‘Linako Tsa Tsosoloso’ li Atametse!
Pejana Jesu a nyolohela leholimong, ba bang ba barutuoa ba hae ba tšepahalang ba ile ba mo botsa: “Morena, na u khutlisetsa ’muso ho Iseraele nakong ee?” Karabo ea Jesu e ile ea fana ka maikutlo a hore ho ne ho tla feta nako e itseng pele ’Muso oo o ka tla. Nakong eo, ho ne ho tla ba le mosebetsi o mongata oo balateli ba hae ba lokelang ho o etsa. E ne e lokela ho ba lipaki tsa Jesu “Jerusalema hammoho le Judea le Samaria kaofela le ho isa karolong e hōle-hōle ea lefatše.”—Liketso 1:6-8.
KABELO eo e ne e ke ke ea finyelloa ka matsatsi a seng makae, libeke tse seng kae kapa likhoeli tse seng kae. Leha ho le joalo, kapele feela barutuoa bana ba ile ba qala ho bolela. Empa ha baa ka ba felloa ke thahasello tabeng ea tsosoloso. Moapostola Petrose o ile a bua ka eona ho batho ba bangata ba neng ba bokane Jerusalema, a re: “Bakang, ’me le sokolohe e le hore libe tsa lona li hlakoloe, e le hore linako tse khathollang li ka tla ho tsoa ho Jehova ka boeena le hore a ka romela Kreste ea behetsoeng lōna, Jesu, eo leholimo, ka sebele, le lokelang ho mo boloka ka hare ho lona ho fihlela linakong tsa tsosoloso ea lintho tsohle tseo Molimo a ileng a bua ka tsona ka melomo ea baprofeta ba hae ba halalelang ba nakong ea khale.”—Liketso 3:19-21.
‘Linako tsena tsa tsosoloso’ li ne li lokela ho tlisa “linako tse khathollang” tse tsoang ho Jehova. Tsosoloso e boletsoeng esale pele e ne e lokela ho tla ka mekhahlelo e ’meli. Oa pele ke oa tsosoloso ea moea e khathollang, e tsoelang pele hona joale. Oa bobeli ke oa ho thehoa ha paradeise ea sebele lefatšeng ho neng ho tla latela.
Tšimoloho ea Nako ea Tsosoloso
Joalokaha moapostola Petrose a ile a hlalosetsa batho bao ba bangata ba Jerusalema, leholimo le ile la ‘boloka Jesu ka hare ho lona.’ Ho bile joalo ho fihlela ka 1914, ha Jesu e e-ba ’musi ’me a qala ho busa e le Morena ea khethiloeng oa Molimo. Ka nako eo, Petrose o ile a bolela esale pele hore Jehova o ne a tla “romela” Mora oa hae ka kutloisiso ea hore O ne a tla lumella hore Jesu a phethe karolo ea hae e le motho ea ka sehloohong mererong ea Molimo. Bibele e hlalosa ketsahalo ena ka puo ea tšoantšetso: “’Me [mokhatlo o hlophisitsoeng oa Molimo oa leholimo oa] beleha mora, e motona, [’Muso oa Molimo o matsohong a Jesu Kreste] ea tla lisa lichaba kaofela ka molamu oa tšepe.”—Tšenolo 12:5.
Empa lichaba li ne li sa ikemisetsa ho ipeha tlas’a puso ea Kreste. Ha ho pelaelo hore li ile tsa hlasela ka lipolelo bahlanka ba hae ba lefatšeng ba tšepahalang, bao kajeno ba tsejoang e le Lipaki tsa Jehova. Joaloka lilelekela tsa tsona tsa nakong ea baapostola, Lipaki li ile tsa etsa “mosebetsi oa ho paka ka Jesu” ntle ho tieho. (Tšenolo 12:17) Khanyetso ea mosebetsi oo Bakreste bana ba khabane ba neng ba o etsa e ile ea befa linaheng ka ho latellana. Ka 1918, litho tse ikarabellang tse sebetsang ntlo-khōlō ea Mokhatlo oa Watch Tower e Brooklyn, New York, li ile tsa qosoa makhotleng ka liqoso tsa bohata ’me ka leeme tsa ahloleloa hore li koalloe teronkong ka nako e telele. Ka nako e itseng ho ile ha bonahala eka mosebetsi oa kajeno oa ho paka “ho isa karolong e hōle-hōle ea lefatše” o tla hlōleha.—Tšenolo 11:7-10.
Leha ho le joalo, ka 1919, litho tse kentsoeng teronkong tse sebetsang ntlo-khōlō li ile tsa lokolloa ’me hamorao tsa hlakoloa molato ka ho feletseng liqosong tsohle tsa bohata. Ha lia ka tsa senya nako pele li ka qalisa mosebetsi oa tsosoloso ea moea. Ho tloha ka nako eo, batho ba Jehova ba ’nile ba thabela katleho ea moea eo ho seng mohla e kileng ea e-ba teng.
Ho ile ha etsoa letšolo le leholo haholo la ho ruta batho ba lichaba tsohle ho boloka lintho tseo Kreste a neng a laetse balateli ba hae hore ba li etse. (Matheu 28:20) Ho ne ho khatholla hakaakang ho bona ha ba bang ba neng ba bonahatsa litšobotsi tsa bophoofolo ba fetola pono ea bona! Ba ile ba hlobola botho ba khale, bo hlahisang litšobotsi tse kang “bohale,” “puo e nyefolang” le “puo e nyonyehang,” ’me ba apara botho bo bocha, “boo ka tsebo e nepahetseng bo ntseng bo nchafatsoa ho ea ka setšoantšo sa [Molimo] ea bo bōpileng.” Le hona joale mantsoe a moprofeta Esaia a phethahala ka kutloisiso ea moea: “Phiri [motho ea neng a bonahatsa litšobotsi tse kang tsa phiri] e tla lula le konyana [motho ea bonahatsang boikutlo ba ho ba bonolo], lengau le bothe le potsanyane; namane le taoana le khomo e nontšitsoeng li tla ba hammoho.”—Bakolose 3:8-10; Esaia 11:6, 9.
Tsosoloso e Eketsehileng e Atametse!
Ho ekelletsa tsosolosong e tlisitseng paradeise ea moea kajeno, nako e atamela ka potlako eo ka eona polanete ea rōna e tla ba paradeise ea sebele. Karolo e nyenyane ea lefatše e ne e le paradeise ha Jehova a ne a beha baholo-holo ba rōna, Adama le Eva, tšimong ea Edene. (Genese 1:29-31) Ke ka lebaka leo re ka bolelang hore Paradeise ea tsosolosoa. Leha ho le joalo, pele seo se etsahala, bolumeli ba bohata bo hlomphollang Molimo bo lokela ho felisoa lefatšeng. Mekha ea lipolotiki ea lefatše lena e tla etsa sena. (Tšenolo 17:15-18) Se tla latela ke hore mekha ea lipolotiki le ea khoebo, hammoho le batšehetsi ba eona e tla felisoa. Qetellong, bahanyetsi ba ho qetela ba Molimo—Satane Diabolose le bademona ba hae—ba tla koalloa ka lilemo tse sekete—e leng nako e tla nkoa ke mosebetsi oa tsosoloso. Nakong eo, “naha e tšehla e tla thaba, le lona lefatše le omeletseng; mahalaopa a tla nyakalla, a mele lipalesa joalo ka leshoma.” (Esaia 35:1) Lefatše lohle le tla lokoloha pherekanong. (Esaia 14:7) Esita le ba limilione ba shoeleng ba tla tsosoa hore ba boele ba tl’o phela lefatšeng. Bohle ba tla latsoa melemo e tsosolosang ea sehlabelo sa thekollo. (Tšenolo 20:12-15; 22:1, 2) Ha ho sa tla ba le lifofu, lithōlō kapa batho ba holofetseng lefatšeng. “Ha ho moahi ea tla re: ‘Kea kula.’” (Esaia 33:24, NW) Kapele ka mor’a hore Puso ea Kreste ea Lilemo tse Sekete e fele, Diabolose le bademona ba hae ba tla lokolloa ka nako e khutšoanyane ’me ba tla bona kamoo morero oa Molimo ka lefatše o phethahetseng kateng ho fihlela nakong eo. Qetellong, ba tla felisoa ka ho sa feleng.—Tšenolo 20:1-3.
Ha lefatše le fihla qetellong ea lilemo tse sekete tsa tsosoloso, “tse phefumolohang kaofela” li tla rorisa Jehova, ’me li tla etsa joalo kamehla le mehla. (Pesaleme ea 150:6) Na u tla ba har’a tsona? Ho ka ba joalo.