Lipotso Tse Tsoang Ho Babali

Balevi ba bang bao e neng e se baprista ba ne ba e-na le mesebetsi e meng e akareletsang ho ba mapolesa a lebelang. Ba ne ba fuoa mosebetsi ona ke motsamaisi oa tempele. Mongoli e mong oa Mojuda ea bitsoang Philo o hlalosa hore mosebetsi oa bona e ne e le ho lebela menyako ea tempele moo batho ba neng ba kena le teng. Ba bang bona ba ne ba lebela sehalalelo e le ho thibela motho ea sa lumelloang hore a se ke a kena, ebang ke ka maikemisetso kapa che. Ba bang ba ne ba lula ba pota-pota tempele bosiu le motšehare ebe ha ba bang ba tsamaea ba bang baa kena.

Ka linako tse ling, lekhotla la Sanhedrine le ne le ka kopa balebeli bana ho le thusa. Mapolesa ana e ne e le ’ona feela ao ’muso oa Roma o neng o a lumella hore a nke lihlomo.

Setsebi sa Bibele Joachim Jeremias se hlalosa hore Jesu o ile a botsa mapolesa ao hore na ke hobane’ng ha a sa ka a mo tšoara ha a ntse a ruta ka tempeleng. (Mat. 26:​55) Hoa hlaka hore Jesu a ka be a sa ba botsa potso eo haeba e ne e se mapolesa a tempele. Joachim o boetse o lumela hore batho ba neng ba ntse ba batla ho tšoara Jesu pelenyana ho moo, e ne e ntse e le ’ona mapolesa ao. (Joh. 7:​32, 45, 46) Hamorao, lekhotla la Sanhedrine le ile la roma motsamaisi oa lekhotla le mapolesa hore ba il’o tšoara barutuoa ba Jesu. Joachim o boetse o belaela hore mapolesa ao a tempele ke ’ona a ileng a ntša Pauluse ka tempeleng.​—Lik. 4:​1-3; 5:​17-27; 21:​27-30.