Jesu Bophelo le Tšebeletso Tsa Hae

Leoatleng la Galilea

BAAPOSTOLA joale ba khutlela Galilea, joalokaha pejana Jesu a ile a ba laela ho etsa joalo. Empa ha baa tiiseha ka seo ba lokelang ho se etsa moo. Ka mor’a nako, Petrose o bolella Thomase, Nathanaele, Jakobo le Johanne ngoan’abo, le baapostola ba bang ba babeli: “Ke ea tšoasa lihlapi.”

Ba tšeletseng baa arabela: “Le rōna re ea le uena.”

Bosiu bohle, ba sitoa ho tšoasa letho. Leha ho le joalo, hantle feela ha eka ho qala ho khanya, Jesu o iponahatsa lebōpong, empa baapostola ha ba lemohe hore ke Jesu. Oa hoeletsa: “Bana, na ha le na se ka jeoang na?”

Ba hoeletsa hape ba le ka mose oane ho metsi: “Che.”

O re: “Akhelang letlooa pel’a lehlakore le letona la sekepana, ’me le tla li bona.” ’Me ha ba le akhela, ba sitoa ho hula letlooa la bona ka lebaka la lihlapi tseo kaofela. Johanne oa hoeletsa: “Ke Morena.” Petrose a apara seaparo sa hae sa ka holimo, o ikakhela leoatleng, ’me o sesa hoo e ka bang limithara tse 90 ho ea lebōpong. Baapostola ba bang ba latela ka seketsoana se senyenyane, se hulang letlooa le tletseng lihlapi.

Ha ba fihla lebōpong, ho na le mollo oa mashala, le hlapi holim’a oona, ’me le bohobe bo teng. Jesu o re: “Tlisang lihlapi tse ling tsa tseo le sa tsoa li tšoasa.” Petrose o kena seketsoaneng ’me o hulela letlooa lebōpong. Le na le lihlapi tse khōlō tse 153!

Jesu oa ba mema: “Tlong, le je.”

Ha ho lea mong oa bona ea nang le sebete sa ho botsa hore, “U mang?” hobane baa tseba hore ke Jesu. Lena ke lekhetlo la bosupa a iponahatsa ka mor’a tsoho ea hae, ’me ke lekhetlo la boraro a iponahatsa ho baapostola joaloka sehlopha. Joale o aba lijo tsa hoseng, ’me o fa e mong le e mong oa bona bohobe le hlapi.

Ha ba qeta ho ja, mohlomong Jesu o ōma ka hlooho a shebile lihlaping tse ngata tse tšoasitsoeng ’me o botsa Petrose: “Simone, mor’a Jona, a u nthata haholo ho fetisa bana [“tsena,” NW] na?” Mohlomong o bolela hore, Na u rata khoebo ea ho tšoasa lihlapi ho feta mosebetsi oo ke u lokiselitseng oona hore u o etse?

Petrose oa arabela: “E, Morena, u tseba hoba kea u rata.”

Jesu oa arabela: “Alosa likonyana tsa ka.”

Hape, lekhetlo la bobeli, oa botsa: “Simone, mor’a Jona, a ua nthata na?”

Petrose oa arabela: “E, Morena, u tseba hoba kea u rata.”

Jesu o boetse oa mo laela: “Lisa linku tsa ka.”

Joale, lekhetlo la boraro, oa botsa: “Simone, mor’a Jona, a ua nthata na?”

Hajoale Petrose o soabile. E ka ’na eaba o ipotsa hore na Jesu o belaella botšepehi ba hae. Ho feta moo, haufinyane ha Jesu a ne a le tekong bakeng sa bophelo ba hae, Petrose o sa tsoa latola ka makhetlo a mararo hore oa mo tseba. Kahoo Petrose o re: “Morena, u tseba tsohle; u tseba hoba kea u rata.”

Jesu o mo laela lekhetlo la boraro: “Alosa linku tsa ka.”

Kahoo Jesu o sebelisa Petrose joaloka mocha oa ho hatisa ho ba bang ka ho tšoanang mosebetsi oo a batlang hore ba o etse. Haufinyane o tla tloha lefatšeng, ’me o batla hore ba nke ketello-pele ho hlokomeleng bao ba tlang ho tlisoa lesakeng la linku tsa Molimo.

Feela joalokaha Jesu a ile a tlangoa ’me a bolaoa hobane a entse mosebetsi oo Molimo o mo rometseng ho o etsa, joale o senola hore Petrose o tla utloa bohloko ka mokhoa o tšoanang. Jesu oa ’molella: “Enere ha u sa le mocha, u no u itlama u ’notsi, u itsamaela moo u ratang teng; empa etlare hobane u tsofale, u tla otlolla matsoho a hao, ’me e mong o tla u tlama, a u ise moo u sa rateng teng.” Ho sa tsotellehe lefu la boshoela-tumelo le emetseng Petrose, Jesu oa mo phehella: “Ntatele!”

Ha a hetla, Petrose o bona Johanne ’me oa botsa: “Morena, ho tla ba joang ho eo?”

Jesu oa arabela: “Ekare ha ke rata hore a lule ke be ke tle, e ka ba eng ho uena? Uena, ntatele.”

Barutuoa ba bangata ba ile ba utloisisa mantsoe ana a Jesu eka a bolela hore moapostola Johanne a ke ke a shoa le ka mohla. Leha ho le joalo, joalokaha moapostola Johanne a ile a hlalosa hamorao, Jesu ha aa ka a re a ke ke a shoa, Jesu o mpa feela a itse: “Ekare ha ke rata hore a lule ke be ke tle, e ka ba eng ho uena?” Johanne 21:1-25; Mattheu 26:32; 28:7, 10.

◆ Ke eng e bontšang hore baapostola ha baa tiiseha ka seo ba lokelang ho se etsa Galilea?

◆ Baapostola ba hlokomela Jesu joang Leoatleng la Galilea?

◆ Ke makhetlo a makae joale ao Jesu a iponahalitseng ka oona haesale ho tloha tsohong ea hae?

◆ Ke joang Jesu a hatisang seo a batlang hore baapostola ba se etse?

◆ Ke joang Jesu a bontšang mokhoa oo Petrose a tla shoa ka oona?

◆ Ke litlhaloso life tsa Jesu ka Johanne tseo ba bangata ho barutuoa ba ileng ba li utloisisa ka mokhoa o fosahetseng?