Jesu Bophelo le Tšebeletso Tsa Hae

Taeo ea ha ba Tla Arohana

SEJO sa sehopotso se felile, empa Jesu le baapostola ba hae ba sa ntsane ba le phaposing e ka holimo. Le hoja Jesu a tla ba sieo haufinyane, o sa na le lintho tse ngata tseo a sa tla ba bolella tsona. Oa ba tšelisa: “Pelo tsa lōna li se ferekane; lumelang ho Molimo.” Empa ho hlokahala ho eketsehileng. Oa phaella: “Le ho ’na le lumele.”

Jesu o tsoela pele: “Meaho e mengata ka tlung ea Ntate; ke ea ho le lokisetsa bolulo . . . hore moo ’na ke leng teng, le lōna le be teng. ’Me moo ke eang, lea tseba, le tsela lea e tseba.” Baapostola ha ba utloisise hore Jesu o bua ka ho ea leholimong, kahoo Thomase oa botsa: “Morena, ha re tsebe moo u eang; tsela re ka e tseba joang na?”

Jesu oa arabela: “Ke ’na tsela, le ’nete, le bophelo.” E, ke feela ka ho mo amohela le ho etsisa tsela ea hae ea bophelo motho a ka kenang tlung ea leholimo ea Ntate hobane, joalokaha Jesu a bolela. “Ha ho motho ea ka tlang ho Ntate ha e se ka ’na.”

Filippi oa kōpa: “Morena, re bontše Ntate, ’me etlaba ho re lekane.” Kamoo ho bonahalang ka teng Filippi o batla hore Jesu a fane ka pontšo e bonahalang ea Molimo, e kang e ileng ea fuoa Moshe, Elisha le Esaia ka lipono mehleng ea boholo-holo. Empa, ka sebele, baapostola ba na le ho molemonyana ho feta lipono tsa mofuta oo, joalokaha Jesu a hlokomela: “Ke lutse le lōna nako e kalo, ’me ha ua ka ua ntseba, Filippi, na? Ea mponang o bone Ntate.”

Jesu o bonahatsa botho ba Ntat’ae ka ho phethahetseng hoo ho phela le eena le ho mo ela hloko ho tšoanang hantle le ho bona Ntate ka ho toba. Leha ho le joalo, Ntate o moholo ho Mora, joalokaha Jesu a lumela: “Mantsoe ao ke le bolellang ’ona, ha ke a bolele ke ’notši.” Ka ho loketseng Jesu o fa Ntate oa hae oa leholimo tlotla eohle eo a e fumaneng ka baka la lithuto tsa hae.

E tlameha e bile ho khothatsang baapostola hakaakang ho utloa Jesu joale a ba bolella: “Ea lumelang ho ’na, mesebetsi eo ke e etsang, o tla e etsa le eena, o tla etsa le e fetisang ena”! Jesu ha a bolele hore balateli ba hae ba tla bontša matla a ho etsa mehlolo a maholo ho a hae. Che, empa o bolela hore ba tla ntšetsa tšebeletso pele ka nako e teletsana, sebakeng se seholoanyane, le ho batho ba bangata haholo.

Jesu a ke ke a lahla barutuoa ba hae kherehloa ha a se a tsamaile. Oa tšepisa: “Tsohle tsee le tla li kōpa ka lebitso la ka, ke tla li etsa.” Hape, o re: “Ke tla rapela Ntate, ’me o tla le nea moemeli [“mothusi,” NW] e mong, a tle a lule le lōna ka ho sa feleng, moea oa ’nete.” Hamorao, ka mor’a ho nyolohela leholimong, Jesu o tšollela moea o halalelang, holim’a barutuoa ba hae, e leng oona mothusi enoa e mong.

Jesu o se a tla tsamaea, joalokaha a re: “Ho se ho se hokae, ’me lefatše ha le sa tla mpona.” Jesu e tla be e le sebōpuoa sa moea seo ho seng motho ea ka se bonang. Empa hape Jesu o tšepisa baapostola ba hae ba tšepahalang: “Lōna le tla mpona; ereka ha ’na ke phela, le lōna le tla phela.” E, e seng feela hore Jesu o tla hlaha ho bona ka sebōpeho sa motho ka mor’a tsoho ea hae empa ka nako ea teng o tla ba tsosetsa ho phela le eena leholimong e le libōpuoa tsa moea.

Joale Jesu o bolela molao ona o bonolo: “Ea nang le melao ea ka, ’me a e boloka, ke eena ea nthatang; ’me ea nthatang o tla ratoa ke Ntate; le ’na ke tla mo rata, ’me ke tla ipontša eena.”

Ho sena moapostola Judase, eo hape a bitsoang Thaddea, oa kenella: “Morena, ke ka’ng ha u tla ipontša rōna, u sa ipontše lefatše?”

Jesu oa arabela: “Ekare ha motho a nthata, o tla boloka lentsoe la ka; Ntate o tla mo rata . . . Ea sa nthateng, ha a boloke mantsoe a ka.” Ho fapana le balateli ba hae ba utloang, lefatše le batho ha le natse lithuto tsa Kreste. Kahoo ha a iponahatse ho bona.

Nakong ea tšebeletso ea hae lefatšeng, Jesu o rutile baapostola ba hae lintho tse ngata. Ba ka li hopola joang kaofela, haholo-holo joalokaha, ho fihlela nakong ena, ba ntse ba hlōleha ho utloisisa ho hongata hakaale? Ka ho thabisang, Jesu oa tšepisa: “Moemeli, e leng moea o halalelang, eo Ntate a tla mo roma ka lebitso la ka, ke eena ea tla le ruta tsohle, ’me o tla le hopotsa le tsohle tsee ke le boleletseng tsona.”

A boela a ba tšelisa, Jesu o re: “Ke le siela khotso; ke le fa khotso ea ka . . . Lipelo tsa lōna li se ferekane, ’me li se tšohe.” Ke ’nete, Jesu oa tsamaea, empa oa hlalosa: “Hoja lea nthata, le ka be le thabile, ha ke itse: Ke ea ho Ntate; hobane ntate o moholo ho ’na.”

Nako e setseng ea hore Jesu a ’ne a be le bona e khutšoanyane. O re: “Ha nka ke ka hlola ke bua le lōna haholo, hobane morena oa lefatšeng lena oa tla; ’me ha a na letho ho ’na [“ha a na taolo holim’a ka,” NW].” Satane Diabolose, eena ea ileng a kena ho Judase ’me a mo susumetsa, ke morena oa lefatše. Empa Jesu ha a na bofokoli ba sebe boo Satane a ka nkang monyetla ka bona ho mo khelosa ho sebeletsa Molimo. Johanne 14:1-31; 13:27; Luka 22:3, 4; Exoda 24:10; 1 Marena 19:9-13; Esaia 6:1-5.

◆ Jesu o ea hokae, ’me Thomase o fumana karabelo efe mabapi le tsela e eang moo?

◆ Ho ea ka kōpo ea hae, kamoo ho bonahalang ka teng Filippi o batla hore Jesu a fane ka eng?

◆ Ke hobane’ng ha ea boneng Jesu a bone le Ntate?

◆ Ke joang balateli ba Jesu ba etsang mesebetsi e meholo ho eo a e entseng?

◆ Ke ka moelelo ofe Satane a se nang taolo holim’a Jesu?