Hantle-ntle ke Bo-mang ba Nang le Pitso ea Leholimo?
JEHOVA o rata moloko oa batho. E, lerato la hae le leholo hoo a ileng a nehelana ka Mora oa hae, Jesu Kreste, e le topollo ho lopolla seo ntat’a rōna moholo Adama a se lahlileng! Ke eng seo? Bophelo bo phethahetseng, le bo sa feleng ba batho hammoho le litokelo tsohle tsa bona le litebello. (Johanne 3:16) Hape topollo e ne e le pontšo ea lerato la Jesu bakeng sa batho.—Mattheu 20:28.
Lerato la bomolimo le ’nile la bontšoa ka ho bula litebello tse peli tse fanoeng ke Molimo tse theiloeng molemong oa sehlabelo sa Jesu sa topollo. (1 Johanne 2:1, 2) Pele Jesu a e-shoa e le motho, tšepo feela e neng e bulehetse ba nang le kamohelo ea bomolimo e ne e le ea bophelo lefatšeng la paradeise. (Luka 23:43) Leha ho le joalo, kamor’a Pentekonta 33 C.E., Jehova a neha “mohlatsoana” tšepo ea leholimo. (Luka 12:32) Ho etsahetse’ng mehleng ea morao tjena? Ho tloha ka 1931 molaetsa oa ’Muso o lebisitse tlhokomelo e khōloanyane ho “linku tse ling,” ’me ho tloha ka 1935 ho ea pele Molimo o ’nile oa atametsa “bongata bo boholo ba batho” ba kang linku ho oona ka Kreste. (Johanne 10:16; Tšenolo 7:9) Molimo o kentse lipelong tsa bona tšepo ea bophelo bo sa feleng lefatšeng la paradeise. Ba batla ho ja lijo tse phethahetseng, ba buse liphoofolo ka lerato, ’me ba thabele botsoalle le batho ba bang ba lokileng ka ho sa feleng.
Baprista ba Nang le Kutloelo-bohloko le Marena
Kaha lerato le ile la susumelletsa Jesu ho nehelana ka bophelo ba hae e le topollo, ka sebele e tla ba Morena oa leholimo ea nang le kutloelo-bohloko. Leha ho le joalo, Jesu a ke ke a ba mong ha a lebisa batho phethehong nakong ea Puso ea Lilemo tse Sekete. Jehova o entse tokisetso ea marena a mang a nang le kutloelo-bohloko leholimong. E, “e tla ba baprista ba Molimo le ba Kreste, ’me ba tla busa le eena lilemo tse sekete.”—Tšenolo 20:1-6.
Kreste o tla ba le babusi-’moho le eena ba bakae, ’me ba khethoa joang bakeng sa tokelo eo e tsotehang? Moapostola Johanne o ile a bona ba 144 000 ba le Thabeng ea Sione ba e-na le Konyana, Jesu Kreste. Kaha ‘ba lopollotsoe lefatšeng,’ ba tla tseba hore ho bolela’ng ho hlaheloa ke liteko, ho mamella boima ba ho se phethahale, ho utloisoa bohloko, le ho shoa joaloka batho. (Tšenolo 14:1-5; Jobo 14:1) Ka baka leo, e tla ba marena le baprista ba nang le kutloelo-bohloko e kaakang!
Paki ea Moea
Ba 144 000 ba “amohetse tlolo ho Ea halalelang,” Jehova. (1 Johanne 2:20) Ke ho tlotsetsoa tšepong ea leholimo. Molimo o ‘ba tšoaile ’me o ba neile tebeletso ea se tla tla, e leng, moea, lipelong tsa bona.’—2 Ba-Korinthe 1:21, 22.
E, ba nang le pitso ea leholimo ba na le bopaki ba moea oa Molimo tabeng eo. Mabapi le sena, Pauluse o ngotse ho Ba-Roma 8:15-17: “Hobane ha lea ka la neoa moea oa bohlanka, hore tšabo e boele e be teng, le mpa le neiloe Moea oa ba beoang bana, oo re bitsang Abba! Ntate! ka oona. Le oona Moea o emelana le moea oa rōna, hore re bana ba Molimo. ’Me ha re le bana, re majalefa: majalefa a Molimo, le majalefa hammoho le Kreste, ha re fela re utloa bohloko le eena, re tle re neoe khanya le eena.” Ke ka moea oa Molimo, kapa matla a sebetsang, batlotsuoa ba hooang: ‘Abba, Ntate!’
Bopaki bo ka sehloohong ba hore motho o tlotselitsoe ho ba le pitso ea leholimo ke moea, kapa boikutlo bo matla, ba ho ba mora. (Ba-Galata 4:6, 7) Motho ea joalo o kholisehile ka ho felletseng hore o tsoetsoe ke Molimo ho ba mora oa moea e le e mong oa ba 144 000 e leng majalefa-’moho a ’Muso oa leholimo. A ka paka hore tšepo ea hae ea leholimo ha se takatso ea hae eo a e hlaoletseng kapa ho inahanela; ho fapana le hoo, empa e tsoa ho Jehova ka baka la ho sebetsa ha moea oa Molimo ho eena.—1 Petrose 1:3, 4.
Tlas’a tšusumetso ea moea o halalelang oa Molimo, moea, kapa boikutlo bo matla, ba batlotsuoa bo sebeletsa e le matla a susumetsang. Bo ba susumelletsa ho arabela hantle ho seo Lentsoe la Molimo le se bolelang ka tšepo ea leholimo. Hape ba arabela ka tsela e ntle litšebelisanong tsa Jehova le bona ka moea o halalelang. Kahoo, ba kholisehile hore ke bana ba Molimo ba moea le majalefa.
Ha batlotsuoa ba bala seo Lentsoe la Molimo le se bolelang ka bana ba oona ba moea le ka tšepo ea leholimo, ka hare ho bona ba ba le tšekamelo e tlang ka potlako ea hore, ‘Sena se lebisitsoe ho ’na!’ E, ba arabela ka thabo ha Lentsoe la Ntat’a bona le tšepisa moputso oa leholimo. Ba re, ‘Hoo ho lebisitsoe ho ’na!’ ha ba bala hore: “Baratuoa, joale re bana ba Molimo.” (1 Johanne 3:2) ’Me ha batlotsuoa ba bala hore Molimo o hlahisitse “bao e kang ke lithakangoaha tsa libopuoa tsa hae,” tšekamelo ea mehopolo ea bona ke ho arabela ka hore, ‘E, o ntlhahisitse bakeng sa morero oo.’ (Jakobo 1:18) Baa tseba hore ba ‘kolobelelitsoe ho Kreste Jesu’ le ho isa lefung la hae. (Ba-Roma 6:3) Ka baka leo ba na le kholiseho e tiileng ea ho ba karolo ea ’mele oa Kreste oa moea le ho ba le tšepo ea ho feta lefung le kang la hae le ho tsosetsoa bophelong ba leholimo.
Hore batlotsuoa ba rue ’Muso oa leholimo, ba tlameha ‘ho etsa sohle se matleng a bona ho etsa hore pitso ea bona le ho khethoa ha bona e be ha sebele.’ (2 Petrose 1:5-11, NW) Ba tsamaea ka tumelo le ho tsoela pele ba hōla moeeng, joalokaha ho etsa ba nang le tšepo ea lefatšeng. Ka baka leo, ke eng hape e leng teng ho bopaki ba moea?
Lebaka Leo ka Lona ba Jang
Bakreste ba tlotsitsoeng ha ba batle ho ea leholimong ka baka la ho se khotsofalle maemo a kajeno a bophelo ba lefatšeng. (Bapisa le Juda 3, 4, 16.) Ho e-na le hoo, moea o halalelang o pakelana le moea oa bona hore ke bana ba Molimo. Hape ba kholisehile hore ba nketsoe selekaneng se secha. Ba leng selekaneng sena ke Jehova Molimo le Iseraele oa moea. (Jeremia 31:31-34; Ba-Galata 6:15, 16; Ba-Heberu 12:22-24) Selekane sena, se entsoeng se sebetsang ka mali a Jesu a tšolotsoeng, se hlahisa batho ba lebitso la Jehova ’me se etsa Bakreste bana ba tlotsitsoeng karolo ea “peō” ea Abrahama. (Ba-Galata 3:26-29; Liketso 15:14) Selekane se secha se lula se ntse se sebetsa ho fihlela ha Baiseraele bohle ba moea ba tsoselitsoe bophelong ba ho se bole leholimong.
Ho feta moo, bao ka sebele ba nang le pitso ea leholimo ha ba na pelaelo ea hore le bona ba selekaneng sa ’Muso oa leholimo. Jesu o ne a bua ka selekane sena pakeng tsa hae le balateli ba hae ha a ne a re: “Ke lōna ba tiiselitseng le ’na melekong ea ka. ’Me ’na ke le nea ’muso, joale ka ha Ntate a ’neile oona, le tle le be ba jang le ba noang tafoleng ea ka ’musong oa ka; ’me le tle le lule literoneng, le ahlole meloko e leshome le metso e ’meli ea Iseraele.” (Luka 22:28-30) Selekane sena se ile sa hlongoa bakeng sa barutuoa ba Jesu ka ho tlotsoa ha bona ka moea o halalelang letsatsing la Pentekonta 33 C.E. Se ile sa lula se ntse se sebetsa pakeng tsa Kreste le marena hammoho le eena ka ho sa feleng.—Tšenolo 22:5.
Ba nang le pitso ea leholimo ba kholisehile hore ba selekaneng se secha le selekaneng sa ’Muso. Ka baka leo, ka nepo ba ja litšoantšetso tsa bohobe le veine meketeng ea selemo le selemo ea Sejo sa Morena sa Mantsiboea, kapa Sehopotso sa lefu la Jesu Kreste. Bohobe bo sa lomosoang bo tšoantšetsa ’mele oa botho oa Jesu o se nang sebe, ’me veine e tšoantšetsa mali a hae a phethahetseng a tšolotsoeng lefung le ho tiisa selekane se secha.—1 Ba-Korinthe 11:23-26.
Haeba Jehova a hlaoletse ka ho uena tšepo e ke keng ea latoloa ea bophelo ba leholimo, u itšetlehile ka eona. U etsa lithapelo tse bontšang tšepo eo. E-ea u khomarela, ’me u ke ke ua e tlosa ho uena. U ba le litebello tse matla tsa moea. Empa haeba u qea-qea u sa kholiseha, ka sebele ha ua lokela ho ja litšoantšetso tsa Sejo sa Morena sa Mantsiboea.
Ke Hobane’ng ha ho E-ba le Mehopolo e Fosahetseng?
Ba bang ba ka ’na ba ja litšoantšetso tsa Sehopotso ka phoso hobane ba hlile ba sa lumele hore ho tlotsoa “hase taba ea thato kapa ea boiteko ba motho, empa ke ea mohau oa Molimo.” (Ba-Roma 9:16, BPN) Hase taba ea motho ho ikhethela hore o lakatsa ho nkeloa selekaneng se secha le ho fetoha mojalefa-’moho le Kreste ’Musong oa leholimo. Jehova ke eena ea khethang. Iseraeleng ea boholo-holo, Molimo o ile oa khetha ba neng ba tla sebeletsa e le baprista ba oona, ’me oa bolaea Kore hobane ka boikhohomoso a ile a batla boprista boo ka taelo ea bomolimo bo neng bo beiloe lelapeng la Aarone. (Exoda 28:1; Numere 16:4-11, 31-35; 2 Likronike 26:18; Ba-Heberu 5:4, 5) Ka ho tšoanang, ho ke ke ha khahlisa Jehova haeba motho a ka itlhahisa e le e mong oa ba bitselitsoeng ho ba har’a marena a leholimo le baprista empa e le ha Molimo o sa mo neha pitso e joalo.—Bapisa le 1 Timothea 5:24, 25.
Ka phoso motho a ka ’na a nahana hore o na le pitso ea leholimo ka baka la boikutlo bo matla bo bakoang ke mathata a tebileng. Ho shoa ha molekane kapa masisa-pelo a mang a ka bakela motho ho felloa ke thahasello bophelong ba lefatšeng. Kapa motsoalle ea haufi a ka ipolela e le ea tlotsitsoeng, ’me motho a ka lakatsa bokamoso bo tšoanang. Mabaka a joalo a ka ’na a etsa hore a ikutloe hore bophelo ba leholimo ke ba hae. Empa ena hase tsela ea Molimo ea ho neha leha e le mang moea oa ho ba mora. E tla be e le ho bontša ho haelloa ke teboho bakeng sa morero oa Molimo ka lefatše haeba motho a ne a ka lakatsa ho ea leholimong ka baka la maemo a sa rateheng kapa khatello ea maikutlo e amanang le bophelo ba lefatšeng.
Maikutlo a pele a bolumeli le oona a ka bakela motho ho etsa qeto e fosahetseng ea hore o na le pitso ea leholimo. Mohlomong o kile a kopanela le bolumeli ba bohata bo neng bo buella bophelo ba leholimo e le bona tšepo feela bakeng sa ba tšepahalang. Kahoo, Mokreste o lokela ho itebela hore a se haptjoe ke maikutlo le lipono tse fosahetseng tsa nakong e fetileng.
Tlhahlobo e Hlokolosi ke ea Bohlokoa
Moapostola Pauluse o ile a bolela ntlha ea bohlokoa ka ho fetisisa ha a ne a ngola: “Mang le mang ea jang bohobe boo, kapa ea noelang senoelong sa Morena ka mokhoa o sa tšoanelang, o tla ba le molato oa ’mele le oa mali a Morena. Motho ka mong a ke a itekole ke hona, ’me joale e be hona a jang bohobe bona, a noelang senoelong sena. Hobane ea jang, le ea noang ka mokhoa o sa tšoanelang, o itjella, o inoella tsuo, hobane a sa lemohe ’mele oa Morena.” (1 Ba-Korinthe 11:27-29) Ka hona, Mokreste ea kolobelitsoeng eo lilemong tsa morao tjena a qalileng ho nahana hore o amohetse pitso ea leholimo o lokela ho nahanisisa taba ena ka hloko le ka thapelo.
Motho ea joalo a ka boela a ipotsa: ‘Na ke susumellelitsoe ke ba bang hore ke be le khopolo ea bophelo ba leholimo?’ Hona e tla ba ho sa lokelang, hobane Molimo ha oa abela motho ho khothalletsa ba bang bakeng sa tokelo e joalo. Ho ba le tšekamelo ea mehopolo e inahaneloang e ke ke ea e-ba pontšo ea hore motho o tlotsitsoe ke Molimo, ’me ha o tlotse majalefa a ’Muso ka ho etsa hore a utloe mantsoe le melaetsa e joalo.
Ba bang ba ka ’na ba ipotsa: ‘Pele ke e-ba Mokreste, na ke ne ke amehile tšebelisong e sa lokang ea lithethefatsi? Na ke sebelisa meriana e amang maikutlo? Na ke ile ka phekoloa ka baka la mathata a kelello le a maikutlo?’ Ba bang ba boletse hore pele ba ile ba loantšana le mohopolo oo ba neng ba nahana hore ke oa tšepo ea leholimo. Ba bang ba boletse hore ka nako e itseng Molimo o ile oa nka tšepo ea bona ea lefatšeng ’me qetellong oa ba neha ea leholimo. Empa mokhoa o joalo o khahlanong le tsela eo lintho tsa bomolimo li etsoang ka eona. Ho feta moo, tumelo ha e qea-qee; e kholisehile.—Ba-Heberu 11:6.
Hape motho a ka ’na a ipotsa: ‘Na ke lakatsa bophahamo? Na ke laba-labela boemo ba ho ba le matla a ho laola hona joale kapa ke le e mong oa marena le baprista-’moho le Kreste?’ Lekholong la pele la lilemo C.E., ha ho ne ho ntšitsoe memo e akaretsang ea hore bohle ba batle ho kena ’Musong oa leholimo, hase Bakretse bohle ba tlotsitsoeng ba neng ba e-na la maemo a boikarabelo e le litho tsa sehlopha se busang kapa e le baholo kapa bahlanka ba sebeletsang. Ba bangata e ne e le basali, ’me ba ne ba se na matla a itseng a khethehileng a ho laola; kapa hona hore ho tlotsoa ka moea ho tlisa kutloisiso e sa tloaelehang ea Lentsoe la Molimo, hobane Pauluse o ile a ho fumana ho hlokahala ho ruta le ho eletsa batlotsuoa ba bang. (1 Ba-Korinthe 3:1-3; Ba-Heberu 5:11-14) Ba nang le pitso ea leholimo ha ba italime e le batho ba phahameng, ’me ha ba ikhulele tlhokomelo ka ho tlotsoa ha bona. Ho e-na le hoo, ba bontša boikokobetso boo ka nepo bo lebelletsoeng ho ba nang le “mohopolo oa Kreste.” (1 Ba-Korinthe 2:16, NW) Hape baa hlokomela hore Bakreste bohle ba tlameha ho boloka litlhokahalo tse lokileng tsa Molimo, ebang ba na le tšepo ea leholimo kapa ea lefatšeng.
Ho ipolela ha motho hore o na le pitso ea leholimo ha ho mo tlisetse litšenolo tse khethehileng. Molimo o na le mocha oa puisano oo ka oona o fanang ka lijo tsa moea ho mokhatlo oa oona o hlophisitsoeng oa lefatšeng. (Mattheu 24:45-47) Ka baka leo ha ho motho ea lokelang ho nahana hore ho ba Mokreste ea tlotsitsoeng ho mo neha bohlale bo phahametseng ba batho ba “bongata bo boholo” ba nang le tšepo ea lefatšeng. (Tšenolo 7:9) Ho tlotsoa ka moea ha ho bonahale ka ho atleha boboleling, ho arabeleng lipotso tsa Mangolo, kapa ho fana ka lipuo tsa Bibele, hobane Bakreste ba nang le tšepo ea lefatšeng le bona ba etsa hantle haholo litšobotsing tsena. Joaloka batlotsuoa, le bona ba phela bophelo bo behang mohlala o motle ba Bokreste. Hape, Samsone le ba bang ba pele ho mehla ea Bokreste ba ne ba e-na le moea oa Molimo ’me ba ile ba tlala cheseho le kutloisiso. Leha ho le joalo, ha ho lea mong oa ‘leru leo le leholo la lipaki’ ea neng a e-na le tšepo ea leholimo.—Ba-Heberu 11:32-38; 12:1; Exoda 35:30, 31; Baahloli 14:6, 19; 15:14; 1 Samuele 16:13; Ezekiele 2:2.
Hopola ea Khethang
Haeba molumeli-’moho a botsa ka pitso ea leholimo, moholo ea khethiloeng kapa Mokreste e mong ea hōlileng tsebong a ka buisana le eena ka taba eo. Empa motho e mong a ke ke a etsetsa e mong qeto ena, ’me ke Jehova ea fanang ka tšepo ea leholimo. Motho eo kannete a nang le pitso ea leholimo le ka mohla ha ho hlokahale hore a botse Bakreste-’moho le eena hore na o na le tšepo e joalo. Batlotsuoa ba “tsoetsoe, e seng ka peo e bolang, e leng ka e sa boleng, ka lentsoe la Molimo le phelang, le hlolang ka ho sa feleng.” (1 Petrose 1:23) Molimo ka moea le ka Lentsoe la oona, o jala ‘peō’ e etsang hore motho e be “’mōpuoa e mocha”, ea nang le tšepo ea leholimo. (2 Ba-Korinthe 5:17) E, Jehova ke eena ea khethang.
Ka baka leo, ha re ithuta Bibele le batho ba bacha, ha ho hotle hore re etse tlhahiso ea hore ba leke ho itherela hore na ba na le pitso ea leholimo kapa che. Empa ho thoe’ng haeba Mokreste ea tlotsitsoeng a ipakile a sa tšepahale ’me ho hlokahala hore ho kenngoe e mong? E tla ba ho loketseng ho qeta ka hore Molimo o tla fana ka pitso ea leholimo ho e mong ea beileng mohlala o motle ho nehelaneng ka tšebeletso e tšepahalang ho Ntate oa rōna oa leholimo ka lilemo tse ngata haholo.
Kajeno, pakane e ka sehloohong ea molaetsa oa Molimo hase ea hore batho ba fetohe litho tsa monyaluoa oa Kreste oa leholimo. Ho e-na le hoo, “moea le monyaluoa ba re: Tlo!” Ena ke memo ea ho phela paradeiseng lefatšeng. (Tšenolo 22:1, 2, 17) Ha batlotsuoa ba ntse ba etella pele mosebetsing ona, ba bontša “boikokobetso” ’me ba sebeletsa ‘ho etsa hore pitso le ho khethoa ha bona e be ha sebele.’—Ba-Efese 4:1-3; 2 Petrose 1:5-11.