7. Monna oa papisong ea Jesu o ile a sebetsa bothata ba hae joang?

⁷ Ha re khutlela papisong ea Jesu, monna oa morui o ile a etsa’ng ha a ne a chaile hoo a neng a se na moo a ka bolokang lijo teng? O ile a etsa qeto ea hore a qhaqhe matlo a polokelo ao a neng a se a ntse a e-na le ’ona ’me a hahe a maholoanyane e le hore a tsebe ho boloka lijo-thollo tsohle le lintho tsohle tse molemo tseo a neng a e-na le tsona. Mohlomong morero oo oa hae o ne o ile oa etsa hore a ikutloe a sireletsehile a bile a khotsofetse hoo a bileng a ipolella a re: “Ke tla re ho moea oa ka: ‘Moea, u na le lintho tse ngata tse molemo tse bolokiloeng ka lilemo tse ngata; khatholoha, u je, u noe, u ithabise.’”—Luka 12:19.

Ke Hobane’ng ha ho Thoe ke “ea se Nang Kahlolo e Molemo”?

8. Ke ntho efe ea bohlokoa eo monna oa papisong ea Jesu a ileng a e tlōlisa mahlo?

⁸ Leha ho le joalo, ho ea ka moo Jesu a behileng litaba kateng, morero oa monna enoa oa morui o ne o mo entse hore a ikutloe eka o sireletsehile. Le hoja ho bonahala eka morero oo o ne o ka sebetsa, ho na le ntho ea bohlokoa eo a neng a e tlōlisitse mahlo—thato ea Molimo. Monna enoa o ne a inahana boeena feela, a inahanela feela ka hore na o tla khatholoha, a je, a noe a be a ithabise joang. O ne a nahana hore ka ho ba le “lintho tse ngata tse molemo” o ne a tla boela a phele ka “lilemo tse ngata.” Empa ka bomalimabe lintho ha lia ka tsa e-ba joalo. Joalokaha Jesu a boletse pejana, “esita le ha motho a e-na le ho hongata haholo bophelo ba hae ha bo hlahe linthong tseo a nang le tsona.” (Luka 12:15) Bosiung bona boo lintho tsohle tseo monna eo a neng a li sebelelitse li ile tsa fela ka tšohanyetso, hobane Molimo o ile a re ho eena: “Uena ea se nang kahlolo e molemo, bosiung bona ba batla moea oa hao ho uena. Joale, ke mang ea tla ba le lintho tseo u li bokeletseng?”—Luka 12:20.

10. Ke hobane’ng ha ho ba le “lintho tse ngata tse molemo” ho sa bolele hore joang kapa joang motho o tla phela “lilemo tse ngata”?

¹⁰ Ke hantle ha re tebisa maikutlo ka papiso ena. Na re ka tšoana le monna eo oa papisong—ra sebetsa ka thata ho etsa bonnete ba hore re tla ba le “lintho tse ngata tse molemo” empa ra sitoa ho etsa lintho tse hlokahalang hore re be le tšepo ea hore re phele “lilemo tse ngata”? (Johanne 3:16; 17:3) Bibele e re: “Lintho tsa bohlokoa e tla ba tse se nang molemo letsatsing la khalefo” ’me “ea tšepang maruo a hae—o tla oa.” (Liproverbia 11:4, 28) Ka lebaka leo, Jesu o ile a phaella temoso ena ea ho qetela papisong eo: “Ho joalo le ka motho ea ipolokelang letlotlo empa a sa ruela ho Molimo.”—Luka 12:21.