Ho Bokella Lintho Tse Leholimong le Lintho Tse Lefatšeng
“Ke ho ea ka ho khahloa ha hae . . . [hore a bokelle] lintho tsohle hape ho Kreste, lintho tse maholimong le lintho tse lefatšeng.”—BAEFESE 1:9, 10.
1. Jehova o “khahloa” ke ho etsa eng leholimong le lefatšeng?
KHOTSO BOKAHOHLENG! Ona ke morero o thabisang oa Jehova, “Molimo oa khotso.” (Baheberu 13:20) O ile a bululela moapostola Pauluse hore a ngole hore O “khahloa” ke “ho bokella lintho tsohle hape ho Kreste, lintho tse maholimong le lintho tse lefatšeng.” (Baefese 1:9, 10) Hantle-ntle leetsi le fetoletsoeng e le ‘ho bokella hape’ temaneng ee le bolela’ng? Setsebi sa Bibele J. B. Lightfoot se re: “Polelo ena e bolela ho ba teng ha kutloano bokahohleng bohle, moo ho ke keng ha hlola ho e-ba le libōpuoa tse ling tse tsoang ka ntle tse bakang likarohano, empa lintho tsohle li tla momahana ’me li be bonngoeng le Kreste. Sebe le lefu, masoabi le bofokoli le mahlomola, li ke ke tsa e-ba teng.”
“Lintho Tse Maholimong”
2. “Lintho tse maholimong” tse lokelang ho bokelloa, ke bo-mang?
2 Moapostola Petrose o ile a bolela ka bokhutšoanyane tšepo e babatsehang eo Bakreste ba ’nete ba nang le eona ha a ne a ngola a re: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona.” (2 Petrose 3:13) “Maholimo a macha” a tšepisitsoeng mona ke puso e ncha, e leng ’Muso oa Bomesia. “Lintho tse maholimong” tse boletsoeng ke Pauluse lengolong leo a neng a le ngoletse Baefese li lokela ho bokelloa “ho Kreste.” Ke palo e lekanyelitsoeng ea batho ba khethetsoeng ho ea busa le Kreste maholimong. (1 Petrose 1:3, 4) Bakreste bana ba 144 000 ba tlotsitsoeng ‘ba rekiloe lefatšeng,’ “ba rekiloe har’a moloko oa batho,” hore e be majalefa-’moho le Kreste ’Musong oa hae oa leholimo.—Tšenolo 5:9, 10; 14:3, 4; 2 Bakorinthe 1:21; Baefese 1:11; 3:6.
3. Ho ka boleloa joang hore batlotsuoa ‘ba lutse libakeng tsa leholimo’ esita leha ba ntse ba le lefatšeng?
3 Bakreste ba tlotsitsoeng ba tsoaloa hape ka moea o halalelang hore e be bara ba Jehova ba moea. (Johanne 1:12, 13; 3:5-7) Kaha Jehova o ba amohetse e le “bara,” e ba barab’abo Jesu. (Baroma 8:15; Baefese 1:5) Kahobane ba le boemong bona, esita leha ba ntse ba le lefatšeng, ho thoe ba ‘tsosoa hammoho ’me ba lula hammoho libakeng tsa leholimo bonngoeng le Kreste Jesu.’ (Baefese 1:3; 2:6) Ba ba boemong bona bo phahameng ba moea kahobane ba ‘tiisitsoe ka moea o halalelang o tšepisitsoeng, oo e leng pontšo esale pele ea lefa la bona’ leo ba le boloketsoeng maholimong. (Baefese 1:13, 14; Bakolose 1:5) Joale, bana ke bona “lintho tse maholimong,” ’me palo ea bona e feletseng eo Jehova a e rerileng esale pele e ne e lokela ho bokelloa.
Ho Bokella Hoa Qala
4. “Lintho tse maholimong” li qalile ho bokelloa neng hona joang?
4 Tumellanong le “tsamaiso” ea Jehova, kapa tsela ea ho laola lintho, ho bokelloa ha “lintho tse maholimong” ho ne ho tla qala “tekanyong e feletseng ea linako tse behiloeng.” (Baefese 1:10) Nako eo e loketseng e ile ea fihla ka Pentekonta ea 33 C.E. Letsatsing leo, moea o halalelang o ile oa tšolleloa ho baapostola le sehlopheng sa barutuoa, sa banna le basali. (Liketso 1:13-15; 2:1-4) Sena se ile sa fana ka bopaki ba hore selekane se secha se ne se qalile ho sebetsa, ’me kahoo ketsahalo ena e ne e tšoaea ho qaleha ha phutheho ea Bokreste le ea sechaba se secha sa Iseraele ea moea, e leng “Iseraele ea Molimo.”—Bagalata 6:16; Baheberu 9:15; 12:23, 24.
5. Ke hobane’ng ha Jehova a ile a bōpa “sechaba” se secha se neng se tla nkela Iseraele ea nama sebaka?
5 Selekane sa Molao se neng se entsoe le Iseraele ea nama ha sea ka sa hlahisa “’muso oa baprista le sechaba se halalelang” se neng se tla sebeletsa leholimong ka ho sa feleng. (Exoda 19:5, 6) Jesu o ile a re ho baeta-pele ba bolumeli ba Bajuda: “’Muso oa Molimo o tla nkuoa ho lōna ’me o fuoe sechaba se hlahisang litholoana tsa oona.” (Matheu 21:43) Sechaba seo, e leng Iseraele ea moea, se entsoe ka Bakreste ba tlotsitsoeng ba kentsoeng selekaneng se secha. Moapostola Petrose o ile a re ho bona: “Le ‘morabe o khethiloeng, baprista ba marena, sechaba se halalelang, batho bakeng sa letlotlo le khethehileng, e le hore le ka bolela hohle makhabane a hlomphehang’ a ea le bitsitseng ho le ntša lefifing ho le kenya leseling la hae le hlollang. Etsoe ka nako e ’ngoe le ne le se sechaba, empa joale le sechaba sa Molimo.” (1 Petrose 2:9, 10) Iseraele ea nama e ne e se e se sechaba sa Jehova sa selekane. (Baheberu 8:7-13) Joalokaha Jesu a ne a boletse esale pele, e ile ea amohuoa tokelo ea ho ba karolo ea ’Muso oa Bomesia eaba tokelo eo e fuoa litho tse 144 000 tsa Iseraele ea moea.—Tšenolo 7:4-8.
Ba Kentsoe Selekaneng sa ’Muso
6, 7. Jesu o ile a etsa selekane sefe se khethehileng le barab’abo ba tsoetsoeng ka moea, hona se bolela’ng ho bona?
6 Bosiung boo Jesu a thehileng Sehopotso sa lefu la hae ka bona, o ile a re ho baapostola ba hae ba tšepahalang: “Ke lōna ba nkhomaretseng litekong tsa ka; ’me ke etsa selekane le lōna, feela joalokaha Ntate a entse selekane le ’na, bakeng sa ’muso, e le hore le ka ja le ho noa tafoleng ea ka ’musong oa ka, le ho lula literoneng ho ahlola meloko e leshome le metso e ’meli ea Iseraele.” (Luka 22:28-30) Mona Jesu o ne a bua ka selekane se khethehileng seo a neng a se entse le barab’abo ba tlotsitsoeng ka moea ba 144 000, ba neng ba tla ‘tšepahala esita le ho isa lefung’ le ho ba ‘bahlōli.’—Tšenolo 2:10; 3:21.
7 Ba leng sehlopheng sena se lekanyelitsoeng ba tela tšepo leha e le efe ea ho phela ka ho sa feleng lefatšeng e le batho ba nama le mali. Ba tla busa le Kreste leholimong, ba be ba lule literoneng ho ahlola moloko oa batho. (Tšenolo 20:4, 6) Joale a re hlahlobeng mangolo a mang a sebetsang feela ho batlotsuoa bana a bontšang hore na ke hobane’ng ha “linku tse ling” li sa je litšoantšetso tsa Sehopotso.—Johanne 10:16.
8. Batlotsuoa ba bontša eng ka ho ja bohobe? (Bona lebokose le leqepheng la 23.)
8 Batlotsuoa ba ba le karolo litlhokofatsong tsa Kreste ’me ba ikemiselitse ho shoa lefu le tšoanang le la hae. Pauluse, eo e neng e le e mong oa sehlopha seo, o ile a re o ne a ikemiselitse ho tela ntho leha e le efe e le hore a ka ‘rua Kreste e le hore a mo tsebe ’me a tsebe le matla a tsoho ea hae le ho ba le karolo litlhokofatsong tsa hae.’ Ka sebele, Pauluse o ne a ikemiselitse ho shoa “lefu le tšoanang le la [Kreste].” (Bafilipi 3:8, 10) ’Meleng ea bona ea nama, Bakreste ba bangata ba tlotsitsoeng ba ile ba mamella “tšoaro e bolaeang e ileng ea nehoa Jesu.”—2 Bakorinthe 4:10.
9. Bohobe ba Sehopotso bo emela ’mele ofe?
9 Ha Jesu a theha Lijo Tsa Shoalane Tsa Morena, o ile a re: “Sena se bolela ’mele oa ka.” (Mareka 14:22) O ne a bua ka ’mele oa hae oa ’nama, o neng o tla tloha o tetekoa ’me o tsoe mali. Bohobe bo se nang tomoso bo ne bo tšoantšetsa ’mele oo hantle. Hobane’ng? Hobane ka Bibeleng, tomoso e ka tšoantšetsa sebe kapa bokhopo. (Matheu 16:4, 11, 12; 1 Bakorinthe 5:6-8) Jesu o ne a phethahetse, ’me ’mele oa hae oa nama o ne o se na sebe. O ne a tla nehelana ka ’mele oo o phethahetseng e le sehlabelo sa poelano. (Baheberu 7:26; 1 Johanne 2:2) Seo se ne se tla ruisa Bakreste bohle ba tšepahalang molemo, ho sa tsotellehe hore na ba na le tšepo ea ho ea phela leholimong kapa ea ho phela ka ho sa feleng lefatšeng la paradeise.—Johanne 6:51.
10. Ba noang veine ea Sehopotso ‘ba ba le karolo maling a Kreste’ ka tsela efe?
10 Mabapi le veine eo Bakreste ba tlotsitsoeng ba e noang Sehopotsong, Pauluse o ile a ngola a re: “Senoelo sa tlhohonolofatso seo re se hlohonolofatsang, na hase ho ba le karolo maling a Kreste?” (1 Bakorinthe 10:16) Ba noang veine ‘ba ba le karolo maling a Kreste’ joang? Ho hang ha ba be le karolo ea ho fana ka sehlabelo sa thekollo, kaha bona ka bobona ba hloka topollo. Ka lebaka la tumelo ea bona matleng a lopollang a mali a Kreste, ba tšoareloa libe ’me ba boleloa ba lokile bakeng sa ho ea phela leholimong. (Baroma 5:8, 9; Tite 3:4-7) Ka mali a tšolotsoeng a Kreste, majalefa-’moho le Kreste a 144 000 a ‘halalelitsoe,’ a beheletsoe ka thōko, a hloekisitsoe sebeng hore e be “bahalaleli.” (Baheberu 10:29; Daniele 7:18, 27; Baefese 2:19) Ka sebele, Kreste o ile a sebelisa mali a hae a tšolotsoeng hore a ‘rekele Molimo batho molokong o mong le o mong le lelemeng le leng le le leng le bathong ba bang le ba bang le sechabeng se seng le se seng, le ho ba etsa ’muso le baprista ho Molimo oa rōna, ’me ba tla busa e le marena holim’a lefatše.’—Tšenolo 5:9, 10.
11. Batlotsuoa ba bontša eng ha ba e-noa veine ea Sehopotso?
11 Ha Jesu a theha Sehopotso sa lefu la hae, o ile a fa baapostola ba hae ba tšepahalang senoelo sa veine eaba o re: “Noang ho sona, kaofela ha lōna; kaha sena se bolela ‘mali a selekane’ a ka, a tlang ho tšolloa molemong oa ba bangata bakeng sa tšoarelo ea libe.” (Matheu 26:27, 28) Feela joalokaha mali a lipoho le a lipōli a ile a tiisa selekane sa Molao pakeng tsa Molimo le sechaba sa Iseraele, mali a Jesu a ile a tiisa selekane se secha seo Jehova a neng a tla se etsa le Iseraele ea moea, ho qala ka Pentekonta ea 33 C.E. (Exoda 24:5-8; Luka 22:20; Baheberu 9:14, 15) Ha batlotsuoa ba e-noa veine e tšoantšetsang “mali a selekane,” ba bontša hore ba kentsoe selekaneng se secha ’me ba amohela melemo ea sona.
12. Batlotsuoa ba kolobetsoa ho kena lefung la Kreste joang?
12 Batlotsuoa ba boetse ba hopotsoa ho hong. Jesu o ile a re ho barutuoa ba hae ba tšepahalang: “Senoelo seo ke se noang le tla se noa, ’me kolobetso eo ke ntseng ke kolobetsoa ka eona le tla kolobetsoa ka eona.” (Mareka 10:38, 39) Hamorao moapostola Pauluse o ile a re Bakreste ba “kolobetsoa ho kena lefung la [Kreste].” (Baroma 6:3) Batlotsuoa ba phela bophelo ba boitelo. Ba shoa lefu la sehlabelo kahobane ba tela tšepo leha e le efe ea ho phela ka ho sa feleng lefatšeng. Ho kolobetsoa ha Bakreste bana ba tlotsitsoeng hore ba kene lefung la Kreste ho phethoa ka mor’a hore ba shoe ba tšepahetse ’me ba tsosoe e le libōpuoa tsa moea e le hore ba ‘buse hammoho e le marena’ le Kreste leholimong.—2 Timothea 2:10-12; Baroma 6:5; 1 Bakorinthe 15:42-44, 50.
Ho Ja Litšoantšetso
13. Ke hobane’ng ha ba nang le tšepo ea ho phela lefatšeng ba sa je litšoantšetso tsa Sehopotso, empa ke hobane’ng ha ba e-ba teng Sehopotsong?
13 Kaha ho ja bohobe le ho noa veine tse fetisoang nakong ea Sehopotso ho akarelletsa lintho tsena kaofela, e ne e ke ke ea e-ba ho loketseng hore ba nang le tšepo ea ho phela lefatšeng ba je litšoantšetso tsena. Ba nang le tšepo ea ho phela lefatšeng baa tseba hore bona hase litho tse tlotsitsoeng tsa ’mele oa Kreste, ebile ha ba selekaneng se secha seo Jehova a se entseng le ba tla busa le Jesu Kreste. Kaha “senoelo” se emela selekane se secha, ba leng selekaneng sena se secha ke bona feela ba jang litšoantšetso tsena. Ba lebeletseng ho fumana bophelo bo sa feleng lefatšeng tlas’a ’Muso moo ba tla beng ba phethahetse, ha ba kolobetsoe ho kena lefung la Jesu kapa hona hore ba bitsetsoa ho ea busa le eena leholimong. Haeba ba ne ba ka ja litšoantšetso tsena, ba ne ba tla be ba etsa ntho e sa ba tšoaneleng. Kahoo, ha ba je litšoantšetso tsena, le hoja ba e-ba teng Sehopotsong e le bashebelli ba hlomphang. Ba leboha lintho tsohle tseo Jehova a ba etselitseng tsona ka Mora oa hae, tse akarelletsang tšoarelo ea libe motheong oa mali a tšolotsoeng a Kreste.
14. Ho ja bohobe le ho noa veine ho matlafatsa batlotsuoa moeeng joang?
14 Ho tiisoa ha ho qetela ha palo e fokolang ea Bakreste ba bitselitsoeng ho ea busa le Kreste leholimong ho se ho tla phethoa. Ho fihlela batlotsuoa ba fihla qetellong ea bophelo ba bona ba lefatšeng boo ba tla bo tela, ho ja ha bona litšoantšetso tsa Sehopotso ho ba matlafatsa moeeng. Ba ikutloa ba le bonngoeng le bara le barali ba bang babo bona ba tlotsitsoeng bao e leng litho tsa ’mele oa Kreste. Ho ja ha bona bohobe ba tšoantšetso le ho noa veine ho ba hopotsa boikarabelo ba bona ba hore ba lokela ho lula ba tšepahala ho isa lefung.—2 Petrose 1:10, 11.
Ho Bokella “Lintho Tse Lefatšeng”
15. Ke bo-mang ba ’nileng ba bokelleloa ka lehlakoreng la Bakreste ba tlotsitsoeng?
15 Ho tloha bohareng ba lilemo tsa bo-1930, palo e ntseng e hōla ea “linku tse ling,” tseo e seng tsa “mohlatsoana” le tse nang le tšepo ea ho phela ka ho sa feleng lefatšeng, e ile ea kenya letsoho ho tšehetsa batlotsuoa. (Johanne 10:16; Luka 12:32; Zakaria 8:23) E bile metsoalle e tšepahalang ea barab’abo Kreste, ea ba thusa mosebetsing oa ho bolela “litaba tsena tse molemo tsa ’muso” hore e be bopaki ho lichaba tsohle. (Matheu 24:14; 25:40) Ka ho etsa joalo, e ba le monyetla oa hore Kreste a e nke e le “linku” tsa hae, tse ka “letsohong la hae le letona” tseo a tla li hauhela ha a tlil’o ahlola lichaba. (Matheu 25:33-36, 46) Ka lebaka la ho ba le tumelo maling a Kreste, e tla ba “bongata bo boholo,” bo tla pholoha ‘matšoenyeho a maholo.’—Tšenolo 7:9-14.
16. “Lintho tse lefatšeng” li tla akarelletsa bo-mang, hona ke joang batho baa kaofela ba tla ba le monyetla oa ho ba “bana ba Molimo”?
16 Ha masala a ba 144 000 a tiisitsoe la ho qetela, “meea” ea timetso e tla lokolloa hore e timetse tsamaiso e khopo ea lintho ea Satane e lefatšeng. (Tšenolo 7:1-4) Nakong ea Puso ea Lilemo Tse Sekete ea Kreste le marena le baprista-’moho le eena, batho ba tsositsoeng ba se nang palo ba tla ikopanya le bongata bo boholo. (Tšenolo 20:12, 13) Ba tla ba le monyetla oa ho ba bafo ba lefatšeng ba ka ho sa feleng ba Morena oa Bomesia, e leng Kreste Jesu. Qetellong ea Puso ea Lilemo Tse Sekete, ‘lintho tsena kaofela tse lefatšeng’ li tla feta tekong ea ho qetela. Ba tlang ho tšepahala ba tla amoheloa e le “bana ba Molimo” ba lefatšeng.—Baefese 1:10; Baroma 8:21; Tšenolo 20:7, 8.
17. Morero oa Jehova o tla phethahala joang?
17 Kahoo, ka lebaka la “tsamaiso” ea hae e bohlale ka ho fetisisa, kapa tsela ea hae ea ho laola lintho, Jehova o tla be a phethahalitse morero oa hae oa “ho bokella lintho tsohle hape ho Kreste, lintho tse maholimong le lintho tse lefatšeng.” Libōpuoa tsohle tse bohlale tse leholimong le tse lefatšeng li tla be li bokelletsoe hammoho khotsong e tla rena bokahohleng bohle, ka thabo li ikokobeletsa bobusi bo lokileng ba Moreri e Moholo, e leng Jehova.
18. Batlotsuoa le bo-mphato ba bona ba tla rua molemo joang ka ho ba teng Sehopotsong?
18 E tla ba ho matlafatsang tumelo hakaakang ha palo e fokolang ea batlotsuoa le bo-mphato ba bona ba limilione ba linku tse ling ba bokana ka la 12 April, 2006! Ba tla keteka Sehopotso sa lefu la Kreste, feela joalokaha Kreste a ile a laela a re: “Le ’ne le etse sena ho nkhopola.” (Luka 22:19) Bohle ba tla ba teng ba lokela ho hopola seo Jehova a ba etselitseng sona ka Mora oa hae ea ratoang, e leng Kreste Jesu.
Tlhahlobo
• Morero oa Jehova ke ofe ka lintho tse leholimong le ka lintho tse lefatšeng?
• “Lintho tse maholimong” ke bo-mang, hona li ’nile tsa bokelloa joang?
• “Lintho tse lefatšeng” ke bo-mang, hona li na le tšepo efe?
[Lebokose le leqepheng la 23]
‘’Mele oa Kreste’
Ho 1 Bakorinthe 10:16, 17, ha Pauluse a tšohla kamoo bohobe bo leng bohlokoa kateng ho barab’abo Kreste ba tlotsitsoeng ka moea, o buile ka “’mele” ka kutloisiso e khethehileng. O itse: “Bohobe boo re bo qhetsolang, na hase ho ba le karolo ’meleng oa Kreste? Kahobane ho na le bohobe bo le bong, rōna, le hoja re le bangata, re ’mele o le mong, kaha kaofela re ja bohobe boo bo le bong.” Ha Bakreste ba tlotsitsoeng ba ja bohobe ba Sehopotso, ba phatlalatsa bonngoe ba bona ka har’a phutheho ea batlotsuoa, e kang ’mele oo Kreste e leng Hlooho ea oona.—Matheu 23:10; 1 Bakorinthe 12:12, 13, 18.
[Litšoantšo tse leqepheng la 23]
Ke hobane’ng ha e le batlotsuoa feela ba jang bohobe le ba noang veine?
[Setšoantšo se leqepheng la 25]
Ka lebaka la tsamaiso ea Jehova, libōpuoa tsohle tse leholimong le tse lefatšeng li tla ba bonngoeng