Mareka ha aa ka a Nyahama

MAREKA o ngotse e ’ngoe ea libuka tse ’nè tsa Bibele tse buang ka bophelo ba Jesu. Ke eona e khutšoanyane ho li feta le e bonolo ka ho fetisisa. Mareka e ne e le mang? Na u nahana hore o ne a tseba Jesu?—a A re ke re bue ka mathata a ileng a hlahela Mareka ’me re ithute hore na ke hobane’ng ha a sa ka a khaotsa ho ba Mokreste.

Ho buuoa ka Mareka ka lekhetlo la pele ka Bibeleng ka mor’a hore Morena Heroda Agripa a koalle Petrose teronkong. Bosiung bo bong lengeloi le ile la lokolla Petrose, ’me hang-hang a leba ha Maria, ’mè oa Mareka, ea neng a lula Jerusalema. Lilemo tse ka bang leshome ka mor’a hore Jesu a bolaoe ka Paseka ea 33 C.E., Petrose o ile a lokolloa teronkong.—Liketso 12:1-5, 11-17.

Na ua tseba hore ke hobane’ng Petrose a ile a ea ha Maria?— Mohlomong ke kahobane a ne a tseba litho tse ling tsa lelapa la hae a bile a tseba hore barutuoa ba Jesu ba ne ba tšoarela liboka ha hae. E ne e se e le khale motsoala oa Mareka ea bitsoang Barnabase e bile morutuoa, bonyane e bile morutuoa ho tloha ka Mokete oa Pentekonta ea 33 C.E. Bibele e re o ile a fa barutuoa ba bacha lintho tse ngata ka nako eo. Kahoo, e ka ’na eaba Jesu o ne a tseba Barnabase, esita le Mareka le ’mè oa hae Maria.—Liketso 4:36, 37; Bakolose 4:10.

Kosepeleng ea hae, Mareka o itse bosiung boo Jesu a ileng a tšoaroa ka bona, ho ne ho e-na le mohlankana ea neng a apere seaparo “’meleng o hlobotseng.” Ha lira li tšoara Jesu, Mareka o re mohlankana eo o ile a qela ho leoto. U nahana hore mohlankana eo e ne e le mang?— Mohlomong e ne e le Mareka! Kahoo, ha Jesu le baapostola ba hae ba tloha bosiung boo, mohlomong Mareka o ile a akhela seaparo feela eaba oa ba latela.—Mareka 14:51, 52.

Ka sebele Mareka o hōletse har’a batho ba ratang Molimo. Mohlomong o ne a le teng ha moea o halalelang o ne o tšolloa ka Pentekonta ea 33 C.E., ’me o ne a tloaelane le bahlanka ba Molimo ba tšepahalang, ba kang Petrose. Empa o ile a boela a tsamaea le motsoal’ae Barnabase, ea ileng a thusa Saule ka hore a mo tsebise Petrose ka mor’a lilemo tse ka bang tharo hoba Jesu a itlhahise ho Saule ponong. Lilemo tse itseng hamorao, Barnabase o ile a romeloa Tarsase ho ea batla Saule.—Liketso 9:1-15, 27; 11:22-26; 12:25; Bagalata 1:18, 19.

Ka 47 C.E., Barnabase le Saule ba ile ba khetheloa hore ba bolele evangeli linaheng tse ling. Ba ile ba tsamaea le Mareka, empa ka mabaka a sa boleloang, Mareka o ile a ba siea eaba o khutlela hae Jerusalema. Seo se ile sa halefisa Saule, eo hamorao a ileng a tsejoa ka lebitso la hae la Seroma la Pauluse. ’Me ha aa ka a hlokomoloha ketso ea Mareka eo a neng a nka hore e mpe haholo.—Liketso 13:1-3, 9, 13.

Ha Pauluse le Barnabase ba khutla moo ba neng ba bolela evangeli teng, ba ile ba bolela kamoo ba ileng ba atleha ka ho hlollang kateng. (Liketso 14:24-28) Likhoeli tse itseng hamorao, ba ile ba rera ho khutlela libakeng tseo le ho etela barutuoa ba bacha. Barnabase o ne a batla hore ba tsamaee le Mareka, empa na ua tseba hore Pauluse o ne a ikutloa joang ka seo?— “O ne a sa nahane hore ho loketse” hobane Mareka o ne a ile a ba siea eaba o ikela hae. Ka sebele se ileng sa etsahala ka mor’a moo se ile sa utloisa Mareka bohloko!

Ba ile ba tjolietsana, ’me ka mor’a “ho phatloha ho hoholo ka bohale,” Pauluse le Barnabase ba ile ba arohana. Barnabase o ile a tsamaea le Mareka ho ea bolela evangeli Cyprase, ’me Pauluse a ikhethela Silase eaba o khutlela ho barutuoa ba bacha joalokaha ba ne ba rerile. E tlameha ebe Mareka o ile a utloa bohloko haholo ha a qabantse Pauluse le Barnabase.—Liketso 15:36-41.

Ha re tsebe hore na ke hobane’ng ha Mareka a ile a ba siea eaba o khutlela hae. Mohlomong eena o ne a nka hore o na le mabaka a utloahalang. Leha ho le joalo, ho totobetse hore Barnabase o ne a kholisehile hore a ke ke a hlola a etsa joalo. O ne a nepile. Mareka ha aa ka a nyahama! Hamorao o ile a tsamaea le Petrose ha a il’o bolela evangeli hōle Babylona. Ha ba le moo, Petrose o ile a romela litumeliso a ba a eketsa ka ho re: “Le mora oa ka Mareka o le romela litumeliso.”—1 Petrose 5:13.

Petrose le Mareka ba ne ba sebeletsa Molimo hammoho ka kutloano. Bonnete ba sena bo totobala ha re bala Kosepele ea Mareka. Ho eona Mareka o re phetela lintho tseo Petrose a li boneng ka mahlo. Ka mohlala, bapisa se boleloang ka sefefo se neng se le Leoatleng la Galilea. Mareka o eketsa ka ho bolela hore na Jesu o ne a robetse hokae ka sekepeng le hore na o ne a robetse holim’a eng, e leng lintho tse ka beng li hlokometsoe ke Petrose ea tšoasang litlhapi. A re bone bopaki ba sena ka hore re bale ’me re bapise seo Bibele e se buang ka litaba tsena ho Matheu 8:24; Mareka 4:37, 38; le Luka 8:23.

Hamorao, ha Pauluse a ne a le teronkong Roma, o ile a babatsa Mareka ha a ile a mo tšehetsa ka botšepehi. (Bakolose 4:10, 11) Ha Pauluse a boela a kenngoa teronkong moo, o ile a ngolla Timothea hore a mo tlisetse Mareka, a re: “O na le thuso ho ’na bakeng sa ho sebeletsa.” (2 Timothea 4:11) Ka sebele, Mareka o ile a sebeletsa Molimo ka litsela tse khethehileng hobane ha aa ka a nyahama.