Jubile ea Bokreste E Fihla Tlhorong Lilemong tse Sekete
1. Bajode ba Riphabliking ea Iseraele ha baa etsa boiteko ba ho tsosolosa eng, hona hobane’ng?
LE RIPHABLIKING ea Iseraele (e theiloeng ka 1948), Bajode ba bangata ba inkang ba le tlas’a molao oa Moshe ha baa tsosolosa ho keteka selemo sa Jubile. ’Me ho ne ho tla ba le mathata a mangata haeba ba ne ba ka leka ho ho etsa. Mathata a maholo a moruo a ne a tla hlaha, hobane ho ameha litokelo tsa thepa. Riphabliki ea Iseraele ha e sa ahile naheng eohle eo meloko e 12 ea boholo-holo e neng e le ho eona. Hape ha ho na tempele e nang le moprista e moholo oa leloko la Levi, kaha mokhoa oa ho tsebahatsa meloko o se o lahlehile.
2. Bakreste ba bang ba se ba qalile joang ho keteka Jubile e tšoantšelitsoeng ke ea Iseraeleng ea boholo-holo?
2 Leha ho le joalo, hoo ho re sia kae mabapi le mahlohonolo a mokete oa Jubile? Re hopola hore Jubile ea boholo-holo e ne e le mokete oa selemo sa tokoloho—Baiseraele ba neng ba ithekisitse bokhobeng ba ne ba lokolloa ’me masimo a lefa a khutlisoa. (Levitike 25:8-54) Sehloohong se fetileng re bone hore tokisetso ena e ile ea fela le selekane sa Molao oa Moshe ka 33 C.E. (Ba-Roma 7:4, 6; 10:4) Eaba ho kenngoa selekane se secha seo ka sona Molimo o neng o ka tšoarela balumeli libe, oa ba tlotsa ka moea o halalelang le ho ba nkela ka lapeng e le bara ba tla isoa leholimong. (Ba-Heberu 10:15-18) Leha ho le joalo ba ruang molemo ka tokisetso ena ea selekane se secha ke “mohlatsoana” oa ba 144 000 “ba lopolotsoeng lefatšeng.” Kahoo Bakreste ba bang ba tšepahalang ba limillione ba ka fumana joang tokoloho e tšoantšelitsoeng ka Jubile?—Luka 12:32; Tšenolo 14:1-4.
Sehlabelo bakeng sa Bohle!
3. Sehlabelo sa Jesu ke se molemo le sa nako e kae?
3 Mehleng ea pele ho Bokreste melemo ea Letsatsi la Lipheko la selemo le selemo e ne e nka selemo se le seng feela. Melemo ea sehlabelo sa topollo sa Morena Jesu Kreste ha e khaotse, ke ea kamehla. Kahoo Moprista e Moholo ea neng a tšoantšetsoa, Jesu, ha ho hlokahale hore a boele e be motho hape, a iketse sehlabelo e be O khutlela leholimong ho ea hlahisa bohlokoa ba sehlabelo seo selemo le selemo Sehalalelisisong sa Jehova Molimo. Joalokaha Mangolo a bolela: “Kreste, ha a se a tsohile bafung, ha a sa boela a e-shoa; lefu ha le sa na matla ho eena.”—Ba-Roma 6:9; Ba-Heberu 9:28.
4, 5. (a) Phello ea ho sebelisoa ha sehlabelo sa Jesu ho tloha ka Pentekonta ea 33 C.E. ke eng? (b) Re na le pontšo efe ea hore sehlabelo sa hae se tla sebelisoa ka bophara haholoanyane?
4 Kahoo, lilemong tsa ho tloha ka Pentekonta ea 33 C.E., ha balumeli ba ntse ba fetoha barutuoa ba tsoetsoeng ka moea ba Morena Jesu ea tlotlisitsoeng ba qalile ho keteka Jubile ea Bokreste. Hang ha ‘ba holotsoe molaong oa sebe le oa lefu,’ ba thabetse bolokolohi bo hlasimollang. (Ba-Roma 8:1, 2) Hape ba tumisitse molaetsa oa Bokreste e le hore ba bang ba ka tšoareloa libe tsa bona, ba tlotsoa le ho fetoha bara ba moea ba Molimo. Leha ho le joalo, na hona ho bolela hore haeba motho e se oa sehlopha seo se lekanyelitsoeng ho ba 144 000, hona joale a ke ke a latsoa tokoloho e thabisang?
5 Habohlokoa ntlheng ena ke mantsoe a moapostola Pauluse ho Ba-Roma 8:19-21: “Tse bōpiloeng kaofela li lebeletse ponahalo ea bana ba Molimo ka hlolohelo e kholo. Hobane tse bōpiloeng li ne li beoe tlas’a ’muso oa bosaoana [e le baetsalibe ’me ba sitoa ho felisa sebe].” Joale Pauluse o hatisa hore “tšepo e ntse e le teng ea hore le tsona tse bōpiloeng li tla holloa bohlankeng ba tšenyeho, li tle li be tokollong ea khanya ea bana ba Molimo.” Ka baka leo, bolokolohi bo joalo, ha boa lekanyetsoa ho ba fetohang “bana ba Molimo” leholimong. Mantsoe a tloaelehileng a ho Johanne 3:16 a tiisa hona. ’Me, joalokaha ho boletsoe, moapostola ea tlotsitsoeng Johanne o itse Kreste o shoetse “libe tsa rōna; e seng . . . tsa rōna feela, empa e le le . . . tsa lefatše lohle.”—1 Johanne 2:2.
1919—Tokoloho ea Pele
6, 7. Ho ’nile ha tumisoa tokoloho ea mofuta ofe ho tloha ka 1919, ’me ke ho tloha ka nako eo haholo-holo hobane’ng?
6 Mehleng ea kajeno batlotsuoa ba ketekang Jubile ea Bokreste ba ’nile ba bolela litaba tse molemo tse lokollang, haholo-holo ho tloha ka 1919. Haeba hase khale u phela, u ka ’na ua botsa, ‘Ke hobane’ng ha ho thoe ho tloha ka nako eo?’ A re boneng, hopola hore ho thabela ha hao bophelo hoa ameha.
7 Ka mashome-shome a lilemo pele ho selemo seo batlotsuoa ba Jehova ba ile ba hatisa linnete tsa Bibele, tse kang tse letotong le tsebisahalang la Studies in the Scriptures (1886-1917). Ba boetse ba aba libukana le lipampitšana tse ngata tse laeang. Ntoeng ea I ea Lefatše, ha tla khanyetso, teko le ho hlokoloa, le ho khoehlisoa ha mosebetsi oa bona. Empa ka 1919 masala a tlotsitsoeng a tsoela pele ka cheseho e ncha ho tumisa linnete tsa Bibele. Joalokaha ka 30 C.E. Jesu a ne a ka bolela hore o tlotsitsoe ho “bolella ba holehiloeng hore ba tla lokolloa, le ba foufetseng hore ba tla boela ba bone,” le batlotsuoa bana ba kajeno ba ka bua joalo. Ka morao ho kopano e thabisang ea la 1 ho ea ho la 7 Loetse, 1919,a ba tsoela pele ka matla ho bolela linnete tse ileng tsa lokolla batho ba bangata haholo.—Luka 4:18.
8, 9. Ba bangata ba lokolotsoe ka kutloisiso efe, ’me ke lithuso life tse ’nileng tsa sebelisoa ho bolela tokoloho e joalo?
8 Ka mohlala, nahana ka thuso ea ho ithuta Bibele The Harp of God (1921), e ileng ea fana ka linnete tsa bohlokoa joalokaha eka ke likhole tse leshome tsa harepa. Buka ea lumela hore “ba bangata ba tšabisitsoe ho ithuta Bibele” ke thuto ea hore “kotlo ea ba khopo . . . ke tlhokofatso kapa tlhoriso ea ka ho sa feleng liheleng tse chesang tse sa timeng tsa mollo le sebabole.” Babali ba likopi tse ka bang 6 000 000 tsa buka ena ba ithuta hore thuto ena e ne e “ke ke ea e-ba ’nete bonyane ka lebaka la mabaka a mane le a khethehileng: (1) hobane ha e utloahale; (2) hobane e hanana le toka; (3) hobane e hanana le melao-metheo ea lerato; le (4) hobane ho hang ha e lumellane le Mangolo.” U ka inahanela hore na hoo e bile ho lopollang hakaakang bakeng sa batho ba neng ba hotse ba tšohile tlhokofatso ea ka ho sa feleng ea lihele kapa mahlomola a pelekatori!
9 E, lefatšeng lohle boboleli bona bo chesehang ba linnete tsa Bibele ba batlotsuoa ba lokolla batho ba neng ba kentsoe bohlankeng ba lithuto tsa bohata, tumela-khoela le mekhoa eo e seng ea Mangolo (e kang ho rapela balimo, ho tšaba lithotsela kapa meea e mebe, le ho tlatlapuoa lichelete ke baruti). Lihlooho tsa lithuso tse ling tsa ho ithuta Bibele li bontša tšusumetso e lopollang eo li neng li e-na le eona bakeng sa ba limillione.b Kahoo mantsoe a Jesu a pakiloe hore ke a ’nete, ha a ne a re barutuoa ba hae ‘ba tla etsa mesebetsi e meholo’ ho feta eo a e entseng. (Johanne 14:12) Ha ho bapisoa le mosebetsi oa mathomo oa ho lokolla oo Jesu a o entseng ha a bolela ‘tokoloho ho ba tlamiloeng,’ bahlanka ba kajeno ba Molimo ba entse ho hoholoanyane haholo—ba fihla ho ba limillione tse ngata ho potoloha lefatše.
10. Ke hobane’ng ha re ka lebella hore ho tla ba le tokoloho e ’ngoe le e kholoanyane?
10 Leha ho le joalo, hopola hore lekholong la pele la lilemo ho ile ha qaleha tokoloho e ’ngoe hape ka Pentekonta ea 33 C.E. Mono Jubile ea Bokreste e ile ea qala bakeng sa “mohlatsoana” o neng o tla tšoareloa libe tsa oona, ho neng ho tla etsa hore ba fetohe “bana ba Molimo” leholimong. Ho thoe’ng ka mehla ea rōna? Na Bakreste ba bang ba limillione ba ineetseng ba ne ba tla lokolloa bohlankeng ba sebe ’me kahoo ba keteke Jubile e khōlō? E, ’me moapostola Petrose o bontšitse hona ha a ne a bua ka “mehla ea tokiso ea lintho tsohle eo Molimo o e boletseng ka melomo ea baprofeta ba halalelang ba oona bohle, ha e sa le le tšimolohong.”—Liketso 3:21.
Jubile bakeng sa ba Limillione
11. Levitike khaolo ea 25 e fana ka tlhahiso ea hore re ka lebella tokoloho e fetelang ka nģa’ane ho meeli ea Iseraeleng ea moea joang?
11 Hoa hlokomeleha hore ka makhetlo a mabeli ho Levitike khaolo ea 25, Baiseraele ba ne ba hopotsoa hore ponong ea Jehova e ne e le ‘bahlanka’ ba hae bao a neng a ba lopolotse Egepeta. (Litemana tsa 42 le 55) Khaolo ena ea Jubile e boetse e bua ka “basele” le ‘bajaki ba har’a bona.’ Ba joalo kajeno ba tšoana le “bongata bo boholo ba batho” bo kopanelang le Baiseraele ba moea ho bolela litaba tse molemo tsa Bokreste.
12. Ke phetoho efe e thabisang e tsoetseng pele ho tloha ka 1935?
12 Ho tloha ka 1935 “molisa ea molemo” Jesu Kreste o kentse bao a itseng ke “linku tse ling” botsoalleng bo mafolo-folo le masala a tlotsitsoeng. Bana o ile a lokela ho ba ‘tlisa’ ’me ba ne ba lokela ho bōpa ‘mohlape o le mong’ tlas’a ‘molisa a le mong.’ (Johanne 10:16) Hona joale “linku tse ling” li baloa ka limillione. Haeba u e mong oa letšoele leo le thabileng, u se u ntse u baloa u le ea lokileng joaloka motsoalle oa Molimo, hape joaloka karolo ea batho ba bōpiloeng, u lebelletse ‘ho lokolloa bohlankeng ba tšenyeho’ nakong e tlang ea “tokiso ea lintho tsohle” lefatšeng. Ena ke tšepo e nang le motheo.—Ba-Roma 8:19-21; Liketso 3:20, 21.
13. Ke tlhohonolofatso efe e khethehileng eo re lokelang ho e hlokomela e etsahala kamorao ho ‘mahlomola a maholo’?
13 Hoba moapostola Johanne a bone ba 144 000 ba thabelang Jubile ea Bokreste ba nang le tšepo ea ho ea phela leholimong, o hlalositse “bongata bo boholo ba batho,” a re: “Ke ba tsoang mahlomoleng a maholo; ba hlatsoitse liaparo tse telele tsa bona, ba li soeufalitse maling a Konyana. Ke ka lebaka leo ba leng pel’a terone ea Molimo, ’me ba o sebeletsa motšehare le bosiu tempeleng ea oona.”—Tšenolo 7:14, 15.
14, 15. Ke hobane’ng ha bao ba “bongata bo boholo ba batho” ba e-na le lebaka le khethehileng la ho thaba hona joale?
14 Le hona joale, pele ho mahlomola a maholo, bana ba lumela maling a tšolotsoeng a Kreste ’me kahoo ba rua molemo lefung la hae la sehlabelo. Ba boetse ba thabela ho lokolloa ho Babilona e moholo, ka hore ba na le letsoalo le letle pel’a Jehova Molimo, le tokelong ea bona ea ho kopanela phethahatsong ea Mattheu 24:14 ka ho bolela litaba tse molemo tsa ’Muso pele bofelo bo e-tla.
15 Leha ho le joalo, ho thoe’ng ka tebello ea bongata bo boholo ba batho ea ho lokolloa sebeng sa tsoalo le ho se phethahaleng? Na nako eo e se e le haufi? Re na le lebaka le letle la ho ba le maikutlo a hore har’a rōna ho sa ntsane ho e-na le ba bang ba moloko ona oa batho oo Jesu Kreste a profetileng hore o ke ke oa feta ho fihlela lintho tsohle tse profetiloeng li etsahala. (Mattheu 24:34) Kahoo, tlhoro ea “ho fela ha lefatše” e lokela e be e haufi haholo—Mattheu 24:3.
Sehlohlolo sa Jubile ea Bokreste
16. Re eme hokae phethahatsong ea morero oa Molimo, ’me ke eng se larileng ka pele?
16 “Ntoa ea letsatsi le leholo la Molimo o matla ’ohle” e tla ka potlako, ’me masala a “mohlatsoana,” hammoho le “bongata bo boholo ba batho” ba metsoalle ea masala e tšepahalang le e khabane bo tla tšepahala ho Jehova Molimo ’me bo lebelle hore Molimo o bo sireletse. Ka cheseho ba lebelletse hore Jehova a hlōle makhotla ’ohle a sera ka ho phethahetseng, bakeng sa ho itumisa e le Morena ’Musi oa Bokahohle. Hoo e tla ba tšobotsi e hlomphehang hakaakang ea hore ba thabele bolokolohi ba bona ba Bokreste!—Tšenolo 16:14; 19:19-21; Habakuke 2:3.
17. Ba limillione ba sa ntsane ba tla fumana tokoloho joang Jubileng e khōlō?
17 Holim’a lefatše le hloekisitsoeng, ho tla latela puso ea Morena Jesu Kreste ea hlōlang, ho boetse ho tiisoa borena ba bokahohleng ba Jehova ka Jesu Kreste a laola litaba tsa lefatše ka ho feletseng e le Morena oa marena le ’Musi oa babusi. Joale o tla sebelisa ka ho toba bohlokoa ba sehlabelo sa hae ho batho ba limillione, ho akarelletsa bafu ba tsositsoeng, ba lumelang ’me ka boithatelo ba amohela tšoarelo ea libe eo Molimo o tla fana ka eona ka Kreste. Bopaki ba hona e tla ba hore “Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko.” (Tšenolo 21:3, 4) Haeba hoo hase tokoloho ea ’nete, e be tokoloho ea ’nete ke eng?
18. Ha ho bapisoa le tšobotsi ea Jubile ea boholo-holo, ho tla etsahala eng ka lefatše tsamaisong e ncha?
18 Ho feta moo, lefatše le ke ke la hlola le laoloa, le silafatsoa le ho senngoa ke batho ka bomong ba meharo, mekhatlo e meharo, le mebuso ea batho e meharo. (Tšenolo 11:18) Ho e-na le hoo, le tla khutlisetsoa ho barapeli ba ’nete. Ba tla neoa mosebetsi o thabisang oa ho kopanela phethahatsong ea sebele ea boprofeta ba Esaia: “Ba tla haha matlo, ba lule ho ’ona, ba tla hloma merara, ba je litholoana tsa eona. Ba ke ke ba haha matlo, osele a lula teng, leha e le ho hloma merara, osele a je tholoana tsa eona, . . . Ba ke ke ba sebeletsa lefeela, ba ke ke ba tsoala bana ’me ba lahleheloa ke bona kapele; hobane e tla ba leloko le hlohonolofalitsoeng ke Jehova.” (Esaia 65:21-25) Qetellong ea Puso ea Lilemo tse Sekete mesaletsa eohle ea sebe se futsitsoeng le ho se phethehe e tla be e hlakotsoe ’me ba tšepahalang ba Molimo ba lefatšeng ba tla keteka tlhoro eo Jubile e tlang ho phethoa ka eona. Kahoo tokoloho e tšoantšelitsoeng ka Jubile e tla be e phethahalitsoe.—Ba-Efese 1:10.
Kamor’a Tlhoro ea Jubile ea Lilemo tse Sekete
19, 20. Satane le bademona ba tla leka joang ho khathatsana le mahlohonolo a tlisitsoeng ke Jubile ea Lilemo tse Sekete, empa e le ka phello efe?
19 Tšenolo 20:1-3 e profeta hore Satane Diabolose, morena oa makhotla a bademona, o tla be a le sieo ha Kreste a busa holim’a batho ka lilemo tse sekete. Qetellong ea Lilemo tse Sekete, ha Diabolose le bademona ba hae ba tla lumelloa hore ba khutle ka nakoana, meea ena e khopo e ke ke ea bona lefatše le le boemong boo e le siileng le le ho bona, empa e tla le bona e le paradeise ea lefatše e botle bo tsotoang. Ba tla bona lefatše le ahiloeng ke “bongata bo boholo ba batho” ba tšepahalang le batho ba likete tse limillione ba tsositsoeng bafung bao Jesu Kreste a ba shoetseng e le sehlabelo sa topollo. Qetellong ea Lilemo tse Sekete Jubile ea Bokreste e tla be e finyelletse morero oa eona oa ho lokolla batho ka ho feletseng liphellong tsa sebe. (Ba-Roma 8:21) E tla ba bokhopo bo hlabisang lihlong hakaakang hore mang kapa mang a leke ho senya boemo boo bo botle! Empa ka tumello ea Molimo o matla ’ohle, Diabolose o tla iteka la ho qetela hore a etse sena, ’me ka masoabi a tsieleho o tla hlasela. Ntlheng ena ho ngotsoe ho Tšenolo 20:7-10, 14:
20 “Lilemo tse sekete ha li fetile, Satane o tla lokolloa teronkong ea hae; ’me o tla tsoa ho ea khelosa lichaba tse likhutlong tse ’nè tsa lefatše, Gogo le Magogo, a ba bokellele ho loana; palo ea bona e ka ka lehlabathe la leoatle. Ka ba bona ba tla ka bophara ba lefatše, ’me ba lika liahelo tsa bahalaleli le motse o ratoang; ha mpa ha hlaha mollo o tsoang ho Molimo leholimong, ’me oa ba qeta. ’Me Diabolose ea ba khelositseng a akheloa letšeng la mollo le sebabole.”
21. Hoba ho fele Jubile ea Bokreste ka Lilemo tse Sekete, ke karabelo efe ea bara ba Molimo ba leholimo e tla tšoana le ea Jobo 38:7?
21 Tokoloho ea ’nete e tlisitsoeng ke tokisetso ea Jubile, e tla ’ne e thabeloe hohle, libōpuoa tsohle li tla lokoloha ’me li tla hlompha A le mong feela eo lebitso la hae e leng Jehova. (Pesaleme ea 83:18) Hoo e tla ba ’nete ha Jehova a tsoela pele ho phethahatsa merero ea hae bokahohleng bohle. Ha ho ne ho boptjoa lefatše, pele ho beoa motho holim’a lona, ‘linaleli tsa meso tsa ntša mehoo ea thabo, le bara bohle ba Molimo ba bina ka nyakallo’ ha ba bona pono e ntle. (Jobo 38:7) Hoo ba tla ho etsa haholoanyane hakaakang ha ba bona lefatše le tlatsitsoe ka banna le basali ba bontšitseng ba ba ba paka boineelo bo feletseng ba bona le botšepehi bo feletseng ba bona ho Molimo o matla ’ohle.
22. Boikutlo ba rōna e lokela ho ba bofe, tumellanong le khothatso e fumanoang ho Pesaleme ea 150:1-6?
22 Ha ho nahaneloa lintho tsohle leseling le khanyang leo Mangolo a bonesoang ka lona, ha ho letho leo re ka le etsang ha e se feela ho thaba le maholimo ’me re re, Bokang Jehova! Buka ea Lipesaleme ha e phethoa e lebisa khothatso ena ho rōna: “Bokang Jehova! Rorisang Molimo sehalalelong sa oona, o roriseng leholimong le entsoeng ke matla a oona! O rorisetseng liketso tsa oona tse phahameng! O roriseng ka ho ea ka boholo ba oona bo fetisisang! O roriseng ka molumo oa terompeta! O roriseng ka pesalterine le harepa! O roriseng ka meropa le ka mehobelo! O roriseng ka molumo oa thomō e likhole le ka phala! O roriseng ka cymbala e molumo o hlakang; o roriseng ka cymbala e molumo o hlakang! Tse phefumolohang kaofela a li ke li rorise Jehova! Bokang Jehova!”—Pesaleme ea 150:1-6.
[Mongolo o botlaaseng ba leqephe]
a Mono ho ile ha lokolloa makasine o mocha o neng o tla “tšoana le lentsoe le hooang lefeelleng la pherekano, morero oa oona [e le] ho tsebahatsa ho tla ha Mehla ea Thabo e KhōIō.” Kajeno makasine ona o bitsoa Tsoha!
b Millions Now Living Will Never Die (1920); Deliverance (1926); Freedom for the Peoples (1927); Liberty (1932); “’Nete e tla le Lokolla” (1948); What Do the Scriptures Say About “Survival After Death”? (1955); Bophelo bo sa Feleng—Tokolohong ea Bara ba Molimo (1972); ’Nete e isang Bophelong bo sa Feleng (1969); The Path of Divine Truth Leading to Liberation (1980).
U ka Arabela Joang?
◻ Barutuoa ba Jesu ba ile ba lokolloa ho eng ka Pentekonta ea 33 C.E., ho tšoaea qaleho ea eng bakeng sa bona?
◻ Ke hobane’ng ha ho e-na le lebaka la ho lebella tokoloho e kholoanyane ho feta ea lekholong la pele la lilemo?
◻ Ke tokoloho ea mofuta ofe e ’nileng ea tsoela pele ho tloha ka 1919?
◻ Ke joang hona neng “linku tse ling” li tla rua molemo Jubileng e khōlō?
◻ Lefatše le tla ba joang kamorao ho tlhoro ea Jubile?
[Setšoantšo se leqepheng la 25]
Tokoloho e tumisitsoe Cedar Point, 1919
[Setšoantšo se leqepheng la 26]
“Linku tse ling” li kopanela Jubileng ea Lilemo tse Sekete