April—Nako ea ‘ho Sebetsa ka Thata le ho Ikitlaetsa’
1 Libeke tse pota-potileng Sehopotso ke nako ea ho thuisa ho batho ba Jehova. Ena ke nako ea ho nahanisisa ka se finyeletsoeng ke lefu la Kreste le ho thuisa ka tšepo eo re e filoeng ke Molimo eo mali a tšolotsoeng a Jesu a entseng hore e khonehe. Ha u nahana ka la 19 April selemong se fetileng, u hopola eng? Na u sa hopola lifahleho tseo u ileng ua li bona mantsiboeeng ao? moea o hloekileng, oa lintho tsa moea Sehopotsong? puisano ea Bibele e tebileng le lithapelo tse tlohang botebong ba pelo? Mohlomong u ile ua ikemisetsa ho bontša ka botlalo haholoanyane ho teba ha teboho ea hao bakeng sa lerato leo Jehova le Jesu ba u bontšitseng lona. Ho thuisa ho joalo ho u ama joang hona joale?
2 Ho hlakile hore batho ba Jehova ba bontša teboho ka litsela tse ngata ho feta teboho ea mantsoe. (Bakol. 3:15, 17) Ka April, selemong se fetileng, ka ho khetheha re ile ra hahamalla ho bonahatsa kananelo ea rōna bakeng sa litokisetso tsa Jehova bakeng sa poloko ka ho ikitlaetsa tšebeletsong ea Bokreste. Bo-pula-maliboho ba thusang ba ne ba baloa ka likete, ba feta tlhōrō e ka pele ho eo Afrika Boroa ka karolo ea 27 lekholong. Linaha tse ling tse tlas’a lekala la Afrika Boroa le tsona li ile tsa tlaleha litlhōrō tse ncha tsa bo-pula-maliboho ba thusang. Boiteko ba bona, hammoho le ba baboleli ba bang bohle ba ’Muso, bo ile ba fella ka litlhōrō tse ncha tsa lihora, ho tsamaisoa ha limakasine le maeto a ho boela. Thabo ea rōna e ile a eketsoa ke ho bona ho qalisoa lithuto tse ncha tsa Bibele tse likete ’me ba bangata ba e-ba teng Sehopotsong!
3 Ka sebele, ho tiea ha tšepo ea rōna ho re susumelletsa ketsong. Ho joalokaha moapostola Pauluse a ngotse: “Ho finyella sena re sebetsa ka thata ’me rea ikitlaetsa, hobane re behile tšepo ea rōna ho Molimo ea phelang, eo e leng Mopholosi oa batho ba mefuta eohle, haholo-holo oa ba tšepahalang.”—1 Tim. 4:10.
4 Nakong ee ea Sehopotso, u tla bonahatsa tumelo ea hao joang litokisetsong tsa Jehova bakeng sa bophelo? Ka April selemong se fetileng re bone palo e phahameng ka ho fetisisa e kileng ea tlalehoa ea bahoeletsi ba ’Muso Afrika Boroa. Na re ka feta palo eo ka April selemong see? Ke seo re ka se finyellang. Empa ho tla hlokahala hore mohoeletsi e mong le e mong, ea kolobelitsoeng le ea sa kolobetsoang, a kopanele. Ba bangata ba bacha le bona ba ka ’na ba tšoaneleha hore ba kopanele. Kahoo, ha u ntse u etsa litokisetso tsa ho sebetsa ka thata le ho ikitlaetsa ka April selemong sena, hlahloba litsela tseo u ka susumetsang ba bang ka tsona, ho akarelletsa le ba bacha le ba se nang phihlelo, hore ba tsamaee le uena.
5 Ho Thusa ba Bang ho Tsosolosa Tšebeletso ea Bona: Haeba u tseba ba bang ba e-song ho tsoele tšebeletsong ea tšimo khoeli kapa tse peli, mohlomong u ka ba khothatsa le ho ba memela ho tsamaea le uena tšebeletsong ea tšimo. Haeba ba bang ka phuthehong ba fetohile ba sa kopaneleng tšebeletsong, baholo ba tla etsa boiteko bo khethehileng hore ba ba etele le ho ba khothatsa ho qala bocha ka April.
6 Kaofela ha rōna re tlameha ho tsoela pele ho kōpa moea oa Jehova ho re matlafatsa tšebeletsong ea hae. (Luka 11:13) Re tlameha ho etsa’ng hore re fumane moea oo? Bala Lentsoe le bululetsoeng la Molimo. (2 Tim. 3:16, 17) Hape re tla tlameha hore re “utloe seo moea o se bolellang liphutheho” ka hore re be teng libokeng tsohle tse hlano beke le beke. (Tšen. 3:6) Joale ona ke monyetla oa ho thusa ba sa tsoeng kamehla le ba sa kopaneleng tšebeletsong hore ba ntlafatse mekhoeng ea bona ea ho ithuta le ho ba ba tsitsitseng ho beng ha bona libokeng. (Pes. 50:23) Re etsa sena ha le rōna re ntse re shebisisa bophelo ba rōna ba moea. Empa ho hlokahala ho hong hape.
7 Moapostola Petrose o ile a hlalosa hore Molimo o fana ka moea oa hae o halalelang ho “ba mo mamelang e le ’musi.” (Lik. 5:32) Ho mamela ho joalo ho akarelletsa ho ela hloko taelo ea hore “re bolelle batho le ho fana ka bopaki bo phethahetseng.” (Lik. 1:8; 10:42) Kahoo, le hoja e le ’nete hore re hloka moea oa Molimo ho re matlafaletsa ho bolela, hape e sa le ’nete hore ha re qala ho bontša takatso ea rōna ea ho thabisa Jehova, o re thusa le ho feta. E se eka le ka mohla re ke ke ra nyenyefatsa bohlokoa ba ho nka bohato boo bo qalang ba ho ithaopela ho mamela!
8 Ho Thusa ba Bacha Lilemong: Batsoali, na le bone bopaki ba hore bana ba lōna ba batla ho bua le ba bang ka ’nete? Na ba ’nile ba tsamaea le lōna tšebeletsong ea tšimo? Na boitšoaro ba bona bo beha mohlala? Haeba ho joalo, ke hobane’ng ha le qeaqea? Atamelang e mong oa litho tsa Komiti ea Tšebeletso ea Phutheho, ’me le bone hore na ngoana oa lōna oa tšoaneleha hore a baloe e le mohoeletsi ka April selemong sena. (Bona buka ea Tšebeletso ea Rōna, leqepheng la 99-100.) Hlokomelang hore bana ba lōna ba ka tlatsetsa ka tsela e khōlō mohoong oa thoriso o eang ho Jehova nakong ena ea Sehopotso.—Mat. 21:15, 16.
9 ’Mè e mong oa Mokreste Georgia, U.S.A., kamehla o ne a khothalletsa morali oa hae e monyenyane hore a bue le ba bang ka Jehova. Selemong se fetileng, ha ngoanana eo a ntse a tšoarehile tšebeletsong le ’mè oa hae, o ile a tsamaisetsa monna e mong bukana ea Seo a se Hlokang ’me ka bokhutšoanyane a hlalosa lethathamo la tse ka hare. Monna eo o ile a botsa: “U lilemo li kae?” O ile a re: “Tse supileng.” Monna eo o ile a makalla ho bona a bua le eena ka tsela e utloahalang hakaalo. O ne a hōliselitsoe ’neteng empa ho se mohla a ileng a e nka ka ho teba bophelong ba hae. Kapele ka mor’a moo, ho ne ho khannoa thuto ea Bibele le monna eo, mosali oa hae le morali oa hae.
10 Bacha ba bangata e se e le bahoeletsi, ’me re thabela ho tsamaea le bona ha ba sebetsa le rōna tšebeletsong. Bacha bana ba ka susumetsa le ho khothatsa lithaka tsa bona. Empa April e sa boetse e le nako e loketseng ea hore malapa a matlafatse litlamo tsa ’ona le ho haha bomoea ba ’ona ka ho sebetsa hammoho tšebeletsong e halalelang. Lihlooho tsa malapa li lokela ho etella pele ho sena.—Liprov. 24:27.
11 Ho Thusa ba Bacha ’Neteng: Ho thoe’ng ka ba bacha bao u ithutang Bibele le bona? Na ba ka tlatsetsa boitekong bo khethehileng ka April selemong see? Mohlomong ba ile ba u bolella hore ba lakatsa ho bolella ba bang seo ba ithutang sona ha le akaretsa khaolo ea 2, serapeng sa 22 kapa khaolo ea 11, serapeng sa 14, bukeng ea Tsebo. Haeba le le haufi le ho qeta buka ena, itokisetseng ho bua ka taba ena pepenene ha le akaretsa khaolo ea 18, serapeng sa 8 se reng: “Mohlomong u laba-labela ho bolella beng ka uena, metsoalle, le ba bang seo u ithutang sona. Ha e le hantle, e ka ’na eaba u se u ntse u etsa joalo, feela joalokaha Jesu a ile a arolelana litaba tse molemo le ba bang maemong ao a sa a rerang. (Luka 10:38, 39; Johanne 4:6-15) Joale u ka ’na ua batla ho etsa ho eketsehileng.” Na ho joalo le ka bao u ithutang le bona?
12 Na motho eo u ithutang le eena o lumela Lentsoe la Molimo? Na o ’nile a sebelisa melao-motheo ea Bibele? Na o entse hore bophelo ba hae bo lumellane le litekanyetso tsa bomolimo? Na o ’nile a ba teng libokeng tsa phutheho? Na o batla ho sebeletsa Jehova Molimo? Joale ke hobane’ng ha u sa mo khothalletse hore a bue le baholo e le hore ba ka fumana hore na oa tšoaneleha hore e ka ba mohoeletsi ea sa kolobetsoang kapa che ’me a sebetse le uena ka April? (Bona buka ea Tšebeletso ea Rōna, leqepheng la 97-9.) Ka tsela ena a ka qala ho latsoa ka lekhetlo la pele kamoo mokhatlo o hlophisitsoeng oa Jehova o tlang ho mo tšehetsa kateng boitekong ba hae ba ho sebeletsa Jehova.
13 Ke ’nete, liithuti tse ling li tsoela pele ka potlako ho feta tse ling. Kahoo, tumellanong le tataiso e leqepheng la 4, serapeng sa 5-6 ho Tšebeletso ea Rōna ea ’Muso ea June 2000, ba bangata ba ’nile ba ithuta buka ea bobeli le batho ba bonahalitseng thahasello qalong empa ba ne ba hloka thuso e eketsehileng hore ba kopanele ka mafolofolo. Le ka mohla ha re felloe ke tšepo ea hore bana ba lipelo li tšepahalang ba tla fetoha barutuoa ba ’nete ba Kreste, “ebang ke ka nako e khutšoanyane kapa ka nako e telele.” (Lik. 26:29) Empa, haeba palo ea likhoeli tseo le ’nileng la li qeta le ithuta le batho ba joalo e hlalositsoe hamolemo e le “nako e telele,” na ebe mohlomong nako ee ea Sehopotso ke monyetla oa hore seithuti sa hao se qale ho bontša hore na se ananela thekollo ea Kreste ka ho teba?
14 Mokhoa oa ho ba Thusa ho Kopanela: Re ithuta ho eketsehileng ka ho thusa ba tšoanelehang hore ba qalise tšebeletsong ka ho hlahloba hore na Jesu o ile a koetlisa ba bang joang. Hase hore o ile a fumana batho feela ’me a bolella baapostola ba hae hore ba qale ho bua le bona. O ile a qala ka ho hatisa hore mosebetsi oa ho bolela oa hlokahala, a khothalletsa boikutlo ba ho rapela, eaba o ba fa litokisetso tsa motheo tse tharo: ’mate, kabelo ea tšimo le molaetsa. (Mat. 9:35-38; 10:5-7; Mar. 6:7; Luka 9:2, 6) U ka etsa se tšoanang. Ebang u tla be u thusa ngoana oa hao, seithuti se secha, kapa e mong ea e-song ho tlalehe tšebeletso leha e le efe ka nako e itseng, e ne e tla ba ho loketseng ho etsa boiteko bo khethehileng ho phehella lipakane tse latelang.
15 Totobatsa Tlhokahalo: Hatisa ho motho eo bohlokoa ba mosebetsi oa ho bolela. E-ba le boikutlo bo botle ka taba ena. Pheta liphihlelo tse bontšang seo phutheho e se finyeletseng tšebeletsong. Bonahatsa moea oo Jesu a o bontšitseng ho Matheu 9:36-38. Khothalletsa motho eo e ka ’nang ea e-ba mohoeletsi kapa motho ea sa kopaneleng tšebeletsong hore a rapele ka ho kopanela ha hae tšebeletsong hammoho le ho atleha ha mosebetsi lefatšeng ka bophara.
16 Khothalletsa Motho ho Nahana ka Menyetla e Mengata ea ho Paka: Bolela monyetla o ka bang teng oa ho kopana le sehlopha sa thuto ea buka bakeng sa ho paka ka ntlo le ntlo. Bua ka ho qoqa le beng ka uena le bao u tloaelaneng le bona kapa ho bua le basebetsi-’moho kapa bao u kenang sekolo le bona nakong ea khefu ea lijo tsa motšehare. Ha motho a tsamaea ka lipalangoang tsa sechaba, hangata a ka qala moqoqo ka hore feela a thahaselle baeti-’moho le eena. Ha e le rōna ba qalang, hangata sena se bula monyetla oa ho fana ka bopaki. Ka sebele ho na le menyetla e mengata ea ho kopanela tšepo eo re nang le eona le ba bang “letsatsi le letsatsi.”—Pes. 96:2, 3.
17 Leha ho le joalo, mohlomong ho ne ho ka ba hotle hore uena le mohoeletsi e mocha le sebetse hammoho ka ntlo le ntlo kapele kamoo ho ka khonehang. Haeba u ipehetse pakane ea ho eketsa tšebeletso ea hao ka April, botsa mohlanka oa tšimo hore na ho na le tšimo e u loketseng. Haeba e le teng, sena se tla u neha menyetla ea ho e sebetsa ka ho feletseng. Ka mohlala, ha u qeta tšebeletso kapa u e-ea libokeng kapa libakeng tse ling, u ka ’na ua hlokomela hore ho na le motho lapeng leo pele u sa kang ua fumana motho kapa moo ho neng ho e-na le thahasello. Haeba ho loketse, mo etele hakhutšoanyane nakong eo ho etsa joalo ho ka atlehang haholo. ’Me sena se tla tlatsetsa boikutlong ba ho finyella ho itseng le thabo tšebeletsong.
18 Lokisetsa Molaetsa o Ipiletsang: Hore motho a rate ho arolela ba bang molaetsa oa ’Muso ho fapane hōle le hore a ikutloe a itšepa ka tsela ea hae ea ho o fetisetsa ho ba bang, haholo-holo ha a le mocha kapa e le khale a sa tsoele tšebeletsong. Ho thusa ba bacha le ba khaolitseng ho kopanela tšebeletsong ho lokisetsa ke habohlokoa. Liboka tsa Tšebeletso le liboka tsa tšebeletso ea tšimo li ka fana ka likhopolo tse molemo, empa ha ho na se ka nkelang sebaka ho lokisetsa ha motho ka mong.
19 U ka thusa ba bacha hore ba lokiselletse tšebeletso joang? Qala ka nehelano ea limakasine, ’me e be e bonolo le e khutšoanyane! Ba kōpe hore ba nahane ka liketsahalo tse litabeng tse tla ama batho ba tšimong eo, ebe joale u fumana ntlha e ’ngoe ho e ’ngoe ea limakasine tsa morao-rao tse amanang le tsona. Itlhakisetseng nehelano hammoho, ’me le e sebelise tšebeletsong kapele kamoo ho ka khonehang.
20 A re Itokiselletseng Keketseho e ka ’Nang ea E-ba Teng ka Moso: Selemong se fetileng ba bileng teng Sehopotsong lefatšeng ka bophara ba ne ba feta limilione tse 14,8. Palo e tlalehang ea bahoeletsi e ne e feta feela limilione tse tšeletseng. Hona ho bolela hore batho ba ka bang limilione tse 8,8 ba ne ba thahasella hoo ba ileng ba tla lenaneong lena le khethehileng moo ba ileng ba utloa ha e ’ngoe ea lithuto tse ka sehloohong tsa Bibele e hlalosoa. Ba ile ba tseba ba bang ba rōna, e leng hoo mohlomong ho ileng ha ba khahla haholo. Ba bangata ba bona ba re bua hantle, ba ntša monehelo bakeng sa mosebetsi oa rōna oa lefatšeng ka bophara, le ho re sireletsa ho ba bang. Sehlopha sena se seholo se emela keketseho e ka ’nang ea e-ba teng ka moso. Re ka etsa eng ho ba thusa hore ba tsoele pele?
21 Boholo ba ba bang teng Sehopotsong ba etsa joalo ka lebaka la memo e tsoang ho e mong oa rōna. Hangata, hona ho bolela hore bonyane ba na le motho eo ba tloaelaneng le eena har’a bamameli. Haeba motho a e-ba teng ka lebaka la memo ea rōna, re na le boikarabelo ba ho etsa hore a ikutloe a amohelehile ’me re mo thuse hore a rue molemo ka botlalo lenaneong. Kaha holo e tla be e tletse, mo thuse hore a fumane setulo. Mo alime Bibele, ’me u mo meme hore a kopanele le uena buka ea lipina. Araba potso leha e le efe eo a ka ’nang a e botsa. Ho mo hlokomela ha hao ka mofuthu e ka ba ntho e khōlō ho hlaoleleng thahasello ea hae. Ke ’nete hore kaofela re arolelana boikarabelo bona—haeba re bona sefahleho se sa tloaelehang, se amohele ka mofuthu ’me u qoqe le eena ka bokhutšoanyane hore le tloaelane.
22 Ho ba teng Sehopotsong ho ka ba le tšusumetso ea sebele monahanong oa motho eo. Taba ea hore o tlile sebokeng e ka ’na ea fana ka maikutlo a hore ha a e-s’o fumane seo a se batlang kae-kae le hore rōna re fana ka ho hong hoo a utloang ho hlokahala hore a ho hlahlobele haufi-ufi. Tlhaloso ea tokisetso e babatsehang ea thekollo e ka ba tšenolo e utloahalang ho motho ea sa utloisiseng lerato le se nang moeli la Jehova. A ka ’na a bona habonolo hore re fapane—rea tšepahala, re na le botsoalle, re na le lerato hape re na le tlhompho. Holo ea rōna ha e tšoane ho hang le seo e ka ’nang eaba o se bone likerekeng tse nang le litšoantšo le litšebeletso tse se nang moelelo. Ba bacha ba tla hlokomela hore bamameli ke batho ba mefuta eohle le hore ha ho nkuoe koleke. Ho tseba sena e ka ba tšusumetso e matla hore ba tle ba khutlele.
23 Ka mor’a Sehopotso, ho lokela ho be le e mong ea hlokolosi ho latella ho ea thusa motho e mong le e mong e mocha ea bileng teng. Haeba u memme ba bacha ’neteng, u na le boikarabelo bo khethehileng. Pele ba tsamaea, etsa bonnete ba hore baa tseba ka liboka tse ling tse Holong ea ’Muso. Bolela sehlooho sa puo e latelang ea phatlalatsa. Ba tsebise sebaka le nako ea Thuto ea Buka ea Phutheho e haufi le ha bona. Hamorao, ba fe buka ea Ho Batla, ’me u ba tsebise hore puisano ea beke eo ea la 16 April e tla ba “Bokreste—Na Jesu e ne e le Tsela e Isang ho Molimo?”
24 Lokisetsa ho ba etela malapeng a bona ka leeto la botsoalle. Etsa bonnete ba hore ba na le bukana ea Seo a se Hlokang le buka ea Tsebo, tse ba tloaelanyang le lithuto tsa motheo tsa Bibele. Haeba ba e-s’o qale ho ithuta, ba bolelle ka thuto ea Bibele. Etsa tlhahiso ea hore ba bale bukana ea Lipaki Tsa Jehova, e fanang ka leseli le hlakileng la hore na mokhatlo o hlophisitsoeng o sebetsa joang. Ba meme hore ba shebelle livideo tsa rōna, tse kang Our Whole Association of Brothers. Lokisetsa hore ba kopane le ba bang ka phuthehong. Likhoeling tse tlang, lula u iteanya le ba bacha; ba meme hore ba tle libokeng ha molebeli oa potoloho a le teng kapa ha le e-na le kopano ea potoloho kapa kopano ea letsatsi le khethehileng. Ba fe monyetla o mong le o mong hore ba iponahatse “ba e-na le tšekamelo e nepahetseng bakeng sa bophelo bo sa feleng”!—Lik. 13:48.
25 Seo Baholo ba ka se Etsang: Ho atleha boitekong bo matla tšebeletsong ka April ho tla itšetleha haholo ka baholo. Haeba u khanna thuto ea buka, etsa lethathamo la lintho tseo u ka li etsang ho thusa e mong le e mong ea sehlopheng sa hao sa thuto ea buka hore a kopanele tšebeletsong e khethehileng. Na ho na le ba abetsoeng sehlopheng sa hao ba bacha lilemong, ba bacha ’neteng, ba sa tsoeng kamehla, kapa ba khaolitseng ho kopanela tšebeletsong? Hlahlobang ho bona hore na batsoali, bo-pula-maliboho, kapa bahoeletsi ba bang ba ithaopetse ho ba thusa. Thusang ka hohle kamoo le ka khonang. Morali e mong oabo rōna ea neng a sa tsoe kamehla tšebeletsong ea tšimo ka lilemo tse peli o ile a qeta lihora tse fetang 50 tšebeletsong ka April selemong se fetileng. O ile a susumetsoa ke eng? O itse ke maeto a bolisa a hahang a baholo.
26 Baholo le bahlanka ba sebeletsang ba lokela ho sebelisana ho tiisa hore ho na le tšimo, limakasine le libuka tse lekaneng bakeng sa khoeli e tlang. Na ho ka lokisetsoa liboka tse eketsehileng tsa tšebeletso ea tšimo? Haeba ho joalo, tsebisang ka litokisetso tseo tse khethehileng. Ka holim’a tsohle, lithapelong tsa lōna tsa phatlalatsa le tsa ka sephiring, kōpang tlhohonolofatso ea Jehova khoeling ena ea tšebeletso ea rōna e ekelitsoeng ea ’Muso.—Bar. 15:30, 31; 2 Bathes. 3:1.
27 Ka April selemong se fetileng phuthehong e ’ngoe North Carolina, baholo ba hlile ba khothalletsa tšebeletso e eketsehileng. Libokeng beke e ’ngoe le e ’ngoe, ba ile ba mema bahoeletsi hore ba nahanisise ka thapelo hore na ba ka ngolisa e le bo-pula-maliboho ba thusang. Ha monyetla o mong le o mong o hlaha, sehlopha sohle se ne se bua ka cheseho ka ho etsa hore khoeli ea April e be e molemohali. Ka lebaka leo, karolo ea 58 lekholong ea bahoeletsi, ho akarelletsa le baholo bohle le bahlanka ba sebeletsang, ba ile ba bula maliboho khoeling eo!
28 Thabo ea ho Kopanela ka Botlalo: Ho ‘sebetsa ka thata le ho ikitlaetsa’ ha rōna ho na le litlhohonolofatso life? (1 Tim. 4:10) Mabapi le tšebeletso e chesehang ea phutheho ka April selemong se fetileng, baholo ba boletsoeng ka holimo ba ile ba ngola: “Hangata bara le barali babo rōna ba bua ka kamoo ba ikutloang ba ratana kateng ho tloha ha ba qala ho sebetsa tšebeletsong ea tšimo haholoanyane.”
29 Mora e mong oabo rōna e monyenyane ea neng a sa khone ho tsamaea hantle o ne a labalabela ho kopanela tšebeletsong e khethehileng ka April selemong se fetileng. Ka lebaka la ho hlophisa lintho ka makhethe le ka thuso ea ’mè oa hae le bara le barali babo ba moea, o ile a thabela khoeli eo e behang e le pula-maliboho ea thusang. O ile a ikutloa joang ka phihlelo eo? O itse: “Ka lekhetlo la pele bophelong ba ka, ke ne ke qala ho ikutloa joaloka monna ea shahlileng.”
30 Ha ho pelaelo hore Jehova o hlohonolofatsa ka ho enneng ba nkang ka ho teba tokelo ea bona ea ho bua ka borena ba hae. (Pes. 145:11, 12) Ha re keteka lefu la Morena oa rōna, rea utloisisa hore litlhohonolofatso bakeng sa boinehelo ba bomolimo li tla ba ngata le ho feta nakong e tlang. Moapostola Pauluse o ile a labalabela moputso oa bophelo bo sa feleng. Leha ho le joalo, o ne a tseba hore ho bo fumana o ne a ke ke a ka lula feela a sa etse letho ’me a tšepile feela. O ile a ngola: “Ho finyella sena ka sebele ke sebetsa ka thata, ke ikitlaetsa tumellanong le tšebetso ea hae le e sebetsang ho ’na ka matla.” (Bakol. 1:29) Jehova, ka Jesu, o ile a fa Pauluse matla a ho finyella tšebeletso e pholosang bophelo, ’me A ka etsa se tšoanang le ho rōna kajeno. Na ho tla ba joalo le ho uena ka April selemong see?
[Lebokose le leqepheng la 3]
U ka Khothatsa Mang Hore e be Mohoeletsi ka April?
Ngoana oa hao?
Seithuti sa Bibele?
E mong ea khaolitseng ho kopanela tšebeletsong?