Khaolo 2

Jesu Kreste, Paki e Tšepahalang

KA LILEMO tse ka bang 4 000, lipaki tse ngata tsa pele ho mehla ea Bokreste li ile tsa fana ka bopaki ba tsona. Empa litseko tse amang bobusi ba Molimo le botšepehi ba bahlanka ba oona ho hang li ne li e-s’o rarolloe. Joale ho ile ha fihla nako ea hore “peō” e tšepisitsoeng ea borena, Messia, e tl’o itlhahisa lefatšeng.—Gen. 3:15.

Har’a bahlanka bohle ba hae ba moea ba limillione, ke ofe eo Jehova a ileng a mo khethela kabelo ee? Kaofela ha bona ba ile ba bona se etsahetseng Edene ’me ha ho pelaelo hore ba ile ba elelloa litseko tsa bokahohleng tse hlahisitsoeng. Empa ke ofe ea neng a e-na le cheseho e matla ka ho fetisisa ea ho sebeletsa ho hlakola thohako lebitsong la Jehova le ho tlosa qoso bobusing ba hae? Ke ofe ea neng a ka fana ka karabelo ea makhaola-khang phephetsong ea Satane ea hore ha ho ea neng a tla boloka botšepehi bobusing ba Molimo tlas’a teko? Jehova o ile a khetha Letsibolo la hae, Mora oa hae ea tsoetsoeng a ’notši, Jesu.—Joh. 3:16; Ba-Kol. 1:15.

Jesu o ile a amohela kabelo ena ka cheseho le ka boikokobetso, le hoja ho etsa joalo ho ne ho bolela ho tloha lehaeng la leholimo leo a neng a phetse le Ntate oa hae ho lona ka nako e telele ho feta leha e le mang e mong. (Joh. 8:23, 58; Ba-Fil. 2:5-8, NW) O ne a susumetsoa ke eng? Ke lerato le tebileng ho Jehova le takatso e chesehang ea ho bona ho hlakoloa thohako eohle lebitsong la Hae. (Joh. 14:31) Jesu o ile a boela a nka khato eo ka baka la lerato la hae ho batho. (Liprov. 8:30, 31; bapisa le Johanne 15:13.) Ho tsoaloa ha hae lefatšeng lehoetleng la selemo sa 2 B.C.E., ho ile ha etsahala ka tšebetso ea moea o halalelang—oo ka oona Jehova a ileng a tlosa bophelo ba Jesu leholimong ho bo kenya ka pōpelong ea moroetsana oa Mojode Maria. (Matt. 1:18; Luka 1:26-38) Ka hona Jesu o ile a tsoalloa sechabeng sa Iseraele.—Ba-Gal. 4:4.

Jesu o ne a tseba hamolemo ho feta Moiseraele ofe kapa ofe hore e ne e lokela ho ba paki ea Jehova. Hobane’ng? E ne e le setho sa sechaba seo Jehova a neng a ile a se bolella tjena ka moprofeta Esaia: “Ke lōna lipaki tsa ka.” (Esa. 43:10) Ho phaella moo, ha Jesu a kolobetsoa Nōkeng ea Jordane ka 29 C.E., Jehova o ile a mo tlotsa ka moea o halalelang. (Matt. 3:16) Ka hona Jesu o ile a fuoa matla a “ho bolela ngoaha oa mehauhelo ea Jehova,” joalokaha a ile a tiisa seo hamorao.—Esa. 61:1, 2; Luka 4:16-19.

Jesu o ile a phethahatsa kabelo ea hae ka botšepehi ’me a fetoha paki ea Jehova e khōlō ka ho fetisisa lefatšeng. Ka hona, moapostola Johanne ea neng a eme pel’a Jesu nakong ea lefu la hae o na le tokelo eohle ea ho bitsa Jesu “Paki e Tšepahalang.” (Tšen. 1:5, BPN) ’Me ho Tšenolo 3:14, (BPN) Jesu ea tlotlisitsoeng o ipitsa “Amen” le “paki e tšepahalang, ea ’nete.” ‘Paki ee e Tšepahalang’ e ile ea fana ka bopaki bofe?

‘Ho Pakela ’Nete’

Ha Jesu a ne a qosoa ka pel’a ’musisi oa Roma Pilato, o ile a re: “Ke tsoaletsoe sena, ’me ke tletse sena lefatšeng, hore ke tle ke pakele ’nete. E mong le e mong ea ka lehlakoreng la ’nete o mamela lentsoe la ka.” (Joh. 18:37, NW) Ke ’nete efe eo Jesu a ileng a e pakela? Ke ’nete ea Molimo, tšenolo ea merero ea Jehova ea ka ho sa feleng.—Joh. 18:33-36.

Leha ho le joalo, Jesu o ile a pakela ’nete ee joang? Leetsi la Segerike le emelang ho “pakela” le boetse le bolela “ho phatlalatsa, ho tiisa, ho paka hamolemo, ho bua se setle (ka ho itseng), ho amohela (ho itseng).” Libukeng tsa loli tsa boholo-holo tsa Segerike, ka tloaelo mofuta o mong oa leetsi (mar·ty·roʹ) o ne o hlaha ka mor’a mosaeno, joaloka liphapanyetsanong tsa khoebo. Ka hona, Jesu o ne a lokela ho tiisa ’nete ea Molimo ka tšebeletso ea hae. Ka sebele sena se ne se hloka hore a phatlalatse, kapa a bolelle ba bang ’nete eo. Leha ho le joalo, ho ne ho hlokahala ho eketsehileng, eseng ho bua feela.

Jesu o ile a re: “Ke ’na . . . ’nete.” (Joh. 14:6) E, o ne a phela ka tsela e phethahatsang ’nete ea Molimo. Morero oa Molimo o mabapi le ’Muso le ’Musi oa oona Messia o ne o boletsoe ka ho hlaka boprofeteng. Ka tsela ea hae eohle ea bophelo lefatšeng, e ileng ea qetella ka lefu la hae la sehlabelo, Jesu o ile a phethahatsa lintho tsohle tse neng li profetiloe ka eena. Ka hona o ile a tiisa ’me a fana ka bopaki bo tiileng ba ’nete ea lentsoe la Jehova la boprofeta. Ka baka lena moapostola Pauluse o ne a ka re: “Hobane lipallo tsa Molimo kaofela ha tsona ke e ho eena; ka baka leo, amen [e bolelang, “a ho be joalo,” kapa “ka sebele”] le eona e teng ka eena, Molimo o tle o tlotlisoe ka rōna.” (2 Ba-Kor. 1:20) E, Jesu ke eena eo litšepiso tsa Molimo li phethahalang ho eena.—Tšen. 3:14.

Ho Pakela Lebitso la Molimo

Jesu o ile a ruta balateli ba hae ho rapela: “Ntat’a rōna ea maholimong, lebitso la hao a le ke le halaletsoe [kapa, “le nkoe le halalela; le tšoaroe joaloka le halalelang”].” (Matt. 6:9, NW mongolo o botlaaseng ba leqephe) Ha a rapela Ntate oa hae oa leholimo bosiung ba ho qetela ba bophelo ba hae lefatšeng, Jesu o ile a boela a re: “Lebitso la hao ke le senoletse batho bao u ’neileng bona lefatšeng; e ne e le ba hao, ’me u ’neile bona, ’me ba bolokile lentsoe la hao. Ke ba tsebisitse lebitso la hao, ’me ke tla ’ne ke ba tsebise lona, hore lerato leo u nthatileng ka lona le be ho bona, le ’na ke be ho bona.” (Joh. 17:6, 26) Ha e le hantle, ona e ne e le oona morero oa sehlooho oo Jesu a neng a tlile lefatšeng ka oona. Ho tsebahatsa lebitso la Molimo ho ne ho akarelletsa eng?

Balateli ba Jesu ba ne ba se ba ntse ba tseba lebitso la Molimo ba bile ba le sebelisa. Ba ne ba le bona ba bile ba le bala meqolong ea Seheberu ea Bibele e neng e fumaneha masynagogeng a bona. Ba ne ba boetse ba le bona ba bile ba le bala ho Septuagint—phetolelo ea Segerike ea Mangolo a Seheberu, eo ba neng ba e sebelisa ha ba ruta le ha ba ngola. Haeba ba ne ba tseba lebitso la Molimo, ke ka kutloisiso efe Jesu a ileng a ba senolela lona, kapa a ba tsebisa lona?

Mehleng ea ho ngoloa ha Bibele, mabitso e ne e se mantsoe feela a khethollang. A Greek-English Lexicon of the New Testament, ea J. H. Thayer e re: “Lebitso la Molimo ka T[estamenteng] e N[cha] le sebelisoa bakeng sa litšoaneleho tsohle tseo lebitso leo le li akarelletsang ho barapeli ba hae, le tseo Molimo o itsebahatsang ka tsona ho batho.” Jesu ha aa ka a tsebahatsa lebitso la Molimo ka ho le sebelisa feela empa o ile a boela a le tsebahatsa ka ho senola Motho ea emeloang ke lebitso leo—merero ea hae, mesebetsi ea hae, le litšoaneleho tsa hae. Joaloka ea ‘neng a le sefubeng sa Ntate,’ Jesu o ne a ka hlalosa Ntate ka tsela eo ho seng motho ofe kapa ofe ea ka mo hlalosang ka eona. (Joh. 1:18) Ho feta moo, Jesu o ile a bonahatsa setšoantšo sa Ntat’ae ka tsela e phethahetseng hoo barutuoa ba Jesu ba neng ba ka ‘bona’ Ntate ho Mora. (Joh. 14:9) Jesu o ile a pakela lebitso la Molimo ka seo a ileng a se bua le seo a ileng a se etsa.

O Ile a Paka ka ’Muso oa Molimo

Joaloka “Paki e Tšepahalang,” Jesu e ne e le ’moleli ea hlahelletseng oa ’Muso oa Molimo. Ka tieo o ile a re: “Ke tlameha ho phatlalatsa litaba tse molemo tsa ’muso oa Molimo, hobane ke rometsoe sena.” (Luka 4:43, NW) O ile a bolela ka ’Muso oo oa leholimo ho pholletsa le Palestina eohle, a tsamaea lik’hilomithara tse makholo-kholo ka maoto. O ne a bolela kae kapa kae moo ho neng ho e-na le batho ba ka mamelang: mabōpong a matša, matsoapong, metseng le metsaneng, masynagogeng le tempeleng, ’marakeng, le malapeng a batho. Empa Jesu o ne a tseba hore ho ne ho e-na le moeli oa sebaka seo a neng a ka se sebetsa le lenane la batho bao a neng a ka ba pakela. (Bapisa le Johanne 14:12.) Kahoo Jesu o ile a koetlisetsa barutuoa ba hae ho ba baboleli ba ’Muso a ba a ba roma ka morero oa ho sebetsa tšimo ea lefatše ka kakaretso.—Matt. 10:5-7; 13:38; Luka 10:1, 8, 9.

Jesu e ne e le paki e sebetsang ka thata, e chesehang, ’me ha aa ka a itumella hore a faposoe ke letho. Le hoja a ne a bontša kameho ea botho bakeng sa litlhoko tsa batho, ha aa ka a tšoareha haholo ho etseng lintho tse neng li tla tlisa topollo ea nakoana hoo a ileng a hlokomoloha kabelo ea hae eo a e filoeng ke Molimo ea ho bontša batho tharollo e sa feleng ea mathata a bona—e leng ’Muso oa Molimo. Ka lekhetlo le leng, ka mor’a hore a fepe banna ba ka bang 5 000 ka mohlolo (mohlomong batho ba fetang 10 000 ha ho baloa basali le bana), sehlopha sa Bajode se ne se se se batla ho mo nka ka likhoka le ho mo etsa morena oa lefatšeng. Jesu o ile a etsa joang? O ile “a boela a ea thabeng a ’notši.” (Joh. 6:1-15; bapisa Luka 19:11, 12; Liketso 1:6-9.) Le hoja Jesu a ile a etsa mehlolo e mengata ea ho folisa, o ne a sa tsebahale ka ho khethehileng e le Moetsi oa Mehlolo, empa ho fapana le hoo, balumeli hammoho le ba sa lumelang ba ne ba mo tseba e le “Moruti.”—Matt. 8:19; 9:11; 12:38; 19:16; 22:16, 24, 36; Joh. 3:2.

Ka ho hlakileng, ho pakela ’Muso oa Molimo e ne e le oona mosebetsi oa bohlokoa ka ho fetisisa oo Jesu a neng a ka o etsa. Thato ea Jehova ke hore motho e mong le e mong a tsebe hore na ’Muso oa Hae ke eng ’me a tsebe le kamoo o tla phethahatsa merero ea Hae ka teng. Ke oa bohlokoa ka ho fetisisa pelong ea Hae, hobane ke oona mocha oo ka oona A tla halaletsa lebitso la Hae, a hlakole thohako eohle ho lona. Jesu o ne a tseba seo, ’me o ile a fetola ’Muso oo sehlooho sa boboleli ba hae. (Matt. 4:17) Jesu o ile a phahamisa bobusi ba Jehova bo nang le tokelo ka ho kopanela ka pelo eohle ho boleleng ka bona.

Paki e Tšepahalang Esita le ho Isa Lefung

Ha ho motho ea neng a ka rata Jehova le bobusi ba Hae ho feta Jesu. Joaloka “letsibolo la tsohle tse hloliloeng,” Jesu o ne a ‘tseba Ntat’ae ka botlalo’ ka baka la kamano e haufi-ufi eo a neng a e-na le eona le eena ha e ntse e le sebōpuoa sa moea maholimong. (Ba-Kol. 1:15; Matt. 11:27) O ile a ikokobeletsa bobusi ba Molimo ka boithaopo ka lilemo tse se nang palo pele ho bōptjoa monna oa pele le mosali oa pele. (Bapisa le Johanne 8:29, 58.) E tlameha e be o ile a utloa bohloko hakaakang ha Adama le Eva ba furalla bobusi ba Molimo! Leha ho le joalo, o ile a leta ka mamello ka lilemo tse ka bang 4 000 maholimong, ’me qetellong, ho ile ha fihla nako ea hore a sebeletse e le paki ea Jehova e khōlō ka ho fetisisa e kileng ea e-ba teng lefatšeng!

Jesu o ile a elelloa ka botlalo litseko tsa bokahohleng tse neng li mo ama ka ho toba. Ho ne ho ka ’na ha bonahala eka Jehova o mo sirelelitse. (Bapisa le Jobo 1:9-11.) Ke ’nete hore o ne a bontšitse botšepehi le boinehelo ba hae maholimong, empa na o ne a tla boloka botšepehi tlas’a teko ea mofuta ofe kapa ofe ha e se e le motho lefatšeng? Na o ne a ka hanyetsa Satane boemong boo ho bona ho neng ho bonahala eka sera sa hae se matla ho mo feta?

Mohanyetsi ea kang noha ha aa ka a senya nako. Nakoana ka mor’a ho kolobetsoa le ho tlotsoa ha Jesu, Satane o ile a mo leka hore a bontše boithati, a iphahamise, le hore qetellong a furalle bobusi ba Ntat’ae. Empa polelo ea Jesu e hlakileng ho Satane, “Ke Jehova Molimo oa hao eo u tlamehang ho mo rapela, ’me u tlameha ho nehelana ka tšebeletso e halalelang ho eena feela,” e ile ea bontša hore na o eme hokae litsekong tseo. O ne a fapane hakaakang le Adama!—Matt. 4:1-10, NW.

Tsela eo Jesu a neng a e khethetsoe e ne e bolela ho hlokofatsoa le lefu, ’me Jesu o ne a tseba sena hantle. (Luka 12:50; Ba-Heb. 5:7-9) Leha ho le joalo, “ha a iphumana a le sebōpehong sa motho, o ile a ikokobetsa ’me a utloa ho isa lefung, e, lefu thupeng ea tlhokofatso.” (Ba-Fil. 2:7, 8, NW) Ka tsela eo, Jesu o ile a paka Satane e le raleshano ea tšabehang, a arabela ka ho felletseng potso ena, Na ho na le motho leha e le ofe ea tla boloka botšepehi bobusing ba Molimo haeba Satane a ka lumelloa ho mo leka? Empa lefu la Jesu le ile la finyella ho eketsehileng.

Ka lefu la hae thupeng ea tlhokofatso, Jesu o ile a nehelana ka “sephefumolohi sa hae e le thekollo bakeng sa ba bangata.” (Matt. 20:28, NW; Mar. 10:45, NW) Bophelo ba hae bo phethahetseng ba botho bo ne bo e-na le molemo oa sehlabelo. Ho nehelana ha Jesu ka bophelo ba hae e le sehlabelo ha ho etse feela hore re khone ho fumana tšoarelo ea libe empa ho boetse ho re bulela monyetla oa bophelo bo sa feleng lefatšeng la paradeise, tumellanong le morero oa Molimo oa tšimolohong.—Luka 23:43, NW; Lik. 13:38, 39; Ba-Heb. 9:13, 14; Tšen. 21:3, 4.

Jehova o ile a paka lerato la hae le ho amohela ha hae Jesu e le “Paki e Tšepahalang” ka ho mo tsosa bafung ka letsatsi la boraro. Sena se ile sa tiisa hore bopaki boo Jesu a neng a fane ka bona mabapi le ’Muso e ne e le ba ’nete. (Lik. 2:31-36, NW; 4:10; 10:36-43; 17:31) Hoba a qete matsatsi a 40 a ntse a le tikolohong ea lefatšeng, e leng nako eo ka eona a ileng a itlhahisa ho baapostola ba hae ka makhetlo a mangata, Jesu o ile a nyolohela leholimong.—Lik. 1:1-3, 9.

Jesu o ile a bontša hore ’Muso oa Molimo oa Messia o ne o tla hlongoa nakong e tlang e neng e sa ntsane e le hōle. (Luka 19:11-27) Hape, ketsahalo eo e ne e tla tšoaea qaleho ea ‘ho ba teng ha Jesu le qaleho ea bofelo ba tsamaiso ea lintho.’ (Matt. 24:3, NW) Empa balateli ba hae ba lefatšeng ba ne ba ka hlokomela lintho tsee tse neng li tla etsahala joang? Jesu o ile a ba fa “pontšo”—pontšo e akarelletsang lintho tse ngata e entsoeng ka bopaki bo bongata, ho kopanyelletsa lintoa, litšisinyeho tsa lefatše, likhaello tsa lijo, mafu a seoa, le keketseho ea ho hloka molao. Karolo e hlahelletseng hape ea pontšo eo e ne e tla ba hore litaba tse molemo tsa ’Muso li ne li tla boleloa ho pholletsa le lefatše leo ho ahiloeng ho lona e le bopaki ho lichaba tsohle. Ho ka hlokomeloa litšobotsi tsohle tsa pontšo eo e tsotehang mehleng ea rōna, e leng se bontšang hore re phela nakong ea ho ba teng ha Jesu e le Morena oa leholimo esita le nakong ea bofelo ba tsamaiso ea lintho.a—Matt. 24:3-14, NW.

Leha ho le joalo, ho thoe’ng ka balateli ba Jesu? Nakong ena ea ho ba teng ha Jesu, litho tsa likereke tse ngata tse fapa-fapaneng li bolela hore li latela Kreste. (Matt. 7:22) Leha ho le joalo, Bibele e re ho na le ‘tumelo e le ’ngoe’ feela. (Ba-Ef. 4:5) Kahoo ke joang u ka khethollang phutheho ea ’nete ea Bokreste, eo Molimo o e amohelang le eo o e tataisang? U ka etsa seo ka ho hlahloba seo Mangolo a se bolelang ka phutheho ea Bokreste ea lekholong la pele la lilemo e be joale u sheba hore na ke bo-mang ba latelang mohlala o tšoanang kajeno.

[Mongolo o botlaaseng ba leqephe]

[Ntlha e Qolotsoeng e leqepheng la 20]

‘Ke tsoaletsoe ho pakela ’nete’

[Ntlha e Qolotsoeng e leqepheng la 21]

Jesu o ile a etsa ’Muso oa Molimo sehlooho sa boboleli ba hae

[Ntlha e Qolotsoeng e leqepheng la 22]

Jesu Kreste e bile paki ea Jehova e khōlō ka ho fetisisa e kileng ea ba teng lefatšeng

[Setšoantšo se tletseng leqephe la 23]