Pono ea Bibele
Ke Bo-mang ba ‘Tsoetsoeng Hape’?
NIKODEMA e ne e le setho sa lekhotla le leholo la linyeoe la Bajode, seithuti molaong oa bolumeli, ’me o ne a bone bopaki bo lekaneng ba mehlolo ea Jesu ho mo kholisa hore Jesu e ne e le Messia. Leha ho le joalo, o ne a sa utloisise seo Jesu a neng a se bolela: “Ha e mong a sa tsoaloe hape, a ke ke a bona ’muso oa Molimo.”—Johanne 3:1-3, 10, NW.
“Ke joang motho a ka tsoaloang ha a se a hōlile?” Nikodema a botsa. “A ke ke a kena ka popelong ea ’m’ae ka lekhetlo la bobeli ’me a tsoaloa, na a ka etsa joalo?”—Johanne 3:4, NW.
Batho ba limillione kajeno ba lumela hore ba “tsoetsoe hape” ’me ba bolela hore ba utloisisa hantle se boleloang ke hoo. Ba bang, joaloka Nikodema, ba makatsoa ke khopolo eohle ea ho tsoaloa hape. Kaha Jesu Kreste a hlahisitse ntlha ea hore hona ho ne ho hlokeha ho kena ’Musong oa Molimo, ke ha bohlokoa hore re utloisise seo a neng a se bolela ka ho “tsoaloa hape.”
Jesu ha a arabela potso ea Nikodema, o tsoetse pele ho re: “Ka ’nete ke re ho uena, ha e mong a sa tsoaloe hape ka metsi le ka moea, a ke ke a kena ’Musong oa Molimo. Se tsoetsoeng ke nama, ke nama, ’me se tsoetsoeng ke moea ke moea. U se ke ua makala hobane ke u bolelletse, le lokela ho tsoaloa hape.”—Johanne 3:5-7, NW.
Na ho thata ho utloisisa? Jesu o ne a tseba hore ho utloisisa linnete tsa moea ha ho bonolo. Kahoo, ho hlakisa lintho haholoanyane, o ile a sebelisa setšoantšo sa moea. “Moea o fokela moo o ratang teng, ’me u utloa molumo oa oona feela; empa ha u tsebe moo u tsoang teng, le moo u eang teng. Ho joalo le ka bohle ba tsoetsoeng ka moea.” (Johanne 3:8) Nikodema o ne a tseba ho utloa, le ho bona liphello tsa moea, empa u ne a ke ke a tseba ho utloisisa mohloli oa ona kapa pheletso ea ona. Leha ho le joalo, ’nete ea sebele ea moea e ne e utloahala. Ka ho tšoanang, ba hlokang tsebo ea lintho tsa moea ba ka fumana ho le thata ho utloisisa hore na ke joang Jehova, ka moea oa hae, a ka etsang hore motho a tsoaloe hape le hore na pheletso ea ea joalo e tla ba efe. Leha ho le joalo, ka thuso ea bangoli ba bululetsoeng ba Bibele, re ka utloisisa litaba tse joalo.—Johanne 16:13.
Ho Hlakisa Bothata
Ke eng seo Jesu a neng a se hopotse ha a ne a bua ka ho “tsoaloa ka metsi le ka moea”? Tsoalo e bolela qalo. Tsoalo e ncha e bolela qalo e ncha. Tabeng ea barutuoa ba Jesu, bohato ba bona ba pele ho tsoaloeng hape bo qalile hang feela ha ba baketse libe tsa bona, ba furalletse tsela e fosahetseng, ’me ba kolobelitsoe metsing. Ho qala ka Pentakonta ea 33 C.E., karabelong ea ketso e joalo, Jehova o ba file seo Petrose a se boletseng e le “tsoalo e ncha tšepong e phelang . . . e bolokiloeng leholimong.” (1 Petrose 1:3, 4, NW; 3:21) Moea o halalelang oa Jehova o kentse ka ho bona tšepo ea hore qetellong ba tla phela le Jesu Kreste leholimong. Sena se ba file pono e ncha ka ho feletseng bophelong—qalo e ncha.
Na sena e ne e mpa e le phihlelo ea maikutlo ea bolumeli? Che. Moea o halalelang oa Molimo o ba fetotse ho hong ho hocha ka ho feletseng, “pōpo e ncha.” (2 Ba-Korinthe 5:17, NW) Ho tsoaloeng ha bona pele e le batho, e ne e le bana ba baetsalibe ba Adama, ba futsa ho se phethahale hohle hoo a ho fetiselitseng baneng ba hae. Ha joale, ka ho “tsoaloa hape,” barutuoa bana ba fumane boemo bo hloekileng pel’a Molimo. Joang? Melemo ea sehlabelo sa Jesu e ile ea sebetsa bakeng sa bona. Ka lebaka leo, Molimo o ba bone ba lokile leha e ne e ntse e le batho ba sa phethahalang. (Ba-Roma 3:25, 26; 5:12-21; 1 Ba-Korinthe 6:11) Ho feta moo, Jehova joale a ba hlokomela e le bara ba hae. Moapostola Pauluse o bontša seo ka tsela ena: “Hobane bohle ba tsamaisoang ke moea oa Molimo, bona ke bara ba Molimo . . . bana ba Molimo.” (Ba-Roma 8:14, 16, NW) Joale ba ne ba amoheloa e le karolo ea lelapa la Molimo la leholimong.
’Me ho ne ho e-na le ho eketsehileng. Pauluse o boela a hlalosa: “’Me ha re le bana, re majalefa: Majalefa a Molimo, le majalefa hammoho le Kreste.” (Ba-Roma 8:17) Bara bana ba moea ba Molimo joale ba ne ba e-na le tebello ea ho ja lefa leo Kreste Jesu a neng a tl’o le ja—matla a borena leholimong. Jesu o senoletse moapostola Johanne palo ea batho bao a tlang ho busa hammoho le bona lefatše—144 000. (Tšenolo 7:4; 14:1-3) Joale a tsoela pele ho bontša Johanne hore barutuoa bana ba bontšitsoeng mohau “e tla ba baprista ba Molimo le Kreste, ’me ba tla busa le eena lilemo tse sekete.”—Tšenolo 20:6.
Melemo ho ba Bang
Na joale sena se bolela hore ho fumana mohau oa Molimo, e mong le e mong o tlameha ho “tsoaloa hape”? Che. Sehlabelo sa Jesu se kopanyelletsa batho ba fetang 144 000 ba khethiloeng, ho ba le eena maholimong. Ha moapostola Johanne a ngolla Bakreste ba ‘tsoetsoeng hape’ qetellong ea lekholo la pele la lilemo, o itse mabapi le sehlabelo sa Jesu: “Ke eena e leng pheko ea libe tsa rōna; e seng ea tsa rōna feela, empa e le le ea tsa lefatše lohle.” (1 Johanne 2:2) Sena se joalo joang?
Ka tsela ena. Ba ‘tsoetsoeng hape’ ba tla busa le Jesu Kreste ’Musong oa Jehova oa leholimong ho tlisetsa batho ba bang ba tla phela lefatšeng melemo. Sena se profetiloe tšepisong e hlokomelehang e entsoeng ho ntate-moholo oa Jesu Abrahama lilemong tse batlang ho ba 4 000 tse fetileng. “Lichaba tsohle tsa lefatše li tla itlhohonolofatsa lelokong la hao,” Jehova o boleletse Abrahama. (Genese 22:18) E, mahlohonolo a maholo a ne a tla neoa lichaba tsohle ka “peō” ea Abrahama!
“Peō” eo e ne e le mang? Ke Jesu Kreste, hammoho le balateli ba hae ba tšepahalang ba ‘tsoetsoeng hape.’ Moapostola Pauluse oa hlalosa: “Ho feta moo, ha le le Bakreste, le hlile le peō ea Abrahama.” (Ba-Galata 3:16, 29, NW) ’Me ke mahlohonolo afe a tlelang batho ba lichaba tsohle ka Jesu Kreste le barutuoa bana ba ‘tsoetsoeng hape’? Tokelo ea ho khutlisetsoa mohaung oa Molimo le ho thabela litokisetso tsohle tsa hae bakeng sa lefatše la paradeise.—Genese 1:27, 28; Pesaleme ea 37:29; Liproverbia 2:21, 22; Esaia 45:18.
Kahoo barutuoa ba 144 000 ba ‘tsoetsoeng hape’ ba tla “kena ’musong oa [leholimo] oa Molimo” ho fana ka mahlohonolo a hlollang ao ’Muso oa Molimo o tlang ho a tlisetsa batho ba limillione tse sa boleloeng hona mona lefatšeng. (Mattheu 6:10; Ba-Roma 8:19-21; Tšenolo 21:1-5) Ebang Nikodema o ile a utloisisa mantsoe a Jesu ’me a ‘tsoaloa’ hape ho ba karolo ea sehlopha sena se busang, ha re tsebe. Seo re se tsebang ke hore monyetla oa ho amohela melemo ea bobusi ba bona ba leholimo e teng bakeng sa e mong le e mong ea batlang ho iphumanela eona. Na u tla etsa joalo?
[Ntlha e qolotsoeng leqepheng la 17]
Na e mong le e mong o tlameha ho ‘tsoaloa hape’ ho fumana mohau oa Molimo?