Tsebo e Nepahetseng ea Molimo le Mora oa Oona e Lebisa Bophelong
“’Me bophelo bo sa feleng ke hore ba u tsebe, uena Molimo o ’notši oa ’nete, le Jesu Kreste eo u mo romileng.”—JOHANNE 17:3.
1. Ke hobane’ng ha tsebo e nepahetseng ea Molimo le Jesu Kreste e le ea bohlokoa hakaale?
TSEBO e nepahetseng ea Molimo le Mora oa oona, Jesu Kreste, ea hlokahala bakeng sa ba batlang bophelo bo sa feleng. “Thato [ea Molimo] ke hore batho ba mefuta eohle ba pholohe ’me ba tle tsebong e nepahetseng ea ’nete.” (2 Timothea 2:4, NW) Tsebo e joalo e tsoang Lentsoeng le bululetsoeng la Molimo, Bibele, e tla re hlomella hore re tsebe hore na Molimo ke mang le hore na re na le litlamo life malebana le eena. (2 Timothea 3:16, 17; 1 Johanne 2:17) Hape e tla etsa hore re khone ho khetholla Jesu Kreste ka nepo le ho khetholla kamano ea rōna le eena.—Pesaleme ea 2:12; Ba-Filippi 2:5-11.
2. Phello ea ho hloka tsebo e nepahetseng e ka ba efe?
2 Ntle le tsebo e nepahetseng, re ka tšoasoa ke lithuto tsa bohata tse phahamisoang ke mohanyetsi oa Molimo, Satane Diabolose, eo e leng “raleshano le ntate oa leshano.” (Johanne 8:44, NW) Kahona, haeba thuto eitseng e loantšana le Lentsoe la Molimo, haeba ke leshano, joale ho e lumela le ho e ruta ho nyelisa Jehova ’me ho re etsa ba mo hanyetsang. Kahoo ho hlokahala hore re hlahlobe Mangolo ka hloko e le hore re ka khetholla ’nete ho bohata. (Liketso 17:11) Ha re batle ho tšoana le ba “ithutang ka mehla, empa e le ba sitoang ho fihla tsebong ea ’nete le ka mohla o le mong.”—2 Timothea 3:1, 7.
3. Thuto ea Bibele e hlakileng ka Molimo, Jesu Kreste, le moea o halalelang ke efe?
3 Joalokaha re bone sehloohong se fetileng, thuto ea Boraro-bo-bong hase thuto ea Bibele. Lentsoeng la oona Molimo, o re bolella ka ho hlaka hore ke ’Mōpi oa lintho tsohle le hore ntho ea pele eo o e bōpileng leholimong ke Mora oa oona. (Tšenolo 4:11; Ba-Kolosse 1:15, 16) Molimo o ile oa romela Mora oa oona lefatšeng e le motho hore a tl’o fana ka sehlabelo, se sebeletsang e le motheo oa tšoarelo ea libe tsa batho, le ho tla beha batho ba lipelo li tšepahalang leseling le eketsehileng ka Molimo le merero ea oona. (Mattheu 20:28; Johanne 6:38) Empa, thuto e bonolo, e hlakileng ea hore Molimo le Kreste ke batho ba babeli ba arohaneng, le hore moea o halalelang hase motho empa ke matla a Molimo a sebetsang, e ’nile ea sothoa ho theosa le makholo a lilemo. Ho e-na le hoo, thuto ea Boraro-bo-bong e fetohile thuto ea mantlha ea Bokreste-’mōtoana.
“’Na le Ntate, re Bang Feela”
4. Ke hobane’ng ha polelo eo likereke li e etsang ka Johanne 10:30 e se ’nete?
4 Hangata likereke li supa Johanne 10:30 ho leka ho tšehetsa Boraro-bo-bong, le hoja ho se moo ho buuoang ka motho leha e le ofe oa boraro temaneng eo. Mono Jesu o itse: “’Na le Ntate, re bang feela.” Empa na Jesu o ne a bolela hore e ne e le Molimo o Matla ’Ohle ka booona, a mpa a le sebopehong se fapaneng? Che, ho ne ho ke ke ha e-ba joalo hobane kamehla Jesu o ’nile a bolela hore ke Mora oa Molimo, le hore o monyenyane ho Oona le hore o katlaase ho Oona. Joale, Jesu o ne a bolela eng ho Johanne 10:30?
5, 6. (a) Jesu o ne a bolela hore eena le Ntate oa hae ba ne ba le bang ka kutloisiso efe? (b) Hoo ho bontšoa joang mabapi le barutuoa ba Jesu?
5 Jesu o ne a bolela hore o ne a le mong ka khopolo le ka morero le Ntate oa hae. Sena se ka bonoa ho Johanne 17:21, 22 moo Jesu a ileng a rapela Molimo hore barutuoa ba hae “ba be bang, joale ka ha uena, Ntate, u le ho ’na, le ’na ke le ho uena; le bona ba be bang ho rōna . . . ba tle ba be bang, joale ka ha le rōna re le bang.” Na Jesu o ne a rapella bore barutuoa ba hae kaofela ba fetohe motho a le mong? Che, o ne a rapella hore ba be bonngoeng, ba be le mohopolo o le mong le morero o le mong, feela joalokaha Jesu le Molimo ba ne ba le joalo.
6 Khopolo e tšoanang e bontšoa ho 1 Ba-Korinthe 1:10, moo Pauluse a bolelang hore Bakreste ba ‘bolele bohle taba e le ’ngoe, likhaohano li se ke tsa e-ba teng har’a bona, ba mpe ba phethehe boikutlong bo le bong le khopolong e le ’ngoe.’ Kahoo ha Jesu a ne a re eena le Ntate oa hae ba ne ba le bang, o ne a sa bolele hore e ne e le motho a le mong, feela joalokaha ha a ne a re barutuoa ba hae ba be bang a ne a sa bolele hore e ne e le motho a le mong.
“Lentsoe” e ne e le Mang?
7. (a) Bokreste-’mōtoana bo bolela eng ka Johanne 1:1? (b) Ho na le eng ho Johanne 1:1 e bontšang hang-hang hore ha ho boraro-bo-bong boo ho buuoang ka bona moo?
7 Leha ho le joalo, ho thoe’ng ka Johanne 1:1, eo Bibeleng ea King James Version e reng: “Qalehong ho ne ho e-na le Lentsoe, ’me Lentsoe le ne le e-na le Molimo, ’me Lentsoe e ne e le Molimo”? Johanne 1:14 e re bolella hore “Lentsoe le ne le etsoe nama, ’me la aha har’a rōna.” Bokreste-’mōtoana bo bolela hore “Lentsoe” lena (loʹgos, ka Segerike) le ileng la tla lefatšeng e le Jesu Kreste e ne e le Molimo o Matla ’Ohle ka booona. Empa, hlokomela hore esita le ho King James Version Johanne 1:1 e re “Lentsoe le ne le e-na le Molimo.” Motho ea nang le motho e mong hase ntho e le ’ngoe le motho eo e mong. Kahoo esita le phetolelong ena, ho bontšoa batho ba babeli ba arohaneng. Hape, ha ho moo ho buuoang ka motho oa boraro oa Boraro-bo-bong leha e le bofe mona.
8. Liphetolelo tse ling tsa Bibele li fetolela karolo e qetellang ea Johanne 1:1 joang?
8 Ha e le King James Version eo karolong e qetellang ea Johanne 1:1 e bolelang hore “Lentsoe e ne e le Molimo,” liphetolelo tse ling li bua ntho e ’ngoe e fapaneng. Tse ling li ka tsela ena:
1808: “’me lentsoe e ne e le molimo.” The New Testament, in an Improved Version, Upon the Basis of Archbishop Newcome’s New Translation: With a Corrected Text, London.
1864: “’me molimo e ne e le Lentsoe.” The Emphatic Diaglott, ea Benjamin Wilson, New York le London.
1935: “’me Lentsoe le ne le le bomolimo.” The Bible—An American Translation, ea J. M. P. Smith le E. J. Goodspeed, Chicago.
1935: “Logos e ne e le bomolimo.” A New Translation of the Bible, ea James Moffat, New York.
1975: “’me molimo (kapa, oa mofuta oa bomolimo) e ne e le Lentsoe.” Das Evangelium nach Johannes, ea Siegfried Schulz, Göttingen, Jeremane.
1978: “’me oa mofuta o kang molimo e ne e le Logos.” Das Evangelium nach Johannes, ea Johannes Schneider, Berlin.
1979: “’me molimo e ne e le Logos.” Das Evangelium nach Johannes, ea Jurgen Becker, Würzburg, Jeremane.
Hape, ka 1950 New World Translation of the Christian Greek Scriptures, e hatisitsoeng ke Watchtower Bible and Tract Society of New York, Inc., e ile ea fetolela polelo eo tjena: “’me Lentsoe e ne e le molimo.”
9. Temaneng ea Segerike, ke eng se etellang pele ho lereho the·osʹ (Molimo) moo le hlahang teng ka lekhetlo la pele ho Johanne 1:1, e bontšang hore ho buuoa ka Molimo o matla ’ohle?
9 Na ho fetoleloa ha polelo eo joalo ho lumellana le tsela eo lipolelo li hahiloeng ka eona ho Johanne 1:1 sebopehong sa puo ea Segerike? E, lia lumellana. Ho Johanne 1:1 lereho la segerike the·osʹ (molimo) le hlaha ka makhetlo a mabeli. Lekhetlong la pele le supa Molimo o matla ’ohle, oo Lentsoe le neng le e-na le oona—“’me Lentsoe [loʹgos] le ne le e-na le Molimo [sebōpeho sa the·osʹ].” The·osʹ ea pele e etelloa pele ke sebōpeho sa lentsoe la Segerike le khethollang ho. Lereho the·osʹ leo lentsoe le khethollang ho le tlang pele ho lona le supa boleng bo arohileng, ntlheng ena, Molimo o matla ’ohle—“’me Lentsoe le ne le e-na le Molimo [(the) God].”
10. Mabapi le moo the·osʹ e hlahang teng ka lekhetlo la bobeli ho Johanne 1:1, ho siuoa kathōko ha lentsoe le khethollang ho ho bontša eng?
10 Empa karolong e qetellang ea Johanne 1:1, liphetolelo tse kang tse thathamisitsoeng serapeng sa 8 li fetolela the·osʹ ea bobeli (eo e leng ketso-lereho) e le “bomolimo” kapa “molimo (a god)” ho fapana le “Molimo.” Hobane’ng? Hobane the·osʹ ea bobeli ke ketso-lereho e ka bonngoeng e hlahang pele ho ketso ’me e se na lentsoe le khethollang ho ka Segerike. Temaneng ena, ho hahoa ha polelo ena ho bontša tšoaneleho kapa tšobotsi ea eo ho boleloang ka eena. Kahoo, e totobatsa boleng ba Lentsoe, hore le ne le le “bomolimo,” “molimo,” empa e se Molimo o matla ’ohle. Hona ho lumellana le mangolo a mangata a bontšang hore “Lentsoe” e ne e le ’muelli oa Molimo, ea rometsoeng lefatšeng ke Molimo. Joalokaha Johanne 1:18 e bolela: “Ha ho motho ea kileng a bona Molimo ka nako leha e le efe; molimo o tsoetsoeng o ’notši [Mora ea bōpiloeng leholimong ke Molimo o matla ’ohle] o leng boemong ba ho ba sefubeng sa Ntate ke oona o [tlileng lefatšeng e le motho Jesu ’me] o mo [Molimo o matla ’ohle] hlalositse.”
11. Ho na le mohlala ofe ka Bibeleng oa moo mofetoleli a kentseng lentsoe le khethollang le kang “a” puong ea Senyesemane moo le neng le le sieo Segerikeng, ’me hoo ho etsoa hobane’ng?
11 Ho na le litemana tse ling tse ngata tsa Bibele moo ba fetolelang ho tloha Segerikeng ho ea puong e ’ngoe ba kenyang lentsoe le khethollang (“a”, ka Senyesemane) puong ea Senyesemane pele ho ketso-lereho le hoja ho se lentsoe le khethollang mongolong oa Segerike. Ho kenngoa ha lentsoe lena phetolelong ho hlahisa tšoaneleho kapa tšobotsi ea lereho. Ka mohlala, ho Mareka 6:49, ha barutuoa ba bona Jesu a tsamaea holim’a metsi, King James Version e re, “ba ile ba nahana hore ke moea [a spirit, ka Senyesemane]” (phanʹta·sma, ka Segerike). New World Translation ka ho nepahetseng haholoanyane e fetolela polelo eo, “Ba ne ba nahana hore: ‘Ke pono!’” Ka tsela e tšoanang, phetolelo e nepahetseng ea Johanne 1:1 e bontša hore Lentsoe e ne e se “Molimo,” empa e ne e le “molimo [a god, ka Senyesemane].”
12. Ke tšebeliso efe e ’ngoe ea lebōpi-kakaretso “a” e fumanoang ho Johanne 8:44?
12 Mehlala e ’meli e fumanoa ho Johanne khaolo ea 8, temana 44. Moo, ha Jesu a bua ka Diabolose, o re: “Eena ke ’molai [a manslayer, ka Senyesemane] ha e sa le ho qaleng . . . Ke ea leshano [a liar, ka Senyesemane], le ntate oa ea leshano.” (NW) Ka ho tšoanang le ho Johanne 1:1, Segerikeng sa khale, ketso-lereho lipolelong tseo tse peli (“manslayer,” “liar”) e etella leetsi pele ’me ha e na lebōpi-khetho. Polelong ka ’ngoe, tšoaneleho kapa tšobotsi ea Diabolose e-ea hlalosoa ’me liphetolelong tse ngata tsa mehleng ena ho hlokahala hore ho kenyelletsoe lebōpi-kakaretso (“a”, ka Senyesemane) hore ho fetisoe khopolo ena. Ke kahoo, Bibele ea Sesotho e fetolelang lipolelo tsena, “Ke ’molai [a murderer, ka Senyesemane] . . . ke ea leshano [a liar, ka Senyesemane] le ntate oa lona.”—Bona hape Mareka 11:32; Johanne 4:19; 6:70; 9:17; 10:1, 13, 21; 12:6.
“Morena oa ka le Molimo oa ka”
13, 14. Ke hobane’ng ha Thomase a ne a ka bitsa Jesu “Molimo oa ka” empa a sa bolele hore Jesu e ne e le Jehova?
13 Batho ba lumelang ho boraro-bo-bong ba boetse ba supa Johanne 20:28 ho tšehetsa lipolelo tsa bona. Mono Thomase o itse ho Jesu: “Morena oa ka le Molimo oa ka!” Joalokaha ho bontšitsoe kaholimo, ha ho letho le phoso ka hore Thomase a bitse Jesu molimo. Hoo ho ne ho tla be ho lumellana le ’nete ea hore Jesu, bophelong ba hae ba pele e e-ba motho, ka sebele e ne e le molimo, ke hore, motho ea matla, ea nang le bomolimo. ’Me ka sebele o bile joalo ho tloha lefung la hae le tsohong ea hae ho ea bophelong ba leholimo. Jesu o bile a qotsa ho Lipesaleme ho bontša hore batho ba matla ba ne ba bitsoa “melimo.” (Pesaleme ea 82:1-6; Johanne 10:34, 35) Moapostola Pauluse o ile a hlokomela hore “melimo e fela e le mengata, le marena a mangata.” (1 Ba-Korinthe 8:5) Esita le Satane o bitsoa “molimo oa lefatše lena.”—2 Ba-Korinthe 4:4.
14 Kreste o lutse setulong se phahameng haholo ho feta batho ba sa phethahalang, kapa Satane. Haeba ba joalo ba ka bitsoa “melimo,” ka sebele Jesu a ka bitsoa molimo, ’me o ne a bitsoa oona. Ka baka la setulo sa hae se ikhethang kamanong le Jehova, Jesu ke “molimo o tsoetsoeng o ’notši” (Johanne 1:18, NW), “Molimo o matla” (Esaia 9:6), le “molimo (a god)” (Johanne 1:1, NW). Kahoo ho ne ho se letho le phoso ka hore Thomase a bitse Jesu ka tsela eo. Thomase o ne a bolela hore ho eena Jesu e ne e le molimo, ea nang le bomolimo, ea matla. Empa o ne a sa re Jesu e ne e le Jehova, e leng lebaka leo ka lona Thomase a itseng, Molimo “oa ka” e seng feela “Molimo”.
15. Ke joang temana ea 31 ho Johanne khaolo ea 20 e tsebahatsang ka ho hlaka hore na Jesu ke mang?
15 Litemana tse tharo feela hamorao, ho Johanne 20:31, Bibele e bolela hore: “Empa eo e ngoliloe hore le tle le lumele hobane Jesu ke Kreste, Mora oa Molimo.” Khoao eohle ea hore na e be Thomase o ne a bolela mang, ea tlosoa mona. Mongoli oa Bibele Johanne ka ho hlaka o bolela hore Jesu ke Mora oa Molimo, e seng Molimo o matla ’ohle ka booona.
Ha a Lekane le Molimo
16. Bajode ba ne ba bolela eng, ’me Jesu o ile a hanyetsa hoo joang?
16 Lengolo le leng leo likereke li le sebelisang ke Johanne 5:18. Le bolela hore Bajode ba ne ba batla ho bolaea Jesu hobane “o bile o re, Molimo ke Ntat’ae ka sebele, ’me o iketsa ea lekanang le Molimo.” Ke mang ea neng a re Jesu o iketsa ea lekanang le Molimo? Hase Jesu. O hlakisa sena temaneng e latelang (19) ka ho bolela hore: “Mora o sitoa ho etsa letho a ’notši, ha a sa ka a le bona le etsoa ke ntat’ae.” Kahoo Jesu ha aa ka a ipolela hore e ne e le Molimo o matla ’ohle kapa hore o lekana le Oona. O ne a bontša Bajode hore ba ne ba fositse, hore e ne e se Molimo, empa e ne e le Mora oa Molimo, ’me e le ’muelli oa Molimo, o ne a ke ke a sebetsa a iqapela ntho. Na re ka inahanela ka Molimo o matla ’ohle oa bokahohle o bolela hore o ne o ke ke oa etsa letho leo o iqapelang lona? Kahoo ke Bajode ba ileng ba etsa qoso, ’me Jesu a e hanyetsa.
17. (a) Ke bopaki bofe bo hlakileng bo tsoang Lentsoeng le bululetsoeng la Molimo mabapi le ho tsebahatsoa ha Jehova, Jesu Kreste le moea o halalelang? (b) Ho lokela ho etsoa joang ka lengolo leha e le lefe leo batho ba lumelang ho Boraro-bo-bong ba ka ’nang ba le supa ka boiteko ba ho leka ho lokafatsa tumelo ea bona?
17 Kahona, ho tsoa bopaking ba Molimo bo Lentsoeng la oona le bululetsoeng, ho tsoa bopaking ba Jesu, le ho tsoa bopaking ba barutuoa ba Jesu, bopaki bo boholo haholo bo bontša ka ho hlaka hore Molimo o matla ’ohle le Jesu Kreste ke batho ba babeli ba arohaneng, Ntate le Mora. Bopaki boo bo boetse bo bontša ka ho hlaka hore moea o halalelang hase motho oa boraro oa Boraro-bo-bong empa ke matla a Molimo a sebetsang. Ha ho thuse letho ho ntša mangolo moelelong kapa ho leka ho a sotha hore a tšehetse Boraro-bo-bong. Mangolo leha e le afe a joalo a lokela ho etsoa hore a lumellane le bopaki bo bong kaofela bo hlakileng ba Bibele.
Ke Hobane’ng ha Boraro bo Bong bo ile ba Tsoela Pele?
18. Thuto ea Boraro-bo-bong e hlahile hokae?
18 Haeba u hlahloba leqephe 18, “Tsoelo-pele ea Thuto ea Boraro-bo-bong Historing,” u tla hlokomela hore Boraro-bo-bong bo metse bohedeneng. Hase thuto ea Bibele, empa e ile ea amoheloa ke Bokreste-’mōtoana lekholong la bone la lilemo. Leha ho le joalo, nako e telele pele ho moo, ho ne ho e-na le melimo e tsamaeang ka lihlopha tsa boraro Babylona ea boholo-holo, Egepeta, le libakeng tse ling. Eaba Bokreste-’mōtoana bo kenyeletsa khopolo ena ea bohedene lithutong tsa bona. Sena se ile sa hlohlelletsoa ke hlooho ea ’muso oa Roma Constantine, ea neng a sa thahaselle ’nete ka taba ena, a mpa a batla ho tiisa ’muso oa hae o neng o entsoe ka bahedene le Bakreste ba bakoenehi. Ho e-na le ho ba tsoelopele ea thuto ea Bokreste, Boraro-bo-bong e ne e le bopaki ba hore Bokreste-’mōtoana bo ne bo koenehetse lithuto tsa Kreste ’me ka ho fapaneng bo amohetse lithuto tsa bohedene.
19. Ke hobane’ng ha thuto ea Boraro-bo-bong e ile ea tsoela pele?
19 Ke hobane’ng ha thuto e joalo e ne e ka tsoela pele? Ka sebele, ha ho phethoe lithahasello tsa Molimo ka ho etsa hore Oona, Mora oa Oona, le moea oa Oona o halalelang e be lintho tse ferekanyang le tseo e leng sephiri. Hape ha ho phethe lithahasello tsa batho hore ba ferekanngoe. Ho e-na le hoo, ha ho e-ba le pherekano e kholoanyane ka Molimo le merero ea oona, hoo ho khahlisa haholoanyane ho Satane Diabolose, mohanyetsi oa Molimo, ‘molimo oa lefatše lena,’ ea sebeletsang ho ‘foufatsa likelello tsa ba sa lumelang.’ (2 Ba-Korinthe 4:4) Kaha thuto e joalo e etsa hore ho bonahale e ka ke litsebi tsa thuto ea bolumeli feela tse ka utloisisang lithuto tsa Bibele, hona ho boetse ho khahlisa baetapele ba bolumeli ba Bokreste-’mōtoana. Sena se ba thusa hore ba ’ne ba buse batho ba tlaase.
20. (a) ’Nete e bonolo ka Boraro-bo-bong ke efe? (b) Ho fumana tsebo e nepahetseng ea linnete tse lokollang ho tla bolela eng bakeng sa rōna?
20 Empa, ’nete ea taba ena e hlakile hoo le ngoana a ka e utloisisang. Moshanyana oa tseba hore eena le ntat’ae hase ntho e le ’ngoe empa ke batho ba babeli ba arohaneng. Ka ho tšoanang, ha Bibele e bolela hore Jesu Kreste ke Mora oa Molimo, hoo ke hona hoo e ho bolelang. Eo ke ’nete e bonolo, ha thuto ea Boraro-bo-bong e se joalo. Ke leshano. Kahoo e tlameha e be e simolohile ho ea “bitsoang Diabolose le Satane, [ea] thetsang lefatše kaofela.” (Tšenolo 12:9) Empa linnete tse bonolo, tse khathollang ka Molimo, Mora oa oona, Jesu Kreste, le moea o halalelang o matla oa Molimo li lokolla batho bokhobeng ba lithuto tsa bohata tse metseng bohedeneng le tseo mohloli oa tsona e leng Satane. Joalokaha Jesu a boleletse batho bao ka tieo ba neng ba batla ’nete: “Le tla tseba ’nete, ’me ’nete e tla le lokolla.” (Johanne 8:32) Ho fumana tsebo e nepahetseng ea linnete tse lokollang, le ho nka bohato ka tsona, “ho bolela bophelo bo sa feleng.”—Johanne 17:3, NW.
U Ne U Tla Arabela Joang?
◻ Ke hobane’ng ha tsebo e nepahetseng ea Molimo le Mora oa oona e le ea bohlokoa hakaale?
◻ Jesu o ne a bolela eng ha a re, “’Na le Ntate re bang feela”?
◻ Ke joang Johanne 1:1 e khethollang pakeng tsa Lentsoe le Molimo?
◻ Ke hobane’ng ha Thomase ka ho loketseng a ne a ka bitsa Jesu “Molimo oa ka”?
◻ Ke joang thuto ea Boraro-bo-bong e qalileng, ’me mohloli oa eona ke mang?
[Lebokose le leqepheng la 18]
Tsoelo-pele ea Thuto ea Boraro bo Bong Historing
The New Encyclopædia Britannica, 1985, Micropædia, Moqolo 11, leqephe 928, tlas’a sehlooho sa Boraro-bo-bong e re: “Leha e le lentsoe Boraro-bo-bong kapa thuto eo ka ho hlaka ha li hlahe Testamenteng e Ncha, kapa hona hore Jesu le balateli ba hae ba ne ba rerile ho hanyetsa Serapa sa Litemana seo Bajode ba se phetang letsatsi le letsatsi se hlahang Testamenteng ea Khale: ‘Utloa, Uena Iseraele: Morena Molimo oa rōna ke Morena a le mong.’ (Deut. 6:4)” Encyclopedia ena e boetse e re: “Thuto eo e ile ea tsoela pele butle-butle ho theosa le makholo a ’maloa a lilemo le ho feta likhanyetsanong tse ngata. . . . Seboka sa Nicaea ka 325 se ile sa bolela motheo oa bohlokoa oa thuto eo ka ho lumela ha eona hore Mora ‘o na le kaheho e le ’ngoe . . . le Ntate,’ le hoja se ne se bua ho honyenyane haholo ka Moea o Halalelang. . . . Qetellong ea lekholo la bo4 la lilemo . . . thuto eo ea Boraro-bo-bong e ile ea nka sebopeho sa motheo seo e ’nileng ea lula ka sona ha e sa le ho tloha ka nako eo.”
New Catholic Encyclopedia, 1967, Moqolo 14, leqephe 299, ea lumela: “Ho qaptjoa ha ‘Molimo o le mong ho Batho ba bararo’ ho ne ho sa theoa ka ho tiea, ka sebele ho ne ho sa amoheloa bophelong ba Bokreste le polelong ea bona ea tumelo, pele ho qetello ea lekholo la bo4 la lilemo. . . . Har’a bo-Ntate Baapostola, ho ne ho se letho esita le le atametsang hanyenyane feela monahanong o joalo kapa kutloisisong e joalo.”
Kahona, thuto ea Boraro-bo-bong hase ea Mangolo empa e ile ea amoheloa ka molao Sebokeng sa Nicaea ka selemo sa 325 C.E. Thuto eo e ne e kenyelelitse khopolo ea bohedene e neng e simolohile Babylona ea boholo-holo le Egepeta nako e telele pele ho moo ’me e ne e sebelisoa ka ho tšoanang linaheng tse ling. Rahistori Will Durant o ile a hlokomela ho The Story of Civilization: Part III, leqephe 595: “Bokreste ha boa ka ba felisa bohedene; bo ile ba bo amohela. . . . Ho tloha Egepeta ho tlile likhopolo tsa boraro-bo-bong bo halalelang.”
Ho An Encyclopedia of Religion, e ngotsoeng ke Vergilius Ferm, 1964, maqepheng 793 le 794, tlas’a polelo “sehlopha sa melimo e meraro,” ho thathamisitsoe melimo e tsamaeang ka lihlopha tsa boraro ea Babylona, Buddha, Hindu, Norse, le Taoi, le malumeli a mang, ’moho le ea Bokreste-’mōtoana. E le mohlala, e bolela hore India, “Sehlopha se seholo sa melimo e meraro se akarelletsa Brahma, ’Mōpi, Vishnu, ’Moloki le Shiva, Moripitli. Melimo ena e emela potoloho ea bophelo, joalokaha sehlopha sa melimo e meraro sa Babylona sa Anu, Enlil le Ea se emela lintho tse hlokahalang bakeng sa bophelo, moea, metsi, lefatše.”
Ntlo ea Polokelo ea Lintho tsa Khale ea Brithani e London e na le mesebetsi ea matsoho e bontšang melimo ea boholo-holo e tsamaeang ka lihlopha tsa boraro, e kang Isis, Harpokratēs, le Nephthys tsa Egepeta. Khatiso ea lekala la Mehla e Bohareng le Mehla ea Boholo-holo ea ntlo eo ea polokelo ea lintho tsa khale e bolela se latelang se neng se ngotsoe mabenyaneng a boholo-holo: “[Lehlakore le] kaholimo, melimo ea Egepeta Horus-Baït (o nang le hlooho ea phakoe), Buto-Akori (noha), le Hathor (o nang le hlooho ea sehohoana). [Lehlakore le] katlaase, temana ea Segerike ‘Baït a le mong, Hathor a le mong, Akori a le mong; matla a bana a mang. Hail, ntat’a lefatše, hail, molimo o likarolo li tharo!’ Kahona melimo eo e tsebahatsoa e le liponahatso tse tharo tsa matla a le mang, mohlomong molimo oa letsatsi.”
Histori e tiisa hore Boraro-bo-bong bo nkiloe ho bahedene ’me bo bile teng makholo a lilemo pele Jesu a tla lefatšeng. Nako e telele kamorao ho lefu la hae, bo ile ba phahamisoa ke ba neng ba susumelitsoe ke lifilosofi tsa bohedene le ba neng ba koenehile borapeling ba ’nete ba Molimo kamoo Jesu le barutuoa ba hae ba neng ba bo rutile kateng.
[Setšoantšo se leqepheng la 16]
Jesu o ile a rapella hore barutuoa ba hae ba be bang mohopolong le morerong joalokaha eena le Ntate oa hae ba ne ba le bang