba joang hore bofelo bo atametse?
17 Le hoja re sebeletsa Molimo re e-na le tebello ea bosafeleng, re ntse re hopola letsatsi la Jehova. Ho phethahala ha boprofeta ba Bibele ho paka ka ho hlakileng hore letsatsi leo le atametse. Lekholo lena la lilemo le ’nile la tšoauoa ka lintoa, mafu a seoa, litšisinyeho tsa lefatše le khaello ea lijo, hammoho le ho hlorisoa ha Bakreste ba ’nete le boboleli ba litaba tse molemo tsa ’Muso oa Molimo lefatšeng lohle. Ana kaofela ke matšoao a nako ea bofelo ba tsamaiso ena e khopo ea lintho. (Matheu 24:7-14; Luka 21:11) Lefatše le tletse ka batho “ba baithati, ba ratang chelete, ba ikhopolang ho tlōla, ba ikhohomosang, banyefoli, ba sa mameleng batsoali, ba se nang teboho, ba sa tšepahaleng ka ho sa sekisetseng, ba se nang boikutlo bo mofuthu ba tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba hohomohileng ke boikakaso, ba ratang menyaka ho e-na le ba ratang Molimo.” (2 Timothea 3:1-5) Matsatsing ana a ho qetela a mahlonoko, bophelo boa re thatafalla re le bahlanka ba Jehova. Re labalabela hakaakang letsatsi leo ka lona ’Muso oa Jehova o tlang ho tlosa bobe bohle! Khabareng, a re ikemisetseng ho tsamaea le Molimo re e-na le tebello ea bosafeleng.
Ho Sebeletsa re E-na le Tebello ea Bophelo bo sa Feleng
18, 19. Ke’ng se bontšang hore batho ba tšepahalang ba boholo-holo ba ile ba sebeletsa Molimo ba e-na le tebello ea bosafeleng?
18 Ha re ntse re tsamaea le Jehova, a re hopoleng tumelo ea Abele, Enoke, Noe, Abrahama le Sara. Ka mor’a ho bua ka bona, Pauluse o ile a ngola: “Ka tumelo bana kaofela ba ile ba shoa, le hoja ba sa ka ba fumana phethahatso ea litšepiso, empa ba ile ba li bonela hōle ’me ba li amohela ka mofuthu ’me ba bolela phatlalatsa hore e ne e le basele le baahi ba nakoana naheng eo.” (Baheberu 11:13) Bana ba tšepahalang ba ile ba “hahamalla sebaka se molemonyana, ke hore, sa leholimo.” (Baheberu 11:16) Ka tumelo, ba ile ba lebella sebaka se molemonyana tlas’a bobusi ba ’Muso oa Molimo oa Bomesia. Re ka kholiseha hore Molimo o tla ba putsa ka bophelo bo sa feleng sebakeng seo se molemonyana—Paradeise ea lefatšeng tlas’a puso ea ’Muso.—Baheberu 11:39, 40.
19 Moprofeta Mikea o ile a hlalosa boikemisetso ba batho ba Jehova ba ho rapela Molimo ka ho sa feleng. O ile a ngola: “Lichaba kaofela li tsamaea se seng le se seng ka lebitso la molimo oa sona, empa rōna, re tla tsamaea ka lebitso la Jehova, Molimo oa rona, ka mehla le mehla.” (Mikea 4:5) Mikea o ile a sebeletsa Jehova ka botšepehi ho fihlela lefung la hae. Ka mor’a hore a tsosoe bafung lefatšeng le lecha, ha ho pelaelo hore moprofeta enoa o tla tsoela pele ho tsamaea le Molimo ka ho sa feleng. Ke mohlala o motle hakaakang ho rōna ba phelang hare-hare nakong ee ea bofelo!
20. Boikemisetso ba rōna e lokela ho ba bofe?
20 Jehova o ananela lerato leo re le bontšang bakeng sa lebitso la hae. (Baheberu 6:10) Oa tseba hore ho thata hore re lule re tšepahala ho eena lefatšeng lena le busoang ke Diabolose. Leha ho le joalo ‘lefatše lea feta, empa ea etsang thato ea Molimo o hlola ka ho sa feleng.’ (1 Johanne 2:17; 5:19) Joale, ka thuso ea Jehova, a re ikemisetseng ho mamella liteko tseo re tobanang le tsona letsatsi le letsatsi. E se eka menahano ea rōna le tsela ea rōna ea bophelo li ka tsepama litlhohonolofatsong tse babatsehang tse tšepisitsoeng ke Ntate oa rōna ea lerato oa leholimo. Litlhohonolofatso tsena re ka li fumana feela haeba re tsoela pele ho tsamaea le Molimo re e-na le tebello ea bosafeleng.—Jude 20, 21.
U ne U Tla Arabela Joang?
◻ Morero oa Molimo ke ofe ka batho ba mamelang?
◻ Ke hobane’ng ha Jehova a e-s’o nke bohato ho felisa lefatše lee le se nang bomolimo?
◻ Ke hobane’ng ha ho se tsebe ha rōna nako e tobileng eo Molimo a tlang ho nka bohato ka eona ho sa fokotse cheseho ea rōna?
◻ Melemo e meng ea ho tsamaea le Molimo ka tebello ea bosafeleng ke efe?
[Setšoantšo se leqepheng la 17]
Ho tsamaea le Molimo ho re hloka hore re mo sebeletse ka cheseho joalokaha barutuoa ba Kreste ba pele ba entse