Lipotso tse Tsoang ho Babali

◼ Na ho loketse ho bua ka “lefatše le lecha” le tlang?

Ha ho phoso ho botsa potso ena, kaha lentsoe la Segerike le atisang ho fetoleloa e le “lefatše,” koʹsmos, ha e le hantle le bolela batho, ’me Molimo o ke ke oa bōpa moloko o mocha oa batho. Ho feta moo, ka Bibeleng ha re fumane poleloana kai·nosʹ koʹsmos (hantle-ntle, “lefatše le lecha”).

Empa tšebeliso ea Bibele ea koʹsmos e lumella Mokreste hore a bue ka “lefatše le lecha” ha a bua ka Paradeise e tlang e tsosolositsoeng lefatšeng. The New International Dictionary of New Testament Theology ea hlalosa: ‘Lereho kosmos qalehong le ne le supa ho haha, empa ka ho khethehileng haholoanyane le bolela taolo.’ Buka ena e hlalosang mantsoe e phaella ka hore lentsoe le boetse le na le kutloisiso e khethehileng, e kang “mokhabo le boitlhopho,” “mokhoa oo bophelo bo tsamaisoang ka oona har’a batho,” le “baahi ba lefatše, sethō.”

Ka Mangolong a Bokreste a Segerike, koʹsmos hangata e sebelisoa ka kutloisiso ea lelapa lohle la motho. Kahoo, re bala hore “bohle ba sitiloe [ke hore, bana bohle ba sa phethahalang ba Adama], ’me ha ba tšoaneloe ke khanya ea Molimo.” (Ba-Roma 3:19, 23) Ka lehlakoreng le leng, “Molimo o ratile lefatše [koʹsmos] hakalo, o bile oa le nea mora oa oona ea tsoetsoeng a ’notši; hore e mong le e mong ea lumelang ho eena, . . . a mpe a be le bophelo bo sa feleng.” (Johanne 3:16) E, sehlabelo sa Kreste se fumanoa ke e mong le e mong ea lumelang ea ka lapeng la motho.

Haeba eo e ne e le eona tšebeliso feela ea Bibele ea koʹsmos, e ne e tla ba ho sa nepahalang ho bua ka “lefatše le lecha” le tlang. Hobane’ng? Hobane batho ba bang ba tla pholoha mahlomola a maholo a tlang. Bana joale ba tla ba le monyetla oa ho phela Paradeiseng e tsosolositsoeng. Ka hona Molimo o ke ke oa bōpa moloko o mocha oa motho, batho ba bacha, lefatše le lecha la batho. Leha ho le joalo, Bibele ha e sebelise koʹsmos feela ho bolela batho bohle.

Ka mohlala, ka linako tse ling lentsoe leo la Segerike le bolela batho bohle ba ikarotseng ho Molimo. Ba-Heberu 11:7 e bolela hore “ka tumelo Noe . . . o tsoile lefatše [koʹsmos].” Ho totobetse hore ha a ka a tsoa motho e mong le e mong, batho bohle; Noe le ba bang ba supileng ba lelapa la hae ba ile ba pholoha Moroallo oo. Ka ho tšoanang, Jesu o ile a rapela: “Ha ke rapelle lefatše [koʹsmos], ke rapella bao u ’neileng bona, . . . lefatše le ba hloile, kahobane e se ba lefatše, joale ka ha le ’na ke se oa lefatše.”—Johanne 17:9, 14; bapisa 2 Petrose 2:5; 3:6.

Leha ho le joalo, a re lebiseng tlhokomelo ea rōna kutloisisong e ’ngoe eo Bibele e sebelisang koʹsmos ho eona. Hona ho bolela sebopeho, taolo, kapa tikoloho ea bophelo ba motho.a Re teana le tšebeliso e joalo tlhalosong ea Jesu: “Leha motho a ka rua lefatše [koʹsmos] lohle, ha a timeletsoe ke moea oa hae, ekaba o ruile’ng ka lona?” (Mattheu 16:26) Ka ho hlakileng, Kreste o ne a sa bue ka hore motho ‘a rue lefatše la batho kaofela ha lona,’ leha e le ‘lefatše lohle la batho ba ikarotseng ho Molimo.’ Motho ea nang le pono ea lintho tse bonahalang o ne a ke ke a rua batho, empa seo batho ba nang le sona, ba se etsang kapa ba se lokisetsang. Hona e ne e boetse e le ’nete ka se hlokometsoeng ke moapostola Pauluse ka motho ea nyetseng ea ‘belaellang lintho tsa lefatše lena.’ Ka ho tšoanang, Mokreste ha a lokela ho ‘sebelisa lefatše lena ka botlalo.’—1 Ba-Korinthe 7:31-33.

Ka kutloisiso ena, koʹsmos e na le tlhaloso e tšoanang le ea lentsoe la Segerike ai·onʹ, e ka ngoloang e le “tsamaiso ea lintho,” kapa “mehla.” (Bona Aid to Bible Understanding, maqephe 1671-74.) Mabakeng a mang re fumana hore mantsoe ana a mabeli a ka ba a sebelisoa ka ho fapanyetsana. Nahana ka mehlala e ’meli ea ho tšoana pakeng tsa koʹsmos le ai·onʹ: (1) Pauluse o ile a ngola hore o ile a furalloa ke Demase, ea neng a “rata lefatše la joale [ai·onʹ, (“Tsamaiso ea joale ea lintho,” NW)].” Empa moapostola Johanne o elelitse khahlanong le ‘ho rata lefatše [koʹsmos],’ leo ho lona ho simolohang “takatso ea nama, le takatso ea mahlo, le boikhantšo joa bophelo.” (2 Timothea 4:10; 1 Johanne 2:15-17) (2) Johanne 12:31 e bua ka “morena oa lefatše lena [koʹsmos, ea tsebahatsoang ho 2 Ba-Korinthe 4:4, NW, e mo tsebahatsang e le “molimo oa tsamaiso ena ea lintho, [ai·onʹ].”

Ka baka leo, koʹsmos kapa “lefatše,” e ka sebelisoa mabapi le batho bohle, ka sebopeho sa tikoloho ea batho. Ka lebaka lena, ka ho loketseng e bile e le ka nepo e tšoanang, re ka bua ka ho tla ha “tsamaiso e ncha” kapa “lefatše le lecha.” Hona e tla ba sebopeho se secha, taolo ea lefatše, kapa tikoloho ea bophelo ba batho. Boholo ba ba tla beng ba ahile Paradeiseng e tsosolositsoeng ea lefatše ba tla be ba ile ba phela tsamaisong ea khale ea lintho. Leha ho le joalo ba tla be ba e pholohile kapa ba tsositsoe. Kahoo e tla be e ntse e le batho bona bane. Leha ho le joalo, ho se ho le sieo lefatše la batho ba ikarotseng ho Molimo, ’me tokisetso e ncha, kapa taolo e ncha, e theiloeng thatong e hlakileng ea Molimo e le eona e busang, Paradeise eo e tsosolositsoeng e tla ba lefatše le lecha.

[Mongolo o botlaaseng ba leqephe]

[Setšoantšo se leqepheng la 31]

Batho ba lokileng ba tla tsosolosa Paradeise lefatšeng le lecha